შაბათი, ივლისი 19, 2025

შემზარავი ტრაგედია სიყვარულის გამო დათმობილი სიცოცხლე – ახალგაზრდა ბიჭმა ცოლისა და სიდედრის თვალწინ თავი მოიკლა

შემზარავი ტრაგედია რუსთავში, ლერმონტოვის ქუჩაზე მოხდა. 27 წლის დათო ქურდაძემ ყოფილი ცოლისა და სიდედრის თვალწინ გადაჭრილი სანადირო თოფი საფეთქელთან მიიდო, მათ რამდენიმე სიტყვა უთხრა და ჩახმახს თითი გამოჰკრა. ბიჭი იქვე, სადარბაზოს შესასვლელთან პირაღმა დაეცა. ქალების განწირულ კივილზე ბინებიდან მეზობლები გამოცვივდნენ და ამ შემზარავი სურათის თვითმხილველები გახდნენ. სიდედრი ახალგაზრდა კაცის სისხლში იყო მოსვრილი და ისტერიკულად კიოდა. “”სასწრაფოც” გამოიძახეს, მაგრამ დათო ადგილზევე გარდაიცვალა.

უმძიმეს მდგომარეობაშია დღეს ქურდაძეების ოჯახი. დათოს ცხედარს შვილმკვდარი დედა დასტიროდა და მოსთქვამდა, რომ მისმა ვაჟმა სიყვარულის გამო მოიკლა თავი:
“ორჯერ მკვდარი ვარ ახლა, წესიც თუ ვერ აგიგე, მაშინ რა უნდა ვქნა?! როგორ დაგვღუპე! სიყვარულისთვის მოხდა ყველაფერი. ვერ დაინახეს შენი გრძნობა, ვერ დაგაფასეს. როგორი სათნო გული გქონია, ვერ გაუძლო ამდენს შენმა გულმა და ჩვენც ვერ მივხვდით, რამდენი გტკიოდა. ვხვდებოდი, გტკიოდა, რომ გიყურებდი ასე, მეწვოდა გული, მაგრამ რა მექნა, დედი, მე აღარ მემორჩილებოდი. ახლა რა ვქნათ? იმის იმედად ვარ, რომ საპატრიაქოსგან მივიღებ თანხმობას წესის აგებაზე… ეს რა გაგვიკეთე, როგორ დაგვღუპე! შენი სულის წადილი ვერ ამოვიცანით, შვილო. სიკვდილის დროსაც მერიკოზე ფიქრობდი, მერიკო არ დაადანაშაულოთ ჩემს სიკვდილშიო, დამიბარე”…

დათო ქურდაძე კერძო კომპანიის დაცვის უფროსი იყო. მანამდე სახელმწიფო დაცვის სამსახურში მუშაობდა. იყო პრეზიდენტის დაცვაში, სპეცრაზმში, გარკვეული პერიოდი საპატრიარქოს დაცვაშიც მუშაობდა. მას თურმე ყველა პატივს სცემდა.
დათომ და მერი გოგიამ წელიწად-ნახევრის წინ იქორწინეს. მათი ოჯახი სიყვარულით შეიქმნა, მაგრამ ერთად დიდხანს არ ყოფილან. 9 თვეა, რაც მერი მშობლებთან დაბრუნდა. ამას თურმე დათო ვერ ეგუებოდა. ხშირად მიდიოდა ცოლთან და შერიგებას სთხოვდა, გოგო კი უარზე იყო. იმ საბედისწერო დღეს, მერის დის, ნინოს დაბადების დღე იყო. გოგიების სახლში დათო ნასვამი მივიდა და ეს ტრაგედია დაატრიალა. წინაღამეს, 3 საათზე დათოს დედისთვის მესიჯი მიუწერია: “დედა, ხომ იცი, ყველანი ძალიან მიყვარხართ, მაგრამ თუ თავს მოვიკლავ, მერის არაფერი უთხრათ, არაფერი დააბრალოთ, მისი ბრალი არაფერია!”
ბუნებრივია, ამ სიტყვებმა დედა ძალიან ააფორიაქა, მოსვენება დაკარგა და შვილს ეძებდა. პირველ რიგში, მის ყოფილ ცოლს დაურეკა და ჰკითხა, დათო მასთან ხომ არ იყო? ამის შემდეგ დათოს ცოლიც ურეკავდა, მაგრამ არც მის ზარებს უპასუხა, მერე საერთოდ გამორთო ტელეფონი.
შემთხვევის ადგილზეც მივედით. იქ სისხლის კვალი მეზობლებს გადაერეცხათ. მეზობლები ამბობენ, რომ გასროლის ხმა გაიგონეს. გოგიების ბინიდან მოთქმა-გოდების ხმა გამოდიოდა. სიმართლე გითხრათ, იმედი არ მქონდა, რომ ჩემთან საუბარს მოინდომებდნენ, მაგრამ მაინც დავაკაკუნე. კარი დათოს სიდედრმა გამიღო და შინ შეგვიპატიჟა. ცოტა რომ დამშვიდდა, მომხდარის შესახებ დაწვრილებით მოგვიყვა.

ლია გრძელიძე, გარდაცვლილის სიდედრი:
– ტრაგედია დღის პირველ საათზე დატრიალდა. იმ დღეს ჩემი მეორე ქალიშვილის, ნინოს დაბადების დღე იყო. ვემზადებოდით, რომ ეს დღე აღგვენიშნა. წინადღეს გოგონები მეგობრის დაბადების დღეზე იყვნენ და გვიან დაბრუნდნენ შინ. დათუნას იქაც გაუვლია და ცოტა ხანი უსაუბრია მერიკოსთან. ღამით დათოს დედამ დარეკა, შვილს ეძებდა. აფორიაქებული იყო: შვილს მიუწერია, თავს მოვიკლავო. ამის შემდეგ მერიკოც ურეკავდა, მაგრამ ვერ დაუკავშირდა. მერე მითხრეს, რომ თურმე იმ ღამით აქ ტრიალებდა. მესიჯებიც გამოუგზავნია გოგონებისთვის. ბოდიშებს იხდიდა ამ მესიჯებით – ვინც მიყვარს, იმათ ვატკინე გულიო. დათო ბრწყინვალე ადამიანი იყო, ძალიან კეთილშობილი. თუ შეიძლება, ადამიანი შეიმკოს ყველანაირი დადებითით, ასეთი იყო ჩემი დათუნა. ისინი ერთმანეთს დაშორდნენ, მაგრამ ამის მიუხედავად, დათო ჩვენს სახლში ხშირად მოდიოდა. სულ მეფერებოდა, – ლია დეიდა, ძალიან მიყვარხარო. იმ დღესაც კარი მე გავუღე, გოგონებს ეძინათ. ისევ ისე თბილად მომეფერა, მეც ვეფერე. ჩემი მეგობარი იყო სახლში. ამ დროს მერიკოც გამოვიდა ოთახიდან და ჩაეხუტნენ ერთმანეთს. მერიკოს უთხრა, – ხომ იცი, როგორ მიყვარხარო? – შენც იცი, როგორ მიყვარდი, მაგრამ ახლა აღარ მიყვარხარო, – უთხრა მერიკომ. გაბრაზებული იყო და ასე იმიტომ უთხრა. დათო ისევ მოეფერა. სამზარეულოში გავედი, – ყავას მოგიდუღებ-მეთქი. მის ხელში იარაღი არ დამინახავს, თურმე, ქურთუკში ჰქონდა ჩამალული. მკითხა, – შენი მეგობარი მალე წავაო? მერე ნინოს 5 წლის შვილის სახლიდან გაყვანა ითხოვა. ალბათ, სახლში უნდოდა, ტრაგედია დაეტრიალებინა და ბავშვის გარიდებას იმიტომ ითხოვდა. ღმერთმა ყველა დაიფაროს მსგავსი ამბისგან! შვილივით მიყვარდა და ვცდილობდი, შერიგებულიყვნენ… როგორ ეფერებოდა ცოლს, თქვენ არ იცით. სადარბაზოში გავიდა. უცებ გასროლის ხმა გაისმა. გვეგონა, ბავშვებმა რამე ააფეთქეს. მერიკო შემოვარდა ტირილით, – დედიკო, დათოს იარაღი აქვსო. წინათ მას იარაღი არასოდეს ჰქონია. გავედი და დავინახე, ეზოში, სადარბაზოს წინ იდგა და ხელში გადაჭრილი თოფი ეჭირა. მივუახლოვდი და ვუთხარი, – დედი, ასე ნუ მეთამაშები, იარაღით თამაში არ შეიძლება-მეთქი. მეგონა, მაშინებდა… – ბოდიში, ლია დეიდაო, – მე მითხრა, – მიყვარხარო, – მერიკოს, – და ჩახმახს გამოჰკრა. ყველაფერი წამებში მოხდა, აზრზე მოსვლა ვერ მოვასწარი. თქვენ არ იცით, რა განცდაა ეს… ნეტავ მოვკვდებოდე მეც და მასთან წავიდოდე. გაისროლა და იქვე გადავარდა. მივვარდი, მაგრამ ცოცხალი არ იყო. მისი სისხლით მოსვრილი ვიყავი და ვკიოდი. არ ვიცი, მის გარეშე როგორ ვიცხოვრო. ჩემი გული წაიღო, შვილო. ჩემს შვილსაც დაუნგრია ცხოვრება და ყველაზე მთავარი, თავისი სიცოცხლე მოისპო. ჩემი შვილების სიცოცხლეს ვფიცავ, სიკვდილი მინდა. შვილივით მყავდა, ძალიან მიყვარდა.

ბუნებრივია კითხვა: თუ ასეთი ურთიერთობა ჰქონდათ ერთმანეთთან და მათი შერიგებაც მოსალოდნელი იყო, დათოს თავი რატომ უნდა მოეკლა? მისი ცოლისა და ცოლისდის ტელეფონებში დათოს არაერთი მესიჯია შემონახული. ის მათ პატიებას სთხოვდა. ცოლისდას წინაღამით ასეთი მესიჯი მისწერა:
“ნინო, ბოდიშს გიხდი, როგორ არაადამიანურად მოგექეცით. ვიცი, არასდროს დაგავიწყდებათ. თუ შეძლებ, მაპატიე, მაგრამ დამიჯერე, მე გადამიხადა უფალმა სამაგიერო. მრცხვენია და არაადამიანად მიმაჩნია თავი. მთელი ცხოვრება უნდა ვატარო ეს ტვირთი. ვეღარასდროს ვერავისთან ვილაპარაკებ კაცობასა და ადამიანობაზე. ამაზე საშინელი არაფერია, როცა ადამიანი ისეთ რამეს ჩაიდენ, რომ მთელი ცხოვრება ვერ გამოასწორებ და თან, იმ ადამიანებთან, ვინც ყველაზე ძალიან გიყვარს. გავბოროტდი და ასეთი რამ ჩავიდინე. შენ ვერ მიხვდები, როგორ სულიერად დავეცი. მაპატიეთ ყველამ, თუ შეძლებთ”.
ამის შემდეგ, ნინომ გვიან ღამით კიდევ ერთი მესიჯი მიიღო. “ნინო, გილოცავ ნინოობას, მრავალს დაესწარი შენს შვილთან და შენს ოჯახთან, შენს მეგობრებთან ერთად. კარგია, რომ ასეთი სიურპრიზი მოგიწყვეს, მეც მინდოდა შენთვის საჩუქარი გამეკეთებინა, მაგრამ არა უშავს, მერე იყოს. მართლა ძალიან მიყვარხართ. თქვენ კიდევ ვერ ხვდებით. მე შენი დიდი რიდი მაქვს და პატივს გცემ, ნინო. შენ მაინც ხომ იცი, მე თქვენთვის კარგი მინდა და ამიტომ ვარ ამ დღეში. მე ადამიანებს არაფერს ვუშავებ, უბრალოდ, არაკაცი და უნამუსო გავხდი, მაგრამ თქვენთვის ყოველთვის კარგი მინდა. ეს იცოდეთ. მე თუ ვიტანჯები, ესეც ჩემი არაადამიანობის ბრალია, მაგრამ თქვენი გულისთვის ყველაფერს გავაკეთებ”. ნინოს ამ მესიჯის წაკითხვისას თვალები აუცრემლიანდა და თქვა, ეს მესიჯი იმ ღამით არ მინახავს და გული მტკივა, პასუხი რომ არ მიმიწერია მისთვისო.
ბუნებრივია, ამ მესიჯებიდან ირკვევა, რომ სრული იდილია მათ ურთიერთობაში არ იყო და დავინტერესდი, რატომ წერდა ამ შინაარსის მესიჯებს ცოლსა და ცოლისდას. გაირკვა, რომ ამის წინაპირობა არსებობდა: ტრაგედიამდე რამდენიმე დღით ადრე, მერიკოს ვიღაცამ “ფეისბუკი” გაუტეხა. რუსთავში იმასაც ამბობენ, მერიკოსა და ვიღაც რუსთაველი ბიჭის მიმოწერა აჩვენეს დათოსო. თითქოს იმ ბიჭს ეუბნებოდა, ძალინ ვნანობ, დათოს ცოლად რომ გავყევი, შენ უნდა გამოგყოლოდიო. მერიკოს და ამბობს, რომ ვიღაცამ გატეხა “ფეისბუკი” და ეს მის დას მოუწყვეს. ფაქტია, ამან დათოს გაღიზიანება გამოიწვია და შესაძლოა, ეჭვიანობაც ყოფილიყო მათი კონფლიქტის მიზეზი. დათომ თურმე მერიკოს დედას აჩვენა “ფეისბუკის” მიმოწერა.

ნინო გოგია, მერიკოს და:
– დათოსთან ძალიან კარგი ურთიერთობა მქონდა. ჩემგან გაიცნო მერიკომ და შეუყვარდათ ერთმანეთი, მაგრამ ჩვენ მათ ურთიერთობაში არ ვერეოდით. სულ გვინდოდა, რომ შერიგებულიყვნენ. დათო მერიკოს ეუბნებოდა, სწავლის ქირას გადაგიხდი და სწავლა გააგრძელეო. მერიკო ფიქრობდა, აეღო თუ არა მისგან სწავლის ქირა. ერთ დღეს დათო მოსულა სახლში და დედაჩემისთვის უთქვამს, წამოდი ბანკში, საბუთზე ხელი მაქვს მოსაწერიო. დედაც გაჰყვა. ბანკის ნაცვლად ისინი ჩემი ყოფილი ქმრის სახლში აღმოჩნდნენ. თურმე, იქ აჩვენეს დედაჩემს გატეხილი “ფეისბუკი” და იქაური მიმოწერა, რაც ვიღაცამ სპეციალურად გააკეთა, ასევე, ფოტოები და ვიდეოები. დედას ეს სურათები ნანახი ჰქონდა, დაბადების დღის ფოტოები იყო, მაგრამ ძალიან შეურაცხყოფილად იგრძნო თავი, რომ ასე მოტყუებით აღმოჩნდა იქ. სახლში ტირილით მოვიდა, საშინელ დღეში იყო. დათო ამბობდა, განა მერიკოს არ ვენდობი, მაგრამ ხალხი მეუბნება რაღაცებსო. ეჭვიანობდა ალბათ. დედაჩემი ასე ატირებული რომ ვნახეთ, ძალიან გავნაწყენდით. მერიკომ დაურეკა დათოს, – როგორ გაბედე მოტყუებით დედაჩემის წაყვანა, ამხელა ქალი როგორ გაატუტუცეო? ამის გამო იხდიდა ის ბოდიშს. მიხვდა, რომ ვიღაცების ჭორებს აჰყვა და განიცდიდა. ეს მესიჯებიდანაც ჩანს. ალბათ, ბრაზობდა, რომ მერიკო დაბადების დღეზე დადიოდა და იქ ცეკვავდა კიდეც. ალბათ ფიქრობდა, რომ ის სულ სახლში უნდა ყოფილიყო ჩაკეტილი. წარმოიდგინეთ, როგორ უნდა იცხოვროს მერიკომ ამ ტრაგედიის შემდეგ? ის დღეს ხმასაც ვერ იღებს, საშინელ დღეშია. ვერ ამიხსნია, დათომ ეს რატომ დაატრიალა. შეიძლება, შერიგებულიყვნენ. მათ შორის სერიოზული კონფლიქტი არ ყოფილა. მარტო რომ ეცხოვრათ, ალბათ ბედნიერები იქნებოდნენ. თურმე, სამჯერ სცადა თავის მოკვლა მერიკომ დათოს სახლში ცხოვრებისას. ეს ჩემი დის მეჯვარისგან გავიგეთ. შვილი არ ჰყავდათ, პირველი ბავშვი დაკარგა და დედამთილი სულ ეუბნებოდა, – ჩემს ქმარს ძალიან უნდა შვილიშვილიო. სერიოზული კონფლიქტი არ ჰქონიათ, მაგრამ წამოვიდა იქიდან. მოუნელებელი ტკივილია დათო ჩვენთვის.

რუსთავში დათოს ყველა დადებითად ახასიათებს. მომხდარით შეძრულები არიან. მის სკოლაში ყოფილი მასწავლებლები თვალცრემლიანი დაგვხვდნენ.
მაყვალა ოღიაშვილი, პედაგოგი:
– ძალიან ზრდილობიანი, მოსიყვარულე ბიჭი იყო. სალამს ვერ დაასწრებდი. წარმატებული ახალგაზრდა. არ ვიცი, რატომ დაასრულა სიცოცხლე ასე. სკოლაში შევიტყვე ეს ამბავი და გამიჭირდა გაკვეთილების ჩატარება. ძალიან ვწუხვარ მომხდარის გამო. მის მშობლებსაც ვიცნობ. კარგი ოჯახი აქვთ. გავიგე, ცოლთან უთანხმოება ჰქონდაო. მასწავლებლები შეწუხებულები ვართ მომხდარით. მისი კლასის დამრიგებელი ვიყავი და სულ თვალწინ მიდგას მისი ბავშვობა.

როგორც ჩანს, დათომ სანადირო თოფი სპეციალურად გადაჭრა და ქურთუკში დამალა. შინაგან საქმეთა სამინისტროს თანამშრომლებმა მერი გოგია და მისი ოჯახის წევრები უკვე დაჰკითხეს. ფაქტზე სისხლის სამართლის საქმე 115-ე მუხლით, ადამიანის თვითმკვლელობამდე მიყვანით მიმდინარეობს. ვნახოთ, რა გაირკვევა გამოძიებით.

წყარო: be.facetube.ge

ქეთევან ნინუაhttp://tiflisnews.ge
საინფორმაციო სააგენტო tiflisnews.ge კონტაქტი- ☎️ 555 100 929

ქუთაისში, ავარიის შედეგად დაშავებული 15 წლის რომა გარდაიცვალა

ქუთაისში, ავარიის შედეგად დაშავებული მოზარდი გარდაიცვალა. რომ 15 წლის იყო.მიმდინარე წლის 28 მარტს, 15 წლის ბიჭს მანქანა დაეჯახა, რის შედეგადაც მიიღო თავის ტვინის მძიმე დაზიანება.რამდენიმეთვიანი მკურნალობის მიუხედავად ექიმებმა მისი გადარჩენა ვერ მოახერხეს.„სად მიდიხართ შვილო ამდენი ანგელოზი...უფალმა დაგიმკვიდროს ცათა სასუფეველი.ანგელოზთა დასს შეუერთდა.უფალო გვაკმარე ამდენი დედის ცრემლი... უკვე გაუსაძლისია“,- წერენ კომენტარებში.

რა უნდა გავითვალისწინოთ კონდიციონერის გამოყენების დროს

მაღალი ტემპერატურა, მწველი მზე ქუჩაში და ცხელი ჰაერი სახლში, ზაფხულში გარკვეულ დისკომფორტს გვიქმნის. შესაბამისად, ზაფხულის ცხელ დღეებთან გამკლავებაში კონდიციონერი ძალიან გვეხმარება. ის დღესდღეობით კომფორტული გარემოს შექმნის აუცილებელ ელემენტად მოიაზრება. თუმცა, ჰაერის კონდიცირებას ყველა დადებით მხარესთან ერთად, შესაძლოა, ჩვენს კანზე გარკვეული უარყოფითი გავლენაც ჰქონდეს.ამ თემასთან დაკავშირებით, "რუსთავი 2-ის" გადაცემა "ნამდვილ ექიმებში" ისაუბრეს. როგორც ექიმების რეკომენდაციებიდან ირკვევა, კონდიციონერი იწვევს კანის ნაადრევ დაბერებას. ასევე, როგორც კვლევები მიუთითებს, თუ კონდიციონერი მუდმივად არის ჩართული, მის მიერ გამომშრალი ჰაერი უტოლდება საჰარას სიმშრალეს.რაში მდგომარეობს მთავარი გამოწვევა და რა პრობლემები ექმნება ჩვენს კანს?კონდენსატი, ანუ წყალი შეკუმშული ჰაერის სისტემებისთვის ერთ-ერთ უმნიშვნელოვანეს პრობლემას წარმოადგენს. კონდიციონერის მილიდან გადმოსული წყლის წვეთები, ოთახის ჰაერიდან გამოდევნილი ტენია. კონდიციონერის მუშაობის პერიოდში, მის გარეთა ნაწილს, 2 საათში 3 ლიტრამდე სითხის დაგროვება შეუძლია. ეს სწორედ ის წყალია, რომელიც ჩვენს ოთახში უჩინრად ჰაერში ცირკულირებს. გამოდევნილი წყლის რაოდენობა დამოკიდებულია კონდიციონერის სიმძლავრეზე, გასაგრილებელი ფართის ზომასა და ჰაერის ტენიანობაზე.ჰაერის იდეალური ტენიანობა 40-60% უნდა იყოს. ჰაერის გამაგრილებელი, რა თქმა უნდა, ვერ აკონტროლებს ჰაერის ტენიანობას ოთახში. შედეგად, გამომშრალი ჰაერი ჩვენი კანის ზედაპირს აშრობს. ამასთან, როდესაც გრილი ოთახიდან გარეთ, სიცხეში გავდივართ, ტემპერატურის მკვეთრი ცვლილება დიდი სტრესია ჩვენი კანისთვის. ამ ყველაფრის გამო, კანი გაღიზიანებულია, გამომშრალია, იქერცლება, კარგავს ელასტიკურობას და ნაოჭები ჩნდება.კანი კონდიციონერის გავლით, უფრო მგრძნობიარე ხდება და ადამიანები, რომლებიც მუდმივად კონდიციონერით გაგრილებულ ოთახებში სხედან, უჩივიან აკნეს და სხვადასხვა ბაქტერიულ ინფექციებს. ამ ყველაფერს ემატება გამომშრალი ცხვირის ღრუ და ხველა. თუ ადამიანს კანის ქრონიკული დაავადებები აწუხებს, როგორიც არის დერმატიტი, ეგზემა, ფსორიაზი და სხვა, რასაც ემატება სიცივისა და სიცხის მკვეთრი მონაცვლეობა, აუცილებლად გაუარესდება თქვენი კანის მდგომარეობა.რა მოვიმოქმედოთ?ამ ყველაფრის თავიდან ასაცილებლად, აუცილებელია დავლიოთ იმაზე მეტი წყალი, ვიდრე ვსვამთ, კანი კარგად უნდა დავიტენიანოთ, მივირთვათ ხილი, რომელიც შეგვივსებს სითხის დეფიციტს და შეგვავსებს მინერალებითა თუ ვიტამინებით. ასევე, აუცილებელია ოთახში იყოს დამატენიანებელი აპარატი, რომელიც შეავსებს იმ დაკარგულს წყალს, რასაც კონდიციონერი "იპარავს" ჩვენი ოთახიდან. მნიშვნელოვანია მოვერიდოთ ცხელ შხაპს, რადგან ის უფრო აშრობს ჩვენს კანს. სასურველია ოთახში შენარჩუნებული იყოს 20-22 გრადუსი ცელსიუსი ტემპერატურა.

ევროპარლამენტი – საქართველო ვერ შეუერთდება ევროკავშირს, ვიდრე მისი ხელისუფლება არ შეცვლის ავტორიტარულ კურსს

საქართველო ვერ შეუერთდება ევროკავშირს, ვიდრე მისი ხელისუფლება არ შეცვლის ავტორიტარულ კურსს, – ამის შესახებ ევროპარლამენტი სოციალურ ქსელში წერს.როგორც ევროპარლამენტი აღნიშნავს, საქართველოს გზა ევროკავშირისკენ ფაქტობრივად შეჩერებულია სამართლიანი არჩევნების ჩატარებამდე.„საქართველო ვერ შეუერთდება ევროკავშირს, ვიდრე მისი ხელისუფლება არ შეცვლის თავის ავტორიტარულ კურსს. ევროპარლამენტი ქართველი ხალხის გვერდით დგას. პარლამენტი არ აღიარებს საქართველოს ამჟამინდელ მთავრობას და აცხადებს, რომ მისი გზა ევროკავშირისკენ ფაქტობრივად შეჩერებულია სამართლიანი არჩევნების ჩატარებამდე“, – წერს ევროპარლამენტი. 

ბაჩიაშვილის ცემის ფაქტი, ისევე როგორც სხვა ცემის ფაქტები მეტყველებს, რომ დღეს ქართული სახელმწიფო არ გვაქვს – ვიქტორ ყიფიანი

" ცემის ფაქტი, ისევე როგორც სხვა ცემის ფაქტები, რომელიც მომრავლდა ჩვენს რეალობაში მეტყველებს ერთ რამეზე, რომ დღეს ქართლი სახელმწიფო არ გვაქვს," - ამის შესახებ GEOCASE-ის დამფუძნებელმა ვიქტორ ყიფიანმა "TV პირველის" ეთერში განაცხადა.მან თანადგომა გამოუცხადა გიორგი ბაჩიაშვილს და აღნიშნა, რომ ის არის მაღალი კომპეტენციის, ეთიკური ნორმების მქონე ადამიანი, რომელიც გამოირჩევა სანიმუშო სტანდარტით ერთგულებისა და ლოიალურობისა საქმისადმი და საქმიანი ინტერესებისა და პრინციპებისადმი."ცემის ფაქტი, რომელიც მომრავლდა ჩვენს რეალობაში მეტყველებს ერთ რამეზე - დღეს ქართლი სახელმწიფო ჩვენ არ გვაქვს. ქართულმა სახელმწიფომ შეწყვიტა არსებობა ეროვნულ სახელმწიფოებრიობის კლასიკური გაგების თვალსაზრისით.მე გიორგისთან ერთად ვმუშაობდი ერთ ცნობილ საქმეზე. მე კომენტარს ვერ გავაკეთებ კონკრეტულად სისხლის სამართლის საქმესთან მიმართებაში, რაზეც ბატონი ივანიშვილი ბატონ ბაჩიაშვილს ედავება, მაგრამ იმ გამოცდილებიდან გამომდინარე, რაც გიორგი ბაჩიაშვილთან მაკავშირებს, ის არის მაღალი კომპეტენციის მქონე ადამიანი, მაღალი ეთიკური ნორმების მქონე ადამიანი, რომელიც გამოირჩევა სანიმუშო სტანდარტით ერთგულებისა და ლოიალურობისა საქმისადმი და საქმიანი ინტერესებისა და პრინციპებისადმი, ამიტომ თანადგომა გიორგის და მაქსიმალური სოლიდარობა მას ადამიანური პროფესიული და მოქალაქეობრივი", - განაცხადა ვიქტორ ყიფიანმა.მან ასევე "ქართული ოცნების" პოლიტიკა შეაფასა და ის პროცესები, რაც დღევანდელ რეალობაში მიმდინარეობს."რამდენიმე განცხადება მოვისმინე "ქართული ოცნების" წარმომადგენლების მხრიდან, რომ ვიღაცამ ქვეყანა უბედურებას ააცდინა და საუბარია მითურ „მეორე ფრონტზე და "გლობალური ომის პარტიაზე". ჩემი აზრით, ამ სისტემამ გაცილებით მეტ უბედურებაში გაახვია და არა ააცდინა - ეს არის ქართული სახელმწიფოს მოსპობა და მისი თანმიმდევრული განადგურება. მთავარი იმპერატივი, რაც ქართველ ერს სჭირდება, არა მარტო საკუთარი იდენტობის შესანარჩუნებლად, არამედ განვითარებისა და მოდერნიზაციისთვის.პროცესები, რომელიც "ოცნების" წიაღში მიმდინარეობს, სხვა გაგრძელებას ვერ პოვებდა, რადგან ისეთ პრინციპებზეა დაფუძნებული, რომელსაც არაფერი სწორ მართვასთან, სახელმწიფოებრივ აზროვნებასთან, ეროვნულ დღის წესრიგთან არა აქვს, ამიტომ ის, რომ დღეს შიდა გარჩევებს აქვს ადგილი, ბუნებრივია", - განაცხადა ყიფიანმა.

მძიმე ავარია კახეთის გზატკეცილზე – რა ხდება ადგილზე ამ წუთებში

ცოტა ხნის წინ კახეთის გზატკეცილზე ავარია მოხდა.ერთმანეთს ორი ავტომობილი შეეჯახა.ადგილზე ამ წუთებში საპატრულო პოლიციაა მობილიზებული.შემთხვევის შედეგად არავინ დაშავებულა.

ბოლო სიახლეები