„ქართული ოცნების“ კომუნიკაციების დეპარტამენტი განცხადებას ავრცელებს

გარემოს ეროვნული სააგენტოს ინფორმაციით, 26 აპრილის დღის ბოლოდან 27 აპრილის დღის მეორე ნახევრამდე საქართველოში მოსალოდნელია დროგამოშვებით წვიმა, ზოგან ძლიერი, შესაძლებელია ელჭექი, სეტყვა და ქარის გაძლიერება.მოსალოდნელმა ნალექებმა საქართველოს მდინარეებზე შესაძლებელია წყლის დონეების მნიშვნელოვანი მატება, პატარა მდინარეებზე წყალმოვარდნები, ხოლო ქვეყნის გორაკ-ბორცვიან და მთიან ზონებში მეწყრულ-ღვარცოფული პროცესების ჩასახვა-გააქტიურება გამოიწვიოს (საფრთხის დონე საშუალო).

საქართველოს საპატრიარქოს საზოგადოებასთან ურთიერთობის სამსახურის განცხადებით, თვითმარქვია სასულიერო პირის შესახებ ინფორმაცია ვრცელდება.საპატრიარქოს წარმომადგენლობის განცხადებით, აღნიშნული პიროვნება არ წარმომადგენს არცერთ მონასტერს და თვითნებურად მოქმედებს."ვრცელდება ინფორმაცია თვითმარქვია სასულიერო პირის, ვინმე გიორგი გულიაშვილის შესახებ, რომელიც საკუთარ თავს ხან "ნეკრესის არქიმანდრიტს," ხანაც "მიტროპოლიტს" უწოდებს, აგრეთვე იგი სისტემატურად აღასრულებს სხვადასხვა საეკლესიო მსახურებას.განვმარტავთ, რომ აღნიშნული პიროვნება არასოდეს ყოფილა არც ხელდასხმული და არც აღკვეცილი, არ წარმოადგენს არცერთი მონასტრის საძმოს წევრს და, შესაბამისად, არც სასულიერო პირია. მისი ნებისმიერი ქმედება არის თვითნებური. ამგვარად, მის მიერ ჩატარებული "მსახურება," საეკლესიო თვალსაზრისით, კანონიკური არ არის და ის ხელახლა უნდა შესრულდეს. აღნიშნული პიროვნება აბრკოლებს და შეცდომაში შეჰყავს მორწმუნე საზოგადოების ნაწილი," - ნათქვამია გავრცელებულ იფნორმაციაში.

რომის პაპი ფრანცისკე 26 აპრილს, ანდერძის მიხედვით, არა წმინდა პეტრეს ტაძარში, არამედ რომში, სანტა-მარია-მაჯორეს ბაზილიკაში დაკრძალეს.რომის პაპის ფრანცისკეს ცხედარი მისი კელიიდან ვატიკანში მდებარე წმინდა პეტრეს ბაზილიკაში გადაასვენეს. გადასვენების ცერემონიალი მკაცრად რეგლამენტირებული იყო. მასში კარდინალები, რიგითი მღვდლები, მონაზვნები და შვეიცარიელი გვარდიელები მონაწილეობდნენ. მგალობელთა გუნდი ფსალმუნებს მღეროდა და ლათინურ ენაზე ლოცვებს აღავლენდა.საქართველოს პრეზიდენტი მიხეილ ყაველაშვილი ვატიკანში, რომის პაპის, ფრანცისკეს დაკრძალვის ცერემონიას  დაესწრო.საქართველოს პრეზიდენტი  დელეგაციასთან ერთად გაემგზავრა, რომლის შემადგენლობაში იყვნენ საქართველოს საგარეო საქმეთა მინისტრი მაკა ბოჭორიშვილი, პრეზიდენტის ადმინისტრაციის უფროსი ქეთევან კვინიკაძე, ზუგდიდისა და ცაიშის ეპარქიის მმართველი, საქართველოს საპატრიარქოს საგარეო ურთიერთობების განყოფილების თავმჯდომარე, მიტროპოლიტი გერასიმე და თბილისის სასულიერო აკადემიისა და სემინარიის რექტორი, სიონის საკათედრო ტაძრის წინამძღვრის მოადგილე, პროტოპრესვიტერი გიორგი ზვიადაძე.ცნობისთვის, ვატიკანმა რომის პაპის ფრანცისკეს ანდერძი გამოაქვეყნა, რომელიც 2022 წლის 29 ივნისით არის დათარიღებული.ანდერძის მიხედვით პაპი უნდა დაკრძალონ რომის სანტა-მარია-მაჯორეს ბაზილიკაში და არა ვატიკანის წმინდა პეტრეს ბაზილიკაში."აკლდამა უნდა იყოს მიწაში, მარტივი, ყოველგვარი განსაკუთრებული მორთულობის გარეშე და მხოლოდ ერთი წარწერით: ფრანცისკე", - ნათქვამია ანდერძში.აღსანიშნავია, რომ ფრანცისკე პირველი პაპი იქნება საუკუნეზე მეტი ხნის განმავლობაში, რომელსაც ვატიკანის გარეთ დაკრძალავენ."ჩემი დაკრძალვის მომზადების ხარჯები დაიფარება ქველმოქმედის მიერ შემოწირული თანხიდან", - აღნიშნულია ანდერძში.

უკრაინის პრეზიდენტი ვოლოდიმირ ზელენსკი აცხადებს, რომ ვატიკანში დონალდ ტრამპთან მის შეხვედრას აქვს პოტენციალი გახდეს ისტორიული. ამის შესახებ მან სოციალურ ქსელ X-ში დაწერა.ტრამპსა და ზელენსკის შორის დაახლოებით 15-წუთიანი შეხვედრა წმინდა პეტრეს ბაზილიკაში, რომის პაპის დაკრძალვის ცერემონიის დაწყებამდე გაიმართა.„კარგი შეხვედრა. პირისპირ მოვასწარით ბევრის განხილვა. ვიმედოვნებ, რომ შედეგები იქნება ყველაფერთან დაკავშირებით, რასაც შევეხეთ. ჩვენი ხალხის სიცოცხლის დაცვა, ცეცხლის სრული და უპირობო შეწყვეტა. საიმედო და ხანგრძლივი მშვიდობა, რომელიც თავიდან აიცილებს მორიგი ომის დაწყებას. ეს იყო ძალიან სიმბოლური შეხვედრა, რომელსაც აქვს პოტენციალი გახდეს ისტორიული, თუ მივაღწევთ საერთო შედეგებს. მადლობა“, – წერს ვოლოდიმირ ზელენსკი. 

ავიაკომპანია „ჯორჯიან ეარვეისმა“ თბილისიდან იტალიის დედაქალაქ რომის მიმართულებით პირდაპირი ფრენები დაიწყო. პირველი პირდაპირი რეისი დღეს თბილისის საერთაშორისო აეროპორტიდან შესრულდა. ზაფხულის სანავიგაციო სეზონზე თბილისიდან პირდაპირი ფრენები  რომის აეროპორტ   ფიუმიჩინოს მიმართულებით კვირაში ორჯერ ყოველ ოთხშაბათს და შაბათს შესრულდება. ინფორმაციას საქართველოს აეროპორტების გაერთიანება ავრცელებს.პირველ საინაუგურაციო ფრენასთან დაკავშირებით თბილისის საერთაშორისო აეროპორტში ღონისძიება გაიმართა, რომელსაც საქართველოს საგარეო საქმეთა მინისტრის მოადგილე ალექსანდრე ხვთისიაშვილი, იტალიის ელჩი საქართველოში მასიმილიანო დ’ანტუონო, საქართველოს აეროპორტების გაერთიანების გენერალური დირექტორი ლევან მოსეშვილი, სამოქალაქო ავიაციის სააგენტოს დირექტორი გივი დავითაშვილი, საქაერონავიგაციის გენერალური დირექტორი გოჩა მეზვრიშვილი, TAV Georgia-ს გენერალური მენეჯერი თეა ზაქარაძე და ავიაკომპანიის ხელმძღვანელობა დაესწრნენ.ღონისძიებაზე სიტყვით გამოსვლისას საქართველოს აეროპორტების გაერთიანების გენერალურმა დირექტორმა, ლევან მოსეშვილმა განაცხადა, რომ იტალია საქართველოსთვის ერთ-ერთი სტრატეგიული მიმართულებაა და მნიშვნელოვან მიზნობრივ ბაზარს წარმოადგენს.„უმნიშვნელოვანესია, რომ ჩვენი დედაქალაქები დღეიდან პირდაპირი საჰაერო გზით იქნებიან ერთმანეთთან დაკავშირებული. რისთვისაც მინდა, მადლობა გადავუხადო ავიაკომპანია „ჯორჯიან ეარვეისს“ და წარმატებული ფრენები  ვუსურვო.საქართველოდან რომის მიმართულებით პირდაპირი ფრენები აქამდე მხოლოდ ქუთაისის საერთაშორისო აეროპორტიდან კვირაში ოთხი სიხშირით სრულდებოდა. დღეიდან კი უკვე თბილისის საერთაშორისო აეროპორტიდან „ჯორჯიან ეარვეისის“ მიერ კვირაში ორი სიხშირით რომის მთავარ აეროპორტ ფიუმიჩინოს მიმართულებით შესრულებული პირდაპირი ფრენები დაემატება. ჯამურად კი, ქართული ავიაკომპანია იტალიის სამი ქალაქის მიმართულებით კვირაში ექვსი სიხშირით იფრენს“, – განაცხადა ლევან მოსეშვილმა.ღონისძიების ფარგლებში ავიაკომპანიის ხელმძღვანელობამ და სტუმრებმა ადგილზე მყოფ ეკიპაჟის წევრებს პილოტის მსოფლიო დღე მიულოცეს, რომელიც ყოველწლიურად 26 აპრილს აღინიშნება.„ჯორჯიან ეარვეისი“ უკვე ასრულებს პირდაპირ რეისებს იტალიის ქალაქების, მილანსა და ფორლის მიმართულებით. მილანის მიმართულებით რეგულარული ფრენები კვირაში სამჯერ სრულდება, ხოლო 24 აპრილიდან რეისები ფორლის მიმართულებით კვირაში ერთი სიხშირით დაიწყო. ჯამურად კი, იტალიის მიმართულებით ავიაკომპანია კვირაში 6 სიხშირით ასრულებს ფრენებს.