მარტში უკრაინა ევროკავშირისგან 3,5 მილიარდი ევროს ოდენობის დახმარებას მიიღებს,- ამის შესახებ ევროკომისიის პრეზიდენტმა, ურსულა ფონ დერ ლაიენმა ომის დაწყების მესამე წლისთავთან დაკავშირებით კიევში ვიზიტისას განაცხადა, სადაც ის უკრაინის მხარდაჭერის საერთაშორისო სამიტს ესწრება.
„ევროპა აქ არის, რათა ამ კრიტიკულ მომენტში უკრაინა გააძლიეროს. შემიძლია გამოვაცხადო, რომ უკრაინა 3,5 მილიარდი ევროს ოდენობის ახალ ტრანშს უკვე მარტში მიიღებს. როგორც პრეზიდენტმა კოშტამ განაცხადა, იმართება ევროპული საბჭოს სპეციალური სხდომა, სადაც მე წარვადგენ ყოვლისმომცველ გეგმავს, თუ როგორ გავაფართოოთ ევროპული იარაღის წარმოება და თავდაცვითი შესაძლებლობები. ამით უკრაინაც მიიღებს სარგებელს“, – განაცხადა ურსულა ფონ დერ ლაიენმა.
ევროკომისიის პრეზიდენტის თქმით, სასწორზე არა მხოლოდ უკრაინის, არამედ მთელი ევროპის ბედია. მან აღნიშნა, რომ ევროკავშირმა და მისმა წევრმა ქვეყნებმა ამ დრომდე უკრაინას აღმოუჩინეს 134 მილიარდი ევროს ოდენობის მხარდაჭერა, რაც ყველაზე დიდი დახმარებაა.
ამასთან, ურსულა ფონ დერ ლაიენმა აღნიშნა, რომ ევროკომისია გეგმავს ენერგოუსაფრთხოებასთან დაკავშირებით ამბიციური პაკეტის წარდგენას, რომლის მიზანია უკრაინისთვის მდგრადი, დაცული და კონკურენტუნარიანი ენერგოსისტემის შექმნა.
„ჩვენ მოვახდენთ უკრაინის და მოლდოვის ელექტროენერგიის ბაზრის სრულ ინტეგრირებას ჩვენს ბაზაში მომავლის წლის ბოლომდე. ჩვენ გამოვიყენებთ უკრაინის გაზის საცავების სრულ პოტენციალს, რომელთა 80% ევროკავშირის წევრი ქვეყნების სიახლოვესაა განლაგებული. ეს მოუტანს შემოსავალს უკრაინას. ჩვენ დავაჩქარებთ უკრაინის განახლებადი ენერგიის სფეროში ინვესტიციებს. ყველა ეს ძალისხმევა შედეგად გამოიღებს უფრო მეტ ენერგოუსაფრთხოებას როგორც უკრაინისთვის, ისე ევროკავშირისთვის“, – თქვა ევროკომისიის პრეზიდენტმა.
მან ასევე უკრაინაში სამართლიანი და ხანგრძლივი მშვიდობის მნიშვნელობაზე ისაუბრა.
„არავის სურს მშვიდობა უკრაინელ ხალხზე მეტად. თუმცა სამართლიანი და ხანგრძლივი მშვიდობა შესაძლებელია მხოლოდ სიძლიერით. სწორედ ამიტომ ჩვენ ვაძლიერებთ თქვენს ეკონომიკას; სწორედ ამიტომ ჩვენ ვზრდით ენერგომომარაგების მედეგობას; სწორედ ამიტომ ჩვენ ვაგრძელებთ თქვენი სამხედროების წვრთნასა და აღჭურვას. და დღეს ჩვენ ვიღებთ სანქციების მე-16 პაკეტს. ჩვენ გავაძლიერებთ სადამსჯელო სანქციებს რუსეთის წინააღმდეგ, ვიდრე ის არ აჩვენებს ხანგრძლივი მშვიდობის მიღწევის ნამდვილს სურვილს“, – განაცხადა ურსულა ფონ დერ ლაიენმა.