“ტურბულენტობა თავისი გზით მიდის, ეკონომიკა მაინც ვითარდება”, – ამის შესახებ ეროვნული ბანკის პრეზიდენტის მოვალეობის შემსრულებელმა, ნათია თურნავამ “ტვ იმედთან” ინტერვიუში განაცხადა.
თურნავას მტკიცებით, საქართველოს ეკონომიკას ევროპელი ინვესტორები იმედით უყურებენ, ვინაიდან ქვეყნის ეკონომიკა და ფინანსური სექტორი მედეგია კრიზისების მიმართ.
“დიდი იმედით უყურებენ ჩვენს ეკონომიკას გარე ინვესტორები, ევროპელი ინვესტორები. ახლახან მქონდა შეხვედრა ვენაში Raiffeisen Bank-ის ბანკის მოწვევით საკმაოდ დიდი საინვესტიციო ფორუმი იყო, 25-მდე სხვადასხვა საინვესტიციო ფონდი ესწრებოდა და ბევრიც ონლაინ იყო… რატომ არის ეს ინტერესი? იმიტომ რომ სჯერათ, რომ საქართველოს ეკონომიკა, საფინანსო სექტორი არის მედეგი კრიზისების მიმართ. მართლაც, ჩვენ გამოვიმუშავეთ იმუნიტეტი ყველანაირი უპასუხისმგებლო მოწოდების, მოლოდინების გაუარესების მცდელობის მიმართ და ტურბულენტობა თავისი გზით მიდის, ეკონომიკა მაინც ვითარდება, ფინანსური სექტორი სტაბილურია”, – განაცხადა მან.
ცნობისთვის, როგორც სებ-ი იტყობინება, ნათია თურნავამ რამდენიმე დღის წინ, ვენაში ინვესტორებთან შეხვედრაზე ყურადღება გაამახვილა “ქვეყნის მაკროეკონომიკური და ფინანსურ სტაბილურობის განმტკიცებასა და დოლარიზაციის შემცირების წარმატებულ პოლიტიკაზე”.