საქართველოს საპატრიარქო ოკუპირებული ცხინვალის რეგიონში გარდაცვლილი არჩილ ტატუნაშვილის ოჯახის წევრებსა და კათოლიკოს-პატრიარქ ილია მეორეს შორის შეხვედრის შემდეგ განცხადებას ავრცელებს.
განცხადებაში წერია, რომ შეხვედრა არჩილ ტატუნაშვილის მშობლებისა და ახლობლების ინიციატივით შედგა.
“არჩილის მშობლებმა მის უწმინდესობას სთხოვეს დახმარება შვილის ცხედრის ოჯახისთვის გადმოცემასთან დაკავშირებით. კათოლიკოს-პატრიარქმა ბრძანა, რომ მიმართავს რუსეთის პატრიარქს, რათა იშუამდგომლოს სათანადო ორგანოებთან და სხვა საშუალებებსაც გამოიყენებს ტატუნაშვილების ოჯახის დასახმარებლად“, – აღნიშნულია განცხადებაში.
ტატუნაშვილის ოჯახის წევრები პატრიარქსაც შეხვდნენ. ილია მეორე მათ პირადად დაჰპირდა, რომ ცხედრის გადმოსვენების თაობაზე, რუსეთის პატრიარქს მიმართავს.
არჩილ ტატუნაშვილი 22 თებერვალს დილით ახალგორიდან გაიტაცეს, 23 თებერვალს, გამთენიისას კი, დეფაქტო ცხინვალის ინფორმაციით, ის სუნთქვის უკმარისობით გარდაიცვალა. არსებობს ეჭვი, რომ ტატუნაშვილი, სინამდვილეში, წამებით მოკლეს.
ოკუპირებული ცხინვალის დეფაქტო პრეზიდენტის წარმომადგენელმა პოსტკონფლიქტურ საკითხებში მურატ ჯიოევმა თქვა, რომ ტატუნაშვილს ქართულ მხარეს რუსეთში დამოუკიდებელი ექსპერტიზის ჩატარების შემდეგ გადასცემენ.