პარლამენტი ახალ სამშენებლო კოდექსს ძალიან მალე მიიღებს, – ამის შესახებ პარლამენტის თავმჯდომარემ ირაკლი კობახიძემ იმ საკანონმდებლო პაკეტთან დაკავშირებით განაცხადა, რომლის ინიცირებაც 2016 წლის ბოლოს განხორციელდა.
“ეს არის ბევრად უფრო მასშტაბური პაკეტი, რომელიც ეხება სივრცით მოწყობასა და მშენებლობებს. ამ პაკეტის განხილვა ძალიან მალე უნდა დაიწყოს საქართველოს პარლამენტში. განხილვის ვადა კიდევ რამდენიმე კვირით გაგრძელდა, თუმცა ამის იქეთ აღარ უნდა გაგრძელდეს. აღნიშნული პაკეტის განხილვა ძალიან მალე უნდა დაიწყოს საქართველოს პარლამენტში“, – განაცხადა ირაკლი კობახიძემ.
დღეს თბილისის მერს კახა კალაძესა და პარლამენტის თავმჯდომარეს ირაკლი კობახიძეს შორის გამართული შეხვედრის შემდეგ ცნობილი გახდა, რომ სამშენებლო სფეროს მიმართულებით სანქციების გამკაცრება იგეგმება.
როგორც კობახიძემ ჟურნალისტებს განუცხადა, ცვლილებები პროდუქტის უსაფრთხოების კოდექსში აისახება, რომელიც თავის მხრივ, “შრომის უსაფრთხოების შესახებ“ ინიცირებულ საკანონმდებლო პაკეტს დაემატება.
აღნიშნული პაკეტი პარლამენტში მეორე მოსმენით განხილვის საგანია.