რუსეთმა ორი იტალიელი დიპლომატი გააძევა. ამის შესახებ იტალიის საგარეო საქმეთა სამინისტროში განაცხადეს. ინფორმაციას Reuters-ი ავრცელებს.
26 მარტს იტალიამ ორი რუსი დიპლომატი ქვეყნიდან გააძევა. ამ ნაბიჯით ქვეყანამ ნატოსა და ევროკავშირის სხვა სახელმწიფოების მსგავსად დიდ ბრიტანეთს სოლიდარობა გამოუცხადა.
მოსკოვში, შვეიცარიის საელჩოს საქართველოს ინტერესების სექციაში 8 ქართველი დიპლომატი მუშაობს. მათგან ერთი, შესაძლოა, რუსეთმა ქვეყნიდან გააძევოს, რადგან საქართველომ შვეიცარიის საელჩოს რუსეთის ინტერესების სექციიდან ერთი რუსი დიპლომატის გაძევების გადაწყვეტილება მიიღო. სერგეი სკრიპალის საქმის გამო რუს დიპლომატებს უკვე 30-ზე მეტი ქვეყნიდან უპირებენ გაძევებას. ასეთი დიპლომატების რაოდენობა სულ ცოტა 150-ია.
სერგეი სკრიპალი და მისი შვილი იულია 4 მარტს დიდი ბრიტანეთის ქალაქ სოლსბერის სავაჭრო ცენტრში უგონო მდგომარეობაში იპოვეს და საავადმყოფოში გადაიყვანეს.
14 მარტს ცნობილი გახდა, რომ დიდი ბრიტანეთი რუსი ჯაშუშის სერგეი სკრიპალის საქმის გამო, ქვეყნიდან 23 რუს დიპლომატს გააძევებდა.
პასუხად კრემლმა რუსეთიდან 23 ბრიტანელი დიპლომატი გააძევა.