რუსეთის ქალაქებში ციმბირის კოლონიაში გარდაცვლილი ოპოზიციონერის, ალექსეი ნავალნის ხსოვნისადმი მიძღვნილი საპროტესტო აქციის მონაწილეები დააკავეს. ამის შესახებ BBC-ის რუსული ბიურო წერს.
გამოცემის ცნობით, ნავალნის ხსოვნის პატივსაცემად მოქალაქეებს ყვავილები მიაქვთ პოლიტიკური რეპრესიების მსხვერპლთა მემორიალებთან, ზოგიერთმა მათგანმა კი ცალკეული პიკეტები მოაწყო, რა დროსაც, პოლიციელებმა აქციის მონაწილეების დაკავება დაიწყო.
გამოცემა „ОВД-Инфо“-ს ცნობით, მოსკოვში, რუსეთის უშიშროების ფედერალური სამსახურის მთავარი შენობის მოპირდაპირედ, სოლოვეცკის ქვასთან, სადაც ადამიანებს ყვავილები მიჰქონდათ, ერთი ადამიანი დააკავეს.
„ახალგაზრდა კაცი პოლიციის განყოფილებაში გადაიყვანეს. მას ბრალად ედება პოლიციის მიმართ დაუმორჩილებლობა და ღამეს წინასწარი დაკავების იზოლატორში გაატარებს“, – ნათქვამია ინფორმაციაში.
ხოლო Sota-ს ცნობით, პოლიციამ საბუთების შემოწმების შემდეგ სამი გამვლელი დააკავა მოსკოვში, ლუბიანკას მეტროსადგურის მახლობლად.
Caution News-ის ცნობით, მოსკოვში ასევე დააკავეს გოგონა, რომელიც „სევდის კედელთან“ იმყოფებოდა, თუმცა მოგვიანებით გაათავისუფლეს.
BBC-ის ინფორმაციით, ცალკეული პირები ასევე დააკავეს სანქტ-პეტერბურგში, დონის როსტოვში, მურმანსკსა და ნიჟნი ნოვგოროდში. როგორც ზოგიერთ ქალაქში, პოლიციელები მემორიალურ დაფებთან ყვავილებით მისულ მოქალაქეებს ვინაობას ეკითხებიან და დოკუმენტებს უმოწმებენ.
ამასთან, რუსული მედიის ცნობით, მას შემდეგ, რაც ონლაინში „მასობრივი აქციები“ დაანონსდა, მოსკოვის პროკურატურამ განცხადება გაავრცელა, რომლითაც მოსახლეობას „კანონის დარღვევისგან თავის შეკავებისკენ მოუწოდა“. ცნობისთვის, რუსეთის კანონმდებლობა აქციის ორგანიზატორებს ავალდებულებს, ხელისუფლებისგან ნებართვა ხელისუფლებისგან ნებისმიერი მასობრივი შეკრების ჩასატარებლად.
შეგახსენებთ, ალექსეი ნავალნი 47 წლის ასაკში, იამალ-ნენთა ავტონომიურ ოლქში მდებარე მესამე კოლონიაში გარდაიცვალა. როგორც რუსეთის სასჯელაღსრულების ფედერალურ სამსახურში განაცხადეს, პატიმარმა მოულოდნელად გონება დაკარგა, ადგილზე მისულმა ექიმებმა კი მისი გადარჩენა ვერ შეძლეს. თუმცა, ამ ვერსიას უნდობლობას უცხადებენ საერთაშორისო ორგანიზაციები და დასავლეთის ქვეყნების ლიდერები.