საბაგიტოს პროექტი
მთაწმინდის საბაგირო გზის პროექტის მთავარი მენეჯერის ლაშა დალაქიშვილის თქმით, საბაგიროს მშენებლობაზე ტენდერი ნებართვის მიღებისთანავე გამოცხადდება. მისი თქმით, მშენებლობამდე სხვადასხვა მოსამზადებელი სამუშაო პროცესი იწყება. ინფორმაციას “კომერსანტი” ავრცელებს.
მშენებლობის პროცესს დაახლოებით 9 თვე დასჭირდება, ეს დრო საბაგიროს მონტაჟსაც მოიცავს, რომელსაც ავსტრიული კომპანია Doppelmayr-ი განახორციელებს. მთაწმინდის საბაგიროზე მგზავრთა გადასაყვანად 20 გონდოლა იქნება გამოყოფილი.
“საბაგიროს ხუთი საყრდენი ანძა აქვს და მისი ხელახლა დამონტაჟება მოხდება. უკვე დასრულებულია, როგორც კონსტრუქციული, ისე ხარჯთაღრიცხვის ნაწილის პროექტირება. ამ ეტაპზე სანებართვო პროცედურების განხორციელება იწყება, რათა მშენებლობაზე ნებართვა მივიღოთ და შემდგომ, თბილისის სატრანსპორტო კომპანიისგან, როგორც პროექტის განმახორციელებელისგან სამშენებლო სამუშაოების შესყიდვა მოხდება. შესყიდვის პროცედურები დაიწყება, ხოლო ეკონომიკის სამინისტროს შესაბამისი სამსახურისგან მშენებლობის ნებართვას ავიღებთ”, – თქვა ლაშა დალაქიშვილმა.
ქალაქ თბილისის მერიასა და ავსტრიულ კომპანია ,,DOPPELMAYR”-ს შორის, მთაწმინდაზე საბაგირო გზის ფუნქციონირების აღდგენის მიზნით, ხელშეკრულება 2012 წლის 5 ივნისს გაფორმდა.
მთაწმინდის საბაგირო 1990 წლის 1 ივნისს ჩამოწყდა, რის შედეგადაც 15 ადამიანი დაშავდა, ხოლო 20 გარდაიცვალა.
