დიდ ხუთშაბათს საქართველოს პატრიარქი, ილია მეორე საღმრთო ლიტურგიას სამების საკათედრო ტაძარში დაიწყებს. ტაძარში წირვის დასრულების შემდეგ შესრულდება ფეხთბანვის წესი. უწმინდესი ფეხს 12 სასულიერო პირს დაბანს.
დიდი ხუთშაბათი ერთადერთი დღეა მთელი წლის განმავლობაში, როცა, საჭიროების შემთხვევაში, მირონის კურთხევა შეიძლება (ეს მირონი მღვდელმსახურებაში მირონცხების საიდუმლოს შესრულებისას და ტაძრების კურთხევისას გამოიყენება).
დიდი ხუთშაბათის საღამოს სრულდება დიდი პარასკევის ცისკარი, რომლის დროსაც ე.წ. “თორმეტი სახარება” ანუ ოთხი სახარებიდან ამოკრებილი 12 ნაწყვეტი იკითხება. მათში იესო ქრისტეს ის ვნებებია აღწერილი, რომლებიც ჯვარცმამდე შეემთხვა, დაწყებული მოწაფეებთან მისი უკანასკნელი საუბრიდან საიდუმლო სერობაზე, დამთავრებული მაცხოვრის სხეულის იოსებ არიმათიელის ბაღში დაფლვით და მისი საფლავისთვის მცველების მიჩენით.
სამების საკათედრო ტაძარში ვნების კვირის მსახურების განრიგი სრულიად საქართველოს კათოლიკოს-პატრიარქის ილია მეორის კურთხევით მრევლს არქიდიაკონმა დემეტრემ 1 აპრილს გააცნო.
პარასკევს 09:00 საათზე წაკითხული იქნება დიდი ჟამნობა, ხოლო 14:00 საათზე მწუხრის ჟამი, გარდამოხსნის გამოსვენება და დატირება. შაბათს არის ყოვლადწმინდა ღვთისმშობლის ხარების დღესასწაული. ცისკარი შესრულდება 06:00 საათზე, როგორც ეგების დიდი შაბათის მსახურებას, გარდამოხსნის გარშემოტარებით ტაძარზე და წესის აგება, ხოლო 10:00 საათზე აქ, სამების საკათედრო ტაძარში შესრულდება წმინდა ბასილი დიდის ლიტურგია ხარების დღესასწაულთან დაკავშირებით. ხოლო შაბათს 20:00 საათზე შესრულდება შუაღამიანის მსახურება და გარდამოხსნის შესვენება შუა ტაძრიდან საკურთხეველში. შაბათ 23:00 საათზე იქნება შეხვედრა მის უწმინდესობასთან და წაიკითხება სააღდგომო ეპისტოლე. ხოლო 00:00 საათზე შესრულდება ლიტანიობა და ბრწყინვალე აღდგომის საზეიმო მსახურება”,- აღნიშნა მამა დემეტრემ.
8 აპრილს მართლმადიდებლური ეკლესია აღდგომის ბრწყინვალე დღესასწაულს აღნიშნავს.