პარტია „საქართველოსთვის” პოლიტსაბჭოს წევრი კახა ქემოკლიძე „ქართულ ოცნებას” დებატებში იწვევს

"არავითარი დანდობა არც ყოფილი გუნდის წევრის, არც ახლანდელი წევრის მიმართ არ უნდა იყოს, ვინც იმ პრინციპს გადაუხვევს, რასაც ეროვნული ინტერესი ჰქვია, მათ შორის, ერთ-ერთი დამანგრეველი არის კორუფცია", - ამის შესახებ პარლამენტის ვიცე-სპიკერმა, გია ვოლსკიმ "ღამის კურიერში" სტუმრობისას განაცხადა."სწორად სვამთ შეკითხვას. თუ გამოძიება მიმდინარეობს, გამორიცხავთ, რომ ვიღაცის გვარები, ყოფილი წევრები ფიგურირებდნენ?... მე გამოვრიცხავ. არა მარტო მე გამოვრიცხავ ამას, მაგრამ, ინფორმაცია, რომელიც უნდა წარმოადგინოს გამოძიებამ ყველა დეტალის შემცველი უნდა იყოს. ამასთან დაკავშირებით როდესაც ამბობ - მე კი გამოვრიცხავ, მაგრამ დაველოდოთ გამოძიებას, უკვე ტოვებ გარკვეულ შეკითხვებს შენი გუნდის ყოფილი წევრების მიმართ. ასეთი შეკითხვები არ არსებობს. ეს იმიტომ დასახელდა , რომ თქვენ შეკითხვა დამისვათ, რომ ხალხში რაღაც ნიჰილიზმი გაჩნდეს, არასტაბილურობის განცდა უნდათ შემოიტანონ.ჩვენი მხრიდან მინიშნებები რაზეც კეთდება, ამის იქით საკომენტარო დღეს არაფერია. არავითარი დანდობა არც ყოფილი გუნდის წევრის, არც ახლანდელი წევრის მიმართ არ უნდა იყოს, ვინც იმ პრინციპს გადაუხვევს, რასაც ეროვნული ინტერესი ჰქვია, მათ შორის, ერთ-ერთი დამანგრეველი არის კორუფცია, ნებისმიერი ქვეყნისთვის", - განაცხადა გია ვოლსკიმ.

„რუსთაველის გამზირის“ ლიდერის, პაატა ბურჭულაძის განცხადებით, „ქართულ ოცნებას“ აქვს ორი ვარიანტი, „მშვიდობიანად წავიდნენ ან შეეწინააღმდეგონ და მაინც წავიდნენ“.„მაქვს მოლოდინი, რომ ჩვენ მშვიდობიანად ჩავატარებთ ეროვნულ კრებას, მშვიდობიანად გადმოვიბარებთ ხელისუფლებას. ვინმე თუ აჰყვება ბიძინა ივანიშვილის ხუშტურს, სროლა და რაღაც, ძალიან მკაცრად ვუპასუხებთ ჩვენც. ამას ვერ შეაჩერებენ. ორი ვარიანტი აქვთ, მშვიდობიანად წავიდნენ ან შეეწინააღმდეგონ და მაინც წავიდნენ. რაც შეეხება შეწინააღმდეგებას, ძალიან ინანებენ“, – განაცხადა პაატა ბურჭულაძემ „პალიტრანიუსის“ გადაცემაში.ამასთან, ბურჭულაძემ აღნიშნა: „ცოტათი მაინც თუ ჭკუა შესწევთ, რამდენიმე ორგანიზატორი უნდა დატოვონ, რომ აქცია იყოს მართვადი, რომ ხალხი არ იყოს უმართავი, თორემ ჩვენ ვნახეთ უმართავი ხალხი ნეპალში“.ბურჭულაძე ამბობს, რომ მათი სურვილია, მშვიდობიანად დაამხონ ბიძინა ივანიშვილი.„ჩვენ გვინდა, მშვიდობიანად დავამხოთ ბიძინა ივანიშვილი. მოგვეცით საშუალება, ეს მშვიდობიანად გავაკეთოთ. ყველას თუ დაგვიჭერთ, ხალხი გამოვა და ნახავთ, რა მოგივათ“, – განაცხადა პაატა ბურჭულაძემ.პაატა ბურჭულაძემ 4 ოქტომბერს დაგეგმილ აქციასთან დაკავშირებით აღნიშნა, რომ იქნება სამი ლოკაცია, ამავდროულად, განაცხადა, რომ იმავე დღეს მოხდება საზოგადოებისთვის მინისტრთა კაბინეტის შეთავაზება.„ჩვენ უნდა გვქონდეს სამი ლოკაცია. ამ ლოკაციებს მოგვიანებით ვიტყვით. ველოდებით 200-დან 300 ათასამდე ადამიანს. პირველი საკითხი იქნება – გინდა თუ არა, ხელისუფლება კონსტიტუციის ფარგლებში ჩაიბაროს ქართველმა ხალხმა. დარწმუნებული ვარ, ყველა იტყვის – კი. იმ მომენტიდან საქართველოს ვიბარებთ ჩვენ ხელში. ჩვენ ვერ ვიტყვით, რომ ხელისუფლება წავიდეს, რადგან დღეს ჩვენ არ გვყავს ხელისუფლება. რაც შეხება მეორე და მესამე საკითხს, ამას მოგვიანებით გეტყვით. ვფიქრობ, ეყოფათ ჭკუა, რომ სროლა არ ატეხონ და მარტო ფიზიკურად შემოვიდნენ. 4-შივე მოხდება საზოგადოებისთვის მინისტრთა კაბინეტის შეთავაზება, ხალხმა უნდა იცოდეს ვინ არის. ყველაფერი გამოცხადდება. ტექნიკური მთავრობა იქვე გამოცხადდება. მშვიდობას უნდა ბრძოლა, თორემ გამოსვლით და „ძირს ოლიგარქიას“ ძახილმა უკვე თავისი დრო მოჭამა. ბრძოლა ბოლომდე, არ უნდა დავნებდეთ. ჩემი აზრით, 8:00 საათზე უკვე დასრულებული იქნება. უკვე გადმობარებული უნდა იყოს. ჩემი გადმოსახედიდან, არჩევნები ტყუილად ტარდება“, – განაცხადა პაატა ბურჭულაძემ.პაატა ბურჭულაძე ასევე ამბობს, რომ ამ დღეებში ძალოვნები მიმართავენ თავიანთ კოლეგებს, არ მიაყენონ შეურაცხყოფა აქციის მონაწილეებს.„ამ დღეებში ძალიან ბევრი კარგი მოწოდება იქნება, რომლებსაც ჩვენ გავასაჯაროებთ. ჯერ არ ვასაჯაროებთ, რადგან ძალიან ადრეა. ძალოვნები მიმართავენ ისევ თავიანთ კოლეგებს, რომ ხელი არ წაუცდეთ და არ მიაყენონ შეურაცხყოფა“, – აღნიშნა პაატა ბურჭულაძემ.

გაგაცნობთ, სიახლეს, რომელიც 1-ელი ოქტომბრიდან ამოქმედდება. ინფორმაციას შსს მომსახურების სააგენტო ავრცელებს:„საგზაო მოძრაობის შესახებ“ საქართველოს კანონში განხორციელებული ცვლილებების შესაბამისად, 2025 წლის 1-ელი ოქტომბრიდან CE, DE კატეგორიების და C1E, D1E ქვეკატეგორიების სატრანსპორტო საშუალების მართვის უფლების მისაღები გამოცდების პრაქტიკული ნაწილი ორეტაპიანი ხდება.ცვლილების მიხედვით, პრაქტიკული გამოცდის პირველი ეტაპს კანდიდატი დახურულ მოედანზე ჩააბარებს, ხოლო გამოცდის მეორე ეტაპი რეალური საგზაო მოძრაობის პირობებში, საქართველოს შინაგან საქმეთა მინისტრის ბრძანებით დამტკიცებული საგამოცდო მარშრუტების შესაბამისად ჩატარდება.მძღოლობის კანდიდატს უფლება აქვს პრაქტიკული გამოცდის მეორე ეტაპზე გავიდეს პირველი ეტაპის წარმატებით ჩაბარებიდან 365 კალენდარული დღის განმავლობაში.365 დღიანი ვადის ამოწურვის შემთხვევაში, პრაქტიკული გამოცდის პირველ ეტაპზე მიღებული დამაკმაყოფილებელი შედეგი კარგავს იურიდიულ ძალას.აღნიშნული კატეგორიების/ქვეკატეგორიების მართვის უფლების მიღების მსურველები პრაქტიკული გამოცდის ჩაბარებას მომსახურების სააგენტოს რუსთავის და ქუთაისის სტრუქტურულ ერთეულებში შეძლებენ. პრაქტიკული გამოცდის მეორე ეტაპის გამოცდაზე გასასვლელად სავალდებულოა რიგის დაჯავშნა, რაც შესაძლებელია:უშუალოდ, სააგენტოს შესაბამის სტრუქტურულ ერთეულში გამოცხადებით;ვებგვერდის მეშვეობით;მობილური აპლიკაციის საშუალებით.

„რუსთავი 2-ის“ მიერ მოპოვებული მტკიცებულებების ნახვის მიუხედავად, გიორგი გახარიას თანაგუნდელები ამტკიცებენ, რომ მათ ლიდერს 2020 წელს პარიზში ბინა და ჩხოროწყუში მიწის ნაკვეთები არ უყიდია. ყოფილმა პრემიერმა 2020 წელს შეძენილი ქონება 2025 წლის დეკლარაციაში თავადაც ასახა, თუმცა, გახარიას პარტიაში ფაქტებს უარყოფენ.ოფიციალური ჩანაწერები და დეკლარაცია აჩვენებს, რომ 2020 წელს, როცა გახარია ერთ-ერთ ინტერვიუში საკუთარ გაღარიბებაზე საუბრობდა, სწორედ მაშინ შეიძინა პარიზში ბინა ნახევარ მილიონ ევროდ.მოგვიანებით, ქონებრივ დეკლარაციებში გამოჩნდა ჩხოროწყუში მიწის ნაკვეთებიც. საჯარო ფინანსურ დოკუმენტში ექსპრემიერმა აღარ მიუთითა - სახლი წავკისში და 2 ბინა თბილისში, ამაღლების ქუჩაზე. თუმცა, გახარიას ოჯახი ამ დრომდე წავკისში ცხოვრობს. "კურიერის" გადამღებ ჯგუფს, ექსპრემიერის ოჯახის წევრმა უთხრა, რომ სახლი ნაქირავები აქვთ.როგორ იყიდა პანდემიის პერიოდში გახარიამ პარიზში ბინა - თავად ექსპრემიერი "კურიერის" სატელეფონო ზარებს არ პასუხობს. ოპოზიციის ნაწილი კი ამბობს, რომ გამოძიება თანამდებობის ყველა ყოფილი პირის ქონებრივი და ფინანსური მდგომარეობით უნდა დაინტერესდეს.გიორგი გახარიას ქონებრივი და ფინანსური მდგომარეობის შესახებ საუბრობენ მმართველ გუნდში. სახელისუფლებო პარტია მიიჩნევს, რომ საკითხით საგამოძიებო უწყებები უნდა დაინტერესდნენ.პარიზში შეძენილი ბინის და მიწის ნაკვეთების დოკუმენტაცია "კურიერი P.S-მა" ექსკლუზიურად მოიპოვა. გიორგი გახარიამ საფრანგეთის დედაქალაქში 83 კვადრატული მეტრის ბინა 472 400 ევროდ, 2020 წელს შეიძინა, ჩხოროწყუში კი მიწის 2 ნაკვეთი 85 000 ლარად.

ნუ მიაქცევთ ყურადღებას ეთერებში მსხდომ, დროის გასაყვანად მისულ, გამოგონილ ოპოზიციონერებს და ნურც გაბღენძილ „ლიდერებზე“ იდარდებთ, სამი სართულით ზემოდან რომ გვიყურებენ და მუდმივად სურთ პოლიტიკაში „იტივტივონ“, –  ამის შესახებ „ნაციონალური მოძრაობის“ პოლიტსაბჭოს თავმჯდომარის, ლევან ხაბეიშვილის პოსტშია ნათქვამი, რომელიც მის ფეისბუქგვერდზე გამოქვეყნდა.მისი თქმით, ხალხმა უნდა უსმინოს საკუთარ გულისცემას და იმ ადამიანებს, ვინც გამარჯვებას ასხივებს, 4 ოქრომბრის გარშემოა გაერთიანებული და ბოლომდე აპირებს იბრძოლოს.„შიში, მარცხი, ჩამოშლა, კაპიტულაცია დააპატიმრა ივანიშვილმა და მდინარაძემ. ჩემი კი არ ეშინიათ, რეალურად, თქვენი, ხალხის პანიკური შიში აქვს. ივანიშვილმა მე დამაპატიმრა, მძევლად ამიყვანა ერთი მიზეზით: დავიჭირე დიდი, უშველებელი სარკე და ყველა ქალაქში, სოფელში, ეზოში, ეთერში, სოციალურ ქსელში ხალხს ვაჩვენებდი, რომ დაინახეთ თქვენი გამარჯვებული სახეები, დაინახეთ, რომ ათასჯერ მეტნი ხართ. ჩაიხედეთ სარკეში და ნახეთ, რომ მარტო არ ხართ, შენ ხარ საქართველო. აი, ამ დიდ სარკეს გამოეკიდნენ შლეგებივით, ამ სარკის დამტვრევას ცდილობს ბიძინა. მისი ამოცანაა, რომ სულ ჩვენი დამარცხებული, მოღუშული პირსახე გვახსოვდეს. მას ეშინია, რომ თუ ხალხი იცქირება სარკეში, დაინახავს, რომ უპირობოდ გამარჯვებულია და ხალხს წინ ვერაფერი დაუდგება. ამ დროისთვის ენა „ამომაგლიჯეს“. სარკე ჩამომართვეს და დილეგში გამამწესეს. ბოროტ, კაცთმოძულე ივანიშვილ-მდინარაძეს ვერ გაუაზრებიათ, რომ ეს სარკე უკვე ძალიან ბევრ ადამიანს დააქვს და ვერც ის გაიგეს, რომ ამასობაში სარკე საქართველოს დროშად გადაიქცა და ის ყველა ქართველის გულშია. დიახ, ყველა ქართველს გულით დააქვს დროშა და 4 ოქტომბერს უპირობოდ დაიცავენ იმას, რაც ყველაზე მეტად უყვართ – სამშობლოს.4 ოქტომბერი უკვე არის სახალხო, ეროვნული გამარჯვების დღე, რომელიც ხალხის გასაფორმებელია. ნუ მიაქცევთ ყურადღებას ეთერებში მსხდომ, დროის გასაყვანად მისულ, გამოგონილ ოპოზიციონერებს და ნურც გაბღენძილ „ლიდერებზე“ იდარდებთ, სამი სართულით ზემოდან რომ გვიყურებენ და მუდმივად სურთ პოლიტიკაში „იტივტივონ“. უსმინეთ საკუთარ გულისცემას და იმ ადამიანებს, ვინც გამარჯვებას ასხივებს, 4 ოქრომბრის გარშემოა გაერთიანებული, ბოლომდე აპირებს იბრძოლოს. ხომ დადასტურდა, რომ საზოგადოება ერთიანია საქართველოს გადარჩენის ბრძოლის სტრატეგიაში. ჰოდა, მათთან ერთად ვმობილიზდეთ, ერთმანეთს გადავხედოთ და მტკიცედ მოვემზადოთ.ივანიშვილი რეალურად დაგვეხმარა ამ დაკავების აქტით. მან დაგვარწმუნა, რომ ის უკვე დამარცხებულია. მდინარაძემ ირწმუნა, რომ მარცხდებიან და ამიტომ ამიყვანეს მძევლად. ამაზე უკეთ როგორ გვანიშნონ, რომ გამარჯვება მონდომებაზე და ერთი ხელის გაწვდენაზეა. ღმერთმა დალოცოს საქართველო“, – წერს ლევან ხაბეიშვილი.