ორგანიზაცია „დაიტოვეს“ წევრი – ვიწყებთ ქალაქის პარალიზებას დღეიდან და ვემზადებით იმ დღისთვის, როდესაც მთელი საქართველო ფეხზე დადგება

გეოპოლიტიკური დაძაბულობისა და არახელსაყრელი გარემოებების მიუხედავად, საქართველო წარმატებით გაუმკლავდა საგარეო შოკებს და შეინარჩუნა მაკროეკონომიკური სტაბილურობა, – ამის შესახებ აღნიშნულია პრემიერ-მინისტრ ირაკლი კობახიძის წლიურ ანგარიშში, რომელიც პარლამენტს წარედგინა.დოკუმენტში აღნიშნულია, რომ 2025 წელს, საქართველო გლობალურად გამორჩეული იყო მაღალი ეკონომიკური ზრდით, რომელმაც 7.5% შეადგინა. “2025 წელს, მშპ-მ 104.6 მილიარდი ლარი შეადგინა, ხოლო მშპ ერთ სულ მოსახლეზე 28,235 ლარს – 10,297 დოლარს გაუტოლდა.მაღალი ეკონომიკური ზრდა გაგრძელდა 2026 წელს და იანვრის თვეში – 7.9%, თებერვლის თვეში – 8.8%, ხოლო მარტის თვეში 10.7% რეალური ზრდა დაფიქსირდა. შედეგად, 2026 წლის პირველი კვარტალის საშუალო ეკონომიკური ზრდა 9.1%-ს გაუტოლდა. 2025 წელს ეკონომიკური ზრდა იყო საკმაოდ დივერსიფიცირებული და მასში მნიშვნელოვანი პოზიტიური წვლილი შეიტანა ინფორმაციისა და კომუნიკაციის, განათლების, დამამუშავებელი მრეწველობის, ტრანსპორტისა და დასაწყობების, საფინანსო და სადაზღვევო საქმიანობებისა და სხვა სერვისების მიმართულებით ეკონომიკური აქტივობის ზრდამ. მაღალია შიდა მოთხოვნა და ეკონომიკურ ზრდაში ყველაზე მნიშვნელოვანი წვლილი მოხმარებამ შეიტანა, რომელიც წლიურად 10.3%-ით გაიზარდა, ძლიერი საკრედიტო აქტივობისა და ხელფასების ზრდის ფონზე. მოხმარებასთან ერთად, მზარდი ტენდენციით ხასიათდება მომსახურების ექსპორტი, რაც კომპიუტერული და საინფორმაციო მომსახურების ექსპორტის, ტურიზმიდან მიღებული შემოსავლებისა და სატრანსპორტო მომსახურების ზრდას უკავშირდება“, – აღნიშნულია დოკუმენტში.ანგარიში საუბარია სავალუტო ფონდის პროგნოზზე და ნათქვამია, რომ მათი ცნობით, 2026 – 2031 წლებში, საქართველოს ექნება ყველაზე მაღალი ზრდა რეგიონისა და ევროპის ქვეყნებს შორის, საშუალოდ – 5.1%-ის ოდენობით.„2025 წელს საშუალო წლიურმა ინფლაციამ 3.9% შეადგინა; 2026 წელს ინფლაცია იანვარში 4.8% დაფიქსირდა, ხოლო აპრილში 5.9%-ამდე გაიზარდა. მოსალოდნელია, რომ ის 2026 წლის შუა პერიოდში, ეტაპობრივად დაუბრუნდება მიზნობრივ დონეს. ინფლაციური მოლოდინები არის სტაბილური და კარგად მართვადი, რასაც ხელს უწყობს შესაბამისი მონეტარული პოლიტიკა და ფუნდამენტური მაკროეკონომიკური ფაქტორები. 2025 წელს, როგორც უმუშევრობის დონე, ისე დასაქმების დონე სტაბილურ დონეზე შენარჩუნდა და შესაბამისად, 13.9% და 46.9% შეადგინა“, – აღნიშნულია ანგარიშში.

რუსთავში, მდინარე მტკვარში მაშველებმა 2 ადამიანის ცხედარი იპოვეს. აღნიშნული ინფორმაცია „ინტერპრესნიუსს“ შინაგან საქმეთა სამინისტროში დაუდასტურეს. ორივე გარდაცვლილი მამაკაცია.ამასთან „ინფო რუსთავის“ ინფორმაციით, მაშველებმა ცხედრები ძველი და ახალი რუსთავის დამაკავშირებელი ხიდიდან რამდენიმე კილომეტრში იპოვეს.

რუსეთის პრეზიდენტი ვლადიმერ პუტინი აცხადებს, რომ უკრაინამ ლუგანსკსა და ხერსონის ოლქზე თავდასხმებით კონფლიქტს ახალი ხარისხი შესძინა.„როგორც ჩანს, სტარობილსკის პედაგოგიურ კოლეჯში და ახლა გენიჩესკში ბავშვებისა და მოზარდების წინააღმდეგ განზრახ – დიახ, განზრახ – მძიმე დანაშაულის ჩადენით კიევის ხელმძღვანელობამ გადაწყვიტა, თავისი დანაშაულების სერიაში ახალი ფურცელი გადაშალოს და მთლიანად კონფლიქტს ახალი ხარისხი შესძინოს. ეს მათი არჩევანია“, – განაცხადა პუტინმა სტარობილსკში ტერორისტული თავდასხმის გამოძიების შესახებ გამართულ სხდომაზე.პუტინის თქმით, „ყველა პასუხისმგებელმა პირმა უნდა მიიღოს ის სასჯელი, რასაც იმსახურებს“.როგორც რუსეთის პრეზიდენტმა აღნიშნა, შეხვედრის საჯარო ნაწილის დასრულების შემდეგ განხილვა დახურულ ფორმატში გაგრძელდება.რუსული მხარის ინფორმაციით, 22 მაისს ლუგანსკში, სტარობელსკის სტუდენტურ საერთო საცხოვრებელზე თავდასხმის შედეგად 21 ადამიანი დაიღუპა. გავრცელებული ცნობით, შენობაში იმ დროს 86 ბავშვი იმყოფებოდა.რუსეთის მიერ გავრცელებული მონაცემების თანახმად, ინციდენტის შედეგად 44 ადამიანი დაშავდა, მათ შორის 42 სტუდენტი და კოლეჯის ორი თანამშრომელი. დაზარალებული სტუდენტების ასაკი 15-დან 22 წლამდე იყო.ამასთან, რუსეთის ცნობით, 31 მაისს უკრაინულმა დრონებმა იერიში მიიტანეს გენიჩესკში მდებარე საცხოვრებელ კორპუსებზე, რის შედეგადაც ერთი ბავშვი დაიღუპა და 11 ადამიანი დაშავდა.

ჩემთვის ყველაზე დიდი მიღწევა კონკრეტული პროექტი კი არა, არამედ არის ის, რომ თბილისში ცვლილებები ხდება, – ამის შესახებ დედაქალაქის მერმა, კახა კალაძემ ტელეკომპანია „რუსთავი 2“-ის გადაცემა „დებატებში“ ისაუბრა.როგორც კალაძემ აღნიშნა, ბოლო წლების განმავლობაში თბილისში არაერთი მნიშვნელოვანი პროექტი განხორციელდა სატრანსპორტო და ინფრასტრუქტურის მიმართულებით.„ცვლილებები უკეთესობისთვის არის შეუქცევადი პროცესი, რაც მნიშვნელოვანია. ასევე მნიშვნელოვანია ის, რომ ჩვენ მიერ გადადგმული ყველა ნაბიჯი გახდა სისტემური. დავიწყებ სატრანსპორტო პოლიტიკით. გავიხსენებ იმ მძიმე მდგომარეობას, რაც ამ მიმართულებით გვქონდა – გაუბედურებული, ძირგამომპალი ავტობუსები, მიკროავტობუსები, რომლებიც კრიტიკას ვერ უძლებდა. ეკოლოგიური და ადამიანების ჯანმრთელობის კუთხით მათი გამონაბოლქვი უდიდეს პრობლემას წარმოადგენდა. მეტროში იყო უდიდესი პრობლემები. მინდა, ასევე ვისაუბრო რეკრეაციის მიმართულებაზე. ბოლო წლებში რაც ამ მხრივ ქალაქში გაკეთდა, საკმაოდ თვალსაჩინოა. გვაქვს ახალი პარკები, რეაბილიტირებული სკვერები, მწვანე არეალები, სპორტული მოედნები. მოხდა გასხვისებული არეალების დაბრუნება ქალაქისთვის. ეს იყო რეკრეაციული სივრცეები, სადაც კორპუსები უნდა აშენებულიყო და ჩვენ თბილისელებს მათი სახით მწვანე სივრცეები და სპორტული მოედნები დავუბრუნეთ. რა თქმა უნდა, ბოლო წლებში ძალიან მნიშვნელოვანი ინფრასტრუქტურული პროექტები განხორციელდა – ქუჩების, გამზირების რეაბილიტაცია. რაც მთავარია, ეს ყველაფერი ძირეულად კეთდება – იცვლება ძველი მიწისქვეშა კომუნიკაციები. არ არსებობს პროექტი, სადაც საგზაო ინფრასტრუქტურულ სამუშაოებს ვაწარმოებთ და იქ, პირველ რიგში, მიწისქვეშა კომუნიკაციები არ განვაახლოთ“, – განაცხადა დედაქალაქის მერმა.კახა კალაძემ ისაუბრა ჯანდაცვისა და სოციალურ პროგრამებზე, რომლებსაც მუნიციპალიტეტი ახორციელებს და აღნიშნა, რომ ეს პროგრამები თითოეულ თბილისელს ეხება.„სამწუხაროდ, ჩვენ ჯერ კიდევ გვყავს ადამიანები, ვისაც ჩვენი მხრიდან შესაბამისი თანადგომა სჭირდება. ყველა ჩვენი პროგრამა გვაძლევს იმის შესაძლებლობას, რომ ასეთ ოჯახებს ცხოვრება შევუმსუბუქოთ“, – აღნიშნა თბილისის მერმა.რაც შეეხება დედაქალაქში ჯერ კიდევ არსებულ გამოწვევებს, კახა კალაძის თქმით, ჯერ კიდევ არსებობს პრობლემები, როგორიცაა ავარიული შენობა-ნაგებობები, გადატვირთული სატრანსპორტო მოძრაობა, სოციალურად შეჭირვებული ოჯახები და ა.შ.„რა თქმა უნდა, არსებობს გამოწვევებიც და ამაზეც ბევრი შემიძლია, ვისაუბრო. ლიდერობა მხოლოდ ის არ არის, რომ ვისაუბროთ, ყველაფერი კარგად არის და ამ ცხრა წლის განმავლობაში ჩვენ ყველაფერი გავაკეთეთო. პირიქით, ლიდერობა არის ის, რომ შენ აღიარებ გამოწვევებს და შენს გუნდთან ერთად მიჰყვები, თანმიმდევრულად დგამ ისეთ ნაბიჯებს, რომ ეს პრობლემები მოგვარდეს. ჩვენთვის უდიდესი გამოწვევაა ავარიული შენობა-ნაგებობები, რაც საკმაოდ ბევრი გვაქვს თბილისში – როგორც საცხოვრებელი სახლები, ისე კულტურული მემკვიდრეობის ძეგლის სტატუსის მქონე შენობები. გამოწვევები გვაქვს ასევე საცობების, ინფრასტრუქტურის, მიწისქვეშა კომუნიკაციების მიმართულებით. ასევე, გამოწვევაა იმ ადამიანების არსებობა, ვისაც მატერიალურად ძალიან უჭირს, სჭირდებათ ჩვენი თანადგომა. ზოგადად, ჩვენ ყველაფერს ვაკეთებთ, რომ ქვეყანა ეკონომიურად წინ წავიდეს, მეტი დოვლათი გაჩნდეს, რათა რაც შეიძლება ნაკლები სოციალურად დაუცველი ოჯახი გვყავდეს“, – აღნიშნა თბილისის მერმა.

სრულიად საქართველოს კათოლიკოს-პატრიარქი, მცხეთა-თბილისის მთავარეპისკოპოსი, ბიჭვინთისა და ცხუმ-აფხაზეთის მიტროპოლიტი, უწმინდესი და უნეტარესი შიო მესამე საქართველოში წმინდა ნინოს შემოსვლის დღესთან დაკავშირებით ფოკაში იმყოფება.პატრიარქმა ფოკაში პარაკლისი აღავლინა და შემდეგ იქადაგა.„გილოცავთ დღევანდელ დღესასწაულს, დღეს წმინდა ეკლესია აღნიშნავს სულიწმინდის დღეს, ასევე წმინდა მოციქულთა სწორ ნინოს შემობრძანებას საქართველოში. სულიწმინდის დღე, რომელიც დღეს აღინიშნება, მჭიდროდ უკავშირდება გუშინდელ დღესასწაულს, სულთმოფენობას, რომელიც ჩვენ ვიზეიმეთ. სულიწმინდა, ღმერთი, რწმენა უდიდეს სიხარულს ფენს ჩვენს მორწმუნეთა გულებს, რადგან სულიწმინდის რწმენასთან დაკავშირებულია ყველაზე მთავარი ქრისტიანული სასოება და მოლოდინები. როგორც ამბობს უფალი ჩვენი იესო ქრისტე, სულიწმინდის მოვლინების გამო დაითმინა მან საშინელი ტანჯვა და სიკვდილი. ამას ნიშნავს მისი სიტყვები, უმჯობესია თქვენთვის, მე წავიდე, რადგან მე თუ არ წავალ, ნუგეშინის მცემელი ვერ მოვა თქვენთან, ხოლო თუ წავალ, მე მოგივლენთ მას. აი, სულთმოფენობის შემდეგ აღსრულდა მისი ნათქვამი და ამიერიდან საფუძველი დაედო დედამიწაზე ქრისტეს ეკლესიას, რომელშიც მოქმედებს და სუფევს სულიწმინდა. გილოცავთ ამ დღესასწაულს. როგორც წმინდა მამები გვასწავლიან, სულიწმინდის მადლის მოხვეჭა უნდა იყოს მთავარი მიზანი ქრისტიანის ცხოვრების, რამეთუ ამაში მდგომარეობს სულის ცხონება, რომ უფალს სათნო ვეყოთ სულიწმინდის მადლის მოხვეჭით. მხოლოდ სულიწმინდის მიერ შეიძლება გაიხსნას ჩვენში სასუფეველი ღვთისა, რომელზეც ბრძანებს უფალი იესო ქრისტე, რომ სასუფეველი ღვთისა თქვენშია, უნდა ვეძიოთ პირველად სასუფეველი ღვთისა. ამიტომ აქვს უდიდესი მნიშვნელობა ჩვენთვის სულიწმინდის რწმენას. შემთხვევითი არ არის, რომ წელს, საიუბილეო წელს სულიწმინდის დღის დღესასწაული დაემთხვა წმინდა ნინოს შემობრძანებას საქართველოში. ეს არის კიდევ ერთი ნიშანი იმისა, რომ, მოციქულ ანდრია პირველწოდებულის, მოციქულ სიმონ კანანელის და სხვა მოციქულების მსგავსად, რომლებმაც ჩვენს მიწა-წყალზე იქადაგეს, წმინდა ნინოც იყო განტკიცებული და აღვსილი იმავე სულიწმინდის ძალით, მადლით და ძალით მოაქცია მან ჩვენი ერი ქრისტეს სარწმუნოებაზე. წმინდა ნინოსადმი მიძღვნილ ლოცვებში და საგალობლებში წმინდა ეკლესია მას უწოდებს „დედისა ღვთისა საკუთარ მოწაფეს“ და ეს ჭეშმარიტად ასეა. ისევე როგორც ანდრია პირველწოდებულს, ყოვლადწმინდა ღვთისმშობელმა მიანდო დედა ნინოს საქართველოს მოქცევა და ქრისტეს ჭეშმარიტებაზე, ქრისტეს ნათლით განათლება. მიანდო ამ ნორჩ ქალწულს ეს უდიდესი მისია, რითაც გამოვლინდა დედა ღვთისმშობლის განსაკუთრებული დედობრივი ზრუნვა თავის წილხვედრ ქვეყანაზე, საქართველოზე.ათას შვიდასი წელი გავიდა მას შემდეგ, რაც წმინდა ნინოს სიტყვით მოქცეულმა ქართველმა ერმა ქრისტიანობა სახელმწიფო რელიგიად გამოაცხადა. ეს არ იყო მხოლოდ რელიგიური თარიღი და მოვლენა, არამედ ამ თარიღმა განსაზღვრა მთელი ჩვენი ერის შემდგომი ცხოვრება. წარმოშვა უამრავი დიდი ადამიანი, მოღვაწე და წმინდანი, ამ მოვლენამ აგვაშენებინა საოცარი ტაძრები, მონასტრები, შეგვაქმნევინა უნიკალური თვითმყოფადი ქრისტიანული კულტურა, რწმენამ ჩამოაყალიბა ჩვენი თვითმყოფადი, ეროვნული, სარწმუნოებრივი იდენტობა.ძალიან ამაღელვებელია აქ ყოფნა, ფარავნის ტბასთან, ჯავახეთის ამ მადლიან მიწაზე, საიდანაც დაიწყო ის დიდი სულიერი გზა, რომელმაც საბოლოოდ მიიყვანა ქართველი ერი და სრულიად საქართველო გაქრისტიანებამდე. როგორც მოგეხსენებათ, უკვე მრავალი წელია, ყოველ ამ დღეს, პირველ ივნისს მორწმუნეები იწყებენ მსვლელობას წმინდა ნინოს გზაზე, რითაც გამოხატავენ მისდამი პატივისცემას, ამყარებენ ერთგვარ ისტორიულ კავშირს მის ღვაწლსა და პიროვნებასთან. მინდა, დღეს დავლოცო ყოველი მონაწილე წმინდა ნინოს გზისა, სასულიერო პირები თუ საერო პირები, ღმერთმა დაგლცოთ და გაგაძლიეროთ. მინდა, განსაკუთრებით დავლოცო ის სამღვდელო და სამონაზვნო დასი, რომელიც მოღვაწეობს ჯავახეთის წმინდა მიწაზე და თავისი ღვაწლით მართლმადიდებლობის, ქართული ენის, ჩვენი ტრადიციებისა და ღირსების სადარაჯოზე დგანან. ვევედროთ წმინდა ნინოს, დაგვლოცოს, დაიფაროს ჩვენი სამშობლო, საქართველო. დედა ღვთისმშობლის მეოხებით და წმინდა ნინოს ლოცვით ღმერთმა დალოცოს, გააძლიეროს და გაამთლიანოს სრულიად საქართველო“, – განაცხადა შიო მესამემ ქადაგებისას.