“მსოფლიო რაგბმა” 2018 წლის 20-წლამდე მსოფლიო ჩემპიონატის კალენდარი გამოაქვეყნა, რომელსაც საფრანგეთის სამი ქალაქი – პერპინიანი, ბეზიე და ნარბონი 30 მაისიდან 17 ივნისის ჩათვლით უმასპინძლებს.
უმცროსი ბორჯღალოსნები “მსოფლიო რაგბის” 20-წლამდელთა ჩემპიონატში ზედიზედ მესამედ ითამაშებენ. „C“ ჯგუფში მათი მეტოქეები საფრანგეთის, სამხრეთა აფრიკისა და ირლანდიის ნაკრებები იქნებიან. ჩვენი გუნდი პირველ თამაშს 30 მაისს, თბილისის დროით 20:30-ზე, პერპინიანში, 2017 წლის ჩემპიონატის ბრინჯაოს მედალოსან სამხრეთ აფრიკასთან გამართავს.
3 ივნისს უმცროსი “ბორჯღალოსნები” მასპინძლებს 16 საათზე ბეზიეში ეთამაშებიან. 7 ივნისს ჯგუფური ეტაპის დასკვნით მატჩში ირლანდიას ნარბონში 20:30-ზე შეხვდებიან.
პლეი ოფის შეხვედრები 12 ივნისს, ნარბონსა და პერპინიანში გაიმართება, ხოლო ფინალურ შეხვედრებს ბეზიეს ორი სტადიონი უმასპინძლებს. “მსოფლიო რაგბის” 20-წლამდელთა ჩემპიონატი მე-11-ედ იმართება. მე-10, საიუბილეო ტურნირს საქართველომ უმასპინძლა და საყოველთაო აღიარებით, ის აქამდე ჩატარებულ ტურნირებს შორის საუკეთესო იყო.