საქართველოს პრეზიდენტი მიხეილ ყაველაშვილი ვაზიანში საქართველოს თავდაცვის ძალების აღმოსავლეთის სარდლობის მე-4 ქვეით და მე-5 საარტილერიო ბრიგადებს ესტუმრა. პრეზიდენტი სამხედრო მოსამსახურეებს შეხვდა და მათ საცხოვრებელ პირობებსა და ბაზაზე არსებულ ვითარებას გაეცნო. უმაღლეს მთავარსარდალს საქართველოს ვიცე-პრემიერმა, თავდაცვის მინისტრმა ირაკლი ჩიქოვანმა, თავდაცვის ძალების მეთაურმა და თავდაცვის ძალების სხვა ხელმძღვანელმა პირებმა უმასპინძლეს.
პრეზიდენტს აღმოსავლეთის სარდლობის სტრუქტურის, ამოცანებისა და მიზნების შესახებ პრეზენტაცია წარუდგინეს. მიხეილ ყაველაშვილმა ვაზიანის სამხედრო ნაწილის ინფრასტრუქტურა – ყაზარმები, ლაზარეთი, სიმულაციების ცენტრი და სპორტული დარბაზი დაათვალიერა.
“დღეს ვიმყოფებოდი ვაზიანის სამხედრო ბაზაზე, შევხვდი აღმოსავლეთ სარდლობის მეოთხე ქვეითი ბრიგადის და ასევე მეხუთე საარტილერიო ბრიგადის სამხედროებს, გავეცანი მათ საცხოვრებელ პირობებს და სიამაყით მინდა აღვნიშნო, რომ ეს ყველაფერი არის მაღალ დონეზე. ყველანაირი პირობა გააჩნია ჩვენს სამხედროებს, რომ ისინი მზადყოფნაში და ემსახურონ ჩვენს სამშობლოს. დიდი მადლობა თავდაცვის მინისტრს და ასევე გენერალიტეტს, რომ ყველა პირობას უქმნიან იმისთვის, რათა ჩვენი სამხედროები მაღალ დონეზე იყვნენ წარმოდგენილები. ასევე მნიშვნელოვანია მათი დაფასება საზოგადოებაში იმიტომ, რომ ისინი არიან ჩვენი საზოგადოების საამაყო ნაწილი და მე როგორც პრეზიდენტი ყოველთვის ვიქნები მათი მხარდამჭერი და ყოველთვის ვიქნები მათ გვერდში”, – აცხადებს საქართველოს პრეზიდენტი მიხეილ ყაველაშვილი.