მამუკა მდინარაძე ოპოზიციაზე: არ არის გამორიცხული, პირველივე სხდომაზე შემოვიდნენ – იმიტომ დაწერეს უფლებამოსილების ცნობამდე განცხადებები, რომ მართლა არ მოუწიოთ პარლამენტის დატოვება და მანდატებზე უარის თქმა

ჩვენ განვაცხადეთ, რომ არჩევნები არ ჩატარებულა საქართველოში, შესაბამისად, „ძლიერმა საქართველომ“ განაცხადა, რომ კანონის შესაბამისად აბარებს მანდატებს, ჩახსნის სიას. ეს არის მკაფიო, წყალი არ გაუვა. ამავე დროს, ეს ყველაფერი უნდა მოხდეს ოთხივე ოპოზიციური პარტიის ერთდროული მოქმედებით, – ამის შესახებ „ძლიერი საქართველოს“ ერთ-ერთმა ლიდერმა, მამუკა ხაზარაძემ ერთ-ერთი მედიის ეთერში განაცხადა. ხაზარაძეს გადაცემის წამყვანმა მიმართა, რომ „მეოთხე პარტია, გახარია არ აპირებს უფლებამოსილების შეწყვეტას და სიის ჩახსნას“, რაზეც ხაზარაძემ განაცხადა: „ეს არის დიდი პრობლემა, მაშინ ახლავე უნდა ვთქვათ, რომ როცა ამბობ, ლეგიტიმაციას არ მივცემ პარლამენტს, ეს არის ტყუილი და იღებ პასუხისმგებლობას. სიების ჩახსნა და ბოიკოტი სხვადასხვა რაღაც არის. ბოიკოტი არ არის ლეგიტიმაციის არმიცემა. მოდით, ყველაფერს თავისი სახელი დავარქვათ. მინდა, ძალიან კორექტული ვიყო. იცით, მე და ჩვენს პარტიას მორატორიუმი გვაქვს გამოცხადებული თავდაუსხმელობის შესახებ, ბევრი ნაბიჯი გადავდგი ამისკენ, მაგრამ საკითხი ეხება ჩვენს ხვალინდელ დღეს. ახლა სიტყვებით გაფორმება და შემდეგ უცბად, „გაპრავება“ არალეგალური, მოპარული არჩევნების და „ქართული ოცნების“, არ გამოვა. ამიტომ უნდა შევიკრიბოთ ოთხივე. მაშინ გაუგებარია, დანარჩენი სამი პარტია რატომ ტოვებს მანდატებს. ერთმანეთს და საზოგადოებას ნუ მოვატყუებთ. თუ ბრძოლაა, იყოს ბრძოლა ბოლომდე გულწრფელი და ხვალინდელი დღისთვის. იმაზე თუ არის ლაპარაკი, რომ ვიღაცას ხელფასი უნდა პარლამენტში, შემდეგ კომისიებში ჩაჯდომა, უცხოეთში მოგზაურობა და თან ბოიკოტში ხარ – ასე არ ხდება. უნდა ვიცოდეთ, ვინ რა პოლიტიკურ პასუხისმგებლობას იღებს. პირდაპირ უნდა ვუთხრათ ერთმანეთს. ბოიკოტი არ არის მანდატების ჩახსნა. არავის ვაიძულებ, არც სურვილი მაქვს და არც თავს მივცემ უფლებას, ვიღაც ვაიძულო. სხვათა შორის, ქართულ პოლიტიკაში ბევრს აქვს ამისი სურვილი და მათაც მოვუწოდებ, მსგავს მეთოდებს ყველამ თავი დაანებოს. ამას არ ვაკეთებ. ეს დამკვიდრებული პრაქტიკაა“, – განაცხადა მამუკა ხაზარაძემ. ჟურნალისტმა ხაზარაძეს კითხვა დაუსვა, ოპოზიციაში ხომ არ არის ეს პრაქტიკა დამკვიდრებული, რაზეც მან აღნიშნა: „დიახ, მაგრამ ამაზე არ არის საუბარი ახლა. მინდა, ყველას ვუთხრა, რომ ეს მეთოდები მოძველებულია – დაბულინგება, „ფეისბუქის“ სტატუსები, ვიღაცების მოთაგვა თუ რაღაც. მოდით, რა ხვალინდელ დღეზე ვილაპარაკოთ. ყველამ გადადოს გვერდზე ბავშვობა, ზურგში მოპარვა და თითქოს რაღაც ეგოების თამაში. საუბარია ჩვენი ქვეყნის ხვალინდელ დღეზე. ეს მამოძრავებს მე დღეს. ან ბრძოლაში მივდივარ ბოლომდე, ან დღესვე ვიღაცამ პირდაპირ თქვას, რომ „ქართულ ოცნებას“, ამ პარლამენტს ვუკეთებ ლეგიტიმაციას. ნახევრად ფეხმძიმე ვითარება არ შეიძლება, იყოს. ყველამ თავის გულში ჩაიხედოს და თქვას, თუ ეს არის გულწრფელი ბრძოლა და ყველას გვინდა ახალი არჩევნები, გადავარჩინოთ ქვეყანა და იყოს სამართლიანი არჩევნები. ეს ჩემთვის პრინციპული საკითხია. იცით, ეს პოზიცია დავაფიქსირე, განცხადებაც გვქონდა გაკეთებული, ოთხივე პარტია შევიკრიბოთ პრეზიდენტთან. პრეზიდენტი მზაობას გამოთქვამს, თუ ოთხივე პარტია მივა მასთან. ეს უკვე ფრონტია, ეს უკვე პოზიციაა, მართლა კუთხეში მიყენებაა „ქართული ოცნების“ და გარანტიას გაძლევთ, ძალიან მალე ახალი არჩევნები ჩაინიშნება“, – განაცხადა მამუკა ხაზარაძემ. კიდევ ერთ კითხვაზე, „სინქრონი თუ არ იქნა და გახარიას პარტია არ ჩახსნის სიებს, აზრს კარგავს ამის გაკეთება თქვენგანაც?“, ხაზარაძემ აღნიშნა: „ეს არ მითქვამს, ჩვენ უნდა გავაკეთოთ ყველაფერი და უნდა ავუხსნათ გახარიას პარტიას, რომ ეს არ არის ბრძოლა. მესმის, რომ მათ თავიანთი სტრატეგია აქვთ, მაგრამ ჩვენ უნდა ავუხსნათ მას და საზოგადოებამაც მკაფიოდ უნდა დააფიქსიროს თავისი პოზიცია, მისმა ამომრჩეველმა უნდა დააფიქსიროს თავისი პოზიცია, რომ ეს არის მნიშვნელოვანი საკითხი. მოლაპარაკებების, დარწმუნების და ახსნა-განმარტების გზით. რაც არ უნდა საოცარი იყოს ,ამ ბოლო დროს მე გამოვდივარ რაღაც ყველაზე დიდი ადვოკატი  გახარიასი და მისი პარტიის. დარწმუნებული ვარ, მის გუნდში მიზნის მიღწევა უნდათ, ისევე როგორც ჩვენ. ამიტომ კონსულტაციები უნდა გაიმართოს, ეს ალტერნატიული სახალხო პარლამენტი უნდა გაკეთდეს, კოალიციამ და კოალიციებმა თანამშრომლობა უნდა გააუმჯობესონ. ოთხი კოალიცია უნდა ვსაუბრობდეთ ერთად საქმისთვის. ვინაიდან მოხდა პრეცედენტი ვენესუელაში, გარანტიას გაძლევთ, ეს ამბავი მოხდება საქართველოში, თუ კიდევ ერთხელ ვიქნებით თანმიმდევრულები, მტკიცენი, გვექნება კარგი კოორდინაცია ამ ოთხ ოპოზიციურ კოალიციას. სხვა რას გააკეთებს, ამას ვნახავთ, მაგრამ ახლა ჯინიანობის დრო არ არის, ახლა არის დარწმუნების, ახსნა-განმარტებების და იმის ჩვენების დრო, რომ ოთხივე ერთად თუ არ დავდგებით და სტრატეგიაზე არ შევთანხმდებით, უბრალოდ, ქვეყანას წავაგებთ. ამიტომ, ეს საკითხი არის დისკუსიის და შეხვედრებისთვის გადადებული. ვთხოვ თქვენი ტელეეთერიდან გახარიას გუნდს და გახარიას, უახლოეს ხანში შევხვდეთ და ამ თემაზე ვისაუბროთ, რადგან ამ საკითხში ბუნდოვანება არ შეიძლება იყოს“, – განაცხადა ხაზარაძემ.

რუსეთი მიიჩნევს, რომ უფლება აქვს, გამოიყენოს იარაღი იმ ქვეყნების სამხედრო ობიექტების წინააღმდეგ, რომლებიც იარაღს მის წინააღმდეგ იყენებენ, – ამის შესახებ რუსეთის პრეზიდენტმა, ვლადიმერ პუტინმა განაცხადა. პუტინის თქმით, რუსეთი გადამწყვეტად და სარკისებურად უპასუხებს ესკალაციას. „მიგვაჩნია, რომ გვაქვს უფლება, გამოვიყენოთ ჩვენი იარაღი იმ ქვეყნების სამხედრო ობიექტების წინააღმდეგ, რომლებიც ჩვენი სამიზნეების წინააღმდეგ იარაღის გამოყენების ნებას რთავენ და აგრესიული მოქმედებების ესკალაციის შემთხვევაში, ჩვენ ასევე ვუპასუხებთ გადამწყვეტად და სარკისებურად. ამ საკითხზე სერიოზულად დაფიქრებას ვურჩევ იმ ქვეყნების მმართველ ელიტებს, რომლებიც რუსეთის წინააღმდეგ სამხედრო კონტინგენტების გამოყენების გეგმებს აყალიბებენ“, – განაცხადა პუტინმა. მიმართვაში პუტინმა ასევე აღნიშნა, რომ უკრაინაში მიმდინარე კონფლიქტმა გლობალური სახე შეიძინა. „როგორც ჩვენ არაერთხელ აღვნიშნეთ, უკრაინაში მიმდინარე კონფლიქტმა, რომელიც მანამდე დასავლეთის მიერ იყო პროვოცირებული, ამ მომენტიდან გლობალური სახე შეიძინა“, – განაცხადა პუტინმა.

საქართველოს საკალათბურთო ნაკრებმა ევრობასკეტი 2025-ის შესარჩევ ეტაპზე ესპოოში ფინეთის წინააღმდეგ ითამაშა და 90:83 გაიმარჯვა. მომდევნო შეხვედრას საქართველოს ნაკრები 24 ნოემბერს თბილისში ისევ ფინეთთან გამართავს, გადამწყვეტი ორი ტური კი თებერვალში გაიმართება: საქართველო დანიას უმასპინძლებს და სერბეთს ესტუმრება.

ეს გადაწყვეტილებები სავალდებულოა რომის სტატუტის მონაწილე ყველა სახელმწიფოსთვის, რომელიც მოიცავს ევროკავშირის ყველა წევრ სახელმწიფოს, – ასე გამოეხმაურა საგარეო პოლიტიკისა და უსაფრთხოების საკითხებში ევროკავშირის უმაღლეს წარმომადგენელი ჯოზეფ ბორელი მართლმსაჯულების საერთაშორისო სასამართლოს მიერ ბენიამინ ნეთანიაჰუს, იოავ გალანტისა და „ჰამასის“ ლიდერის, მოჰამედ დეიფის დაკავების ორდერის გაცემას. „მე ვითვალისწინებ მართლმსაჯულების საერთაშორისო სასამართლოს გადაწყვეტილებას ისრაელის პრემიერ-მინისტრ ბენიამინ ნეთანიაჰუს, თავდაცვის ყოფილი მინისტრის, იოავ გალანტისა და „ჰამასის“ ლიდერის, დეიფის დაკავების ორდერის გაცემის შესახებ. ეს გადაწყვეტილებები სავალდებულოა რომის სტატუტის მონაწილე ყველა სახელმწიფოსთვის, რომელიც მოიცავს ევროკავშირის ყველა წევრ სახელმწიფოს“, – წერს ბორელი სოციალურ ქსელში.

ბოიკოტის პარალელურად, ოპოზიციიდან ელჩებს მიმართავენ - "გახარია საქართველოსთვის" ლიდერმა უცხოელ დიპლომატებს მოუწოდა, არ დაესწრონ ახალი მოწვევის პარლამენტის პირველ სხდომას, რათა მას ლეგიტიმაცია არ მიეცეს. ამავდროულად, გიორგი გახარია მხარდამჭერებს მიმართავს სხდომის დღეს პროტესტი გამოხატონ. "როდესაც ქვეყანა აშკარად ლეგიტიმაციის კრიზისშია, მაშინ როდესაც საქართველოს თითოეული მოქალაქე თვლის, რომ არჩევნები და ხმა მას მოჰპარეს, რა თქმა უნდა, მე კიდევ ერთხელ დიდი პატივისცემით, მინდა ვთხოვო ჩვენს ქვეყანაში აკრედიტებულ ელჩებს არ დაესწრონ მე-11 მოწვევის პარლამენტის პირველ სხდომას, რათა არ მისცენ შესაძლებლობა "ქართულ ოცნებას" მანიპულირების და სპეკულირების - ლეგიტიმაციის მიღების. მეორე მხრივ, საქართველოს თითოეულ მოქალაქეს და ჩვენს მხარდამჭერს, მინდა ვთხოვო და მოვუწოდო, რომ იმ დღეს, როცა პარლამენტის პირველი სხდომა ჩატარდება, ყველამ ერთად გავაგონოთ ჩვენი საპროტესტო ხმა დღევანდელ ხელისუფლებას," - განაცხადა გიორგი გახარიამ.