როგორც აქამდე არ ტოვებდა სახელმწიფო ონკოპაციენტს ყურადღების მიღმა, ისევე გაგრძელდება, უბრალოდ ამ ყურადღებას კიდევ ერთი ძალიან კარგი ამბავი, პოზიტიური ამბავი, ახალი 25000 ლარიანი პაკეტი დაემატა, იმისათვის, რომ თავიდან ვისაც რა დასჭირდება ამ ფარგლებში იმკურნალონ, ხოლო შემდეგ, როგორც აქამდე იყო ისე გაგრძელდება მათი მკურნალობა, – ამის შესახებ „ქართული ოცნების“ აღმასრულებელმა მდივანმა, ფრაქცია „ქართული ოცნების“ თავმჯდომარემ მამუკა მდინარაძემ განაცხადა. მდინარაძის თქმით, ონკოლოგიური პაციენტების მკურნალობა სენსიტიური თემაა და 25 000 ლარიანი პაკეტი მათი დახმარების დამატებით რესურსს წარმოადგენს.
„მას შემდეგ რაც დამატებითი რესურსის სახით ონკოპაციენტებისთვის საბაზისო 25 000 ლარიანი, ცალკე პაკეტი გამოიყო, ვიღაცები ცდილობენ, რომ ეს პოზიტიური და ძალიან კარგი ამბავი პირიქით შეატრიალონ, იქიდან გამომდინარე, რომ ონკოპაციენტებს სახელმწიფო აქამდეც ეხმარებოდა ამ 25000 ლარიანი საბაზისო დამატებითი პაკეტის გარეშე. ანუ ახლა გვაქვს ასეთი მოცემულობა, მე რაც ვიცი და რა ინფორმაციაც მაქვს, რომ 25000 ლარიანი დახმარება არის ცალკე პაკეტად, რომლის ამოწურვის შემთხვევაში სახელმწიფო ისედაც, სულ რომ არ იყოს პაკეტი, ისედაც ეხმარებოდა ონკოპაციენტებს და არცერთ მათგანს არ ტოვებდა ყურადღების გარეშე. გაგრძელდება, იქ არის რეფერალური ფონდები და ა.შ., დეტალურად რა თქმა უნდა ამის ჩამოთვლას მე ვერ დავიწყებ.
როგორც ვიცი ინდივიდუალურ განხილვას საჭიროებს შემდეგ და ყველა კონკრეტულ შემთხვევაში იწერებოდა განცხადება, შეისწავლებოდა თემა და ეხმარებოდნენ ხოლმე პაციენტებს. შესაბამისად, ვიღაცების მცდელობა ასეთ სენსიტიურ თემაზე, ამ ადამიანებს თავისი პრობლემები აქვთ და თანამედროვე სამყაროში მე მგონი განუკურნებელი სენი არ არსებობს, მთავარია დროული პროფილაქტიკური სამედიცინო ღონისძიებები და ა.შ. და ამ ადამიანებს ნაცვლად იმისა, რომ იმედი მივცეთ, შემოვუძახოთ, გვერდზე ისედაც ვუდგავართ, როგორც ფინანსურად, მორალურად, ყველანაირად, ამის ნაცვლად ვიღაცები ამაზე პიარის აგორებას აპირებენ და ძალიან ვთხოვ ყველას რომ დაანებონ ამ ხალხს თავი, ნუ მიაწვდიან არასწორ ინფორმაციას, მიაწოდონ სწორი ინფორმაცია, ჯანდაცვის სამინისტრო კომუნიკაციაში იქნება დარწმუნებული ვარ, აუხსნიან დეტალურად და ბუნებრივია დახმარება როგორც აქამდე იქნება ისე გაგრძელდება.“ – განაცხადა მამუკა მდინარაძემ.