ნახევრად სიმართლის ლაპარაკი, აბსოლუტური შეცდომაა, რადგან ნახევრად სიმართლე გულისხმობს, რომ ნახევარს მალავ. იმის ძახილი, რომ 4 ოქტომბერი იყო გამარჯვების დღე, ამ თვალსაზრისით არის ძალიან მძიმე. ადამიანები აღმოჩნდნენ ციხეებში და არ მგონია, განსაკუთრებით, მათი ოჯახის წევრები ამას გამარჯვების დღედ თვლიდნენ, – ამის შესახებ „ნაციონალური მოძრაობის“ წევრმა, ლევან სანიკიძემ განაცხადა.
სანიკიძის შეფასებით, 4 ოქტომბერი ბრძოლის დღე ნამდვილად იყო, მაგრამ გამარჯვების დღე არ ყოფილა.
„თავს უფლებას ვაძლევ, ასე თამამად ვილაპარაკო ამ თემაზე, რადგან მათი ოჯახის წევრები იქნება, უშუალოდ ორგანიზატორების ოჯახის წევრები, თუ თავად ორგანიზატორებიც დაკავებამდე ღიად საუბრობდნენ ღალატზე, გეგმის არევაზე. ღიად საუბრობდნენ, რამდენად იყო ამ გეგმის ნაწილი საერთოდ ათონელის სასახლესთან ჩასვლა. ის, რომ პაატა ბურჭულაძე მანამდე არაერთგზის აფიქსირებდა, აირწინაღიც კი არ უნდა ყოფილიყო საჭირო მათ მიერ შემუშავებული გეგმის ბოლომდე მისაყვანად, იყო ფაქტი. კაცი იყო მისული ოფიციალური ტანსაცმლით და 8 წლის შვილიშვილთან ერთად. არ მგონია, მას იმ სცენის ნახვა სურდა, რაც ჩვენ ათონელზე ვიხილეთ. მგონია, რომ აქ საქმე გვაქვს ძალიან დიდ ღალატთან, გეგმის არევასთან, ამ ადამიანებთან დეზინფორმაციული ნაკადის მიწოდებასთან.
ძალიან მძიმე საკითხია, რადგან ეს ადამიანები ციხეში სხედან და ნამდვილად არ მინდა მათთვის დამატებითი წნეხის დაწესება, რომ გამოვიდნენ და ყველაფერი მოყვნენ, მაგრამ მგონია, რომ ეს უკვე ვალდებულება არის. უნდა ითქვას, ზუსტად რა იყო ჩანაფიქრში 4 ოქტომბერი, „ქართულ ოცნებას“ რომ ხელ-ფეხი არ გაეხსნას, კიდევ უფრო დამატებითად რომ ილაპარაკოს, „სხვანაირად კი არ უნდოდათ, ესე უნდოდათ და ჩვენ ვიცოდით“, ასე შემდეგ. მთავარია, ითქვას, ვინ არიან ის მოღალატეები, ვინ არიან ის გავლენიანი ადამიანები, ვისზეც მათ შორის დაკავებამდე ბატონი მურთაზ ზოდელავა საუბრობდა“, – განაცხადა ლევან სანიკიძემ „პალიტრანიუსის“ ეთერში.