ლატვიის პრემიერი – ვაფასებთ ინიციატივებს, რომლებიც საქართველომ დემოკრატიის დასაცავად მიიღო, ხალხი გადაწყვეტს, არის თუ არა მათი გზა ევროპა, რისთვისაც იბრძოდნენ მოლდოვა, ბალტიის ქვეყნები

ქრთამის აღების, ყალბი ოფიციალური დოკუმენტების დამზადების, გასაღებისა და ჯგუფურად კომერციული მოსყიდვის, სახელმწიფოს კუთვნილი თანხებისა და მიწის ნაკვეთების თაღლითურად დაუფლებისა და სამსახურებრივი უფლებამოსილების ბოროტად გამოყენების ფაქტებზე დაკავებული და სისხლის სამართლის პასუხისგებაში 28 პირია მიცემულია, - ამის შესახებ სახელმწიფო უსაფრთხოების სამსახურში გამართულ ბრიფინგზე სუს-ის ანტიკორუფციული სააგენტოს დირექტორმა, ემზარ გაგნიძემ განაცხადა.მისივე თქმით, მასშტაბური ღონისძიებები 9 რეგიონში ჩატარდა.„სახელმწიფო უსაფრთხოების სამსახურის ანტიკორუფციული სააგენტოს თანამშრომლების მიერ საქართველოს 9 რეგიონში ჩატარებული მასშტაბური ღონისძიების შედეგად, 14 სხვადასხვა სისხლის სამართლის საქმეზე გამოვლენილ დანაშაულებთან დაკავშირებით, მათ შორის ქრთამის აღების, ყალბი ოფიციალური დოკუმენტების დამზადების, გასაღებისა და ჯგუფურად კომერციული მოსყიდვის, სახელმწიფოს კუთვნილი თანხებისა და მიწის ნაკვეთების თაღლითურად დაუფლებისა და სამსახურებრივი უფლებამოსილების ბოროტად გამოყენების ფაქტებზე, დაკავებული და სისხლის სამართლის პასუხისგებაში მიცემულია, ჯამში, 28 პირი.სახელმწიფო შესყიდვების ფარგლებში სახელმწიფოს კუთვნილი თანხების თაღლითურად დაუფლების ფაქტებზე, ხუთ სხვადასხვა სისხლის სამართლის საქმეზე დაკავებულია 3 პირი, ხოლო 11 პირს წარედგინა ბრალდება.კერძოდ, საქმე ეხება წალკის, ახალციხისა და თეთრიწყაროს მუნიციპალიტეტებში, სხვადასხვა კერძო კომპანიის მიერ გზის მონაკვეთის, სასმელი წყლის შიდა ქსელისა და საჯარო სკოლების სარეაბილიტაციო სამუშაოების განხორციელების დროს, დოკუმენტაციების გაყალბებისა და უკანონო ქმედებების შედეგად, თაღლითურად მითვისებულ ათიათასობით ლარს. ამასთან, აღნიშნულ სისხლის სამართლის საქმეებზე მიმდინარე გამოძიებით ასევე დგინდება, რომ პასუხისგებაში მიცემული პირებიდან რამდენიმემ თბილისის საბავშვო ბაღებისა და ბათუმის უფასო სასადილოების მომსახურებისთვის გამოცხადებული სახელმწიფო შესყიდვების ფარგლებში, სხვადასხვა დროს, მიაწოდა ხელშეკრულებით გათვალისწინებულზე ნაკლები ოდენობის განსხვავებული მარკისა და სასაქონლო ნიშნის მქონე სააღდგომო სურსათი და დაბალი ხარისხის სადეზინფექციო საშუალებები. აღნიშნული უკანონო ქმედებების შედეგად, სახელმწიფოს, ჯამში, 669 497 ლარის ოდენობის ზიანი მიადგა.სახელმწიფოს კუთვნილი მიწის ნაკვეთების თაღლითურად დაუფლების, სამსახურებრივი უფლებამოსილების ბოროტად გამოყენებისა და სამსახურებრივი სიყალბის ფაქტებზე, სამ სისხლის სამართლის საქმეზე, 7 პირს ბრალდება წარედგინა.საქმე ეხება სხვადასხვა დროს, დმანისის, გურჯაანისა და წალკის მუნიციპალიტეტების მერიებისა და საკრებულოს რამდენიმე წარმომადგენლის მიერ სამსახურებრივი უფლებამოსილების ბოროტად გამოყენებით, ყალბი დოკუმენტაციის საფუძველზე, სახელმწიფოს კუთვნილი, ჯამში, 91 564 კვ.მ მიწის ნაკვეთის თაღლითურად დაუფლების ფაქტებს, რის შედეგადაც სახელმწიფოს, ჯამში, 397 804 ლარის ოდენობის ზარალი მიადგა.ქრთამის აღების ფაქტებთან დაკავშირებით კი, სისხლის სამართლის სამ საქმეზე დაკავებულია 3 პირი.გამოძიებით დადგინდა, რომ ლანჩხუთისა და თეთრიწყაროს მუნიციპალიტეტების მერიებისა და ონის სატყეო სამსახურის წარმომადგენლებმა, სხვადასხვა დროს, საქართველოსა და უცხო ქვეყნის მოქალაქეებისგან, სახელმწიფოს კუთვნილ მიწაზე მოძრავი სავაჭრო ობიექტის, ე.წ დრაივის განთავსებისა და შემდგომი მფარველობის, სახელმწიფო საკუთრებაში არსებული მიწის ნაკვეთის საფუტკრე მეურნეობის მოსაწყობად გადაცემისა და შემდგომი მფარველობის, ასევე კანონით აკრძალული მუხის მოჭრისა და სატყეო უბნიდან გამოტანის დაპირების სანაცვლოდ, ქრთამი აიღეს.სამ სისხლის სამართლის საქმეზე, ყალბი ოფიციალური დოკუმენტების დამზადების, გასაღებისა და ჯგუფურად კომერციული მოსყიდვის ფაქტებზე კი დაკავებულია 4 პირი.გამოძიებით დადგინდა, რომ დაკავებულებმა, სხვადასხვა დროს, ყალბი მართვის მოწმობის, საქართველოს მოქალაქის პასპორტისა და ერთ-ერთი კერძო უმაღლესი საგანმანათლებლო დაწესებულების ყალბი ბაკალავრის დიპლომის დამზადებისა და გასაღების სანაცვლოდ ქრთამი აიღეს.ზემოთ აღნიშნულ დანაშაულებთან მიმართებით, გამოძიების ფარგლებში, სასამართლოს განჩინებების საფუძველზე, განხორციელდა ფარული საგამოძიებო მოქმედებები, რის შედეგადაც მოპოვებულია აღნიშნული დანაშაულებრივი ქმედების ჩადენის ამსახველი აუდიო და ვიდეომტკიცებულებები.აღნიშნულ დანაშაულებრივ ქმედებებთან დაკავშირებით გამოძიება მიმდინარეობს სისხლის სამართლის კოდექსის 180-ე მუხლის II ნაწილის „ა“ და III ნაწილის „ბ“ ქვეპუნქტით, 196-ე მუხლის I ნაწილით და III ნაწილის „ბ“ ქვეპუნქტით, 221-ე მუხლის IV ნაწილით, 332-ე მუხლის I ნაწილით, 338-ე მუხლის I ნაწილით, 341-ე მუხლით და 362-ე მუხლის II ნაწილის „ბ“ ქვეპუნქტით.ანტიკორუფციული სააგენტო აგრძელებს მუშაობას ნებისმიერი კორუფციული დანაშაულის გამოვლენისა და პრევენციის მიზნით. აქვე აღვნიშნავთ, რომ კორუფციის წინააღმდეგ ბრძოლის ფარგლებში განსაკუთრებული ყურადღება ეთმობა ყველა სახის კორუფციული რისკების შეფასებასა და აღმოფხვრას. ამ მიმართულებით მიმდინარეობს ყოველდღიური მუშაობა, რათა კორუფციის დონე მინიმუმამდე იქნეს დაყვანილი”, - განაცხადა ემზარ გაგნიძემ.

საფრანგეთმა უკრაინას SCALP-ის ტიპის ფრთოსანი რაკეტების, მართვადი ბომბებისა და საზენიტო დამჭერი რაკეტების წარმოების ლიცენზია მისცა.განცხადება ემანუელ მაკრონმა მსურველთა კოალიციის შეხვედრის დასრულების შემდეგ გააკეთა. მისივე თქმით, მომდევნო თვეებში უკრაინის მეზობელ ქვეყნებში საზღვაო სახმელეთო და საჰაერო წვრთნა ჩატარდება, რომელშიც ის მრავალეროვნული სამხედრო კონტინგენტი მიიღებს მონაწილეობას, რომელიც მომავალში უკრაინაში განალაგდება.უკრაინა ასევე გეგმავს 16 ერთეული ფრანგული გამანადგურებლის, Rafale-ის შეძენას. საფრანგეთის პრეზიდენტის განცხადებით, ეს თვითმფრინავები უკრაინის ცაში ამოცანების შესრულებას 2028-2029 წლებში დაიწყებენ.

ცხრა ევროპული ქვეყანა უკრაინასთან ერთად ანტისარაკეტო კოალიციას შექმნის.საფრანგეთის პრეზიდენტის, ემანუელ მაკრონის ადმინისტრაციის ინფორმაციით, დანია, საფრანგეთი, გერმანია, იტალია, ნიდერლანდები, ნორვეგია, ესპანეთი, შვედეთი და გაერთიანებული სამეფო უკრაინასთან ერთად ერთობლივი ანტისარაკეტო კოალიციის შექმნაზე შეთანხმდნენ.„ჩვენ მიგვაჩნია, რომ ევროპის დასაცავად აუცილებელია გლობალური გადაწყვეტა. ინტეგრირებული არქიტექტურა, რომელიც მომავალი სარაკეტო საფრთხეების შეკავებასა და მოგერიებას უზრუნველყოფს. ეს სისტემა ერთობლივი ძალისხმევით, ტექნოლოგიური ღიაობისა და სამრეწველო თანამშრომლობის საფუძველზე უნდა შეიქმნას“,- ნათქვამია ათი ქვეყნის ერთობლივ დეკლარაციაში.ახალი კოალიცია გეგმავს, შეიმუშაოს საერთო ოპერატიული მოთხოვნები, შექმნას ერთობლივი სამუშაო ჯგუფები, განსაზღვროს სახელმწიფოებს შორის თანამშრომლობის მექანიზმები და შეადგინოს საგზაო რუკა, რომელიც პირველადი ოპერატიული შესაძლებლობების შექმნას უზრუნველყოფს.დეკლარაციაში აღნიშნულია, რომ კოალიციას შეძლებენ, შეუერთდნენ სხვა ქვეყნებიც, რომლებიც მის პრინციპებსა და მიზნებს იზიარებენ.ცნობისთვის, უკრაინის პრეზიდენტი ვოლოდიმირ ზელენსკი დღეს პარიზში ჩავიდა, სადაც საფრანგეთის პრეზიდენტ ემანუელ მაკრონსა და „მსურველთა კოალიციის“ წევრებს შეხვდება. მისი თქმით, ვიზიტის მთავარი თემა სწორედ ანტისარაკეტო პროგრამა იქნება.ბოლო პერიოდში ზელენსკი რეგულარულად მოუწოდებს პარტნიორებს, უკრაინას მეტი საჰაერო თავდაცვის სისტემა გადასცენ, რათა ქვეყანამ რუსეთის ბალისტიკური სარაკეტო შეტევების მოგერიება შეძლოს.

ქრისტიანობის მიღებამ და შემდგომ მართლმადიდებელი ეკლესიის ერთგულებამ განაპირობა ჩვენი ერის გადარჩენა როგორც ფიზიკურად, ასევე სულიერად... ეკლესიის ერთგულება და მოციქულთა გზის გაგრძელება არის საწინდარი ჩვენი შემდგომი გადარჩენისა და განვითარებისა, - ამის შესახებ უწმინდესმა და უნეტარესმა, სრულიად საქართველოს კათოლიკოს-პატრიარქმა, მცხეთა-თბილისის მთავარეპისკოპოსმა და ბიჭვინთისა და ცხუმ-აფხაზეთის მიტროპოლიტმა შიო III-მ თორმეტი მოციქულის ხსენების დღესთან (სვეტიცხოვლობასთან) დაკავშირებით სვეტიცხოვლის საპატრიარქო ტაძარში ქადაგებისას განაცხადა.პატრიარქის თქმით, „ვისაც ასე უყვარს უფალი, ის მის მცნებებსაც იცავს, იმიტომ, რომ როცა ვინმე გიყვარს, ცდილობ, მისი სიყვარულიც დაიმსახურო”.„სახელითა მამისათა და ძისათა და სულისა წმინდისათა! ყოვლადსამღვდელონო მეუფენო, პატიოსანნო მამანო, დედანო, ძვირფასო ძმებო და დებო! გილოცავთ თორმეტი მოციქულის ხსენებას და სვეტიცხოვლობას. დღეს ასევე არის ამ დიდებული ტაძრის დღესასწაული, რადგან ის თორმეტი მოციქულის სახელზეა აგებული.ჩვენ ხშირად ვერ ვაცნობიერებთ, რაოდენ მადლობელი უნდა ვიყოთ მოციქულების. მათი პიროვნებები, მათი ღვაწლი ხომ საფუძველია ჩვენი ეკლესიისა. შეიძლება ითქვას, დღეს ჩვენი ერი რომ არსებობს და ცოცხლობს, ეს მათი ღვაწლის, მათი ქადაგების დამსახურებაა, რადგან ქრისტიანობის მიღებამ და შემდგომ მართლმადიდებელი ეკლესიის ერთგულებამ განაპირობა ჩვენი ერის გადარჩენა როგორც ფიზიკურად, ასევე სულიერად. რა თქმა უნდა, ჩვენ ვფიქრობთ, რომ ეკლესიის ერთგულება და მოციქულთა გზის გაგრძელება არის საწინდარი ჩვენი შემდგომი გადარჩენისა და განვითარებისა.წელს ჩვენ აღვნიშნავთ საქართველოში ქრისტიანობის სახელმწიფო რელიგიად გამოცხადებიდან 1700 წლისთავს. ბედნიერნი ვართ, რომ ამ თარიღს აღვნიშნავთ და ეს არის სწორედ მათი ღვაწლის, მათი ქადაგების დამსახურება, რამეთუ წმინდა ნინოს ღვაწლიც იყო მათი მსახურების გაგრძელება.მოხარულნი ვართ, რომ დღეს, ჩვენს ეპოქაშიც, ჩვენს უახლეს ისტორიაში არიან ასეთი მოღვაწეები და მოვესწარით ასეთ ადამიანებს. ერთ-ერთი უპირველესი დღეს მსოფლიო მართლმადიდებელ ეკლესიაში გახლავთ ჩვენი აწ განსვენებული სრულიად საქართველოს კათოლიკოს-პატრიარქი ილია II. ბედნიერნი ვართ, რომ მოვესწარით მის ღვაწლს და ვართ მისი მემკვიდრეები, ასევე, როგორც მოგახსენეთ, მოციქულთა მემკვიდრეებიც ვართ, პირველ რიგში.აი, დღეს დავფიქრდეთ, ვართ თუ არა მზად, გავაგრძელოთ ეს მემკვიდრეობა, მივბაძოთ მათ მაგალითს, გავყვეთ მათ გზას.დღეს სამოციქულოში წაკითხული იყო პავლე მოციქულის სიტყვები: „მობაძავ ჩემდა იქმნენით, როგორც მე ქრისტესი“ (1 კორ. 11,1). ვართ თუ არა მზად, მათი მიმბაძველები გავხდეთ? იმიტომ, რომ მათ თავიანთი ღვაწლი აღასრულეს სიცოცხლის ფასად და უკლებლივ ყველა მათგანი მოწამებრივად აღესრულა, გარდა იოანე ღვთისმეტყველისა, რომელმაც ასევე უამრავი ტანჯვა დაითმინა. ვართ თუ არა მზად ამ გზისთვის, ვიყოთ მათი მოწაფენი და გამგრძელებლები?აი, დავფიქრდეთ ჩვენს თავზეც. მაგალითად, როდესაც მოგველის რაიმე ამქვეყნიური, მიწიური სარგებელი, ხშირად მზად ვართ, დავითმინოთ მრავალგვარი ჭირი, განსაცდელი, მწუხარება, დამცირებაც და სასჯელიც კი, ოღონდ ამ ჩვენს სხვადასხვა მიწიურ მიზანს მივაღწიოთ, რადგან, ვიმეორებ, მოგველის გარკვეული სარგებელი.მაგრამ სულის გადარჩენის საქმეში, ასევე იმაში, რომ თუ შეიძლება ასე ვთქვათ, ღმერთის კეთილგანწყობა მოვიპოვოთ, ხშირად ვიჩენთ სიზარმაცეს, უდარდელობას, უზრუნველობას და უმადურობას. რა გამართლება გვექნება ასეთი საქციელისთვის, მაშინ, როცა ვხედავთ, რომ ამდენი სიკეთე მივიღეთ ღმერთისგან - ჩვენმა ქვეყანამაც, ჩვენმა ოჯახებმაც, პირადად ჩვენც და დღესაც ვიღებთ უამრავ სიკეთეს.წმინდა მოციქულები ასე არ იყვნენ. ისინი იწვოდნენ ქრისტეს სიყვარულით. ეს შესანიშნავად გამოჩნდა წმინდა პავლე მოციქულის სიტყვებში. ის წერს: ვინ განგვაშორებს ჩვენ (მოციქულებს გულისხმობს) ქრისტეს სიყვარულს - ჭირი, მწუხარება, შიმშილი, სიშიშვლე, საფრთხე თუ მახვილი? (რომ. 8, 35). ე. ი. ეს ნიშნავს, რომ არა მხოლოდ სხვადასხვაგვარი ჭირი ვერ განგვაშორებს ქრისტეს სიყვარულს, არამედ სიკვდილის საშიშროებაც რომ დაგვემუქროს, მაშინაც ვერ გავშორდებით ქრისტეს, ვერ შეგვაშინებს ეს.აი, ასეთი სიყვარული და რწმენა ჰქონდათ მათ. მიუხედავად იმისა, რომ მოციქულებმა, მართლაც, გაიარეს ყველა ეს ჩამოთვლილი განსაცდელი (ამასაც აღწერენ ძალიან დაწვრილებით), მათ მაინც ჰქონდათ დიდი სიხარული გულში, სიხარულით იღვწოდნენ, რადგან იცოდნენ - დროებითი ჭირისთვის, მწუხარებისა და სირთულეებისთვის მათ მოელოდათ ზეციური გვირგვინები და დიდი მისაგებელი, მადლი ღვთისგან. ამიტომაც ისინი ამ ყველაფერს არარად მიიჩნევდნენ, მოთმინებით იტანდნენ და მით უფრო მეტი და მეტი მადლი და სიხარული ჰქონდათ.აი, ძვირფასო ძმებო და დებო, ჩვენც ვეცადოთ, ასე შევიყვაროთ უფალი ჩვენი იესო ქრისტე. მართლაც, მეტს არც არაფერს არ გვთხოვს უფალი, რომ იგი შევიყვაროთ და მისი მცნებები დავიცვათ. ვისაც ასე უყვარს უფალი, ის მის მცნებებსაც იცავს, იმიტომ, რომ როცა ვინმე გიყვარს, ცდილობ, მისი სიყვარულიც დაიმსახურო.აი, როგორც წერს წმინდა იოანე ოქროპირი საოცარ სიტყვებს, გახდე იმის ღირსი, რომ ჯეროვნად გიყვარდეს უფალი, ეს არის უკვე სასუფეველი ცათა, ეს არის ნეტარება, ეს არის ურიცხვი სიკეთის მომტანიო.მაგრამ ჩვენი სიყვარული რომ იყოს ჯეროვანი და გულწრფელი, ამისთვის, ღვთის სიყვარულის გულისთვის უნდა გვიყვარდეს ჩვენი მოყვასიც, როგორც ამბობს უფალი, რომ ამ ორ მცნებაზეა დაფუძნებული მთელი რჯული და წინასწარმეტყველები: „გიყვარდეს ღმერთი შენი მთელი გულით, მთელი შენი სულით, გონებით და მთელი ძალით და მოყვასი შენი, როგორც თავი თვისი“ (მარკ. 12, 30). ეს ორი მცნება ბუნებრივად უკავშირდება ერთმანეთს, რადგან ვისაც უყვარს ღმერთი, ის მოყვასს არასდროს არ შეურაცხყოფს, არამედ, პირიქით, ყოველთვის სიკეთეს გაუკეთებს მას, იმიტომ, რომ ახსოვს უფალ იესო ქრისტეს სიტყვები, რაც თქვენ გაუკეთეთ ერთ ამ მცირე ჩემს ძმათაგანს, ის მე გამიკეთეთო (მთ. 25, 40).ასე რომ, როდესაც ადამიანის წინაშე არის გლახაკი, გაჭირვებული, ღარიბი, მთხოვნელი, ის არ ხედავს მასში ამ გლახაკს და ღარიბს, არამედ ხედავს უფალ იესო ქრისტეს, რომელიც დაგვპირდა, რომ ამ გლახაკისთვის გაკეთებული სიკეთე ჩაითვლება ქრისტესთვის გაკეთებულ სიკეთედ. ასე რომ, ვიმეორებ, ასეთი ადამიანი ყოველთვის ქრისტეს სიდიადეს ხედავს და არა გლახაკს მის წინაშე, ყველაფერს დიდი მოშურნეობით ასრულებს და გულმოწყალებას აღასრულებს დიდი სიყვარულითა და დიდი მონდომებით.ასე რომ, ძვირფასო ძმებო და დებო, დღეს არის მოციქულთა დღესასწაული. ესენი იყვნენ ჭეშმარიტების და სიყვარულის მქადაგებლები. ამგვარად, ნუ უგულებელვყოფთ ამ უმთავრეს სამკურნალოს ჩვენი სულისა - სიყვარულს მოყვასისადმი, მოწყალებას, თანალმობას, თანაგრძნობას, რადგან, როგორც გითხარით, ეს უმთავრესი სამკურნალოა ჩვენი სულის, მისი ჭრილობების; ისე კურნავს ეს წამალი ჩვენს სულს, რომ არანაირი იარა აღარ რჩება მასში, თითქოს საერთოდ არც ყოფილა. მაგალითად, გავიხსენოთ წმინდა პავლე მოციქული, რომელიც იყო სასტიკი მდევნელი და დამარბეველი ეკლესიისა და გახდა არათუ მორწმუნე, არათუ მხოლოდ მოციქული, არამედ წინამძღოლი ეკლესიისა. აი, ასეთი საოცარი ცვლილება მოხდა მასში. ასეთი საოცარი ცვლილება იქნება ჩვენშიც, თუ ამ გზის ერთგულნი დავრჩებით და არა მარტო პირადად ჩვენში, არამედ მთელი ჩვენი ერი კიდევ უფრო მეტად იცვლის ფერს, გაძლიერდება და გამთლიანდება.ღმერთმა დაგლოცოთ და გაგაძლიეროთ! კიდევ ერთხელ გილოცავთ თორმეტი მოციქულის ხსენებას, მოციქულთა მადლი და ლოცვა შეგეწიოთ თქვენ და სრულიად საქართველოს! მოციქულთა ლოცვით, ღმერთმა დაიფაროს, გააძლიეროს, გაამთლიანოს და გადაარჩინოს სრულიად საქართველო, ამინ!”,- განაცხადა პატრიარქმა ქადაგებისას.

საქართველოს ტექნიკური უნივერსიტეტის რექტორი, საქართველოს რექტორთა მუდმივმოქმედი კონფერენციის თავმჯდომარე, აკადემიკოსი დავით გურგენიძე, უნივერსიტეტის ადმინისტრაცია, არქიტექტურის, ურბანისტიკისა და დიზაინის ფაკულტეტის დეკანი, პროფესორი ნუგზარ ხვედელიანი, პედაგოგები და სტუდენტები ღრმა მწუხარებას გამოთქვამენ არქიტექტურის საბაკალავრო პროგრამის სტუდენტის - გუგა გურგენაშვილის კასპის მუნიციპალიტეტში, სოფელ ლამისყანის მიმდებარედ, მდინარე ქსანში ტრაგიკულად დაღუპვის გამო და სამძიმარს უცხადებენ ახალგაზრდის ოჯახს, ახლობლებსა და მეგობრებს.სამძიმრის წერილს საქართველოს ტექნიკური უნივერსიტეტი ავრცელებს.„საქართველოს ტექნიკური უნივერსიტეტის რექტორატისა და არქიტექტურის, ურბანისტიკისა და დიზაინის ფაკულტეტის სახელით, ღრმა მწუხარებას გამოვთქვამთ ჩვენი სტუდენტის, გუგა გურგენაშვილის ტრაგიკულად დაღუპვის გამო.ნიჭიერი და სიცოცხლით აღსავსე ახალგაზრდის, მომავალი არქიტექტორის დაკარგვა მოუშუშებელი ტკივილია ჩვენი დიდი ოჯახისთვის. ამ ტრაგიკულ წუთებში რთულია გადმოსცე ის ტკივილი, რომელსაც ასეთი უმძიმესი დანაკარგი იწვევს. მიუხედავად იმისა, რომ გუგამ მხოლოდ ერთი წელი დაჰყო უნივერსიტეტის კედლებში, მან მოასწრო თბილი და ნათელი კვალი დაეტოვებინა პედაგოგებსა და მეგობრებში. რომ არა ეს სულისშემძვრელი ბედუკუღმართობა, ის აუცილებლად მიაღწევდა მიზანს, იტყოდა თავის სათქმელს. ვუსამძიმრებთ გუგას ოჯახს, გამძლეობა და სულის სიმტკიცე მის მშობლებს, ახლობლებს, მეგობრებს, პედაგოგებს. მსუბუქი იყოს მისთვის ქართული მიწა“, - აღნიშნულია საქართველოს ტექნიკური უნივერსიტეტის სამძიმრის წერილში.