კეროლაინ ლევიტი – რუსეთი მშვიდობისთვის საკმარის ინტერესს არ იჩენს, პრეზიდენტი იმედოვნებს, რომ ერთ დღეს შეიძლება, პუტინთან შეხვედრა შედგეს, თუმცა გვინდა, ამას ხელშესახები დადებითი შედეგი მოჰყვეს

საქართველოს პარლამენტის თავმჯდომარე შალვა პაპუაშვილი საქართველოში ევროკავშირის ელჩის, პაველ ჰერჩინსკის დღევანდელ განცხადებას ეხმაურება.საუბარია განცხადებაზე, სადაც ჰერჩინსკიმ აღნიშნა: „საქართველომ მიიღო კანონები, რომლებიც ეწინააღმდეგება ევროკავშირის პრინციპებს. ამ კანონებით შეუძლებელი იქნება, ევროკავშირის წევრი გახდეთ. ძალიან ვწუხვარ, რომ ამას ღიად და პირდაპირ ვამბობ“.„ერთადერთი, რასაც საქართველოს პარლამენტის მიერ მიღებული კანონები ეწინააღმდეგება, არის ბრიუსელის მოქმედი ბიუროკრატიის სურვილი, ფარულად დააფინანსოს რადიკალიზმი და პროპაგანდა, რასაც არაფერი აქვს საერთო ევროკავშირის პრინციპებთან. ძალიან ვწუხვარ, რომ ამას ღიად და პირდაპირ ვამბობ“, – წერს შალვა პაპუაშვილი სოციალურ ქსელში.

საქართველოს ყოფილი პრეზიდენტი მიხეილ სააკაშვილი აცხადებს, რომ 4 ოქტომბრის მოვლენებთან დაკავშირებით დღეს დაიკითხა.როგორც სააკაშვილი სოციალურ ქსელში წერს, ახლა მის წინააღმდეგ ახალი საქმე აღიძვრება.„ზვიგენის საქმე ჩემს წინააღმდეგ დღეს ჩატარდა ჩემი „დაკითხვა“ 4 ოქტომბრის მოვლენებზე, ვითომ მოსამართლესთან ფარცხალაძე-რომანოვის სახელობის „პროკურატურის“ ინიციატივით. 4 ოქტომბერს რუსთაველზე შეიკრიბა ასობით ათასი ადამიანი და სწორედ სახალხო კრებამ დიდწილად განაპირობა ე.წ. ადგილობრივი არჩევნების ბოიკოტი. ამ საქმეზე, რომელიც წმინდა პოლიტიკურ ხასიათს ატარებს ბევრი ძალიან ღირსეული ადამიანია დაკავებული და ახლა უკვე მე მომადგნენ. უკვე მეხუთე წელია, პატიმრობაში ვარ გამოგონილი ბრალდებებით. რუსული პროვინციული ტირანიის წარმომადგენლებს განვუცხადე, რომ ისინი წარმოადგნენ საქართველოს მტრებს. ისინი მეკითხებოდნენ ჩემს კავშირზე ე.წ. გადატრიალების მცდელობასთან, თუმცა უკვე მეხუთე წელი ვიმყოფები, პრაქტიკულად, სრულ იზოლაციაში, სატელეფონო კავშირის აკრძალვის პირობებში, მუდმივი აუდიო და ვიდეო მეთვალყურეობის და ჩაწერის ქვეშ. ასევე მეკითხებოდნენ ჩემს პოსტებზე, რომლებიც არანაირად არ წარმოადგენდნენ რაიმე ძალადობისკენ მოწოდებას, ვინაიდან მე ისტორიაში ვარ შესული, როგორც მთელს მსოფლიოში განთქმული მშვიდობიანი რევოლუციის ლიდერი და ასევე სათავეში ვედექი დემოკრატიულ მოძრაობას მთელი უკრაინის მასშტაბით. ჩემი ტყვეობა და ნებისმიერი ახალი ბრალდებები არის სწორედ რუსეთის და მათი აქაური დამქაშების შურისძიება წარმატებულ ქართულ რეფორმებზე, ისევე როგორც ჩემი ბრძოლისთვის, საქართველოს და უკრაინის რუსული კლანჭებიდან გადარჩენისთვის.ჩემი იმიტომ კი არ ეშინიათ, რომ სახალხო კრებაში ვიყავი ჩართული, არამედ იმიტომ, რომ მართლაც ჩართული რომ ვყოფილიყავი, ბევრად მეტი იქნებოდა მიღწეული სრულიად მშვიდობიანად. ეშინიათ, რადგან ისტორიამ მაქცია საქართველოს დამოუკიდებლობისა და წარმატების სიმბოლოდ მთელი მსოფლიოსთვის. სწორედ ამიტომ მომწამლეს ციხეში და ამიტომ მისჯიან ახალ-ახალ სასჯელებს. კიდევ იცით, რა იყო ჩემთვის დასმული მთავარი კითხვა, რომლის გარშემო ტრიალებდა დაკითხვა, ოღონდ არ გეგონოთ, რომ ვღადაობ, რას გულისხმობდიო შარშანდელ პოსტში, რომ ხალხმა უნდა გადაიღოს სელფი ივანიშვილის ზვიგენის ფონზეო. დარწმუნებული ვარ, ეს კითხვა პირდაპირ ივანიშვილის დაწერილი იყო. ხვდებით, სად ვართ?! ნახეთ, როგორ უყვარს ეს ზვიგენი, რომ მთელი ე.წ. პროკურატურა ჩემგან ზვიგენის დამცველად გადააქცია და თუ დღევანდლის შემდეგ ვინმე საქართველოში ან საქართველოს გარეთ იტყვის, რომ მე არ ვარ პოლიტიკური პატიმარი, ის მართლა იმსახურებს ივანიშვილის ზვიგენების ახლო გაცნობას. ე.ი. ახლა ჩემ წინააღმდეგ აღიძვრება ახალი საქმე „ივანიშვილის ზვიგენის შევიწროებაზე“. იყო პიჯაკების საქმე, ახლა იწყება ზვიგენების საქმე. საქმეს ერქმევა ალბათ ასე „ივანიშვილის ზვიგენი და პროკურატურა სააკაშვილის წინააღმდეგ“ ვფიქრობ, წერილობითი ბოდიში ხომ არ გავუგზავნო ზვიგენს“, – წერს მიხეილ სააკაშვილი.

მრავალი თვის განმავლობაში ჩვენ ძალიან ღიად ვამბობთ და ეს არის გაცხადებული ჩემი ბევრი ხელმძღვანელისგან ბრიუსელში, რომ ჩვენ ვხედავთ საქართველოს უკუსვლას დემოკრატიულ პრინციპებთან მიმართებით და ყველა ქმედების შედეგად, რომელიც განხორციელებული იქნა საქართველოს ხელისუფლების მხრიდან, ყველა შესაძლო ვარიანტი მაგიდაზეა, მათ შორის, უვიზო რეჟიმის სრული ან ნაწილობრივი შეჩერება,- ამის შესახებ ევროკავშირის ელჩმა საქართველოში პაველ ჰერჩინსკიმ განაცხადა.მისივე თქმით, პარალელურად მიმდინარეობს მუშაობა ზოგად რეგულაციებზე, რაც ეხება უვიზო მოგზაურობას ყველა იმ ქვეყანასთან მიმართებით, რომლებიც ახლა სარგებლობენ ევროკავშირთან უვიზო მიმოსვლით. ელჩის განმარტებით, ეს დისკუსია ნოემბრის ბოლოს დასრულდება, დეკემბრის ბოლოს კი ევროკომისია გამოსცემს წლიურ ანგარიშს, სადაც აღნიშნული იქნება, რამდენად შეესაბამება საქართველო უვიზო მიმოსვლის რეგულაციებს.„რაც შეეხება უვიზო რეჟიმის შეჩერების საკითხს, მოცემულ მომენტში მიმდინარეობს ორი პროცესი. ერთი პროცესი უშუალოდ საქართველოს ეხება - მრავალი თვის განმავლობაში ჩვენ ძალიან ღიად ვამბობთ და ეს არის გაცხადებული ჩემი ბევრი ხელმძღვანელისგან ბრიუსელში, რომ ჩვენ ვხედავთ საქართველოს უკუსვლას დემოკრატიულ პრინციპებთან მიმართებით და ყველა ქმედების შედეგად, რომელიც განხორციელებული იქნა საქართველოს ხელისუფლების მხრიდან, ყველა შესაძლო ვარიანტი მაგიდაზეა, მათ შორის, უვიზო რეჟიმის სრული ან ნაწილობრივი შეჩერება. ევროკავშირის 27 წევრი ქვეყნის მინისტრები ამ საკითხს რამდენიმე თვის განმავლობაში განიხილავენ და ეს დისკუსია კვლავაც გაგრძელდება. პარალელურად, მიმდინარეობს მუშაობა ზოგად რეგულაციებზე, რაც ეხება უვიზო მოგზაურობას ყველა იმ ქვეყანასთან მიმართებით, რომლებიც ახლა სარგებლობენ ევროკავშირთან უვიზო მიმოსვლით. ეს დისკუსია ნოემბრის ბოლოს დასრულდება, დეკემბრის ბოლოს ევროკომისია გამოსცემს წლიურ ანგარიშს, სადაც აღნიშნული იქნება, რამდენად შეესაბამება საქართველო უვიზო მიმოსვლის რეგულაციებს და ამის შემდეგ წევრი ქვეყნები გადაწყვეტენ, როგორი რეაგირება ჰქონდეთ. ეს მარტივი გადაწყვეტილება არ იქნება - წევრმა ქვეყნებმა უნდა გადაწყვიტონ რა გააკეთონ, შეაჩერონ ის სრულად თუ ნაწილობრივ. რა გადაწყვეტილებაც არ უნდა იქნას მიღებული, სპეკულირება არ შემიძლია და გადაწყვეტილება წევრი ქვეყნების ხელშია და ის მიიღება კვალიფიციური უმრავლესობის მიერ. ვიცი, რომ ეს საკითხი ძალიან მნიშვნელოვანია საქართველოს მოსახლეობისთვის“, - განაცხადა ჰერჩინსკიმ.რაც შეეხება შეფასებას, როგორ ახდენს საქართველო იმ რეკომენდაციების იმპლემენტაციას, რომლებიც საქართველომ ევროკავშირის მხრიდან მიიღო მაშინ, როდესაც მას მიენიჭა კანდიდატი ქვეყნის სტატუსი, ელჩმა განმარტა, რომ 4 ნოემბერს, გაფართოების უახლოესი ანგარიში იქნება წარმოდგენილი საქართველოსთან დაკავშირებით.„ის იქნება ძალიან გრძელი და არსებითი დოკუმენტი, წარმოდგენილი ევროკომისიის მიერ, სადაც დეტალურად აღწერილი იქნება, რა მოხდა საქართველოში უკანასკნელი ერთი წლის განმავლობაში და როგორ უკავშირდება ეს საქართველოს სწრაფვას გახდეს ევროკავშირის წევრი. 4 ნოემბერი ძალიან მნიშვნელოვანი თარიღია, ამ დღეს გაიმართება პრესკონფერენცია ბრიუსელში, რომელსაც გამართავს ევროკომისიის ვიცე-პრეზიდენტი კაია კალასი და გაფართოების საკითხებში ევროკომისარი მარტა კოსი. ამავე დღეს, 4 ნოემბერს, მეც გავმართავ პრესკონფერენციას თბილისში იმისთვის, რათა გავცე დეტალურ კითხვებს პასუხი, რამდენად კარგად ან ცუდად მუშაობს საქართველო“, - განაცხადა ელჩმა.

საქართველოს ყოფილი პრემიერ-მინისტრის, ირაკლი ღარიბაშვილის ადვოკატი ამირან გიგუაშვილი აცხადებს, რომ ღარიბაშვილს ჩვენება არავის წინააღმდეგ მიუცია.„გამოძიებას აქვს თავისი სპეციფიკა. ამ შემთხვევაში თავს შევიკავებ გარკვეული დეტალებისგან, მაგრამ ცალსახად განვმარტავთ, რომ ირაკლი ღარიბაშვილს არავის წინააღმდეგ მიუცია ჩვენება. მიმდინარეობს გამოძიება, რისი დასრულების შემდეგაც გავაკეთებთ დამატებით კომენტარს დეტალებზე. ბრალდებასთან დაკავშირებით დაცვის მხარემ განვმარტეთ, რომ ირაკლი ღარიბაშვილი თავს ცნობს დამნაშავედ. ეთანხმება ბრალს იმ ნაწილში, რაც დაკავშირებულია მისი მხრიდან უკანონო შემოსავლების მიღებასთან“,  – განაცხადა ამირან გიგუაშვილმა.ამასთან, ამირან გიგუაშვილმა განმარტა, რა გარემოებების გათვალისწინებით შეეფარდა ირაკლი ღარიბაშვილს აღკვეთის ღონისძიების სახით გირაო.„იყო კითხვები, ღარიბაშვილს რატომ შეეფარდა აღკვეთის ღონისძიების სახით გირაო. აღკვეთის ღონისძიების გამოყენებისას სასამართლო და ბრალდების მხარე მხედველობაში იღებს ძალიან ბევრ გარემოებას. ადამიანი როცა თანამშრომლობს გამოძიებასთან, არ ემალება მას, ეთანხმება ბრალს და, პატიმრობის ნაცვლად, იხდის მნიშვნელოვანი მოცულობის გირაოს, ამ შემთხვევაში პროცესუალური სტანდარტია ნაკლებად მძიმე აღკვეთის ღონისძიების შეფარდების საკითხი“, – განაცხადა ამირან გიგუაშვილმა.კითხვაზე, რომელ კომპანიებთან თანამშრომლობდა ირაკლი ღარიბაშვილი და ვის ეხმარებოდნენ უკანონო შემოსავლების ლეგალიზებაში, გიგუაშვილმა აღნიშნა, რომ გამოძიება მიმდინარეობს და მისი მხრიდან დამატებით დეტალებზე საუბარი მიზანშეწონილი არ არის.„კომენტარებს ვაკეთებ საგამოძიებო და პროცესუალურ საკითხებთან დაკავშირებით, ამ შემთხვევაში რაიმე ტიპის პოლიტიკური შინაარსის განცხადება არ გამიკეთებია. მე ვიცავ ირაკლი ღარიბაშვილის ინტერესებს და მისი საუკეთესო ინტერესებიდან გამომდინარე ვაკეთებ ყველა კომენტარსა და განცხადებას. ასევე, მინდა, ხაზგასმით აღვნიშნო, რომ ირაკლი ღარიბაშვილს ბრალად არ ედება საბიუჯეტო თანხების მითვისება, გაფლანგვა ან სამსახურებრივი უფლებამოსილების ბოროტად გამოყენება, ეს ძალიან მნიშვნელოვანია“, – აღნიშნა ამირან გიგუაშვილმა.კიდევ ერთ კითხვაზე, – „პროკურორმა მიანიშნა, რომ შესაძლოა, ღარიბაშვილის ავტომობილები უკანონო შემოსავლით იყოს შეძენილი. მოხდება თუ არა მათი ჩამორთმევა?“ – გიგუაშვილმა განმარტა, რომ ეს თქვა არა პროკურორმა, არამედ ბრალში წერია.„ვერ გეტყვით, ვერ გაგცემთ პასუხს, რას აპირებს ბრალდების მხარე. ეს უნდა ჰკითხოთ ბრალდების მხარეს. დაცვის მხარე ვაპირებთ, რომ ვითანამშრომლოთ გამოძიებასთან კანონის ფარგლებში, მივიღოთ ყველა ის გადაწყვეტილება, რომელიც კლიენტის საუკეთესო ინტერესებისთვის იქნება“, – განაცხადა ამირან გიგუაშვილმა.პროკურატურამ საქართველოს ყოფილ პრემიერ-მინისტრს, ირაკლი ღარიბაშვილს ბრალი დღეს წარუდგინა. დღესვე გაიმართა სასამართლო აღკვეთის ღონისძიებასთან დაკავშირებით. სასამართლოს გადაწყვეტილებით, ღარიბაშვილს განსაკუთრებით დიდი ოდენობით უკანონო შემოსავლების ლეგალიზაციის საქმეზე აღკვეთის ღონისძიების სახით მილიონი ლარის ოდენობის გირაო შეუფარდა. გარდა ამისა, დაკმაყოფილდა პროკურატურის შუამდგომლობები ქვეყნის ფარგლებს გარეთ გამგზავრების აკრძალვისა და პასპორტის ჩამორთმევის შესახებ.

ბიზნესმენ ლევან ჯანგველაძის მკვლელობაში ბრალდებულ გელა უძილაურს მოსამართლემ უვადო პატიმრობა მიესაჯა.საქმეზე გადაწყვეტილება მოსამართლე გიორგი გელაშვილმა მიიღო. მოსამართლემ გაიაზრა ბრალდების მხარის ყველა მტკიცებულება და უძილაური დამნაშავედ ცნო ლევან ჯანგველაძის შეკვეთით და ანგარებით მკვლელობაში.უვადო პატიმრობას ბრალდების მხარე, პროკურორი ლევან ვეფხვაძე ითხოვდა. გელა უძილაური, რომელმაც მკვლელობა აღიარა, ამტკიცებდა, რომ დანაშაული შეკვეთილი არ ყოფილა.ცნობისთვის, გელა უძილაურს ბრალი სისხლის სამართლის 109-ე მუხლის „ბ“ და „ნ“ ქვეპუნქტით ჰქონდა წაყენებული, რაც გულისხმობს დამამძიმებელ გარემოებებში ისეთი საშუალებით განზრახ მკვლელობას, რომელიც უქმნის საფრთხეს სხვის სიცოცხლეს ან ჯანმრთელობას, და განზრახ მკვლელობას ანგარებით ან შეკვეთით. ბრალი 20 წლამდე ან უვადო თავისუფლების აღკვეთას ითვალისწინებს.ბიზნესმენი ლევან ჯანგველაძე 2025 წლის 14 მარტს თბილისში, ილია ჭავჭავაძის გამზირზე მოკლეს. პროკურატურის ინფორმაციით, უძილაურმა ხალხმრავალ ადგილზე ცეცხლსასროლი იარაღიდან რამდენჯერმე ესროლა ლევან ჯანგველაძეს და მის მძღოლს, გია ჩადუნელს. მიღებული მრავლობითი დაზიანების შედეგად ჯანგველაძე შემთხვევის ადგილზე გარდაიცვალა, ხოლო ჩადუნელი ცეცხლსასროლი იარაღიდან მიყენებული ჭრილობებით საავადმყოფოში გადაიყვანეს.