მოსახლეობასთან დავდე პირობა, რომ 4 წლის განმავლობაში გავაკეთებთ ბევრ სასიკეთო საქმეს და მარგინალური პოლიტიკური პარტია „ნაცმოძრაობა“ ილაპარაკებს ამ საქმეებზე. მე ამ დაპირებას ვასრულებ, – ამის შესახებ „ინტერპრესნიუსს“ თბილისის მერმა კახა კალაძემ განუცხადა, რომელმაც კომენტარი გააკეთა გუდიაშვილის მოედნის რეაბილიტაციის პროექტთან დაკავშირებით, კერძოდ, რამდენად სწორად შეირჩა ის ორი კომპანია, რომელიც გუდიაშვილის მოედანზე სამშენებლო პროცესს განახორციელებს.
კახა კალაძის თქმით, თბილისის განვითარების ფონდის მიერ კომპანიების შერჩევის პროცესს არა საკრებულოს ოპოზიცია, არამედ მარგინალური „ნაციონალური მოძრაობა“ აპროტესტებდა.
„დააკვირდით უბრალოდ, რაც მე და ჩემ გუნდს მოგვეცა უფლებამოსილება და დავიწყეთ რეფორმების განხორციელება, ყველა რეფორმაზე, რომელსაც საზოგადოებაში აქვს ძალიან მაღალი შეფასება, მარგინალური პოლიტიკური პარტია „ნაციონალური მოძრაობის“ სახით ყოველთვის რაღაც სისულეებს საუბრობს ამ საქმიანობასთან დაკავშირებით. როდესაც საარჩევნო კამპანიას ვატარებდი, მაშინ მოსახლეობასთან დავდე პირობა, რომ ჩვენ მთელი ოთხი წლის განმავლობაში გავაკეთებდით ძალიან ბევრ სასიკეთო საქმეს ქალაქისათვის და ეს მარგინალური პარტია „ნაციონალური მოძრაობა“ ილაპარაკებს ამ საქმეებზე და მე ამ დაპირებას ვასრულებ“, – განაცხადა კახა კალაძემ.
დედაქალაქისა მერმა მადლობა გადაუხადა ყველა იმ პირს, რომელიც ჩართული იყო გუდიაშვილის მოედანის შენარჩუნებისა და დაცვის პროცესში. კალაძის თქმით, გუდიაშვილის მოედნის რეაბილიტაციის პროექტში „იკომოსი“, „ტფილისის ამქარი“, არქიტექტორები და ხელოვნებათმცოდნეები იყვნენ ჩართული.
„მნიშვნელოვანია, რომ ჩვენ ვიწყებთ ამ პროექტის განხორციელებას, რაზეც წლების განმავლობაში მიდიოდა საუბარი. უკვე იწყება ამ სამუშაოების განხორციელება. პროექტის დაწყების ოფიციალური ცერემონია რამდენიმე დღეში გაიმართება, თუმცა სამუშაოები ხვალიდან დაიწყება. პროექტში ხელოვნებათმცოდნეებისა და არქიტექტორების შენიშვნები მაქსიმალურად იყო გათვალისწინებული. სწორედ ამის გამო სამუშაოების დაწყება დროში გაიწელა“, – განაცხადა კახა კალაძემ.