დედაქალაქის მერი კახა კალაძე მუშაობის 100 დღეს აჯამებს. ურბანული განვითარება, სოციალური პოლიტიკა, ეკოლოგია, ტრანსპორტი, განათლების, კულტურისა და ახალგაზრდული პოლიტიკა – ეს ის საკითხებია, რაზეც დედაქალაქის მერმა ყურადღება გაამახვილა.
კახა კალაძე აცხადებს, რომ მერიაში სტრუქტურული ცვლილებების შედეგად მერიის საქალაქო სამსახურების ფუნქციები დაიხვეწა. ტრანსპორტის მიმართულებით მერმა კიდევ ერთხელ გაუსვა ხაზი 100 ახალი ავტობუსის შემოყვანის მნიშვნელობას. მან წინ გადადგმულ ნაბიჯად შეაფასა სიახლეები, რომლის თანახმადაც 14 ქუჩაზე ტრანსპორტი მხოლოდ გაჩერებებზე გაჩერდება, ასევე ზოგიერთ ქუჩაზე დასუფთავების მანქანები მხოლოდ ღამით იმოძრავებენ. ქალაქს დაემატა რამდენიმე ახალი მარშრუტიც.
კახა კალაძემ ილაპარაკა ურბანულ განვითარებაზე, განსაკუთრებულად აღნიშნა ძველი თბილისის რეაბილიტაცია, რომლისთვისაც 52 მილიონი გამოიყო. ასევე მიწისქვეშა გადასასვლელების მოწესრიგების საკითხი.
რაც შეეხება სოციალურ პოლიტიკას, 288 ოჯახს საცხოვრებელი ფართები დაუკანონდა, ასევე შეიცვალა სამედიცინო მომსახურების და მედიკამენტების დაფინანსების წესი, რაც მერის თქმით, კორუფციულ რისკებს გამორიცხავს.
კახა კალაძემ ყურადღება გაამახვილა ეკოლოგიურ პოლიტიკაზეც, კერძოდ იმ სამართლებრივ ცვლილებეზე, რომლის მოხედვითაც განაშენიანებისას მწვანე სივრცეების მოწყობა გათვალისწინებული იქნება.
დედაქალაქის მერი ამბობს, რომ მნიშვნელოვანი ცვლილებები განხორციელდა ახალგაზრდებისთვისაც, მაგალითად 1 200 000 ლარამდე გაიზარდა სოციალურად დაუცველი სტუდენტების დაფინანსება. კალაძემ ხაზი გაუსვა საბობლიოთეკო რეფორმასაც.