თამამად შეგვიძლია ვთქვათ, რომ საქართველოს ტურისტული სექტორი გამოვიდა პოსტპანდემიური აღდგენის ეტაპიდან და ჩვენ ვაკვირდებით სექტორის განვითარების ახალ ფაზას, რაზეც 2024 წლის განმავლობაში გამოქვეყნებული სტატისტიკაც მეტყველებს, – ამის შესახებ ეკონომიკის მინისტრის მოადგილემ, ირაკლი ნადარეიშვილმა მიმდინარე წლის სამი კვარტლის მონაცემების შეფასებისას განაცხადა, რომლის მიხედვით, მოგზაურობიდან (ტურიზმიდან) მიღებულმა შემოსავალმა რეკორდულ მოცულობას, 3,5 მილიარდ აშშ დოლარს მიაღწია.
ირაკლი ნადარეიშვილის თქმით, ასევე რეკორდულია ცალკე აღებული მესამე კვარტლის მონაცემი, სადაც 1,6 მილიარდი დოლარის შემოსავლები დაგენერირდა.
მინისტრის მოადგილემ ხაზი გაუსვა, რომ, 2019 წლის მესამე კვარტალთან შედარებით, 2024 წლის მესამე კვარტლის შემოსავლების ზრდა 39 პროცენტია, ხოლო გასული წლის მესამე კვარტალში მიღებულ შემოსავლებთან მიმართებაში 8 პროცენტით მეტია. მისივე განცხადებით, მოგზაურობიდან (ტურიზმიდან) მიღებული სამი კვარტლის ჯამური შემოსავალი გასული წლის ანალოგიურ პერიოდთან შედარებით 6.5 პროცენტით არის გაზრდილი.
„მნიშვნელოვანია შემოსავლების სტრუქტურის დინამიკა, სადაც პირველ სამ კვარტალში მნიშვნელოვნად არის გაზრდილი შემოსავლები ევროკავშირის ქვეყნებიდან, ამაში იგულისხმება დიდი ბრიტანეთიც. ეს არის თითქმის ნახევარი მილიარდი დოლარის შემოსავალი, რაც 20%-ით აღემატება 2019 წლის მონაცემებს და თითქმის 7%-ით გასული წლის ანალოგიურ პერიოდს, ასევე გაზრდილია სხვა მნიშვნელოვანი ბაზრებიდან შემოსავლები, მაგალითად, ეს არის ისრაელი – თითქმის 25%-იანი ზრდით გასულ წელთან შედარებით, ასევე საუდის არაბეთი, სადაც დაახლოებით 22%-ით გვაქვს ზრდა და ა.შ.“ – განაცხადა ირაკლი ნადარეიშვილმა.
ტურიზმის ეროვნული ადმინისტრაციის მონაცემებით, საერთაშორისო ტურიზმიდან შემოსავალი ცხრა თვეში რეკორდულად გაიზარდა და 3.5 მილიარდი აშშ დოლარი შეადგინა, რაც 2023 წლის ანალოგიურ პერიოდს +6.5%-ით (210 მლნ აშშ დოლარით) აჭარბებს. ამასთან, ტურიზმიდან მიღებული შემოსავლები მნიშვნელოვნად გაიზარდა ევროკავშირის ქვეყნებიდან და დიდი ბრიტანეთიდან, ასევე ისრაელიდან და საუდის არაბეთიდან.
ირაკლი ნადარეიშვილის კომენტარს ეკონომიკისა და მდგრადი განვითარების სამინისტროს პრესსამსახური ავრცელებს.