დღეს საქართველოს პარლამენტის მიერ დამტკიცებულმა რეზოლუციამ კიდევ ერთხელ დაადასტურა, რომ ჩვენი პოლიტიკა, პრიორიტეტები, პრინციპები და ღირებულებები, რომელსაც ეფუძნებოდა პრემიერ-მინისტრის განცხადებაც, არის უცვლელი, – ამის შესახებ საქართველოს პარლამენტის თავმჯდომარემ, ირაკლი კობახიძემ პარლამენტის მიერ არჩილ ტატუნაშვილთან დაკავშირებით რეზოლუციის დამტკიცების მიერ გამართულ ბრიფინგზე განაცხადა.
„რამდენიმე დღის წინ, საქართველოს პრემიერ-მინისტრმა გააკეთა საჯარო განცხადება, რომლითაც კიდევ ერთხელ გამოითქვა რუსეთის ფედერაციასთან დიალოგის მზადყოფნა რუსეთ-საქართველოს კონფლიქტის დარეგულირებასთან დაკავშირებით. მათ შორის გამოითქვა ჟენევის ფორმატის გააქტიურების მზადყოფნა და სურვილი. გამოითქვა აფხაზებთან და ოსებთან ურთიერთობების გაღრმავების მზადყოფნა საოკუპაციო ხაზის სხვადასხვა მხარეს მცხოვრებ ადამიანებს შორის ნდობის აღდგენის უზრუნველსაყოფად.
სწორედ ამ სულისკვეთებასა და მიზნებს ეფუძნება დღეს საქართველოს პარლამენტის მიერ დამტკიცებული რეზოლუციაც“, – აღნიშნა ირაკლი კობახიძემ.
საქართველოს პარლამენტის თავმჯდომარის განცხადებით, გიორგი კვირიკაშვილის განცხადება ოპონენტების მხრიდან არასწორი ინტერპრეტაციისა და პოლიტიკური სპეკულაციის საგანი გახდა.
„სამწუხაროდ, პრემიერ-მინისტრის განცხადება გახდა ოპონენტების მხრიდან არასწორი ინტერპრეტაციისა და პოლიტიკური სპეკულაციის საგანი. ოპონენტებმა სცადეს პრემიერ-მინისტრის განცხადების წარმოჩენა „ქართული ოცნების“ კურსისა და მიდგომის ცვლილებად, რასაც არ ჰქონდა არავითარი საფუძველი. დღეს საქართველოს პარლამენტის მიერ დამტკიცებულმა რეზოლუციამ კიდევ ერთხელ დაადასტურა, რომ ჩვენი პოლიტიკა, პრიორიტეტები, პრინციპები და ღირებულებები, რომელსაც ეფუძნებოდა პრემიერ-მინისტრის განცხადებაც, არის უცვლელი“, – განაცხადა ირაკლი კობახიძემ.
საქართველოს პარლამენტის თავმჯდომარის თქმით, პარლამენტის მიერ დამტკიცებული რეზოლუცია რუსეთთან მიმართებით საქართველოს ხელისუფლების პრაგმატული პოლიტიკის კიდევ ერთი გამოხატულებაა. მისივე განცხადებით, საქართველოს ხელისუფლებას ძალიან მკაფიო წითელი ხაზები აქვს რუსეთთან მიმართებით.
„როგორც პრემიერ-მინისტრის განცხადება, ისე დღეს პარლამენტის მიერ დამტკიცებული რეზოლუცია არის რუსეთთან მიმართებით საქართველოს ხელისუფლების პრაგმატული პოლიტიკის კიდევ ერთი გამოხატულება, რომლის მიზანია ჩვენი ქვეყნის უსაფრთხოებისა და სტაბილური განვითარების უზრუნველყოფა და ჩვენი ეროვნული ინტერესების დაცვა. აქვე, ხაზგასმით უნდა აღინიშნოს, რომ ჩვენ გვაქვს ძალიან მკაფიო წითელი ხაზები რუსეთთან მიმართებით პრაგმატული პოლიტიკის განხორციელებისას. ეს წითელი ხაზები დაკავშირებულია ჩვენი ისტორიული რეგიონების დეოკუპაციასთან და საქართველოს მიერ აღებულ დასავლურ კურსთან. აღნიშნული წითელი ხაზები კიდევ ერთხელ მკაფიოდ არის დაფიქსირებული პარლამენტის მიერ დღეს დამტკიცებულ რეზოლუციაში“, – აღნიშნა ირაკლი კობახიძემ.
საქართველოს პარლამენტის თავმჯდომარემ მადლობა გადაუხადა დეპუტატებს, რომლებმაც მხარი დაუჭირეს რეზოლუციას.
„მინდა, მადლობა გადავუხადო თითოეულ დეპუტატს – საპარლამენტო უმრავლესობისა და საპარლამენტო ოპოზიციის წარმომადგენლებს, რომლებმაც მხარი დაუჭირეს საპარლამენტო რეზოლუციას და მინდა გამოვხატო რწმენა, რომ რეზოლუციაში ასახული ჩვენი ეროვნული მიზნები და ამოცანები აუცილებლად შესრულდება“, – განაცხადა კობახიძემ.