შაბათი, ოქტომბერი 11, 2025

ინტერვიუ ნინო თოდუასთან-მიუსაფარი და მარტოხელა ქალების ხელშესაწყობად მიმდინარე CSDC-ის პროექტის პირველი ფაზა დასრულდა

ინტერვიუ ნინო თოდუასთან

2020 წლის აგვისტოში, სამოქალაქო საზოგადოების განვითარების ცენტრმა (CSDC) ,,ქალებისთვის გლობალური ფონდის’’ (Global Fund for women) მხარდაჭერით დაიწყო პროექტი მიუსაფარი და მარტოხელა ქალების ხელშესაწყობად.

2021 წლის 28 იანვარს, ორგანიზაცია  დისტანციურ რეჟიმში გამართავს კვლევის პრეზენტაციას. ღონისძიებას სხვადასხვა სახელმწიფო უწყებისა და არასამთავრობო ორგანიზაციის წარმომადგენლები, ასევე ჟურნალისტები, მოხალისეები და ზოგადად, მიუსაფარ ქალთა პრობლემებით დაინტერესებული საზოგადოება დაესწრება.

რა სახის კვლევა მოამზადა CSDC-იმ. თუ ვინ ჩაერთო პროექტში, ვისი დახმარება შეძლო ორგანიზაციამ, რა ღონისძიებები განხორციელდა პროექტის ფარგლებში და როგორია მათი სამომავლო გეგმები, ამ და სხვა საკითხებზე CSDC-ის  ხელმძღვანელთან, ნინო თოდუასთან, ინტერვიუს ფორმატში ვისაუბრეთ:

  • ნინო, გვიამბეთ თქვენი ორგანიზაციის შესახებ. რამდენი ხანია რაც სამოქალაქო საზოგადოების განვითარების ცენტრი ფუნქციონირებს და რა მიზნებს ემსახურება ის?

სამოქალაქო საზოგადოების განვითარების ცენტრი (CSDC) 2010 წლიდან ფუნქციონირებს. ჩვენი ორგანიზაციის მისიაა მოწყვლადი ქალებისა და ბავშვების პრობლემების ადვოკატირება, მათი ინტეგრირება საზოგადოებაში სამოქალაქო უფლებების დაცვის, ინოვაციური ტექნოლოგიებისა და არაფორმალური საგანმანათლებო პროგრამების უზრუნველყოფით, რათა მათ შეძლონ ღირსეული და დამოუკიდებელი ცხოვრება.

  • გვიამბეთ პროექტის შესახებ, რომელიც ქალებისთვის გლობალური ფონდის მხარდაჭერით განხორციელდა, რა იყო პროექტის მიზანი?

პროექტი  „COVID-19 პანდემიის დროს მიუსაფარ და მარტოხელა ქალთა დაცვის ხელშეწყობა“ – 2020 წლის აგვისტოს თვეში დავიწყეთ და 6 თვის განმავლობაში მიმდინარეობდა, პროექტი თბილისის ფარგლებში განხორციელდა.

ამ პროექტის იდეა გაჩნდა პანდემიური ვითარებიდან გამომდინარე. ვირუსის გავრცელების შემდეგ ყველაზე მეტად სწორედ სოციალურად მოწყვლადი ჯგუფები დაზარალდნენ. მათ შორის იყვნენ და არიან მიუსაფარი ქალები და მათი ოჯახები, რომელთაც სხვადასხვა მიმართულებით ესაჭიროებოდათ და დღემდე ესაჭიროებათ დახმარება. ჩვენ ძალიან გვინდოდა ამ ქალების ერთ ნაწილს მაინც დავხმარებოდით. ,,გლობალურმა ფონდმა ქალებისთვის’’ პროექტის ფინანსური მხარდაჭერა უზრუნველყო, რამაც ერთი მხრივ საშუალება მოგვცა, რომ პროექტის პირველ ეტაპზე შერჩეულ ქალებს დავხმარებოდით, ჩვენ მივდიოდით მათთან, მიგვქონდა საკვები პროდუქტები და პირველადი და აუცილებელი ჰიგიენის ნივთები. თუმცა, ამავდროულად, წამოვიწყოთ აქტიური ფანდრაიზინგის კამპანია სახელწოდებით: ,,ჩაერთე და ჩართე’’, რომელშიც მოქალაქეები და სხვადასხვა ორგანიზაცია ჩაერთო,  მათი დახმარებით მიღებული მატერიალური თუ არამატერიალური რესურსები სრულად გამოვიყენეთ მიუსაფარი ქალების სასარგებლოდ.

პროექტის საბოლოო მიზანი იყო ბენეფიციართა სოციალური ინკლუზია და მხარდაჭერა COVID-19 პანდემიით გამოწვეული სირთულეების დასაძლევად.  ვფიქრობ, ამ მიზნის განხორციელება, ჩვენი რესურსებისა და შესაძლებლობების გათვალისწინებით, ნაწილობრივ მაინც შევძელით (პროექტში ჩართული 100-ზე მეტი ქალისა და მათ ოჯახებისთვის).

  • რა ღონისძიებები განახორციელეთ პროექტის სხვადასხვა ეტაპზე?

პროექტი რამდენიმე პირობით ეტაპად შეგვიძლია დავყოთ: პირველ ეტაპზე ჩვენ დავიწყეთ ბენეფიციართა რეგისტრაცია, იმ ქალების მოძიება, რომლებიც თბილისში ცხოვრობდნენ და ჩვენი პროექტის მიზნობრივ ჯგუფში შედიოდნენ. მომზადდა მარტივი სარეგისტრაციო ფორმა, ინფორმაცია გავრცელდა სხვადასხვა წყაროს მეშვეობით, ბევრ ქალს თავად დავუკავშირდით და ჩვენვე დავეხმარეთ ფორმის შევსებაში. საბოლოოდ 100 ქალი შეირჩა, თუმცა რეგისტრაცია გაცილებით მეტმა გაიარა. ძალიან გვინდა, მომავალში ამ ქალების დასახმარებლად კიდევ დავგეგმოთ მსგავსი პროექტები. პროექტის მონაწილე ქალები სხვადასხვა კრიტერიუმის საფუძველზე შევარჩიეთ მკვლევართა ჯგუფის მეშვეობით. ისინი იყვნენ ძირითადად სოციალურად დაუცველი, მრავალშვილიანი და მარტოხელა ქალები, რომელთაც ყველაზე მეტად ესაჭიროებოდათ დახმარება.

შემდეგ ეტაპზე უკვე დავიწყეთ შერჩეულ ქალებთან ოჯახებში ვიზიტები, ცხადია, ყველანაირი რეკომენდაციის გათვალისწინებითა და ჰიგიენის ნორმების დაცვით. ვიზიტისას მიგვქონდა მათთვის პირველადი ჰიგიენური ნივთები და არამალფუჭებადი საკვები პროდუქტები. ვეცნობოდით მათ საჭიროებებს, ვამზადებდით მცირე ფოტო თუ ვიდეო ისტორიებს მათ შესახებ, ცხადია, თითოეული მათგანის თანხმობისა და სურვილის შემთხვევაში.

პროექტის დარჩენილი დრო კი დავუთმეთ კვლევის განხორციელებას და აქტიური ფანდრაიზინგის კამპანიას, ორივე აქტივობის შედეგები ჩვენ დღევანდელ პრეზენტაციაზე შევაჯამეთ.

პროექტის განხორციელებაში CSDC-ის საორგანიზაციო ჯგუფთან ერთად 20 მოხალისეც ჩაერთო, რომლებიც სპეციალურად გადამზადდნენ და მიიღეს შესაბამისი თეორიული ცოდნა ბენეფიციართა აღნიშნულ ჯგუფთან სამუშაოდ.

  • სანამ კვლევის შესახებ გკითხავთ, გვაინტერესებს, როგორ განხორციელდა ფანდრაიზინგის კამპანია და რა შედეგი მიიღეთ საბოლოოდ?

ჩვენს კამპანიაში  ჯამში 100-ზე მეტი ქალი და მათი ოჯახი ჩავრთეთ. ჩვენი პირველი ამოცანა საზოგადოების ინფორმაციული უზრუნველყოფა იყო. კამპანიის შესახებ მოვამზადეთ სოციალური ვიდეო რგოლი და გვიხარია, რომ საზოგადოებრივი მაუწყებლის მხარდაჭერით, ეს მასალა მათივე ეთერში გადიოდა. გარდა ამისა,  ეტაპობრივად ვრცელდებოდა ინფორმაცია სხვა ტელევიზიებისა და საინფორმაციო სააგენტოების, მათ შორის თქვენი სააგენტოს მეშვეობითაც, რისთვისაც მადლობას გიხდით. მეორე მხრივ, ჩვენი ორგანიზაციის სოციალურ ქსელში ქვეყნდებოდა ფოტო და ვიდეო-ისტორიები ამ ქალებისა და მათი ოჯახების შესახებ. ამ ყველაფრის შედეგად, პროექტს 50-მდე მხარდამჭერი, ფიზიკური პირი თუ ორგანიზაცია შემოუერთდა. ყველას ვერ ჩამოვთვლი, მაგალითისთვის გამოვყოფდი ცენტრალურ საარჩევნო კომისიას, რომელთა მხარდაჭერით წინასაახალწლოდ 20 ქალსა და მათ ოჯახს ფულადი დახმარება გადაეცა. გვინდა თითოეულ მხარდამჭერს მადლობა გადავუხადოთ, მათმა მატერიალურმა თუ არამატერიალურმა დახმარებამ განსაკუთრებით გაახარა ბენეფიციარი ქალები და მათი ოჯახები.

 

  • გვიამბეთ კვლევის შესახებ, რა სახის კვლევა განხორციელდა და როგორია კვლევის შედეგები/რეკომენდაციები?

კვლევის პრეზენტაცია ხვალ, 28 იანვარს შედგება. ონლაინ-შეხვედრაზე შედეგებსა და რეკომენდაციებს გავაცანობთ როგორც სახელმწიფო უწყებების, ისე ამ თემაზე მომუშავე სხვადასხვა არასამთავრობო ორგანიზაციის წარმომადგენლებს. აღნიშნული კვლევა, ჩვენი პროექტის ფარგლებში და ჩვენს ბენეფიციართა ჯგუფში ჩაატარა ორგანიზაცია ,,WeResearch’’-მა. ჩატარდა როგორც ფოკუს-ჯგუფები, ასევე, პირისპირ ინტერვიუები, ჩვენ გამოვკვეთეთ და ვიკვლიეთ ისეთი საკითხები, როგორიცაა: COVID-19 პანდემიის გავლენა მიუსაფარ ქალთა ფინანსურ მდგომარეობასა და დასაქმებაზე, ოჯახის წევრთა შორის ურთიერთობებზე, საკვებ რაციონზე, ჯანდაცვის სერვისების ხელმისაწვდომობაზე, თავის მოვლის შესაძლებლობებზე, ასევე დისტანციურ სწავლებასა და მასთან დაკავშირებულ სირთულეებზე. კვლევის შედეგად კი შევიმუშავეთ ძირითადი მიგნებები და რეკომენდაციები, რომლებიც გაეგზავნა სხვადასხვა სახელმწიფო უწყებასა და ინსტიტუტს, ასევე, დეტალურად განვიხილეთ დღევანდელ პრეზენტაციაზე. კვლევა ნებისმიერი დაინტერესებული პირისთვის ხელმისაწვდომია ჩვენს ვებგვერდზე: www.csdc.ge

 

  • როგორია ორგანიზაციის სამომავლო გეგმები? თქვენ საუბრისას აღნიშნეთ, რომ პროექტით გათვალისწინებული 100 ქალის გარდა, კიდევ ბევრი დახმარების მსურველი ქალი დარეგისტრირდა პროექტში მონაწილეობის მისაღებად…

გეთანხმებით, ამ პროექტის რესურსით ყველა რეგისტრირებულ ქალს ვერ გავწვდებოდით. აღსანიშნავია ისიც, რომ მათ გარდა, ჩვენი ორგანიზაციის სოციალურ ქსელშიც ყოველდღიურად გვწერენ მიუსაფარი ქალები, არა მხოლოდ თბილისიდან, არამედ სხვადასხვა ქალაქიდან და რეგიონიდან. სამოქალაქო საზოგადოების განვითარების ცენტრი ამ კუთხით ისევ გააგრძელებს მუშაობას, რადგან, ჩვენი მისიაა,   მოწყვლადი ქალებისა და   ბავშვების საჭიროებების ადვოკატირება,  მათი   ინტეგრირება   საზოგადოებაში   სამოქალაქო   უფლებების   დაცვის, ინოვაციური  ტექნოლოგიებისა  და  არაფორმალური  საგანმანათლებო  პროგრამების  უზრუნველყოფით, რათა მათ შეძლონ ღირსეული და დამოუკიდებელი ცხოვრება. იმედი გვაქვს, რომ პარტნიორების მხარდაჭერითა და საზოგადოების ჩართულობით, უფრო მეტი ქალისა და მათი ოჯახების დახმარებას შევძლებთ მომავალში.

ქეთევან ნინუაhttp://tiflisnews.ge
საინფორმაციო სააგენტო tiflisnews.ge კონტაქტი- ☎️ 555 100 929

17 წლის მარიამ ამბალიას საზოგადოების დახმარება სჭირდება

სოციალურ ქსელში ვრცელდება ინფორმაცია 17 წლის მარიამ ამბალიას მდგომარეობის შესახებ, რომელსაც სამკურნალოდ თურქეთში გადაყვანა ესაჭიროება.17 წლის მარიამ ამბალია, რომელიც მძიმედ დაშავდა სანადირო თოფიდან შემთხვევით გასრილილი ტყვიით იბრძვის სიცოცხლის გადასარჩენად.მდგომარეობის გაუარესების გამო სასწრაფოდ საჭიროებს თურქეთში გადაყვანას.საზოგადოებას უმორჩილესად ვთხოვთ, შეძლებისდაგვარად დავეხმაროთ მარიამს!თანხის მიმღები: ეკა გაბისონია.პ/ნ 29001009563ანგ.საქ.ბანკი GE55BG0000000609401350

ვიქტორ ჯაფარიძე გიორგი კაკაურიძეს: სახელმწიფოს უსაფრთხოება ნომერ პირველი ამოცანა უნდა იყოს, გთხოვთ, გაითვალისწინოთ, რომ ძალოვანი სტრუქტურებისთვის მატერიალურ-ტექნიკური ბაზის განახლება აუცილებელია

პარლამენტის თავდაცვისა და უსაფრთხოების კომიტეტის სხდომაზე, „საქართველოს 2026 წლის სახელმწიფო ბიუჯეტის შესახებ“ მოხსენების განხილვისას, თავდაცვისა და უშიშროების კომიტეტის თავმჯდომარის მოადგილე ვიქტორ ჯაფარიძემ საქართველოს ფინანსთა მინისტრის პირველ მოადგილეს, გიორგი კაკაურიძეს მიმართა.ვიქტორ ჯაფარიძის თქმით, სახელმწიფოს უსაფრთხოება ნომერ პირველი პრიორიტეტი უნდა იყოს და ძალოვანი სტრუქტურებისთვის მატერიალურ-ტექნიკური ბაზა აუცილებლად უნდა განახლდეს.„ბატონო გიორგი, ხელფასის 10%-იანი ზრდა კარგია, მეტი ჯობია, მაგრამ მატერიალურ-ტექნიკური ბაზის განახლება, გაუმჯობესება და გაზრდა ძალოვანი სტრუქტურებისთვის აუცილებელია. თუ ამის საშუალება არ არის, რაღაც პროექტებს ნამდვილად უნდა მოაკლოთ და სახელმწიფოს უსაფრთხოება უნდა იყოს ნომერ პირველი ამოცანა. გთხოვთ, ეს გაითვალისწინოთ“, - აღნიშნა ვიქტორ ჯაფარიძემ.ფინანსთა მინისტრის პირველი მოადგილის განმარტებით, უსაფრთხოება ნამდვილად პრიორიტეტული მიმართულებაა და საჭიროების შემთხვევაში რესურსების მობილიზება ხდება.

„სარფის“ საბაჟო გამშვები პუნქტის გავლით შემოსულმა ტვირთმა ვეტერინარული კონტროლი ვერ გაიარა

,,ფინანსთა სამინისტროს შემოსავლების სამსახურის საბაჟო გამშვებ პუნქტში „სარფი“, 19 980 კილოგრამი ქათმის გაყინული პროდუქციით და 1000 კილოგრამი თევზით დატვირთული 2 ავტოსატრანსპორტო საშუალება იქნა შეჩერებული.ვეტერინარული სასაზღვრო-საკარანტინო კონტროლის პროცედურების განხორციელებისას, შესაბამისი სპეციალისტების მიერ, აღნიშნული ტვირთის შემოწმების შედეგად, გამოვლინდა არადამაკმაყოფილებელი, ჯანმრთელობისთვის საშიში მახასიათებლების არსებობა, ასევე ტრანსპორტირების პირობების უხეში დარღვევა.კანონმდებლობის შესაბამისად, ტვირთი ექსპორტიორ ქვეყანაში გაბრუნებას დაექვემდებარა''- ამის შესახებ ნათქვამია შემოსავლების სამსახურის მიერ გავრცელებულ განცხადებაში.

საქართველოს ტექნიკურ უნივერსიტეტში, ბრიტანელი ექსპერტების ჩართულობით, მასშტაბური პროექტის – „ინოვაციური იდეების კონკურსი“, ჩატარება დაანონსდა

საქართველოს ტექნიკურ უნივერსიტეტში, სტუდენტებსა და კურსდამთავრებულებს შორის ინოვაციური იდეების გენერაციისა და მათი პრაქტიკული განხორციელების ხელშეწყობის მიზნით, კილის უნივერსიტეტთან (დიდი ბრიტანეთი) მრავალწლიანი პარტნიორობის ფორმატში დაგროვილი გამოცდილების გათვალისწინებით, მასშტაბური საუნივერსიტეტო ინიციატივის - „ინოვაციური იდეების კონკურსი - მომავლის პროექტები“ - ჩატარება სპეციალურად მოწვეულ საორგანიზაციო შეხვედრაზე ოფიციალურად დაანონსდა.ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, საორგანიზაციო შეხვედრაში მონაწილეობდნენ სტუ-ის ვიცე-რექტორები - თამარ წერეთელი და თამარ ლომინაძე, სხვადასხვა ფაკულტეტის დეკანები და უნივერსიტეტის შესაბამისი ადმინისტრაციული დეპარტამენტების ხელმძღვანელები.„შეხვედრაში მოწვეული ექსპერტების სტატუსით ჩართულნი იყვნენ პარტნიორები დიდი ბრიტანეთიდან, კერძოდ - კილის უნივერსიტეტის ბიზნესის სკოლის მეწარმეობის დირექტორი, დოქტორი კოლინ რიგბი და ამავე სკოლის პარტნიორობის განვითარების მენეჯერი ციფრული და კრეატიული ინდუსტრიების მიმართულებით - ემა ბონფილიო.როგორც საორგანიზაციო შეხვედრაზე აღინიშნა, ფართომასშტაბიანი საუნივერსიტეტო ინიციატივის - „ინოვაციური იდეების კონკურსი - მომავლის პროექტები“ - მიზანი სტუდენტებს, კურსდამთავრებულებსა და ახალგაზრდა თანამშრომლებს შორის ახალი სამეწარმეო ცოდნა-გამოცდილების გაზიარება, ახალგაზრდების სამეწარმეო უნარების განვითარება, ახალი ბიზნესების ამოქმედების ხელშეწყობა და მისი ფუნქციონირების მხარდაჭერაა, რაც საერთო ჯამში, საქართველოს ტექნიკურ უნივერსიტეტსა და ინდუსტრიებს შორის მჭიდრო და ეფექტიანი თანამშრომლობის სტიმულირებას შეუწყობს ხელს“, - ნათქვამია ინფორმაციაში.ვიცე-რექტორის, პროფესორ თამარ ლომინაძის განცხადებით, ინოვაციური იდეების საუნივერსიტეტო კონკურსის განხორციელება, რაც მოიცავს ახალგაზრდებში ინოვაციური იდეების გენერაციისა და მათი პრაქტიკულად აღსრულების ხელშეწყობას, რამდენიმე ეტაპად წარიმართება„მიგვაჩნია, რომ მსგავსი ფორმატის კონკურსები საუნივერსიტეტო სივრცის მდგრადი განვითარების უმნიშვნელოვანესი კომპონენტია. ინოვაციური იდეების კონკურსი ხელს შეუწყობს სტუდენტებისა და კურსდამთავრებულების ინტეგრირებას რეალურ ბიზნეს და ეკონომიკურ პროცესებში, გააღრმავებს თანამშრომლობას აკადემიურ სექტორსა და ინდუსტრიებს შორის, ხოლო ახალგაზრდა კონკურსანტებისთვის ამით იქმნება ერთგვარი საუნივერსიტეტო პლატფორმა, რომელიც მნიშვნელოვნად აჩქარებს მათ პროფესიულ, სამეწარმეო და კარიერულ წინსვლას. მნიშვნელოვანია, რომ ეს ინიციატივა ეხმიანება თანამედროვე საგანმანათლებლო ტენდენციებს, საერთაშორისო პარტნიორებთან და ადგილობრივ თუ საერთაშორისო ინდუსტრიებთან ეფექტიან კოლაბორაციას. საბოლოო ჯამში კი, აღნიშნული პროცესები ხელს უწყობს საქართველოს ტექნიკურ უნივერსიტეტს ჩამოყალიბდეს სამეცნიერო და პრაქტიკული ინოვაციების ცენტრად.ინოვაციური იდეების კონკურსი სამ ძირითად კატეგორიაში ჩატარდება. ესენია: „ციფრული ტექნოლოგიები“; „სოციალური გავლენა“; „შემოქმედებითობა“; გარდა ამისა, ცალკე კატოგორიად განვიხილავთ „ფენტეზის“. საგულისხმოა, რომ ინოვაციური იდეების გენერირება და მათი პრაქტიკაში შესრულება მოხდება ინკუბაციისა და პროფესორ-მასწავლებლებთან საკონსულტაციო მუშაობის გზით. გამარჯვებული ახალგაზრდები გამოვლინდებიან თითოეული კატეგორიის მიხედვით. პროექტის ფარგლებში, საქართველოს ტექნიკურ უნივერსიტეტში სპეციალური ჟიური გამოავლენს მაქსიმუმ 10 ინოვაციურ იდეას, რომელთა წარდგენაც ღონისძიების დასკვნით ეტაპზე, მიმდინარე წლის დეკემბერში, ავტორების მიერ პრეზენტაციის სახით მოხდება. კონკურსში ძირითად ეტაპზე ჩართვა შესაძლებელია როგორც ინდივიდუალურად, ასევე, გუნდურად. გუნდის შემთხვევაში, წევრთა რაოდენობა სამს არ უნდა აღემატებოდეს. კონკურსანტები, რომლებიც დასკვნით ეტაპზე დამუშავებულ პროექტებს წარადგენენ და გაიმარჯვებენ კონკურში, სხვადასხვა პრიზით დაჯილდოვდებიან. გვინდა ჩვენმა ახალგაზრდებმა გაითვალისწინონ, რომ კონკურსში მონაწილეობა შეუძლიათ საქართველოს ტექნიკური უნივერსიტეტის ნებისმიერი საფეხურის სტუდენტებს, აკადემიურ და ადმინისტრაციულ პერსონალს, ჩვენს კურსდამთავრებულებს - 18-დან 35 წლის ასაკამდე პირებს, რომლებსაც შესწევთ უნარი წარმოადგინონ ინოვაციური სამეწარმეო იდეები და ამასთან ერთად, სურთ თავიანთი იდეები რეალურ ბიზნესპროექტებად აქციონ,“ - აღნიშნა თამარ ლომინაძემ.საორგანიზაციო შეხვედრაზე მიღებული გადაწყვეტილების თანახმად, ინოვაციური იდეების კონკურსის ჩატარების, რეგისტრაციის ვადების, საკონკურსო პირობებისა და ეტაპების შესახებ დეტალური ინფორმაცია საქართველოს ტექნიკური უნივერსიტეტის ოფიციალურ ვებგვერდსა და სოციალურ ქსელებში უახლოეს დღეებში გამოქვეყნდება. სტუ-ის ინფორმაციით, ინოვაციური იდეების კონკურსის ჩატარებას ორგანიზებას უწევენ სტუ-ის ტექნოლოგიებისა და საგრანტო პროექტების ოფისი და საუნივერსიტეტო ცენტრი - „ერთად“. კონკურსის მთავარი პარტნიორია სტუ-ის სტუდენტური სერვისების, სპორტისა და კულტურის დეპარტამენტი; ღონისძიების აკადემიურ მხარდაჭერას სტუ-ის სატრანსპორტო სისტემებისა და მექანიკის ინჟინერიის ფაკულტეტის სამეწარმეო მენეჯმენტის საგანმანათლებლო პროგრამა ახორციელებს, ხოლო კონკურსის მიმდინარეობისას მონაწილეებს კონსულტაციებს ბრიტანელი ექსპერტები გაუწევენ.

ნიკოლ ფაშინიანი – პროექტი „ტრამპის გზა“ დსთ-სთვის ახალ შესაძლებლობებს ხსნის

„ტრამპის გზა“ დსთ-სთვის ახალ შესაძლებლობებს ხსნის, – ამის შესახებ სომხეთის პრემიერ-მინისტრმა, ნიკოლ ფაშინიანმა ტაჯიკეთის დედაქალაქ დუშანბეში, დსთ-ს სახელმწიფოების მეთაურების სამიტზე განაცხადა.ფაშინიანმა აღნიშნა, რომ სომხეთი „ტრამპის გზაზე“ აშშ-სთან და შეთანხმებულ მესამე მხარეებთან იმუშავებს.ფაშინიანის თქმით, TRIPP-ის (ტრამ­პის გზა სა­ერ­თა­შო­რი­სო მშვი­დო­ბი­სა და კე­თილ­დღე­ო­ბის­თვის) პროექტი სომხეთს დსთ-ს წევრ აზერბაიჯანთან და დსთ-ს სხვა წევრებთან სარკინიგზო, ასევე სხვა სატრანსპორტო კავშირებით უზრუნველყოფს.„ეს მნიშვნელოვანი ცვლილება და გარემოებაა, რომელიც უდავოდ ხელს შეუწყობს დსთ-ს ფარგლებში ეკონომიკური კავშირების განმტკიცებას და ორგანიზაციის ეფექტიანობის გაზრდას“, – განაცხადა ფაშინიანმა.როგორც ფაშინიანმა აღნიშნა, პროექტი თანამეგობრობის ქვეყნებისთვის ექსპორტისა და იმპორტის ახალ შესაძლებლობებს ხსნის.ნიკოლ ფაშინიანმა ასევე ისაუბრა ბაქოსთან სამშვიდობო შეთანხმების პარაფირებაზე. მისი თქმით, დამყარებული მშვიდობა არ ნიშნავს, რომ სომხეთსა და აზერბაიჯანს შორის დღის წესრიგში არსებული საკითხები ამოწურულია.„ჩვენ ჯერ კიდევ უნდა დავამყაროთ ორმხრივი სავაჭრო, ეკონომიკური, პოლიტიკური, კულტურული კავშირები და მოვაგვაროთ ჰუმანიტარული საკითხები. მტრობის მრავალწლიანი ისტორიის გათვალისწინებით, ეს მარტივი საქმე არ არის, თუმცა დამყარებული მშვიდობა იძლევა რწმენას, რომ ეს საკითხები თანდათან მოგვარდება“, – განაცხადა სომხეთის პრემიერმა.

ბოლო სიახლეები