იაგო ხვიჩია: მზად ვართ, ჩვენს სამ მილიონ-ნახევარზე ვთქვათ უარი, თუ ბარიერგადალახული ოთხი პარტია იტყვის უარს დაფინანსებაზე, უნდა დაწერონ, არ ვიღებ ფულს, არ ვცნობ არჩევნებს

მინდა, დავიწყო მადლობით, განსაკუთრებული მადლობა ბატონ ბიძინა ივანიშვილს, ჩვენთვის საამაყო და გამორჩეულ პიროვნებას. მე ამაყი და ბედნიერი ვარ, რომ ასეთ რთულ გამოწვევებით სავსე ეპოქაში ჩვენი ქვეყნის დაცვა მიწევს ამ ადამიანთან ერთად. დიდი მადლობა, რომ ეს ნდობა მომანიჭა, – ამის შესახებ საქართველოს პრეზიდენტობის კანდიდატმა, მიხეილ ყაველაშვილმა განაცხადა. ყაველაშვილის განცხადებით, დარწმუნებულია, რომ საზოგადოება მხარს დაუჭერს. „მინდა, მადლობა გადავუხადო ჩემს თანამებრძოლებს, უმრავლესობის თითოეულ წევრს. გაცნობიერებული მაქვს, რამდენად დიდი პასუხისმგებლობაა საქართველოს პრეზიდენტის თანამდებობა, მით უმეტეს იმ ფონზე, როცა ჩვენდა სამწუხაროდ მოქმედმა პრეზიდენტმა უგულვებელყო ჩვენი მთავარი დოკუმენტი საქართველოს კონსტიტუცია და დღესაც აგრძელებს მის დარღვევას. ჩვენი საზოგადოება არის დაპირისპირებული, რადიკალიზაცია, პოლარიზაციაა გაღვივებული, ჩვენი არაკეთილმოსურნე მეგობრები ეხმარებიან, რომ ეს პროცესი უფრო მეტად გამძაფრდეს. აქედან გამომდინარე, ერთ-ერთი მთავარი მიზანი და მისია იქნება, რომ კონსტიტუციურ ჩარჩოში დავაბრუნოთ პრეზიდენტის ინსტიტუტი“, – განაცხადა ყაველაშვილმა. მისივე თქმით, დღეს პრეზიდენტის ინსტიტუტი ძალიან საპასუხისმგებლოა. „ჩვენ გვაქვს ძალიან გამართული  კონსტიტუცია და ძალიან საპასუხისმგებლოა პრეზიდენტის ინსტიტუტი. ყველაზე მთავარი მოცემულობა არის, რომ სწორედ ზეპარტიული, საზოგადოების გამაერთიანებელი უნდა იყოს საქართველოს პრეზიდენტი. საქართველოში ქართველებს არ გვესწავლება, რომ სიძულვილი ნამდვილად ჰყოფს და აპირისპირებს ადამიანებს, ამის საპირისპიროდ სიყვარული არის გამაერთიანებელი. მე მინდა, დაგპირდეთ, უსაზღვროდ მიყვარს ჩემი სამშობლო და ქვეყანა. ყველაფერს გავაკეთებ, რომ საქართველოს საზოგადოება ეროვნული ინტერესების, იდენტობისა და ქვეყნის დამოუკიდებლობის იდეის ირგვლივ გაერთიანდეს. დარწმუნებული ვარ, საზოგადოება მხარს დაგვიჭერს და უფრო მეტად ძლიერს გახდის ჩვენს საქართველოს“, – განაცხადა ყაველაშვილმა.

არ გვიკვირს, როდესაც ქალბატონი მარგარეტა გრეგოროვა და რასა იუკნევიჩიენე ნიკა გვარამიასთან და თინა ბოკუჩავასთან ერთად აკეთებენ განცხადებებს, თუმცა საზოგადოებამ უკვე კარგად გაარჩია, ვინ რის მხარეს დგას, – ამის შესახებ უმრავლესობის წევრმა, გივი მიქანაძემ განაცხადა. მისივე თქმით, ეს არიან ადამიანები, რომლებიც თავს ასაღებენ საქართველოს მეგობრად, ამ დროს საქართველოს და ქართველი ხალხის წინააღმდეგ დგამენ ნაბიჯებს. ამასთან, როგორც მიქანაძემ აღნიშნა, რეალურად ხედავენ იმასაც, რომ ევროპარლამენტშიც გაჩნდნენ სამართლიანობის დამცველი პოლიტიკოსები, რომლებიც უკვე ხმამაღლა ამბობენ, რომ საქართველოს შიდა საქმეებში ჩარევა არ შეიძლება. „ვხედავთ ქვეყნის გარეთ წარმოებულ მორიგ კამპანიას. რადიკალური ფრთის ოპოზიცია წინასაარჩევნო პერიოდშიც კი სისტემატურად სტუმრობდა უცხოეთს, წინასაარჩევნო კამპანიას ეწეოდა იქ და არა მოსახლეობასთან, რადგან მათ მოსახლეობისთვის არც არაფერი ჰქონდათ სათქმელი. ახლაც გამოჩნდნენ ისეთ ოდიოზურ ფიგურებთან ერთად, რომლებიც ქართული საზოგადოებისთვის ძალიან კარგად ცნობილი არიან. ესენი არიან ადამიანები, რომლებიც თავს ასაღებენ საქართველოს მეგობრად, ამ დროს საქართველოს და ქართველი ხალხის წინააღმდეგ დგამენ ნაბიჯებს, აკეთებენ ყველაფერს, რათა გაამყარონ და რაღაც ფორმით აცოცხლონ რადიკალური ოპოზიციის ქმედებებთან დაკავშირებული დღის წესრიგი. უფრო მეტიც, ისინი არიან დაინტერესებულნი, რომ რადიკალურმა ოპოზიციამ გარკვეულ წარმატებას მიაღწიოს. ისინი მხარეს წარმოადგენენ. ეს არასოდეს არც დაუმალავთ და პირდაპირ წინააღმდეგობრივ პოზიციებს აფიქსირებენ, მმართველი გუნდის საწინააღმდეგო პროპაგანდას ეწევიან ყოველგვარი საფუძვლის გარეშე. მათი დამოკიდებულება მიხეილ სააკაშვილთან არის განმსაზღვრელი იმ პოზიციონირების, რომელსაც სამწუხაროდ აგრძელებენ და აბსოლუტურად რეალობისგან და სამართლიანობისგან აცდენილი არიან. აქედან გამომდინარე ასეთი განცხადებები არანაირი სერიოზულ აღქმას ჩვენ საზოგადოებაში არ იწვევს. ჩვენ ვხედავთ, რომ რადიკალებს არანაირი რესურსი არ გააჩნიათ ქვეყნის შიგნით და ეს ქვეყნის გარეთაც მილევად რეჟიმშია, ერთი და იმავე ოდიოზურ ფიგურებთან აქვთ კომუნიკაცია. რეალურად იმასაც ხედავენ, რომ ევროპარლამენტშიც გაჩნდნენ ჯანსაღი აზრის და სამართლიანობის დამცველი პოლიტიკოსები, რომლებიც უკვე ღიად და ხმამაღლა ამბობენ, რომ არ შეიძლება, საქართველოს შიდა საქმეებში ჩარევა იმ ფორმით, რასაც ევროპარლამენტი ცდილობს წლების განმავლობაში. რაც მთავარია, მოუწოდებენ ევროკავშირის წევრ ქვეყნებს, რომ აბსოლუტურად მისაღებია არჩევნები, რომელიც მაღალი სტანდარტით ჩატარდა 26 ოქტომბერს,  შესაბამისად უფრო ინტენსიურად უნდა გაგრძელდეს თანამშრომლობა საქართველოსთან, ევროკავშირში შემდგომი ინტეგრაციის კუთხით. ამიტომ ჩვენ არ გვიკვირს, როდესაც ქალბატონი გრეგოროვა და ქალბატონი იუკნევიჩიენე და სხვა ოდიოზური პირები ნიკა გვარამიასთან და თინა ბოკუჩავასთან ერთად მსგავს განცხადებებს აკეთებენ, თუმცა ჩვენმა საზოგადოებამ უკვე ძალიან კარგად გაარჩია, ვინ რის მხარეს დგას. ამის ნათელი დადასტურება იყო ის შედეგი, რაც საზოგადოების მხარდაჭერით 26 ოქტომბრის არჩევნებზე დაფიქსირდა“, – განაცხადა გივი მიქანაძემ. დღეს „კოალიცია ცვლილებებისთვის“ ერთ-ერთმა ლიდერმა, ნიკა გვარამიამ და „ერთიანობა – ნაციონალური მოძრაობის“ ერთ-ერთმა ლიდერმა, თინა ბოკუჩავამ სტრასბურგში ევროპარლამენტარებთან ერთად ერთობლივი პრესკონფერენცია გამართეს. როგორც პრესკონფერენციაზე ევროპარლამენტარმა, რასა იუკნევიჩიენემ განაცხადა, „ყველაზე მნიშვნელოვანია არჩევნების შედეგების ცნობის უარყოფა და ხელახალი არჩევნების მოთხოვნა, რათა უზრუნველყოფილი იქნეს თავისუფალი საარჩევნო პროცესი ერთ წელიწადში“. ხოლო ევროპარლამენტარმა, მარკეტა გრეგოროვამ აღნიშნა, რომ „რეზოლუციაში გაწერილია  ნაბიჯები, მაგალითად ინდივიდუალურად, მიზანმიმართული სანქციები იმ ადამიანების მიმართ, რომლებიც არიან საარჩევნო მანიპულაციების უკან, ისევე, როგორც მოგზაურობის აკრძალვა ინდივიდებისთვის“.

ხაშურში, ავტოსაგზაო შემთხვევის შედეგად მძიმედ დაშავებული დების, 15 წლის ნიაკოს და 8 წლის თათულის ჯანმრთელობის მდგომარეობის შესახებ რეჟისორი სანდრო ელოშვილი სოციალურ ქსელში სასიხარულო ინფორმაციას ავრცელებს.  „სანამ, მანამ და მანამ სანამ, გავერკვევით ვინ მოიგო და ვინ წააგო... ერთ დადასტურებულ გამარჯვებაზე მოგიყვებით ყველას, ვისაც გვჯეროდა და არ გვჯეროდა, ვინც საკუთარ შვილებს მოაკელით თუნდაც ერთი ლარი და ვინც გულში ისე ილოცეთ, საკუთარი შვილებისთვის რომ ილოცებდით... თვე ნახევრის წინ ამ ორ მზის სხივა და ღიმილა გოგოს ავტომობილი შეეჯახა და მდგომარეობა საშინლად მძიმე იყო... ერთი ბავშვი მ. იაშვილის კლინიკაში იყო, მეორე - New Hospitals ში... სხვადასხვა სახის დაზიანებით და სხვადასხვა სახის ბრძოლით... ხოდა სახელებად რომ ვიცოდეთ რა და თუ ვინმე იცნობთ, უთხარით რომ ყველაზე ჩემპიონები არიან!   ვინც პირველები ოპერაციაზე შევიდნენ... ლევან ტარუაშვილი და ირაკლი თოიძე... რეანიმაციის უფროსები: დავით ციბაძე და მაკუნა თევზაძე... დაიწყეს, დაიწყეს და არ გაჩერდნენ! სამწუხაროდ, ყველას სახელი არ ვიცი... ექიმები, ექთნები, თანამშრომლები... მერე ჩვენც გავიგეთ ეს ამბავი და სხვის ანგარიშებზე ვერაფერს გეტყვით, მაგრამ 60 000 ლარზე მეტი შევაგროვეთ ერთ დღეში!!! მაგრამ ყველაზე დიდი ჩემპიონი, ჩემი ახალი მეგობარი, სოფიო ხარშილაძე მგონია, პატარების დედა... რომელმაც თქვა რომ ზუსტად ისე იქნებოდა, როგორც მას სურდა! როგორც შვილებზე შეყვარებულ დედას უნდოდა! ხოდა, სულ ორი წამით დავივიწყოთ ვინ საით მივდივართ და საით მიგვეჩქარება... ვის როგორ გვინდა და როგორ გამოგვდის... ვინ რა მოვიგეთ და ვინ რა წავაგეთ... ყველამ, სულ ყველამ გავიმარჯვეთ! სიკეთემ გაიმარჯვა ბოროტებაზე... სინათლემ გაიმარჯვა სიბნელეზე... სიყვარულმა სიძულვილზე და რაც მთავარია... სიცოცხლემ! სიცოცხლემ! სიცოცხლემ გაიმარჯვა სიკვდილზე! ქრისტეს გზა როა... ღმერთის გზა როა... ჩვენში როა და ჩვენი ძალაა... აი, მაგ ძალამ გაიმარჯვა! ნიაკოს და თათულის სიცოცხლეს საფრთხე არ ემუქრება, თათუს აღარ დასჭირდა თავის შულტირება, ნიას დღეს აუწყვეს თავის ქალა. ორივე გონზეა და ემოციებს კი იხარე... ცოტა ცრემლებს ღვრიან, მაგრამ თვე ნახევარი მეც რომ მეძინოს და მწვადი არ შევჭამო, მეც ვიტირებ... ეს ხუმრობით, მაგრამ ახლა ნამდვილად გვაქვს საქმე გასაცინად... გასაღიმად... გასახარად! წინ რთული და გრძელი რეაბილიტაციის პროცესია, მაგრამ ისეთი მაგარი გოგოები არიან... ისეთი... ისეთი...დედამიწას გადადგამენ და თავის თავს კი არა, ჩვენც კი მოგვხედავენ... დედამიწის ანგელოზებო... ასეთი ხუმრობები აღარ იყოს! სამყარო უნდა გააფერადოთ!“, - წერს სანდრო ელოშვილი სოციალურ ქსელში.

აშშ აგრძელებს უკრაინის თავდაცვის გასაძლიერებლად დახმარების გაზრდას, – ამის შესახებ აშშ-ის სახელმწიფო მდივანმა, ენტონი ბლინკენმა „დიდი შვიდეულის“ წევრი ქვეყნების საგარეო საქმეთა მინისტრებთან შეხვედრის შემდეგ განაცხადა. ბლინკენის თქმით, რუსეთის მიერ უკრაინასთან ომში ჩრდილოეთ კორეელი ჯარისკაცების განლაგება, შეშფოთების საგანი იყო „დიდი შვიდეულისთვის“ და ვაშინგტონი ყურადღებით ადევნებს თვალს, რას აკეთებს და რა შეიძლება გააკეთოს რუსეთმა ჩრდილოეთ კორეისთვის ამის სანაცვლოდ. „აშშ აგრძელებს დახმარების გაზრდას უკრაინის თავდაცვის გასაძლიერებლად და რუსეთის ესკალაციაზე რეაგირებას, განსაკუთრებით ახლა, ჩრდილოეთ კორეიდან ჯარისკაცების ჩართულობის ფონზე. ნება მომეცით, ვთქვა, რომ ეს არის დიდი შეშფოთების საკითხი „დიდი შვიდეულის“ ყველა წევრისთვის, იმის გამო, რას ნიშნავს ეს უკრაინისთვის, იმის გამოც, რას ნიშნავს ეს ევროპული უსაფრთხოებისთვის, ასევე იმის გამო, რას ნიშნავს ეს ინდო-წყნარი ოკეანესთვის. რუსეთსა და ჩრდილოეთ კორეას შორის ურთიერთობა ორმხრივი გზაა. ჩვენ ვხედავთ, რას აკეთებს ჩრდილოეთ კორეა რუსეთისთვის, მაგრამ ჩვენ ასევე ყურადღებით ვუყურებთ, რას აკეთებს და რა შეიძლება გააკეთოს რუსეთმა ჩრდილოეთ კორეისთვის, მათ შორის პოტენციურად გაზარდოს მისი სარაკეტო და ბირთვული შესაძლებლობები“, – განაცხადა ენტონი ბლინკენმა.

ცოტა უფრო რადიკალური ზომებია საჭირო, საქართველოს ჰიმნის სიმღერა არ ჭრის. ხომ ხედავთ, ამ ადამიანებზე არაფერი არ მოქმედებს, - ამის შესახებ პაატა ბურჭულაძემ „ტვ პირველის“ ეთერში განაცხადა. მისი თქმით, არ სურს ჩხუბისა და შეტაკებებისკენ მოუწოდოს საზოგადოებას, მაგრამ „გამჭვირვალობის კანონის“ პირველი ინიციირების დროს გამართულ საპროტესტო აქციებზე იყო შეტაკებები, რის გამოც ხელისუფლებამ უკან დაიხია. შესაბამისად, ბურჭულაძეს მიაჩნია, რომ პოლიტიკოსებმა რაიმე რადიკალური გზა უნდა შესთავაზონ ხალხს. „ამათ ბატონებო, უკან დასახევი გზა არ აქვთ, მაგრამ შემოგვხედეთ ჩვენც - ჩვენ სხვა სამშობლო არ გვაქვს, უკან ვერ დავიხევთ, საქართველო არის ერთი ჩვენთვის, ჩვენი სამშობლო. ეს ხალხი, რომელიც ასიათასობით გამოდიოდა ქუჩაში, მადლობა ღმერთს, ჯერ არ წასულა საზღვარგარეთ. ისე ბევრს აქვს უკვე წასასვლელად და გასაქცევად საქმე, ესენი კიდევ აქ არიან, ამიტომაც ჩვენ უნდა შევთავაზოთ, უფრო სწორად, პოლიტიკოსებმა, რაღაც ცოტა რადიკალური. მე არ მინდა ჩხუბის და შეტაკებებისკენ მოვუწოდო, მაგრამ იყო პატარა შეტაკება პირველად შარშანწინ მარტის თვეში „რუსულ კანონზე“. მე იქ ვიდექი, ახალგაზრდები იდგნენ, ევროპული დროშით გოგონა რომ გვყავს ახლა ჩვენ. იყო დაიხია უკან , იმიტომ რომ რაღაც რეაგირება მოხდა. სიმღერა-სიმღერით სიარულით და დროშების ფრიალით ამათთან ვერ გავალთ ვერაფერს.“ - აღნიშნა პაატა ბურჭულაძემ.