თელაველი სპორტსმენი, ვახტანგ ჩიდრაშვილი სამბოში ვიცე-ჩემპიონია

ტრანსკასპიური დერეფანი, შეიძლება, იქცეს გზად არა მხოლოდ ევროპისკენ, არამედ მშვიდობისკენაც, – ამის შესახებ ევროკომისიის პრეზიდენტმა, ურსულა ფონ დერ ლაიენმა განაცხადა.აღნიშნული განცხადება ევროკომისიის პრეზიდენტმა ბრიუსელში, ევროკავშირის ელჩების კონფერენციაზე სიტყვით გამოსვლისას გააკეთა.„დავფიქრდეთ ისეთ სტრატეგიულ პროექტებზე, როგორიცაა ტრანსკასპიური სატრანსპორტო დერეფანი. ერთ შეხედვით, მისი მიზანია, შეამციროს მოგზაურობის დრო ცენტრალურ აზიასა და ევროპას შორის 30-დან 15 დღემდე, მაგრამ ეს პროექტი უფრო მეტია. ეს დერეფანი დააკავშირებს წარსულში ერთმანეთისადმი მტრულად განწყობილ სახელმწიფოებს სამხრეთ კავკასიაში და ასევე მათ დააკავშირებს ევროპასთან. ისე, როგორც ქვანახშირმა და რკინამ გააერთიანა ევროპა მეორე მსოფლიო ომის შემდეგ, ამ ახალ დერეფანს შეუძლია, ვაჭრობა და თანამშრომლობა ნორმად აქციოს პრობლემურ რეგიონში და იქცეს გზად არა მხოლოდ ევროპისკენ, არამედ მშვიდობისკენ. ჩემი მოსაზრება მარტივია, ამ რეგიონში, ისევე როგორც აფრიკასა, თუ ახლო აღმოსავლეთში, ჩვენი ინვესტიციები ნიშნავს, რომ ჩვენ გვაქვს ბერკეტი და წარმომადგენლობა“, – განაცხადა ურსულა ფონ დერ ლაიენმა.

ძალიან სამწუხაროა, როდესაც ჩვენი ქვეყნის მოქალაქე აკეთებს ამ ტიპის და ამ შინაარსის განცხადებას მაშინ, როდესაც ვხედავთ, რა ხდება მსოფლიოში, რამდენად მძიმე მდგომარეობაა რეგიონში, – ასე პასუხობს თბილისის მერი კახა კალაძე ჟურნალისტის კითხვას სახელმწიფო უსაფრთხოების სამსახურის მიერ დაწყებულ გამოძიებასთან დაკავშირებით, რომელიც უკავშირდება ქართველი პოლიტიკოსებისა და საჯარო პირების მიერ მედიით გაკეთებულ განცხადებებს.მისივე თქმით, მსგავსი ტიპის განცხადებები, რომლებიც ტყუილზეა დაფუძნებული, შესაძლოა, საფრთხის შემცველი იყოს, შესაბამისად, გამოძიების დაწყება სწორი და დროული იყო.„ძალიან სამწუხაროა, როდესაც ჩვენი ქვეყნის მოქალაქე აკეთებს ამ ტიპის და ამ შინაარსის განცხადებას მაშინ, როდესაც ვხედავთ, რა ხდება მსოფლიოში, რამდენად მძიმე მდგომარეობაა რეგიონში. ამ ყველაფრის გათვალისწინებით, ამ ტიპის განცხადებების გაკეთება, რომელიც სიცრუეზე, ტყუილზეა დაფუძნებული, არის ძალიან დიდი საფრთხის შემცველი. მარტივად რომ ვთქვათ, ეს არის მავნებლობა.ძალიან მნიშვნელოვანი იყო მყისიერი რეაგირება აღნიშნულზე. ჩვენ როგორც ვიცით, დაკითხვაზე იყვნენ ეს ადამიანები დაბარებული. არსებობდა კონკრეტული კითხვები აღნიშნულ საკითხთან დაკავშირებით.ყველა ადამიანს, რიგით მოქალაქეს, რომელიც უყურებს და ისმენს ტელევიზიით ამ შინაარსის და ამ ტიპის განცხადებებს, გაუჩნდება კითხვა: რა დგას ამის უკან? როგორ შეიძლება, ადამიანმა იკადროს ისეთი სიცრუე, რომელიც ძალიან დამაზიანებელი შეიძლება იყოს ჩვენი ქვეყნისთვის? შესაბამისად, გამოძიების დაწყებაც იყო სწორი, დროული, სწრაფი რეაგირება მოჰყვა ამ ყველაფერს. მათი მხრიდან შეცვლილი პოზიცია და შემდეგ გაკეთებული კომენტარი რაზე მიუთითებს, დარწმუნებული ვარ, ყველა ხვდება“, – განაცხადა კახა კალაძემ.

ოპოზიციის მხრიდან ხელისუფლების აღიარება-არაღიარებაზე საუბარი არის პოლიტიკური სპეკულაცია, – ამის შესახებ დედაქალაქის მერმა, კახა კალაძემ მედიასთან ისაუბრა.როგორც მან აღნიშნა, საქართველოში ეუთო-ს საპარლამენტო ასამბლეის დელეგაციის ვიზიტი არის დასტური იმის, რომ ხელისუფლება საერთაშორისო ორგანიზაციებთან აქტიურ თანამშრომლობას აგრძელებს.„ყველაზე მთავარი და მნიშვნელოვანი არის ის, რომ ქართველმა ხალხმა აღიარა „ქართული ოცნება – დემოკრატიული საქართველო“ და უკვე მერამდენე წელია, მხარს გვიჭერს მოსახლეობის უმრავლესობა. ოპოზიციის მხრიდან კი ხელისუფლების აღიარება-არაღიარებაზე საუბარი არის პოლიტიკური სპეკულაცია. ჩვენ ვაწარმოებთ იმ პოლიტიკას, რაც ჩვენი ქვეყნისა და მოსახლეობისთვის არის მნიშვნელოვანი.რაც შეეხება უშუალოდ ეუთო-ს დელეგაციას, გვახსოვს, ბოლო არჩევნებთან დაკავშირებით როგორი შეფასებები გააკეთეს. მათ პირდაპირ განაცხადეს, რომ ყველა პოლიტიკურ პარტიას არჩევნებში მონაწილეობის შანსები თანაბრად ჰქონდა, ქართველ ხალხს კი არჩევანის თავისუფლად გაკეთება შეეძლო. ისიც გვახსოვს, ოპოზიციის, რადიკალებისა და გარე ძალების მხრიდან რა რეაქციები მოჰყვა – როგორ შეურაცხყოფას აყენებდნენ მისიის წარმომადგენლებს. მათი დამოკიდებულება ვიცით, ჩვენ კი ყველა საერთაშორისო ორგანიზაციასთან თანამშრომლობას ვაგრძელებთ”, – აღნიშნა კახა კალაძემ.

პარტიის „გახარია საქართველოსთვის“ წევრის, გიორგი შარაშიძის განცხადებით, ეუთო-ს საპარლამენტო ასამბლეის უმაღლესი დონის დელეგაციასთან შეხვედრაზე დელეგაციის წევრები დაინტერესდნენ მათი პარტიის საპარლამენტო საქმიანობის შესახებ.შარაშიძის თქმით, ეუთო-ს საპარლამენტო ასამბლეის დელეგაციის მიზანია პოლიტიკური დიალოგის გააქტიურება.„საკმაოდ საინტერესო შეხვედრა იყო, დაგეგმილზე დიდხანს გაგრძელდა. ეს ეუთო-ს საპარლამენტო ასამბლეის უმაღლესი დონის დელეგაციაა. მათ განსაკუთრებულად აინტერესებდათ ჩვენი პარტიის საპარლამენტო საქმიანობის შესახებ ყველაფერი და დეტალურად მივაწოდეთ ინფორმაცია. ქართული პოლიტიკის ბედი უნდა წყდებოდეს საქართველოში და ამ მხრივ განსაკუთრებული მოლოდინი არ არის ნებისმიერი საერთაშორისო ორგანიზაციის ვიზიტიდან, მაგრამ ისიც ცხადია, რომ ეუთო-ს, რომელიც საქართველოში იმყოფებოდა, თავისი უმნიშვნელოვანესი როლი აქვს. მათი ოფიციალური მიზანი, რაც ჩვენც დაგვიდასტურეს, არის პოლიტიკური დიალოგის გააქტიურება. ისიც გასაგებია, რომ ეუთო ამ ფორმატში ვერ მიიღებს რომელიმე მხარის მიმართ გამორჩეულ გადაწყვეტილებას, მაგრამ, როგორც მათ გვითხრეს, ამზადებენ სერიოზულ ანგარიშს, რომელიც ხელმისაწვდომი იქნება, რაც, იმედი მაქვს, ხელს შეუწყობს პოლიტიკური ვითარების გაუმჯობესებას.ჩვენ, რა თქმა უნდა, ვისაუბრეთ ყველა იმ ანტიდემოკრატიულ კანონზე, რასაც „ოცნება“ იღებს. ხაზი გავუსვით იმ ფაქტსაც, რომ 2024 წლის საპარლამენტო არჩევნების შესახებ ეუთო-ს კრიტიკული დასკვნის და რეკომენდაციების მიუხედავად, რაც უნდა გაეთვალისწინებინა „ოცნებას“, სამწუხაროდ, გათვალისწინების და ნაბიჯების წინ გადადგმის ნაცვლად, ჩვენ ვიხილეთ სრულიად საპირისპირო. პირიქით, უფრო დაამძიმა საარჩევნო გარემო იმ ანტიდემოკრატიული კანონით, რაც, რა თქმა უნდა, წინააღმდეგობაში მოდის „ოცნების“ საჯარო განცხადებებთან, თითქოს მათ კონსტრუქციული ნაბიჯების გადადგმის სურვილი აქვთ. ერთი მხრივ, ამას ამბობენ და, მეორე მხრივ, იღებენ სრულიად ანტიდემოკრატიულ კანონებს, რაც ერთმანეთთან თავსებადი არ არის“, – აღნიშნა გიორგი შარაშიძემ.

ირანის არასწორმა გათვლამ ყველაფერი გაანადგურა, – ამის შესახებ კატარის პრემიერ-მინისტრმა, მოჰამედ აბდულრაჰმან ალ-თანიმ „სქაი ნიუსთან“ ინტერვიუში განაცხადა.მოჰამედ აბდულრაჰმან ალ-თანიმ ირანის მიერ სპარსეთის ყურის ქვეყნებზე განხორციელებული დარტყმები „სახიფათო შეცდომად“ შეაფასა და აღნიშნა, რომ ვითარების ესკალაცია რეგიონის დესტაბილიზაციისა და გლობალური ეკონომიკისთვის შოკის მომგვრელი შედეგების რისკს ქმნის.კატარის პრემიერის განცხადებით, ქვეყანა ძალიან რთულ პერიოდში შევიდა, თუმცა მან კატარის თავდაცვისა და უსაფრთხოების ძალების პროფესიონალიზმი შეაქო.ამასთან, მისივე თქმით, კრიზისიდან გამოსვლის ერთადერთ გზად დიპლომატია რჩება.„ეს ღალატის დიდი განცდაა. ომის დაწყებიდან სულ რაღაც ერთ საათში კატარს და სპარსეთის ყურის სხვა ქვეყნებს თავს დაესხნენ. ჩვენ ნათლად განვაცხადეთ, რომ ჩვენი მეზობლების წინააღმდეგ არცერთ ომში მონაწილეობას არ ვაპირებთ. თავდასხმა სპარსეთის ყურის ქვეყნებზე – ჩვენ ამას მეზობლისგან არასდროს მოველოდით. ყოველთვის ვცდილობდით, ირანთან კარგი ურთიერთობა შეგვენარჩუნებინა, მაგრამ მათ მიერ გამოყენებული გამართლებები და საბაბები სრულიად უარყოფილია. ჩვენ ვაგრძელებთ დეესკალაციისთვის გზის ძიებას. ისინი ჩვენი მეზობლები არიან – ეს ჩვენი ბედისწერაა“, – განაცხადა მოჰამედ აბდულრაჰმან ალ-თანიმ.ამასთან, კატარის პრემიერ-მინისტრის განცხადებით, ირანელების მიერ სპარსეთის ყურის ქვეყნებზე თავდასხმის არასწორმა გათვლამ ყველაფერი გაანადგურა, თუმცა. მისივე თქმით, ამაზე პასუხი მოლაპარაკებების განახლება უნდა იყოს.კატარის პრემიერმა ასევე უარყო ცნობა იმის შესახებ, რომ ირანის დარტყმები სამხედრო სამიზნეების წინააღმდეგ იყო მიმართული. მოჰამედ აბდულრაჰმან ალ-თანის თქმით, თეირანის სამიზნეს წარმოადგენდა საერთაშორისო აეროპორტები, წყალმომარაგების სისტემები და გაზის ინფრასტრუქტურა.„თავდასხმების 25% სამოქალაქო ობიექტებისკენ იყო მიმართული. რა კავშირი აქვს ამას ომთან? რისი მიღწევა სურთ?“ – აღნიშნა მოჰამედ აბდულრაჰმან ალ-თანიმ.