თბილისში, ფიროსმანის ქუჩაზე მომხდარი განზრახ მკვლელობის ფაქტზე ერთ პირს, ხოლო დანაშაულის შეუტყობინებლობის ფაქტზე სამ პირს ბრალდება წარედგინა

აზერბაიჯანში, ქალაქ შუშაში მიმდინარე საერთაშორისო კონფერენციაზე, „ქართული ოცნების“ ახალგაზრდული ორგანიზაციის ლიდერმა, ვარლამ ლიპარტელიანმა მონაწილეობა მიიღო პანელურ დისკუსიაში თემაზე – „პოსტკონფლიქტური რეკონსტრუქცია: თანამედროვე გამოწვევები ურბანულ დაგეგმარებაში“.„საქართველოს მიზანი უცვლელია – ჩვენი ტერიტორიების მშვიდობიანი დე-ოკუპაცია და უსაფრთხო, ინკლუზიური და მდგრადი საცხოვრებელი გარემოს შექმნა ყველა მოქალაქისთვის, მათ შორის იმ ადამიანებისთვის, რომლებმაც კონფლიქტების შედეგად საკუთარი სახლები და მშობლიური კუთხეები დაკარგეს. სწორედ ამიტომ, თანამედროვე ურბანული დაგეგმარება საქართველოსთვის არა მხოლოდ სივრცითი განვითარების, არამედ მშვიდობის მშენებლობის ერთ-ერთ მნიშვნელოვან ინსტრუმენტად გვევლინება“, – განაცხადა ვარლამ ლიპარტელიანმა სიტყვით გამოსვლისას.„ქართული ოცნების“ ახალგაზრდული ორგანიზაციის ლიდერი და ბორდის წევრები – მარიამ გრიგოლიშვილი და თეკლა თიკანაშვილი, აზერბაიჯანის მმართველი პარტიის, „ახალი აზერბაიჯანის“ ახალგაზრდული ორგანიზაციის მიწვევით, ქალაქ შუშაში იმყოფებიან, სადაც მონაწილეობენ საერთაშორისო კონფერენციაში სახელწოდებით – „რეგიონული წვლილი გლობალურ უსაფრთხოებაში – მშვიდობის მშენებლობა სამხრეთ კავკასიაში“.

თავადაც კარგად იციან და ევროკავშირის არაერთ წევრ ქვეყანას განუცხადებია, რომ უკრაინასა და მოლდოვაში ის სტანდარტები არ მოქმედებს, რომელიც ევროკავშირის წევრობას სჭირდება, თუნდაც ეკონომიკური მაჩვენებლებით, – ამის შესახებ პარლამენტის პირველი ვიცე-სპიკერი გია ვოლსკიმ განაცხადა.ვოლსკის კითხვა დაუსვეს გაფართოების საკითხებში ევროკომისარ მარტა კოსის განცხადებაზე, სადაც მან აღნიშნა: „უკრაინა და მოლდოვა თუ ასრულებენ თავიანთ ვალდებულებებს, ჩვენც უნდა შევასრულოთ ჩვენი. სწორედ ამიტომ ველოდები, რომ ივლისში დარჩენილ ხუთივე კლასტერსაც გავხსნით“. „მთავარი აქცენტი უკრაინაზე კეთდება, რადგან ომი დაიწყო თუ არა, იმ წუთიდან, მაღალი ტრიბუნებიდან განცხადებები კეთდებოდა, რომ უკრაინა ევროპის გამო სისხლს ღვრის და ევროპამ თავისი პოლიტიკური ნაბიჯი უნდა გადადგას. დაპირებები იყო იმასთან დაკავშირებით, რომ უკრაინა ევროკავშირის წევრი სწრაფად გახდებოდა. სკეპტიკოსებმა და კრიტიკოსებმა როდესაც ხმა ამოიღეს და თქვეს, რომ უკრაინაში დაღვრილი სისხლის ოდენობა ნამდვილად არ არის იმ რეალობის შესაბამისი, რასაც კანდიდატის სტატუსის მიცემა ჰქვია, მაშინვე დაიწყო საუბარი, რომ კანდიდატის სტატუსის მინიჭების შემდეგ ევროკავშირის წევრი უკვე სწრაფად გახდეს, თუმცა აქ ის რეალობა გამოჩნდა, რასთანაც გვაქვს საქმე. მონაცემები, რაც უკრაინას და მოლდოვას აქვთ, არ არის საკმარისი იმისათვის, რომ მათ ევროკავშირის წევრი ერქვათ. ორივეს წარმატებებს ვუსურვებ, მაგრამ ფაქტია, რომ საჭირო სტანდარტები არ აქვთ და ამიტომ, დათქმის აუცილებლობა წარმოიშვა. ანუ, ფანდი მოიფიქრეს – ომობ, სისხლს ღვრი, ცრემლს ღვრი, მაგრამ სამაგიეროდ, აგერ, ევროკავშირის წევრობის კანდიდატი ხარ, კი ბატონო, უმძიმეს მდგომარეობაში ხარ, მაგრამ უკვე შემდგომ ეტაპზე ევროკავშირის წევრი გახდები. თავადაც კარგად იციან და ევროკავშირის არაერთ წევრ ქვეყანას განუცხადებიათ, რომ უკრაინასა და მოლდოვაში ის სტანდარტები არ მოქმედებს, რომელიც ევროკავშირის წევრობას სჭირდება, თუნდაც ეკონომიკური მაჩვენებლებით. აქედან გამომდინარე, ფანდი მოიფიქრეს, რომ ეს დაპირება ჰაერში გამოკიდებული არ დარჩეს და კრიტიკოსთა ცეცხლის სამიზნე არ გახდეს. გადაწყვეტილება ჯერ მიღებული არ არის, მაგრამ ეს სტანდარტი და უკრაინის მიმართ ასეთი მიდგომა არასწორია. ყველამ დავინახეთ, რეალობაში რა ხდება“, – განაცხადა გია ვოლსკიმ.

თბილისის მერი კახა კალაძე მიიჩნევს, რომ საქართველოს ევროინტეგრაციის გზაზე ბევრად მეტი მიღწევა აქვს, ვიდრე მოლდოვას ან უკრაინას, თუმცა ქვეყანასთან გაფართოებაზე საუბარი არ მიდის, რადგან ევროკავშირის ზოგიერთი წარმომადგენელი პოლიტიკური ნარატივით მოქმედებს.ამის შესახებ მან ევროკავშირის გაფართოებასთან დაკავშირებით დასმულ შეკითხვაზე განაცხადა და აღნიშნა, რომ საქართველო ყველა პარამეტრითა და სტატისტიკით მოწინავე ქვეყანაა.„რა თქმა უნდა, არის პოლიტიკური ნარატივი. არავინ უყურებს, როგორი წინსვლა აქვს ქვეყანას და რა რეფორმებია განხორციელებული, რა წინგადადგმული ნაბიჯებია. როგორ შეიძლება, საქართველოზე წინ დააყენო მოლდოვა ან უკრაინა, თუნდაც იმ გარემოებიდან გამომდინარე, რაც ამ კონკრეტულ ქვეყნებში ხდება? მოლდოვა რომ ავიღოთ, საუბარია რუმინეთისთვის მიერთებაზე. უკრაინაში რაც ხდება და რამდენად მძიმე მდგომარეობაა, ყველა ვხედავთ – ომი, კორუფცია. არ მინდა, დავიწყო ამ ქვეყნების შეფასება. მე შემიძლია, ძალიან ბევრი ვისაუბრო ჩვენს ქვეყანაზე, რას ვაკეთებთ და რა ნაბიჯები გადაიდგა – ყველა პარამეტრით, სტატისტიკით საქართველო არის მოწინავე ქვეყანა. ბევრ ევროპულ ქვეყანაზე წინ ვართ ეკონომიკური განვითარებით, წინსვლით, რაც შემთხვევით არ მოდის. ეს მოიტანა გრძელვადიანმა მშვიდობამ, იმ პრაგმატულმა პოლიტიკამ, რომელსაც „ქართული ოცნება – დემოკრატიული საქართველო“ ახორციელებს“, – განაცხადა კახა კალაძემ.მისივე შეფასებით, ბოლო წლების განმავლობაში ზოგიერთი ევროპელი ბიუროკრატის მხრიდან საქართველოსთან დაკავშირებით მხოლოდ ბრალდებები ისმის, რაც არასწორი დამოკიდებულებაა.„ზოგიერთი ევროპელი ბიუროკრატის მხრიდან როდესაც ვისმენთ შანტაჟს, ცილისწამებას, ტყუილს, ამის მიზეზებიც ხომ ვიცით – საქართველო, პატარა ქვეყანა როგორ ბედავს და მათგან დაუკითხავად ახორციელებს საკუთარ პოლიტიკას. ჩვენი პოლიტიკის მიზანია, დავიცვათ ჩვენი ქვეყანა, მშვიდობა, ქვეყნის მოსახლეობა, თითოეული ოჯახი. რა თქმა უნდა, ისინი ამას აპროტესტებენ, როგორ ვიკადრეთ და გავბედეთ მსგავსი ნაბიჯების გადადგმა – არ შევუერთდით სანქციებს, ქვეყანაში არ გავხსენით მეორე ფრონტი. ხალხი ხომ უყურებს ამ უსამართლო დამოკიდებულებას? შესაბამისად, მსგავსი ტიპის განცხადებები და დამოკიდებულება ქართული სახელმწიფოს მიმართ, პირველ რიგში, აზიანებთ იმ ბიუროკრატებს, რომელთაგანაც ცილისმწამებლურ განცხადებებს ვისმენთ“, – აღნიშნა თბილისის მერმა.კახა კალაძემ აქვე განაცხადა, რომ საქართველოს ხელისუფლება მზადაა ევროკავშირთან მოლაპარაკებების განახლებისთვის და ამის შესახებ განცხადებაც არაერთხელ გაკეთებულა.„ჩვენ არაერთხელ გავაკეთეთ განცხადება, მათ შორის, პრემიერ-მინისტრი გამოვიდა და ისაუბრა, რომ მზად ვართ, დღესვე გაიხსნას მოლაპარაკებები და დავიწყოთ გაფართოებაზე საუბარი, მაგრამ არა. ეს არის უბრალოდ მათი პოლიტიკური დღის წესრიგი, რომ საქართველოს, ქართულ სახელმწიფოს ელაპარაკონ შანტაჟის ენით, თითის დაქნევით, რომ როგორ გავბედეთ და არ მივუერთდით სანქციებს; როგორ გავბედეთ და უბედურებასა და ომში არ ჩავრთეთ ქვეყანა. ეს ყველაზე დიდი პრობლემაა მათთვის – ის, რისთვისაც ებრძვიან ქართულ სახელმწიფოს და ქართველებს“, – განაცხადა კახა კალაძემ.

ფაქტია, რომ ევროკავშირთან დაახლოების გზაზე სომხეთი უფრო სწრაფად ვითარდება და ქმედით ნაბიჯებს დგამს, ვიდრე საქართველო. მიუხედავად იმისა, რომ საქართველო ევროკავშირის წევრობის კანდიდატი ქვეყანაა, უფრო მეტად არის დაშორებული ევროკავშირის წევრობას, ვიდრე მაშინ, როცა კანდიდატის სტატუსი მიიღო, – ამის შესახებ პარტია „გახარია საქართველოსთვის“ წევრმა, გიორგი შარაშიძემ საქართველოს პირველ არხს განუცხადა.მისი თქმით, ეს განპირობებულია დემოკრატიული უკუსვლით, რაც პარტნიორების მიერ აღინიშნება.„სამწუხარო რეალობაა ის, რომ საქართველო სცილდება ევროკავშირში გაწევრიანების გზას და ამაზე პასუხისმგებლობა მხოლოდ ხელისუფლებას ეკისრება. ირაკლი კობახიძე ხშირად ამბობს, რომ ევროპარლამენტის რეზოლუციას ჩალის ფასი აქვს და როცა ასეთი დამოკიდებულებაა, კრიტიკული რეზოლუციები ევროპარლამენტის მხრიდან არ უნდა გვიკვირდეს. ეს რეზოლუციები დემოკრატიის უკუსვლას და ანტიდემოკრატიულ კანონებს ეყრდნობა, რომლებიც „ოცნებამ“ ბოლო პერიოდში მიიღო“, – განაცხადა შარაშიძემ.

საქართველოს ტექნიკური უნივერსიტეტის საცურაო აუზის - „წყალთა სახეობის ცენტრ „ტონუსის“ წყალბურთელთა გუნდი, წყალბურთში საქართველოს ჩემპიონატში, რომელშიც „ტონუსთან“ ერთად ასპარეზობდნენ ბათუმის, ქუთაისის, რუსთავის, „ოლიმპიკის“, „დინამოს“, „დინამო 2“-ისა და „ლაგუნა ვერეს“ გუნდები, ჩემპიონი გახდა.ინფორმაციას საქართველოს ტექნიკური უნივერსიტეტი ავრცელებს.უნივერსიტეტის ცნობით, „სტუ ტონუსის“ წყალბურთელთა გუნდმა თბილისში, საცურაო აუზ „ოლიმპიკში“ მიმდინარე ეროვნული ჩემპიონატი, 2008-2009 წლებში დაბადებულ წყალბურთელებს შორის, გამარჯვებით დაასრულა და საქართველოს ჩემპიონის ტიტული მოიპოვა. ტურნირის განმავლობაში „ტონუსმა“ მაღალი დონის თამაში აჩვენა და ყველა შეხვედრაში დამაჯერებელი გამარჯვება მოიპოვა. გუნდმა წარმატებით დაძლია ყველა მეტოქე და დამსახურებულად მოიპოვა საქართველოს ჩემპიონის ტიტული 18-წლამდელთა (U18) ასაკობრივ კატეგორიაში.ჩემპიონატის საბოლოო შედეგები ასეთია: I ადგილი - „ტონუსი“; II ადგილი - „დინამო 1“; III ადგილი - „ოლიმპი 2“.სტუ-ის სტუდენტური სერვისების, კულტურისა და სპორტის დეპარტამენტის ხელმძღვანელის თქმით, ჩემპიონი გუნდის მთავარი მწვრთნელი ნოდარ ჩხარტიშვილია, რომლის ხელმძღვანელობით „ტონუსმა“ სეზონი დაუმარცხებლად დაასრულა და ქვეყნის საუკეთესო გუნდის სტატუსი მოიპოვა. როგორც ლევან ფიფია აცხადებს, „ტონუსის“ წარმატება კიდევ ერთხელ ადასტურებს ახალგაზრდა წყალბურთელების მაღალ სპორტულ მომზადებას.„U18 საქართველოს ჩემპიონატის გამარჯვებით გუნდმა მნიშვნელოვანი ნაბიჯი გადადგა ქართველი წყალბურთელების ახალი თაობის წარმატების გზაზე. განსაკუთრებით სასიხარულოა, რომ ახალგაზრდებმა მთელი ჩემპიონატის განმავლობაში მაღალი პროფესიონალიზმი, დისციპლინა და გამარჯვებისკენ სწრაფვა გამოავლინეს. ეს შედეგი არის ყოველდღიური შრომის, მიზანმიმართული მომზადებისა და მწვრთნელების თავდადებული საქმიანობის დამსახურება.ვულოცავთ „ტონუსის“ თითოეულ სპორტსმენს, გუნდის მთავარ მწვრთნელს ნოდარ ჩხარტიშვილს და კლუბის მთელ კოლექტივს ამ მნიშვნელოვან წარმატებას. დარწმუნებულები ვართ, რომ დღევანდელი ჩემპიონები მომავალში საქართველოს წყალბურთის ეროვნულ გუნდებს ღირსეულად წარმოადგენენ საერთაშორისო ასპარეზზე“, - აცხადებს ლევან ფიფია.ცნობისთვის: „ტონუსი“ საქართველოს ტექნიკური უნივერსიტეტის წყალთა სახეობების ცენტრია, სადაც წყალბურთისა და ცურვის მიმართულებით ახალგაზრდების მომზადებას განსაკუთრებული ყურადღება ეთმობა.