თავდასხმა „ქართული ოცნების“ ქალ დეპუტატზე – ბულინგის ობიექტი ამჯერად სალომე ქურასბედიანია. „ქრონიკის“ სიუჟეტი

პუტინი ბელარუსის ომში ჩათრევას გეგმავს, – ამის შესახებ უკრაინის პრეზიდენტი ვოლოდიმირ ზელენსკი აცხადებს. ზელენსკის თქმით, დარწმუნებულია, რომ რუსეთის პრეზიდენტი, ვლადიმერ პუტინი გაზაფხულზე, ზაფხულში, ან შემოდგომაზე ბელარუსში ჯარების განთავსებას და ამ ქვეყნის ომში ჩათრევას გეგმავს. „პუტინის ამბიციებით და იმით, რასაც დღეს ვხედავთ – ის ყველაფერს აკეთებს, რომ ეს ომი არ შეჩერდეს. ეს ფაქტია. ის ამ გზას გააგრძელებს და სხვა ქვეყნებზეც იფიქრებს. ამაში დარწმუნებული ვარ. მე ამის შესახებ ვაფრთხილებ, სრულიად ღიად, გულწრფელად – მესმის, რა მოხდება. თქვენ ნახავთ, ის სხვა ქვეყნების პროვოცირებას მოახდენს. შესაძლოა, პოლონეთი იყოს შემდეგი ან ბალტიის ქვეყნები. და ეს უბრალოდ მორიგი რიტორიკა არ არის. თქვენ ნახავთ გაზაფხულზე, ზაფხულში, ან შემოდგომაზე ის ძალებს ბელარუსის ტერიტორიაზე განათავსებს“,- განაცხადა ზელენსკიმ. როგორც უკრაინის პრეზიდენტმა აღნიშნა, შესაძლოა, ბევრმა ევროპელმა და შესაძლოა აშშ-მაც თქვას, რომ ეს დაშინებაა. „ეს არის პოლონეთის დაშინება, ლიეტუვის დაშინება და ჩვენი სხვა ბალტიის პარტნიორების დაშინება. მაგრამ თქვენ ნახავთ – ის ყველაფერს გააკეთებს მათ ჩასათრევად. ის იფიქრებს, როგორ მოახდინოს მათი პროვოცირება. არ ვიცი, იქნება თუ არა შეჭრა, მაგრამ ნებისმიერ შემთხვევაში, ის ამგვარად ჩაითრევს ბელარუსს ომში. თუმცა, ჩემი აზრით, მას შემდეგ, რაც მათ უკრაინა რაკეტებით დაბომბეს – ისინი უკვე იყვნენ ამ ომში, მაგრამ მათი ხალხი არა და მათი ჯარი არა, ჯერჯერობით, მაგრამ პუტინს ეს ძალიან უნდა“, – აღნიშნა ზელენსკიმ. უკრაინის პრეზიდენტი მიიჩნევს, რომ ყველაფერი უნდა გაკეთდეს პუტინის შესაჩერებლად. ზელენსკის თქმით, ევროპელებმა თავდაცვის ხარჯები დღესვე უნდა გაზარდონ. „თუ არ გსურთ მომავალში მთელი ბიუჯეტის თავდაცვაზე დახარჯვა, დახარჯეთ დღეს ის პროცენტი, რაც დღეს არის საჭირო. ასეთი ნაბიჯებით გააძლიერეთ თქვენი თავდაცვა. უკრაინის მხარდაჭერა – ეს არის თქვენი თავდაცვის ნაწილი“, – აღნიშნა ზელენსკიმ.

ჩვენ არ ვართ პოლიტიკური ძალა, რომელიც მოწყვლადი იქნება რომელიმე მხარისთვის, იქნება ეს ე.წ. ხელისუფლება, თუ ოპოზიციური სპექტრი, – ამის შესახებ პარტია „გახარია საქართველოსთვის“ პოლიტიკური საბჭოს წევრმა, ზაზა თავაძემ საქართველოს პირველი არხის გადაცემაში, „დღის თემა“ განაცხადა. „შესაბამისად, ჩვენ ვრჩებით იმ პოზიციაზე, რა პოზიციაც გვქონდა თავიდანვე. ვგულისხმობ იმას, რომ ჩვენ ეს გადაწყვეტილება მივიღეთ დაახლოებით, ორი თვის წინ, რომ არ დავწერდით განცხადებებს და ჩვენი პოლიტიკური ძალის მიერ არ მოხდებოდა ამის გაკეთება, ვინაიდან ვფიქრობდით, რომ ერთადერთი ბერკეტი, როგორც სამართლებრივი, ისე პოლიტიკური, არ უნდა გადაცემულიყო ივანიშვილის ხელში და მას არ უნდა მისცემოდა შანტაჟის საშუალება ჩვენს პოლიტიკურ ძალაზე, შეგვიწყვეტდა, თუ არ შეგვიწყვეტდა პარლამენტის წევრის უფლებამოსილებას. დღევანდელმა დღემაც ჩვენა, რომ ჩვენ სწორად მოვიქეცით თავის დროზე“, – განაცხადა თავაძემ. გადაცემის წამყვანის შეკითხვაზე, რა ფორმით გამოიხატება ამ შემთხვევაში მათი მხრიდან არჩევნების არაღიარება, საპარლამენტო ბოიკოტირება, რადგან პარტიამ დაფინანსებაზეც არ თქვა უარი, რაზეც ერთ-ერთმა ოპოზიციონერმა კოლეგამაც მიანიშნა, რომ ეს ირიბად ნიშნავს საპარლამენტო არჩევნების შედეგების აღიარებას, ზაზა თევზაძემ განაცხადა, რომ განცხადებებების დაწერა და სიების ჩახსნა არანაირ კავშირში არ არის ლეგიტიმაციასთან, არც სამართლებრივად და არც პოლიტიკურად. „თქვენ როგორც ხედავთ, იმ სკეპტიკოსებს, რომლებიც ორი თვის წინაც ამბობდნენ, რომ ჰქონდათ კითხვის ნიშნები, დღეს უკვე, ალბათ, ეს კითხვის ნიშნები მოეხსნათ. რადგან ჩვენ არ ვართ პარლამენტში, ჩვენ არ ვაძლევთ ამ პარლამენტს ლეგიტიმაციას და ვაგრძელებთ იმ პოზიციას, რომ ე.წ. პრეფიქსი ამ ხელისუფლებას არ მოშორდება იქამდე, ვიდრე არ დაინიშნება ახალი არჩევნები და ვიდრე ქართველი ხალხის ნება, მათი კონსტიტუციური უფლებები არ იქნება დაცული და რეალიზებული, რასაც ახლა არ აქვს ადგილი“, – განაცხადა თავაძემ. თამთა სანიკიძის შეკითხვაზე, როგორ აისახება პოლიტიკურ პროცესზე ხელისუფლების გადაწყვეტილება 49 დეპუტატისთვის მანდატების გაუქმების შესახებ, ზაზა თავაძემ აღნიშნა, რომ ეს ძალიან ცუდად აისახება. „მე ვხედავ იმას, რომ ე.წ. ხელისუფლება პოლარიზაციას კიდევ უფრო მეტად აძლიერებს და ამას მოწმობს ზუსტად დღევანდელი გადაწყვეტილება. ალბათ, დამერწმუნებით, რომ დღეს ამ გადაწყვეტილებას ალბათ, ჩვენი თანამოქალაქეების უმრავლესობა არ ელოდა, რომ ასეთ ხისტ გადაწყვეტილებას მიიღებდა ივანიშვილი. მაგრამ ჩვენ ვნახეთ, რომ მან ეს გადაწყვეტილება მიიღო, მაგრამ ამის ახსნაც შეიძლება იმ მხრივ, რომ მას უკან დასახევი გზა ფაქტობრივად, აღარ აქვს, არ დაიტოვა. შესაბამისად, უწევს აი, ასეთი ხისტი გადაწყვეტილებების მიღება, რომელიც თითქოს მას რაღაც ძალას სძენს და ამით უნდა, აჩვენოს, როგორც მის პარტიას, ასევე საზოგადოებას, თითქოს არის ძლიერი. მაგრამ როდესაც შენს მოსახლეობას უპირისპირდები საპოლიციო ძალებით, შენს მოქალაქეებს ყოველგვარი მტკიცებულებების გარეშე აპატიმრებ და სინდისის პატიმრები გყავს, საქართველოს ისტორიას არ ახსოვს 60-ზე მეტი სინდისის პატიმარი ხომ, ეს შენს ძლიერებაზე არ მოქმედებს. ეს მოქმედებს მის სისუსტეზე“, – განაცხადა თავაძემ.

პარლამენტის თავმჯდომარის მოადგილის, თეა წულუკიანის განცხადებით, თუ ადამიანი სისხლის სამართლის დანაშაულს ჩაიდენს, მისთვის პოლიტიკოსობა და ჟურნალისტობა ინდულგენცია ვერ იქნება. როგორც წულუკიანმა გადაცემა "ღამის კურიერში" საუბრის დროს აღნიშნა, არცერთ პოლიტიკოსს, ჟურნალისტს თუ საერთაშორისო საზოგადოების წარმომადგენელს არ უნდა ჰქონდეს შანტაჟის უფლება. "მივხვდით, რომ სულაც არ არის მიუღებელი კანონი გამოიყენო ისე, როგორც კანონში წერია. ამაზე საუბრობდა დღეს მამუკა მდინარაძე, რომ არ მისცე ჟურნალისტს თუ უცხოელს უფლება მუდმივი შანტაჟის ქვეშ ჰყავდე, იმიტომ, რომ საბოლოოდ სახელმწიფოსთვის ეს არის ძალიან ცუდი. თუ ყველა ვიფიქრებთ, რომ მე პოლიტიკოსი ვარ და ამიტომ ვერ ჩამსვამს ვერავინ ციხეში, თუ ცუდად მოვიქცევი და კანონს დავარღვევ, ეს ინდულგენცია ვერ იქნება. სამწუხაროდ, დიდხანს იყო ეს ინდულგენცია, რას იტყვი უცხოელი. რვა წელი ვიმუშავე იუსტიციის სამინისტროში და ძალიან ბევრი უცხოელის გვარისა და სახელის ჩამოთვლა შემიძლია, რომელიც მოდიოდა და ზეწოლას ახდენდა ჩვენზე, ჩემზე, სხვებზე, ჩემს კოლეგებზე. ჩვენ ძალიან ბევრ რამეს ვითვალისწინებდით. ჟურნალისტი ვარ და ვიშიმშილებ - ეს არ უნდა იყოს ვიღაცის ხელში იარაღი, თუმცა მას ასე სჯერა, ეს მისი უფლებაა და ასე იქცევა. ჩვენი ვალდებულებაა და პენიტენციური სამსახური ყველაფერს აკეთებს იმისთვის, რომ ჯანმრთელობა რაც შეიძლება ნაკლებად დაზიანდეს. ჩვენ თუ მივეჩვევით იმას, რომ პოლიტიკოსობა, ჟურნალისტობა არ იძლევა ყველაფრის უფლებას, პროტესტის გამოხატვაც უფრო ეფექტიანი იქნება", - განაცხადა თეა წულუკიანმა.

პარლამენტის ვიცე-სპიკერმა, თეა წულუკიანმა „ბათუმელებისა“ და „ნეტგაზეთის“ დამფუძნებლის, მზია ამაღლობელის საქმესთან დაკავშირებით "ღამის კურიერის" ეთერში ისაუბრა. როგორც წულუკიანმა აღნიშნა, მზია ამაღლობელის შიმშილობის საკითხი ძალიან აწუხებს და იმედი გამოთქვა, რომ ის ამას შეწყვეტს. „რა თქმა უნდა, ამჟამინდელი თუ მომავალში კანონი რომ იქნება მიღებული, ყველა მათ წინაშე უნდა იყოს თანასწორი და ეს თუ ასე არ არის, რა თქმა უნდა, ეს ცუდია. მე არ მგონია, რომ ნაკლებად მაღელვებს (ვინ დაიჯერებს, ვინ - არა, ეს არ არის საინტერესო, მაგრამ გულწრფელად ვამბობ) ქალი ჟურნალისტი შიმშილობს თუ არ შიმშილობს, ნამდვილად მაღელვებს და დიდი იმედი მაქვს, რომ ის ამას შეწყვეტს. თუმცა, ერთია დღეს რომ გჯერა სწორ საქმეს ემსახურები და ეს მისი უფლებაა, მას ასე სჯეროდეს და იბრძოდეს იმისთვის, რისიც სჯერა, მაგრამ მეორეა ის, რომ ეს ყველაფერი ჩაივლის აუცილებლად მშვიდობიანად და არ დარჩება მისი ჯანმრთელობისთვის მიყენებული გამოუსწორებელი ზიანი. მე ეს მაწუხებს, ვინ დაიჯერებს, ვინ არა, მაგრამ ძალიან მაწუხებს,“ - აღნიშნა თეა წულუკიანმა.

"დღეს აბსოლუტურად ყველანაირი რეაგირების გარეშე, მედიასაშუალებას შეუძლია გაავრცელოს ტყუილი და ეს შემოგვასაღოს სიმართლედ," - ამის შესახებ პარლამენტის ვიცე-სპიკერმა, თეა წულუკიანმა "ღამის კურიერის" ეთერში განაცხადა, რითაც ფრაქცია "ქართული ოცნების" თავმჯდომარის, მამუკა მდინარაძის განცხადებას გამოეხმაურა, რომლის თანახმადაც, მმართველი გუნდი ხვალიდან მუშაობას იწყებს და მალე დაინიცირდება "მედიის კანონი," რომელსაც ბრიტანული მოდელისა და კანონმდებლობის შესაბამისად მიიღებენ. წულუკიანის თქმით, საზოგადოებაში არსებობს განცდა, რომ არსებული მექანიზმები ამ საკითხთან მიმართებაში საკმარისი არ არის. "ჩვენ 2-ზე მეტი დღეა უკვე უმრავლესობის ფორმატში ვიკრიბებით და უმრავლესობის ლიდერი აანონსებს სხვადასხვა ცვლილებას. ყველაზე ხშირად ამ ცვლილებების გამოცხადებისას ისმის სიტყვა - გამკაცრება - და ეს შემდეგ შესაბამისი პირების მხრიდან, მით უმეტეს, რომ ისინი ხშირად არც არიან კეთილსინდისიერნი, გარკვეულ სპეკულაციებსაც აჟღერებენ. ისინი ამბობენ, რომ დაიხურება მედია, არასამთავრობო ორგანიზაცია ან სხვა. სინამდვილეში საქმე გვაქვს გამკაცრებასთან, მაგრამ ისეთ ახალ რეგულაციებთან, რომელიც ან უკვე გვქონია ჩვენ კანონმდებლობაში, მაგალითად, მკაცრი ადმინისტრაციული სახდელები, ან ახალი რეგულაციები, რომელიც, როგორც უმრავლესობის სხდომაზე არაერთხელ ითქვა, უნდა იყოს ანალოგი სხვა დასავლური ქვეყნის. მედიის შემთხვევაში საუბარია ბრიტანულ სტანდარტებზე. დღეს რაზეც იყო საუბარი, არ გახლავთ ძირითადად საკანონმდებლო ცვლილებების სახით წარმოდგენილი, ეს გახლავთ ინიციატივები, როგორც ითქვა კიდეც ბრიფინგის დროს, ეს არის ჩვენი მომავალი ორი თვის საქმიანობის გეგმა. ყველაფერი იქნება საჯაროდ გამოტანილი, თუ რომელი ნორმა, რა ფორმას მიიღებს. ჩვენ ყველას გვაქვს განცდა, რომ არსებული რეგულაციები და ინსტიტუტები ეფექტური ვერ არის. მაგალითისთვის საკმარისია, რომ მედიამ თავის თავს მისცეს უფლება იყოს არაკეთილსინდისიერი, დღეს აბსოლუტურად ყველანაირი რეაგირების გარეშე მედიასაშუალებას შეუძლია გაავრცელოს ტყუილი და ეს შემოგვასაღოს სიმართლედ," - აღნიშნა წულუკიანმა. მისივე თქმით, შეიქმნება შესაბამისი ორგანოები ან არსებული მექანიზმები გახდება ეფექტური იმისთვის, რომ მედიის საკითხი დარეგულირდეს. "ამისთვის იარსებებს შესაბამისი ორგანოები, ან არსებული ორგანოების რეფორმირება უნდა მოხდეს, რომ ისინი გახდნენ ეფექტური. ვერცერთ შემთხვევას მე პირადად ვერ ვიხსენებ, როდესაც ღირდა სადმე ჩივილი. როდესაც ადამიანს აბრალებენ იმას, რაც არ არის სიმართლე, გეუბნებიან, რომ შენ ხარ ჟირაფი და მე უნდა ვამტკიცო, რომ არ ვარ ჟირაფი," - აღნიშნა წულუკიანმა.