ვოლოდიმირ ზელენსკი – უნდა შევჩერდეთ იქ, სადაც ვართ, პრეზიდენტი ტრამპი მართალია, ჩვენ გვჭირდება აშშ-ის მხრიდან უსაფრთხოების გარანტიები, რომ რუსეთი კიდევ არ დაგვიბრუნდება ომით

მსოფლიოს ერთ-ერთი ყველაზე აქტიური ვულკანი კიდევ ერთხელ ამოიფრქვა. ამერიკის შეერთებული შტატების გეოლოგიური სამსახურის კამერებმა ჰავაიზე აქტიური კრატერიდან ლავის გადმოფრქვევის პროცესი დააფიქსირა.კადრებში ჩანს კვამლიც, რომელიც ფერდობზე ტრიალებს. კილაუეას ვულკანი, პერიოდულად, 2024 წლის დეკემბრის შემდეგ იფრქვევა.

გადაცემა "ისტორია დეტალებში" უახლოესი წარსულის ერთ-ერთ მძიმე ეპიზოდს - "ციხის კოშმარს" მიეძღვნა. გადაცემაში კონტროლის პალატის ყოფილი თავმჯდომარის სულხან მოლაშვილის ძმამ, ყოფილმა პოლიტპატიმარმა, თორნიკე მოლაშვილმა უმძიმეს დეტალებზე ისაუბრა.მას შემდეგ, რაც სულხან მოლაშვილმა ევროპულ სასამართლოს მიმართა, მისი ძმა თორნიკე მოლაშვილი შინაგან საქმეთა სამინისტროში დაიბარეს და მოსთხოვეს აღნიშნული მიმართვა უკან გამოეწვიათ. სტრასბურგის სასამართლოდან სარჩელის გამოტანაზე ოჯახმა უარი განაცხადა, ამის შემდეგ კი თორნიკე მოლაშვილი დააპატიმრეს.თორნიკე მოლაშვილი გადაცემაში საკუთარი დაკავების დეტალებს და გლდანის ციხეში გატარებულ მძიმე პირობებს იხსენებს."წამიყვანეს და პირდაპირ მითხრეს, რომ სულხანმა დაწეროს განცხადება, სტრასბურგიდან სარჩელი გამოიტანოს და ხვალ დილით 10 საათზე იქნები სახლში. დაწეროს განცხადება, მოგვცეს ჩვენ და იმ განცხადებას ჩვენ მივხედავთო. წერდა სულხანი განცხადებას, უნდოდა, მაგრამ პასუხისმგებელი იმაზე, რომ მე გამომიშვებდნენ, არავინ არ იყო.აღმოვჩნდი გლდანის ციხეში. სასჯელის ნახევარი გავატარე გლდანის ციხეში, ნახევარი ე.წ. მატროსოვზე. გლდანის ციხე დედამიწაზე ჯოჯოხეთი იყო, ვერ აღგიწერთ. ევროპელი დამკვირვებლები რომ იყვნენ შემოსულები ციხეში, თქვეს, რას უშვრებითო ამ ხალხსო?ციხეში, სად შეიძლება სიჩუმე იყოსო? ბუზის გაფრენის ხმას გაიგებდი ისეთი სიჩუმე იყო ციხეში. სიკვდილის და სისხლის სუნი იდგა. ხალხი დარწმუნებული იყო, რომ ციხიდან ცოცხლები ვერ გამოვიდოდნენ," - აღნიშნა თორნიკე მოლაშვილმა.ასევე, ყოფილმა პოლიტპატიმარმა იმ დეტალზეც გაამახვილა ყურადღება, როდესაც მისი ძმა, პატიმრობის დროს, გარკვეული პერიოდი დაკარგულიც კი იყო."სულხანი 2-ჯერ, ერთხელ 5 დღით, მეორედ 7 დღით, საერთოდ დაიკარგა ციხეში, დაგვიმალეს. ე.წ. რეზბალნიციდან სად გადაიყვანეს არ ვიცოდით. მოვიარეთ მთელი საქართველოს ციხეები, არსად არ იყო, თურმე სამინისტროს ქვემოთ ციხე რომ არის, იქ ჰყოლიათ," - განაცხადა თორნიკე მოლაშვილმა.მისივე განცხადებით, წინა ხელისუფლების დროინდელი ციხეში მყოფი პატიმრების წამების ვიდეო კადრები მიხეილ სააკაშვილთან მიჰქონდათ, რომელიც ამ კადრებით ერთობოდა."ყველა ვიდეო-მასალა მიხეილ სააკაშვილთან მიდიოდა. ამას ყველაფერს აყურებინებდნენ, არამხოლოდ თვითონ, არამედ მის საახლობლო წრესთან განიხილავდა თითოეული პატიმრის წამების ამბავს, იცინოდნენ, ხალისობდნენ, ბედნიერები იყვნენ. ასეთი მთავრობა გვყავდა. მაგათთვის, ვინც არ უნდა ყოფილიყო არ ჰქონდა მნიშვნელობა, ადამიანის წამება, სიკვდილი და სულში ჩაფურთხება სიამოვნებდათ. ამით ტკბებოდა, ვამპირი იყო," - აღნიშნა თორნიკე მოლაშვილმა.

უნგრეთის პრემიერ-მინისტრმა ვიქტორ ორბანმა სოციალურ ქსელ X-ში დაწერა, რომ თუ ევროპას მშვიდობა სურს, მან ომის გეგმებს უნდა გადახედოს.„თუ ევროპას ნამდვილი მშვიდობა სურს, მან სამხედრო გეგმებს უნდა გადახედოს და ყველაფერი გადაიაზროს. მშვიდობა უნდა დამყარდეს და ძალით გამყარდეს. დროა, ევროპა საღი აზრის გზას დაუბრუნდეს!“ - დაწერა ორბანმა.

“ჩვენ გვჭირდება „ტომაჰავკები“ და ბევრი სხვა იარაღი, რასაც ბოლო ოთხი წლის განმავლობაში უკრაინაში ვაგზავნით”, – ამის შესახებ აშშ-ის პრეზიდენტმა, დონალდ ტრამპმა უკრაინის პრეზიდენტ ვოლოდიმირ ზელენსკისთან თეთრ სახლში შეხვედრისას განაცხადა.ჟურნალისტმა ტრამპს ჰკითხა, რა მოხდება თუ შეერთებულ შტატებს დასჭირდება „ტომაჰავკის“ ტიპის რაკეტები საკუთარი კონფლიქტისთვის.დონალდ ტრამპმა განაცხადა, რომ აშშ ამ ეტაპზე მძლავრ იარაღს აწვდის  უკრაინას, რაც ამერიკის რეზერვებზე გავლენას ახდენს.„ერთ-ერთი მიზეზი, რატომაც გვინდა ამ ომის დასრულება, სწორედ ეს არის“, – აღნიშნა აშშ-ის პრეზიდენტმა.ამასთან, აშშ-ის პრეზიდენტმა განაცხადა, რომ ახლა ევროკავშირი იხდის იარაღის საფასურს.დონალდ ტრამპის თქმით, მან უკვე რვა კონფლიქტი მოაგვარა, თუმცა ნობელის პრემია არ აინტერესებს.„როგორც ვიცი, არასოდეს ყოფილა პრეზიდენტი, რომელმაც ერთი ომი მაინც დაასრულა. ბევრი იწყებს ომებს, მაგრამ არავინ ასრულებს მათ,“ – განაცხადა ტრამპმა.როგორც აშშ-ის პრეზიდენტმა განმარტა, სატელეფონო საუბრისას ვლადიმერ პუტინმაც კი, გამოთქვა აღფრთოვანება ახლო აღმოსავლეთში მშვიდობის დამყარების გამო.„გუშინ პუტინმა თქვა, რომ გაოცებული იყო, რომ შევძელით ახლო აღმოსავლეთში მშვიდობის დამყარება. მას ეს წარმოუდგენელი ეგონა“, – აღნიშნა აშშ-ის პრეზიდენტმა ჟურნალისტებთან საუბრისას.

საქართველოს პარლამენტის წევრი და "ხალხის ძალის" ერთ-ერთი ლიდერი, სოზარ სუბარი გადაცემა "ისტორია დეტალებში," უახლოესი წარსულის ერთ-ერთ მძიმე ეპიზოდს - "ციხის კოშმარს" იხსენებს. სოზარ სუბარი იმ პერიოდში სახალხო დამცველი იყო. მისი თქმით, წინა ხელისუფლების დროს, ციხეებში პატიმრების მიმართ სასტიკ და არაადამიანურ მოპყრობაზე ინფორმაციას თითქმის ყოველდღიურად იგებდა.მისივე თქმით, საპატიმროში არსებული უმძიმესი პირობების შესახებ ყველა უცხოელმა პარტნიორმა და ელჩმა იცოდა, თუმცა ამას მხოლოდ პირად საუბრებში აღნიშნავდნენ და ოფიციალურად განცხადებას არავინ აკეთებდა."მე, პირადად, კვირა არ გავიდოდა, რომ ციხეში 2-3-ჯერ რომ არ შევსულიყავი, ზოგჯერ, ყოველდღე მიწევდა შესვლა სხვადასხვა დაწესებულებებში და ერთი და იგივე ჯოჯოხეთი ტრიალებდა ყველგან. სულ ვფიქრობ, რა იყო მიზეზი, რატომ აკეთებდნენ ამას, თუმცა ძალიან ძნელია ახსნა. დანტე ალიგიერს აქვს ნათქვამი ასეთი სიტყვები - "წარწერა ჯოჯოხეთის კარზე: შემომსვლელებმა ყველა იმედი გარეთ დატოვეთ!" - ყველა იმედი უნდა დაგეტოვებინა იქ რომ შედიოდი, ბოლომდე გატეხილიყავი. შანსი არ უნდა გქონოდა იქიდან ცოცხალი გამოსულიყავი, უკიდურეს შემთხვევაში ჯანმრთელი გამოსულიყავი, ახსნა იმ სისასტიკეს არ აქვს. მაგრამ ამ მიზანს ვერ შეასრულებს ნორმალური ადამიანი, ამიტომ, ყველა სადისტი და ავადმყოფი შეიკრიბა, რომლებიც ერთმანეთს კარგად ცნობდნენ.ციხე ყველა შემთხვევაში ცუდია და მძიმეა, მაგრამ 40 კვადრატულ-მეტრ საკანში იყო 105-106 ადამიანი, იქვე იყო სველი წერტილიც, გამოყოფილიც კი არ იყო. წარმოიდგინეთ, 105 ადამიანი, რომელიც ერთი სველი წერტილით სარგებლობს, სადაც არ იყო წყალიც. პარალელურად, ეს ადამიანები ყოველდღე გაჰყავდათ და სცემდნენ.ყველამ ყველაფერი იცოდა, ყველა ელჩმა, თუმცა არავინ ამაზე ხმას არ იღებდა. იყო რამდენიმე საერთაშორისო არასამთავრობო ორგანიზაცია, მაგალითად, Human Rights Watch, Amnesty International, რომლებიც ამაზე წერდნენ, მაგრამ არცერთი ელჩი, არცერთი საელჩო, უცხოელი დიპლომატი თუ ევროპარლამენტარი ამაზე არათუ ხმას არ იღებდა, არანაირ მინიშნებასაც კი არ აკეთებდნენ. ყველა ელჩი იყო ძალიან ღია და გულწრფელი ჩემთან საუბარში, პირდაპირ ჰყვებოდნენ, როგორი წარმოუდგენელი რამ ხდებოდა, თუმცა, როდესაც მე ვეკითხებოდი, რატომ ამაზე ხმამაღლა არ ლაპარაკობთ, ისინი ამბობდნენ, რომ ჩვენ ამაზე აკრძალული გვაქვს ლაპარაკი. ერთადერთი ელჩი, რომელიც არ იმჩნევდა და არ საუბრობდა სხვებივით ღიად, ეს იყო ამერიკის ელჩი", - განაცხადა სოზარ სუბარმა.