ევროპელები ძალიან ნათლად ხედავენ საკუთარ წილს უკრაინის უსაფრთხოების გარანტიებში, მაგრამ მათი საკუთარი უსაფრთხოება აშკარად რისკის ქვეშ დგას ამ სიტუაციაში, – ამის შესახებ საფრანგეთის პრეზიდენტმა, ემანუელ მაკრონმა თეთრ სახლში მიმდინარე გაფართოებულ შეხვედრაზე განაცხადა.
მაკრონმა ასევე განაცხადა ოთხმხრივი შეხვედრის ორგანიზების შესახებ, რადგან როდესაც საუბარია უკრაინისთვის უსაფრთხოების გარანტიებზე, ეს მთელი ევროპის კონტინენტის უსაფრთხოებას ეხება.
„გმადლობთ, ბატონო პრეზიდენტო, ამ შეხვედრის ორგანიზებისთვის და თქვენი ვალდებულებისთვის. ყველაფერი ითქვა უკვე, მაგრამ უბრალოდ უნდა ვთქვა, რომ ყველა ამ მაგიდის გარშემო მშვიდობის მხარესაა, ჩვენ ძალიან ინტენსიურად ვმუშაობთ და ვმუშაობდით ბოლო რამდენიმე წლის განმავლობაში, რომ გვქონოდა მშვიდობა, რომელიც იქნება მტკიცე და ხანგრძლივი. სწორედ ამიტომ სამმხრივი შეხვედრის იდეა ძალიან მნიშვნელოვანია, რადგან ეს არის ერთადერთი გზა ამის გამოსწორების და, სხვათა შორის, ვფიქრობ, როგორც გაგრძელება, ალბათ გვჭირდება ოთხმხრივი შეხვედრა, რადგან როდესაც ვლაპარაკობთ უსაფრთხოების გარანტიებზე, ვლაპარაკობთ მთელი ევროპის კონტინენტის უსაფრთხოებაზე. სწორედ ამიტომ, ყველანი გაერთიანებული ვართ აქ უკრაინასთან ერთად, ამ საკითხზე სამხრივი შეხვედრის ორგანიზების მიზნით. თქვენი იდეა, რომ მოითხოვოთ შეთანხმება ან, მინიმუმ, მკვლელობის შეწყვეტა, როგორც განვიხილეთ, აუცილებლობაა. და ჩვენ, ყველანი ვუჭერთ მხარს ამ იდეას. უკრაინისთვის და მთელი კონტინენტისთვის ასეთი ხანგრძლივი მშვიდობის მისაღებად ჩვენ გვჭირდება უსაფრთხოების გარანტიები. პირველი აშკარად არის საიმედო უკრაინული არმია, წლებისა და ათწლეულებისთვის; მეორე არის ჩვენი საკუთარი ვალდებულებები. ჩვენ ძალიან ინტენსიურად ვმუშაობდით ბოლო რამდენიმე თვის განმავლობაში „მსურველთა კოალიციაში“ ნატო-ს მხარდაჭერით, უსაფრთხოების გარანტიებისა და ჩვენი ვალდებულებების სხვადასხვა საყრდენის შესაქმნელად. შეგიძლიათ, დარწმუნებული იყოთ, რომ ევროპელები ძალიან ნათლად ხედავენ საკუთარ წილს უკრაინის უსაფრთხოების გარანტიებში, მაგრამ მათი საკუთარი უსაფრთხოება აშკარად რისკის ქვეშ დგას ამ სიტუაციაში“, – აღნიშნა მაკრონმა.
თეთრ სახლში, გაფართოებულ შეხვედრაში აშშ-ის პრეზიდენტი დონალდ ტრამპი, უკრაინის პრეზიდენტი ვოლოდიმირ ზელენსკი, ნატო-ს გენერალური მდივანი მარკ რუტე და ევროპელი ლიდერები მონაწილეობენ. მანამდე პირისპირ შეხვედრა გაიმართა დონალდ ტრამპსა და ვოლოდიმირ ზელენსკის შორის.