ნატოს სამიტზე მყოფი უნგრეთის პრემიერ-მინისტრი ვიქტორ ორბანი სამიტის დასრულების შემდეგ ფლორიდაში გაემგზავრა აშშ-ის ყოფილ პრეზიდენტს და ამჟამად პრეზიდენტობის კანდიდატს, დონალდ ტრამპს შეხვდა.
„სამშვიდობო მისია 5.0
დღეს, მარ-ალაგოში პრეზიდენტ დონალდ ტრამპთან სტუმრობის პატივი მქონდა. განვიხილეთ მშვიდობის მიღწევის გზები. დღის კარგი ამბავი: ის ამ პრობლემის გადაჭრას აპირებს!”, – დაწერა პლატფორმა X-ზე უნგრეთის პრემიერ-მინისტრმა ვიქტორ ორბანმა.
„გმადლობ, ვიქტორ. აუცილებელია მშვიდობის დამყარება, თანაც სწრაფად. მეტისმეტად ბევრი ხალხი დაიღუპა ომში, რომელიც საერთოდ არ უნდა დაწყებულიყო”, – დაწერა აშშ-ის ყოფილმა პრეზიდენტმა, ამჟამად კი პრეზიდენტობის კანდიდატმა დონალდ ტრამპმა თავის სოციალურ ქსელში.
შეგახსენებთ, ვიქტორ ორბანი 2 ივლისიდან დღემდე ჯერ უკრაინის პრეზიდენტ ვოლოდიმირ ზელინსკის შეხვდა, შემდეგ კი რუსეთის პრეზიდენტ ვლადიმერ პუტინს. ამის შემდეგ იგი აზერბაიჯანის ქალაქ შუშაში თურქულენოვანი სახელმწიფოების ორგანიზაციის სამიტში მონაწილეობდა. სამიტიდან ვიქტორ ორბანი ბუდაპეშტში დაბრუნდა და იმ დღესვე პეკინს გაემგზავრა. პეკინში მან ჩინეთის პრეზიდენტ სი ძინპინთან უკრაინის საკითხზე გამართა მოლაპარაკება.