დიდ ბრიტანეთში თავშესაფრის მოთხოვნის რეკორდული რაოდენობა დაფიქსირდა
გასულ წელს ბრიტანეთში თავშესაფარი 108 ათასზე მეტმა ადამიანმა მოითხოვა, რაც ასეთი სტატისტიკის წარმოების დაწყების შემდეგ (2001 წელი) ყველაზე მაღალი მაჩვენებელია. შინაგან საქმეთა სამინისტროს მონაცემებით, 2024 წელს თავშესაფრის მიღების თაობაზე შეტანილი განაცხადების რაოდენობა (108 138) 18 პროცენტით აღემატება, წინა, 2023 წელს წარდგენილ მოთხოვნას (91 811 განაცხადი), წინა რეკორდი კი 2002 წელს დამყარდა, როდესაც გაერთიანებულ სამეფოში თავშესაფრის მიღებაზე 103 081 განაცხადი გაკეთდა. ამ სტატისტიკურმა მონაცემებმა მას შემდეგ მიიქცია ფართო საზოგადოების ყურადღება, რაც ამ თვეში პრემიერ-მინისტრმა, კირ სტარმერმა მიგრაციის წესების გამკაცრების პირობა გასცა. ახალი წესები თითქმის შეუძლებელს გახდის თავშესაფრის მიღებას არალეგალური მიგრანტებისთვის, რომლებიც გაერთიანებულ სამეფოში პატარა ნავებით ლა-მანშის სრუტის გადაცურვის გზით შედიან.
სტარმერის ლეიბორისტული მთავრობა დიდი ზეწოლის ქვეშ (მიგრაციის შემცირების კუთხით) მას შემდეგ იმყოფება, რაც ნაიჯელ ფარაჯის ანტიმიგრაციულმა პარტია „Reform UK“-მა ბოლო საყოველთაო არჩევნებზე დაახლოებით ოთხი მილიონი ხმა მოიპოვა, რაც ბრიტანეთის ულტრამემარჯვენე პარტიისთვის უპრეცედენტო შედეგია. უახლესი მონაცემების თანახმად, გასულ წელს თავშესაფრის მაძიებელთა შორის სჭარბობდნენ პაკისტანელები (10 542 პირი), რომლებმაც მიგრანტთა საერთო რაოდენობის 9.7 პროცენტი შეადგინეს. ასევე მნიშვნელოვნად მოიმატა ვიეტნამელი მოქალაქეების განაცხადების რაოდენობამ, რომელიც გაორმაგდა და 2 469-დან (2023 წელი) 5 259-მდე გაიზარდა. გასული წლის ივლისში თანამდებობის დაკავებისას, სტარმერმა უარი თქვა თავისი კონსერვატორი წინამორბედის, რიში სუნაკის გეგმაზე, რომელიც მიგრანტთა ნაკადის შეკავებას ახალი ჩამოსულების რუანდაში დეპორტაციის გზით აპირებდა.
ამის ნაცვლად, მან „ბანდების განადგურების“ პირობა დადო. საზღვრის უსაფრთხოებისა და თავშესაფრის მინისტრმა, ანჯელა იგლმა განაცხადა, რომ მთავრობა თავშესაფრის მოთხოვნებზე გადაწყვეტილებების მიღების დაჩქარებაზე და იმ პირების იძულებით დეპორტაციაზე მუშაობს, ვისი განაცხადიც არ დაკმაყოფილდება. 2024 წლის დეკემბრის ბოლოსთვის, თავშესაფრის განაცხადზე პირველად გადაწყვეტილებას გაერთიანებულ სამეფოში 124 802 მიგრანტი ელოდებოდა. „ჩვენ ასევე ვუზრუნველყოფთ, რომ შემცირდეს ლეგალური მიგრაციაც, რომელიც წინა მთავრობამ ოთხი წლის განმავლობაში გააოთხმაგა“, – აღნიშნა იგლმა.
2024 წელს ლეგალური მიგრანტების რაოდენობა 728 000 იყო, რაც წინა წლის რეკორდულ მაჩვენებელთან (906 000) შედარებით, გარკვეულწილად შემცირებულია. ამის მიუხედავად, გაერთიანებულ სამეფოში ლეგალური მიგრაციის დონე მაინც მაღალ დონეზე რჩება. ამიტომ, სტარმერის მთავრობის გადაწყვეტილებით, უქმდება წინა მთავრობის მიერ დაწესებული სავიზო შეღავათები, რომლებიც აპლიკანტების მიერ ბოროტად გამოიყენებოდა. არალეგალურმა მიგრანტებმა, რომლებიც გაერთიანებულ სამეფოში გასულ წელს ლა-მანშის სრუტით ჩავიდნენ, თავშესაფრის მაძიებელთა საერთო რაოდენობის 32 პროცენტი შეადგინეს.
2024 წელს ლა-მანშის სრუტე დაახლოებით 36 816 მიგრანტმა გადაკვეთა, რაც წინა წლის მაჩვენებელს 25-ით აღემატება.