დესტაბილიზაციის საფრთხე – არის მცდელობა მე-2 სერიაში „პრეზიდენტის ფანჩატურს“ სააკაშვილი ჩაუდგეს სათავეში
Read Time:2 Minute, 0 Second
მიხეილ სააკაშვილს შეუქმნეს გარკვეული წინაპირობა, მათ შორის, სალომე ზურაბიშვილმაც, რომ ოპოზიციამ დაივიწყოს თავისი სახელი, თავისი იდეოლოგია და რაღაც გაუგებარ ჯგუფში გაერთიანდნენ, ხოლო მეორე სერიაში მათ სათავეში ჩაუდგება იგივე მიხეილ სააკაშვილი – ასე ეხმაურება Newshub.ge-თან საუბრისას პარლამენტის ვიცესპიკერი არჩილ თალაკვაძე ექსპრეზიდენტ მიხეილ სააკაშვილის განცხადებებს, რომლის თანახმადაც, მსჯავრდებული პოლიტიკოსი საარჩევნო კამპანიაში ჩართვას აპირებს.
საქართველოს ყოფილი პრეზიდენტის განცხადების კომენტირებისას, სადაც ის ამბობს, რომ რჩება უკრაინის ლოიალურ მოქალაქედ და თავის დროზე ბიძინა ივანიშვილიც იყო ევროკავშირის წევრი სახელმწიფოს მოქალაქე, როდესაც პოლიტიკაში შემოვიდა, არჩილ თალაკვაძე მიიჩნევს, რომ ექსპრეზიდენტის ეს განცხადება უსინდისობაა. მისივე თქმით, ივანიშვილს პოლიტიკური დევნის ნიადაგზე შეუწყვიტეს საქართველოს მოქალაქეობა და სააკაშვილისგან განსხვავებით, მოქალაქეობაზე უარი არ უთქვამს.
„უსინდისობაა ასეთი შედარების გაკეთება. ცდილობს იმის გადაფარვას, რომ ბატონ ბიძინა ივანიშვილს, მისგან განსხვავებით, პოლიტიკური დევნის ნიადაგზე შეუწყვიტეს საქართველოს მოქალაქეობა,. მიხეილ სააკაშვილი კი არის ადამიანი, რომელმაც თვითონ თქვა უარი საქართველოს მოქალაქეობაზე. ეს სამარცხვინოდ გამოიყურებოდა მაშინაც და დღესაც. ის მაშინ იყო ყოფილი პრეზიდენტი, რაც განსაკუთრებით ამძიმებს მის ამ გადაწყვეტილებას.
მეორე საკითხი – მისი გადაწყვეტილება პარტიის ბორდთან დაკავშირებით, კიდევ ერთხელ შეგვახსენებს საზოგადოებას, რომ „ნაციონალური მოძრაობა“ ყოველთვის იყო ერთი კაცის პარტია და ეს ერთი კაცი, მიხეილ სააკაშვილი არჩევნების დროს აანონსებს, რომ სათავეში ჩაუდგება ისევ „ნაციონალურ მოძრაობას“.
მისმა დანიშნულმა კაცებმა ჩამოართვეს მას თანამდებობა და გადავიდნენ მისი პოლიტიკური მემკვიდრეობის გაყოფა-განაწილებაზე. ეს, რა თქმა უნდა, სააკაშვილში უკმაყოფილებას იწვევს და ის არათანმიმდევრული, სენსაციური განცხადებებით ცდილობს, დარჩეს მედიის ზედაპირზე.
ნდობას, რომელიც ნულოვანია სააკაშვილისა და მისი პარტიის მიმართ, კიდევ უფრო დიდ ზიანს აყენებს ასეთი არათანმიმდევრული განცხადებები”, – აცხადებს სააგენტოსთან საუბრისას პარლამენტის ვიცე-სპიკერი..
არჩილ თალაკვაძის თქმით, სააკაშვილი და მისი ლობისტები ყველაფერს გააკეთებენ იმისთვის, რომ ის პოლიტიკაში დააბრუნონ და ამისთვის არც დესტაბილიზაციის მოწყობას მოერიდებიან.
„ქვეყანაშია ანტისახელმწიფოებრივი ძალა, რომელიც დესტაბილიზაციას ცდილობს. მეორე მხრივ, სააკაშვილი და მისი ლობისტები, ყველაფერს აკეთებენ და ყველაფერს გააკეთებენ მომავალშიც იმისთვის, რათა როგორმე მიხეილ სააკაშვილი დააბრუნონ ქართულ პოლიტიკაში. ისინი არ მოერიდებიან არაფერს, მათ შორის, არც პოლიტიკურ დესტაბილიზაციას.
დღევანდელი განცხადება კიდევ ერთხელ შეგვახსენებს საზოგადოებას, რომ ქვეყანაში ჯერ კიდევ რჩება ანტისახელმწიფოებრივი, ანტიევროპული ძალა, რომელიც მცდელობას არ აკლებს, რომ როგორმე ქვეყანაში დესტაბილიზაცია მოახდინოს, არიოს პოლიტიკა და ამღვრეულ წყალში, არჩევნების გვერდის ავლით სცადოს ხელისუფლებაში დაბრუნება.
რეალურად არსებობს იმის საფრთხე, რომ მცდელობები გაძლიერდება მიხეილ სააკაშვილის კოლექტიური „ნაციონალური მოძრაობის“ სათავეში დაბრუნებისას, მას შეუქმნეს კიდეც გარკვეული წინაპირობა, მათ შორის, სალომე ზურაბიშვილის მხრიდანაც კი, რომ ოპოზიციამ დაივიწყოს თავისი სახელები, თავისი იდეოლოგია და გაერთიანდნენ ერთ რაღაც გაუგებარ ჯგუფში. მეორე სერიაში მათ სათავეში უნდა ჩაუდგეს მიხეილ სააკაშვილი“, – დასძინა არჩილ თალაკვაძემ.
ინფორმაციისთვის, ყოფილმა პრეზიდენტმა მიხეილ სააკაშვილმა განაცხადა, რომ აპირებს სათავეში ჩაუდგეს „ნაციონალური მოძრაობის“ ბორდს და წინასაარჩევნო კამპანიაში მიიღოს მონაწილეობა ამასთან, სააკაშვილმა თქვა, რომ ის „რჩება უკრაინის ლოიალურ მოქალაქედ“.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
Comments
0
0
