გურჯაანში ორმა მამაკაცმა ერთმანეთს ესროლა, გარდაიცვალა ორივე მათგანი

„ძვირფასო ახალგაზრდებო, გულითადად გილოცავთ სამხრეთ კავკასიაში ერთადერთ ასწლოვან უმაღლესი საინჟინრო სკოლაში - საქართველოს ტექნიკურ უნივერსიტეტში - სასწავლო პროცესის წარმატებით დასრულებას. თქვენ ღირსეულად გაიარეთ პროფესიული განვითარების გზა, რომელიც მომავალი წარმატებების საფუძველია. დარწმუნებული ვარ, ჩვენს უნივერსიტეტში მიღებული განათლება დაგეხმარებათ გახდეთ მაღალი კვალიფიკაციის პროფესიონალები და საერთაშორისო ასპარეზზე ღირსეულად წარმოაჩინოთ როგორც თქვენი ქვეყანა, ისე ჩვენი უნივერსიტეტი. თქვენ საქართველოს ტექნიკური უნივერსიტეტის საერთაშორისო ოჯახის წევრები ხართ. სასწავლო პროცესში გაიცანით ახალი კულტურა, შეიძინეთ მეგობრები, მიიღეთ ცოდნა და დააგროვეთ გამოცდილება, რომელიც დარწმუნებული ვარ, მომავალშიც გამოგადგებათ. მადლობას გახდით, რომ არჩევანი საქართველოს ტექნიკურ უნივერსიტეტზე შეაჩერეთ. გისურვებთ წარმატებას, პროფესიულ წინსვლასა და მნიშვნელოვანი მიზნების მიღწევას“, - ამის შესახებ სტუ-ის ვიცე-რექტომა, პროფესორმა თამარ ლომინაძემ 2025/2026 აკადემიური წლის კურსდამთავრებულ საერთაშორისო სტუდენტთა გაცილების ღონისძიებაზე განაცხადა.ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, კურდამთავრებულ საერთაშორისო სტუდენტთა გაცილების ღონისძიება, რომელსაც საქართველოს ტექნიკური უნივერსიტეტის ადმინისტრაციის წარმომადგენლები, აკადემიური პერსონალი და სტუდენტები ესწრებოდნენ, ვიცე-რექტორმა თამარ ლომინაძემ გახსნა.მისასალმებელ სიტყვაში ვიცე-რექტორმა, უნივერსიტეტის სახელით, მადლობა გადაუხადა საერთაშორისო სტუდენტებს აქტიური ჩართულობისა და წარმატებული აკადემიური საქმიანობისთვის. მან აღნიშნა, რომ საერთაშორისო სტუდენტებს მნიშვნელოვანი წვლილი შეაქვთ უნივერსიტეტის ინტერნაციონალიზაციის პროცესში და მრავალფეროვან, საერთაშორისო აკადემიურ გარემოს ქმნიან. თამარ ლომინაძემ ახალგაზრდებს სამომავლო წარმატებები უსურვა და იმედი გამოთქვა, რომ საქართველოს ტექნიკურ უნივერსიტეტში მიღებული ცოდნა და გამოცდილება მათ პროფესიულ განვითარებაში მნიშვნელოვან როლს შეასრულებს, ხოლო უნივერსიტეტთან მათი კავშირი მომავალშიც გაგრძელდება.„საქართველოს ტექნიკური უნივერსიტეტი დღეს უკვე მყარად არის დამკვიდრებული საერთაშორისო საგანმანათლებლო სივრცეში, რასაც უცხოელი ახალგაზრდების მზარდი ინტერესი ადასტურებს. განსაკუთრებით მოთხოვნადია ისეთი მიმართულებები, როგორიცაა არქიტექტურა, მშენებლობა, ბიზნესტექნოლოგიები, ინფორმატიკა, მთის მდგრადი განვითარება, დიზაინი. ეს ის სფეროებია, რომლებიც თანამედროვე შრომის ბაზრის მოთხოვნებს პასუხობს და ახალგაზრდებს კონკურენტუნარიანი განათლების მიღების შესაძლებლობას აძლევს. ის ფაქტი, რომ სხვადასხვა ქვეყნის სტუდენტები სწორედ ამ პროგრამებს ირჩევენ, ნათლად მიუთითებს საქართველოს ტექნიკური უნივერსიტეტის საგანმანათლებლო პროგრამების მაღალ ხარისხზე, მათ შესაბამისობაზე საერთაშორისო სტანდარტებსა და გლობალური შრომის ბაზრის მოთხოვნებთან. ჩვენთვის განსაკუთრებით მნიშვნელოვანია, რომ უნივერსიტეტი უცხოელი სტუდენტებისთვის მხოლოდ განათლების მიღების ადგილი არ იყოს, არამედ სივრცე, სადაც ისინი პროფესიულ ცოდნასთან ერთად მრავალფეროვან კულტურულ გამოცდილებას, საერთაშორისო კონტაქტებსა და მეგობრულ გარემოსაც იძენენ“, - განაცხადა თამარ ლომინაძემ.სტუ-ის საერთაშორისო ურთიერთობების დეპარტამენტის უფროსის მოადგილის, ლელა ჩიქოვანის განცხადებით, 2024/25 სასწავლო წელს, საქართველოს ტექნიკურმა უნივერსიტეტმა მიღებაზე გამოცხადებული ადგილების 89% შეავსო, 2025/2026 სასწავლო წელს კი ეს მაჩვენებელი საგრძნობლად გაიზარდა.„საქართველოს ტექნიკური უნივერსიტეტის მიმართ საერთაშორისო სტუდენტების ინტერესი ყოველწლიურად მზარდია, რაც ჩვენი უნივერსიტეტის საერთაშორისო აღიარებასა და საგანმანათლებლო პროგრამების მაღალ ხარისხზე მეტყველებს. 2024/2025 სასწავლო წელს უცხოელი სტუდენტებისთვის გამოცხადებული ადგილების 89% შეივსო, ხოლო 2025/2026 სასწავლო წლისთვის ეს მაჩვენებელი საგრძნობლად გაუმჯობესდა - ეს კი მოთხოვნის ზრდაზე მიუთითებს. ამ შედეგს საფუძვლად უდევს უნივერსიტეტის თანმიმდევრული მუშაობა რამდენიმე მიმართულებით: საერთაშორისო თანამშრომლობის გაღრმავება, უცხოელი აპლიკანტებისთვის ხელმისაწვდომი და გამჭვირვალე მიღების პროცესის უზრუნველყოფა და თანამედროვე, საერთაშორისო სტანდარტებზე მორგებული საგანმანათლებლო პროგრამების განვითარება. დღეს საქართველოს ტექნიკური უნივერსიტეტი მიმზიდველი საგანმანათლებლო სივრცეა მსოფლიოს სხვადასხვა ქვეყნის ახალგაზრდებისთვის. განსაკუთრებით მაღალი ინტერესია არქიტექტურის, მშენებლობის, ბიზნესტექნოლოგიების, ინფორმატიკისა და დიზაინის მიმართულებებზე, რაც ადასტურებს, რომ ჩვენი პროგრამები პასუხობს როგორც საერთაშორისო საგანმანათლებლო სტანდარტებს, ისე თანამედროვე შრომის ბაზრის მოთხოვნებს. ჩვენთვის მნიშვნელოვანია არა მხოლოდ უცხოელი სტუდენტების რაოდენობის ზრდა, არამედ მათთვის ისეთი აკადემიური და კულტურული გარემოს შექმნა, სადაც ისინი შეძლებენ ხარისხიანი განათლების მიღებას, პროფესიულ განვითარებასა და საერთაშორისო გამოცდილების შეძენას. სწორედ ამიტომ, მომავალშიც აქტიურად გავაგრძელებთ საერთაშორისო პარტნიორული ქსელის გაფართოებას და უნივერსიტეტის ინტერნაციონალიზაციის პროცესის გაძლიერებას“, - განაცხადა ლელა ჩიქოვანმა.სტუ-ის ინფორმაციით, 2025/2026 სასწავლო წლის საერთაშორისო კურსდამთავრებულთა გაცილების ღონისძიებას ინფორმატიკისა და მართვის სისტემების ფაკულტეტის სტუდენტი გიორგი შაკიაშვილი უძღვებოდა. ღონისძიების ფარგლებში სტუდენტებმა ერთმანეთს გაუზიარეს საქართველოში სწავლისა და ცხოვრების გამოცდილება, ისაუბრეს კულტურულ მრავალფეროვნებაზე, საერთაშორისო საგანმანათლებლო პროგრამების მნიშვნელობასა და უნივერსიტეტში გატარებულ წლებზე. შეხვედრა თბილ და მეგობრულ გარემოში წარიმართა და სიმბოლური სიგელების, სამახსოვრო საჩუქრების გადაცემითა და სამახსოვრო ფოტოების გადაღებით დასრულდა.

თბილისში შოთა რუსთაველის გამზირის სრული რეაბილიტაცია იწყება.სამუშაოები 23 ივლისიდან ოთხი თვის განმავლობაში გაგრძელდება, შესაბამისად, ამ პერიოდში ქალაქის მთავარ გამზირსა და მერაბ კოსტავას ქუჩის ნაწილზე ყველა ტიპის ტრანსპორტის მოძრაობა შეიზღუდება.შეზღუდვა იმოქმედებს თამარ ჭოველიძის ქუჩიდან თავისუფლების მოედნამდე არსებულ სარეაბილიტაციო არეალში. ასევე, გადაადგილება სრულად აიკრძალება ვასო აბაშიძის ქუჩაზე.შეზღუდვის პერიოდში გადაადგილება შესაძლებელი იქნება ალტერნატიული მარშრუტებით:პეტრე მელიქიშვილის გამზირიდან თავისუფლების მოედნისკენ მიმავალი ავტომობილები იმოძრავებენ ივანე თარხნიშვილის, ვასილ ბარნოვის, კოტე მაყაშვილის, პოლიკარპე კაკაბაძის, დანიელ ჭონქაძის, ამაღლების, ლადო ასათიანისა და შალვა დადიანის ქუჩების გამოყენებით;ნიკოლოზ ბარათაშვილის ქუჩიდან მერაბ კოსტავას ქუჩის მიმართულებით მოძრავი ავტომობილები შემოვლას შეძლებენ რევაზ თაბუკაშვილისა და სანდრო ინაშვილის ქუჩების, პირველი რესპუბლიკის მოედნის, გიორგი ახვლედიანისა და ნიკო ნიკოლაძის ქუჩების გავლით;მიხეილ ჯავახიშვილის ქუჩიდან რუსთაველის გამზირისკენ მიმავალი ავტომობილები იმოძრავებენ რევაზ თაბუკაშვილის, რევაზ ლაღიძის, მარი ბროსეს ქუჩებისა და ზვიად გამსახურდიას სახელობის სანაპიროს საშუალებით;ალექსანდრე გრიბოედოვის ქუჩა – ვანო სარაჯიშვილის ქუჩიდან ალექსანდრე ჭავჭავაძის ქუჩის კვეთამდე გახდება ორმხრივი.რეაბილიტაციის პერიოდში დროებით შეიცვლება საზოგადოებრივი ტრანსპორტის მარშრუტებიც. კერძოდ, ავტობუსები – N301, 305, 306, 308, 309, 310, 314, 326, 331, 337, 342, 344, 345, 352, 358, 388 და 397, ასევე მიკროავტობუსები: N472, 532, 540 და 541 მელიქიშვილის გამზირიდან გადაადგილებისას გმირთა მოედნისა და მტკვრის მარჯვენა სანაპიროს გავლით დაუკავშირდებიან ბარათაშვილის ქუჩას, საიდანაც მგზავრთა მომსახურებას ჩვეული მარშრუტით განაგრძობენ.უკუმიმართულებით, ავტობუსები და მიკროავტობუსები ბარათაშვილის ქუჩიდან მტკვრის სანაპიროების გავლით კვლავ გმირთა მოედანს დაუბრუნდებიან და ისარგებლებენ დადგენილი სქემით.ავტობუსები N359 და N391 იმოძრავებენ გმირთა მოედნისა და გალაკტიონ ტაბიძის ხიდის გავლით; ავტობუსი N378 მეტროსადგურ „რუსთაველამდე“ აღარ მივა და იმოძრავებს გმირთა მოედნის მიმართულებით; N408 მიკროავტობუსი მოძრაობას დაიწყებს თავისუფლების მოედნიდან და მელიქიშვილის გამზირიდან დაუკავშირდება თამარ ჭოველიძის ქუჩას; მიკროავტობუსი N420 მეტროსადგურ „რუსთაველს“ აღარ გაივლის და იმოძრავებს გურამ რჩეულიშვილის ქუჩიდან, დაუკავშირდება მელიქიშვილის გამზირს და სვლას თამარ ჭოველიძის ქუჩის გავლით განაგრძობს; N457 მიკროავტობუსი იმოძრავებს ვარაზისხევის, მელიქიშვილის გამზირის, თამარ ჭოველიძის, ბელინსკისა და ბარნოვის ქუჩების გავლით.ინფორმაციას თბილისის მერია ავრცელებს და შექმნილი დისკომფორტის გამო, მოქალაქეებს ბოდიშს უხდის.

ნიკარაგუის პრეზიდენტის, დანიელ ორტეგას განცხადებით, ქვეყანაში არჩევნები აღარ ჩატარდება. ამის შესახებ ინფორმაციას „როიტერი“ ავრცელებს.გამოცემის ცნობით, ორტეგა, რომელიც 2007 წლიდან ხელისუფლებაშია, აცხადებს, რომ ამ გზით ოპოზიციისთვის ხელისუფლებაში მოსვლის ყველა გზას ჩაკეტავს, თუმცა არ დაუკონკრეტებია, როგორ განხორციელდება აღნიშნული აკრძალვა.მისივე თქმით, ამერკელებისა და სომოსისტების მხარდაჭერილმა (ნიკარაგუაში სომოსას ოჯახის მხარდამჭერები) პარტიებმა ხელისუფლებაში მოსვლა ვერ უნდა შეძლონ.„აქ აღარ ჩატარდება არჩევნები, რათა მათ ვეღარ სცადონ მთავრობისა და ხელისუფლების ხელში ჩაგდება. დასრულდა ის დრო, როდესაც იანკების და სომოსისტების მხარდაჭერილი პარტიები ხელისუფლებაში ბრუნდებოდნენ, ეს აღარასდროს განმეორდება“, – განაცხადა ორტეგამ.ცნობისთვის, დონალდ ტრამპის ადმინისტრაციამ ორტეგას მთავრობა დიქტატურად გამოაცხადა და სანქციები დაუწესა ნიკარაგუის 2 350-ზე მეტ ოფიციალურ პირსა და მათი ოჯახის წევრებს.ნიკარაგუაში ბოლო საპრეზიდენტო არჩევნები 2021 წელს გაიმართა, რომლის შედეგებიც სადავო იყო, მას შემდეგ, რაც ორტეგამ დააკავა პოლიტიკური ოპონენტები და ბიზნესის წარმომადგენლები. გასულ წელს ორტეგამ ძალაუფლება კიდევ უფრო განიმტკიცა საკონსტიტუციო ცვლილებების სერიის მეშვეობით, რომელთა ფარგლებში მისი მეუღლე, როსარიო მურილო, „თანაპრეზიდენტად“ დაინიშნა, ხოლო საპრეზიდენტო ვადა ექვს წლამდე გაზარდა.

სატრანსპორტო საშუალების მართვის უფლების მისაღები საგამოცდო პროცესის გაუმჯობესების მიზნით, 22 ივლისიდან რუსთავში, თელავსა და საჩხერეში მარშრუტების ცვლილება განხორციელდება, - ინფორმაციას საქართველოს შსს მომსახურების სააგენტო ავრცელებს.რუსთავში - სატრანსპორტო საშუალების „B“ და „BE“ კატეგორიის მისაღები პრაქტიკული გამოცდის მეორე ეტაპისთვის განკუთვნილი მარშრუტებიდან ხუთი მარშრუტი ჩანაცვლდება ახალი მარშრუტებით;თელავში - სატრანსპორტო საშუალების „B“ და „BE“ კატეგორიის მისაღები პრაქტიკული გამოცდის მეორე ეტაპისთვის განკუთვნილი მარშრუტებიდან ორი მარშრუტი ჩანაცვლდება ახალი მარშრუტებით.ასევე „C“ კატეგორიისთვის და „C1“ /„D1“ ქვეკატეგორიებისთვის განკუთვნილი მარშრუტი ჩანაცვლდება ახალი მარშრუტით.საჩხერეში - სატრანსპორტო საშუალების „B“ და „BE“ კატეგორიის მისაღები პრაქტიკული გამოცდის მეორე ეტაპისთვის განკუთვნილი მარშრუტები სრულად ჩანაცვლდება ოთხი ახალი მარშრუტით.მარშრუტების შესახებ ინფორმაცია იხილეთ ბმულზე.

საქართველოს პრემიერ-მინისტრი ირაკლი კობახიძე სამუშაო ვიზიტით სინგაპურში გაემგზავრა, - ამის შესახებ ინფორმაციას მთავრობის ადმინისტრაცია ავრცელებს.ვიზიტის ფარგლებში, საქართველოს მთავრობის მეთაური სინგაპურის პრეზიდენტ თარმან შანმუგარატნამს, პრემიერ-მინისტრ ლოურენს ვონგს და სინგაპურის პარლამენტის სპიკერ სია კიან პენგს შეხვდება.ასევე დაგეგმილია ფინანსური ტექნოლოგიების კომპანიებთან შეხვედრა, რომლის მთავარი თემა იქნება საქართველოს საინვესტიციო შესაძლებლობები.პრემიერ-მინისტრი სინგაპურში დელეგაციასთან ერთად გაემგზავრა, რომლის შემადგენლობაში ვიცე-პრემიერი, საგარეო საქმეთა მინისტრი მაკა ბოჭორიშვილი, ეკონომიკისა და მდგრადი განვითარების მინისტრი მარიამ ქვრივიშვილი და მთავრობის ადმინისტრაციის უფროსი ლევან ჟორჟოლიანი არიან.