„გირჩი – მეტი თავისუფლება“ ბორის (ჩელე) ყურუამ და ბადრი გრიგალაშვილმაც დატოვეს

4 ოქტომბერს, ათონელის სასახლესთან განვითარებულ მოვლენებთან დაკავშირებით ბრალდებული 7 პირის, მათ შორის, ექიმ გიორგი ჩახუნაშვილის საქმეზე განაჩენი დღეს, 19 ივნისს გამოცხადდება. სხდომა თბილისის საქალაქო სასამართლოში 11:00 საათზეა დანიშნული.დღევანდელ პროცესზე ბრალდებულები საბოლოო სიტყვას წარმოთქვამენ.აღნიშნულ ეპიზოდს საერთო ჯამში, 15 ბრალდებული ჰყავდა, თუმცა, რვამ ბრალი აღიარა და მათ საპროცესო შეთანხმება გაუფორმდათ. რაც შეეხებათ, ექიმ გიორგი ჩახუნაშვილს, ია დარახველიძეს, ზაქრო ალბუთაშვილს, დავით ჟღენტს, კონსტანტინე კოკაიას, კახაბერ მჟავანაძესა და დავით სტურუას, მათ ბრალი არ აღიარეს. შესაბამისად, მათ საპროცესო შეთანხმება არ გაუფორმდათ.თუკი, დღევანდელ პროცესზე, რომელიმე მათგანი სურვილს გამოთქვამს, არაა გამორიცხული, პროკურატურამ მათ საპროცესო შეთანხმება გაუფორმოს.რაც შეეხება ევა შანშიაშვილს, ალექსანდრე გოგოლაძეს, გოჩა ყატაშვილს, სულხან აბრალავას, რამაზ ჯორბენაძეს, ჯანდრი თირქიას, გენადი კელიხაშვილს და დათო ღუწკაიას მათ საპროცესო შეთანხმება გასულ კვირას გაუფორმდათ.ცნობისთვის, 4 ოქტომბერს განვითარებულ მოვლენებთან დაკავშირებით დაკავებულ ყველა მათგანს ბრალდება საქართველოს სისხლის სამართლის კოდექსის 19-222-ე მუხლის მე-2 ნაწილის “ა“ ქვეპუნქტით აქვთ წარდგენილი, რაც სტრატეგიული და განსაკუთრებული მნიშვნელობის ობიექტების ხელში ჩაგდების და ბლოკირების მცდელობას გულისხმობს ჩადენილს ჯგუფურად. მათ ბრალდება სსსკ-ის 225-ე მუხლის მეორე ნაწილითაც აქვთ წარდგენილი, რაც ჯგუფურ ძალადობაში მონაწილეობას გულისხმობს.

აშშ-ის ცენტრალური სარდლობა ადასტურებს, რომ შეერთებულმა შტატებმა ჰორმუზის სრუტეში ირანის პორტების ბლოკადა მოხსნა.ცენტრალური სარდლობის განცხადებაში ნათქვამია, რომ, აშშ-ის პრეზიდენტის ბრძანების შესაბამისად, ბლოკადა ირანის პორტებსა და სანაპირო ზონებში შემავალი და გამავალი ყველა საზღვაო მოძრაობისთვის უკვე მოხსნილია.სარდლობის განცხადებაში ასევე ნათქვამია, რომ აშშ-ის სამხედრო გემები რეგიონში რჩებიან, რათა აშშ-ირანის შეთანხმების ყველა ასპექტის დაცვა უზრუნველყონ.„დღეს აშშ-ის ძალებმა, პრეზიდენტის მითითების შესაბამისად, მოხსნეს ირანის პორტებსა და სანაპირო ზოლში შემავალი და გამავალი ყველა საზღვაო მოძრაობის ბლოკადა. ამერიკული ძალები არ უშლიან ხელს გემების ტრანზიტს ირანის პორტებისკენ ან პორტებიდან. აშშ-ის სამხედრო ბლოკადის ძალაში ყოფნის ყველა მცდელობა შეწყდა. ჩვენი შესანიშნავი საზღვაო ხომალდები დარჩებიან საერთო არეალში, რათა უზრუნველყონ შეთანხმების ყველა ასპექტის დაცვა, შესრულება და სრული ძალითა და ეფექტურობით მოქმედება“, – ნათქვამია განცხადებაში.

„სტუდენტური ფესტივალი 2026“ საზეიმო ღონისძიებით დაიხურა, სადაც გამარჯვებულები დაჯილდოვდნენ. სხვადასხვა ნომინაციაში გამარჯვებულებს  მედლები და ფულადი პრიზები გადაეცათ.ღონისძიებას, პრემიერ-მინისტრ ირაკლი კობახიძესთან ერთად, დედაქალაქის მერი კახა კალაძე დაესწრო და სტუდენტებს სიტყვით მიმართა.„თქვენ ხართ ის ადამიანები, რომლებიც ახალი იდეებით, ცოდნითა და შრომით გვერდით უნდა დაუდგეთ ჩვენს სამშობლოს, რადგან თითოეული ახალგაზრდის როლი ჩვენი ქვეყნის კეთილდღეობისა და ხვალინდელი დღისთვის განსაკუთრებით მნიშვნელოვანია. სტუდენტური ფესტივალი არის სივრცე, სადაც ერთიანდება უამრავი ახალგაზრდის  ნიჭი, უნარები და შემოქმედება. შესაბამისად, მჯერა, რომ გამოცდილება, რომელიც ფესტივალის ფარგლებში მიიღეთ, დაგეხმარებათ საკუთარი შესაძლებლობების უკეთ წარმოჩენაში, ხოლო ურთიერთობები, რაც აქ შეიძინეთ, შეგმატებთ თანამოაზრეებს ბევრი სასიკეთო იდეის განსახორციელებლად“, – განაცხადა კახა კალაძემ.მისივე ინფორმაციით, „სტუდფესტი 2026“, რომელშიც საქართველოში  მოქმედი 42 სახელმწიფო და კერძო უმაღლესი სასწავლებლის 20 000-ზე მეტი სტუდენტი მონაწილეობდა, მასშტაბური აღმოჩნდა.„ფესტივალის ფარგლებში გამართულ ჩემპიონატებში მონაწილე თითოეული გუნდი არის გამარჯვებული. ეს ის შემთხვევაა, როდესაც დამარცხებული არ არსებობს. მართალია, ფესტივალი დასრულდა, მაგრამ არ გემშვიდობებით. ჩვენი თანამშრომლობა გაგრძელდება მომავალშიც. თბილისის მუნიციპალიტეტს არაერთი ახალგაზრდული პროგრამა გააჩნია კულტურის, სპორტის, განათლების, სოციალური მეწარმეობის მიმართულებით. მზად ვართ, ხელი შეგიწყოთ, დაგეხმაროთ, რათა თქვენი შესაძლებლობები აქციოთ რეალობად. დარწმუნებული ვარ, ერთობლივად ბევრ საინტერესო და მნიშვნელოვან პროექტს განვახორციელებთ როგორც ჩვენი ქალაქისთვის, ისე ქვეყნისთვის“, – აღნიშნა კახა კალაძემ.დედაქალაქის მერმა მადლობა გადაუხადა სტუდენტებს ფესტივალში მონაწილეობისთვის, ასევე ყველა შესაბამისი უწყების წარმომადგენელს ფესტივალის მაღალ დონეზე ჩატარებისთვის.„სტუდენტური ფესტივალი 2026“ პირველ მაისს რუსთავში გაიხსნა და 14 ივნისს თბილისში მოხალისეობრივი გარბენით დაიხურა. ჩატარდა 45 საგანმანათლებლო, კულტურული და სპორტული ტურნირი თბილისსა და საქართველოს ყველა დიდ ქალაქში.პროექტის მხარდამჭერები არიან განათლების, მეცნიერებისა და ახალგაზრდობის სამინისტრო, თბილისის მერია, რუსთავის მერია და ახალგაზრდობის სააგენტო.ღონისძიებას მინისტრთა კაბინეტის წევრები, საკრებულოს თავმჯდომარე ზურაბ აბაშიძე, რუსთავის მერი ნინო ლაცაბიძე, თბილისის მერიის კულტურის, განათლების, სპორტისა და ახალგაზრდულ საქმეთა საქალაქო სამსახურის უფროსი ირაკლი გვილავა, ასევე სპორტსმენები, უნივერსიტეტების წარმომადგენლები, ფესტივალის ორგანიზატორები და მონაწილეები ესწრებოდნენ.ინფორმაციას თბილისის მერიის პრესსამსახური ავრცელებს.

ირანის სულიერი ლიდერი მოჯტაბა ხამენეი აცხადებს, რომ განსხვავებული შეხედულების მიუხედავად, აშშ-ირანის სამშვიდობო შეთანხმება მიიღო.ირანის სულიერმა ლიდერმა შესაბამისი განცხადება ამჯერადაც წერილობითო ფორმით გააკეთა და ის ირანის სახელმწიფო მედიამ გაავრცელა.წერილის მიხედვით, ხამენეი თავდაპირველად არ ეთანხმებოდა ურთიერთგაგების მემორანდუმს, მაგრამ ირანის პრეზიდენტის, მასუდ ფეზეშქიანის გარანტიების შემდეგ მას განხორციელების უფლება მისცა.ამასთან, სულიერი ლიდერი აღნიშნავს, რომ შეთანხმების მისაღწევად „სასოწარკვეთილმა დონალდ ტრამპმა ყველანაირი ბერკეტი გამოიყენა“.„როგორც მოგეხსენებათ, ირანისა და ამერიკის შეერთებული შტატების პრეზიდენტებს შორის ურთიერთგაგების მემორანდუმი გაფორმდა. ამ ეტაპის მიღწევის გზაზე ირანის ხელისუფლებამ თანაგრძნობითა და კეთილი ნებით ბევრი ძალისხმევა გასწია და, რა თქმა უნდა, სწორედ ამერიკის შეერთებული შტატების პრეზიდენტი იყო ის, ვინც სასოწარკვეთილების გამო ყველანაირი ბერკეტი გამოიყენა ამ მიზნით. პრინციპში, მე განსხვავებული პოზიცია მქონდა, მაგრამ იმ ვალდებულების გამო, რომელიც პატივცემულმა პრეზიდენტმა, როგორც უზენაესი ეროვნული უშიშროების საბჭოს თავმჯდომარემ, საკუთარი და სხვა წევრების სახელით მომცა ირანელი ერისა და წინააღმდეგობის ფრონტის უფლებების დასაცავად და განაცხადა, რომ პასუხისმგებლობას აიღებდა, მე მას ნებართვა მივეცი“,- ნათქვამია განცხადებაში.წერილში სულიერი ლიდერი ასევე აღნიშნავს, რომ თეირანი ვაშინგტონის მხრიდან პირობების შესრულებას ელოდება და თუ მომავალში აშშ-სა და ირანის ლიდერები პირისპირ მოლაპარაკებები გაიმართება, ეს არ ნიშნავს, რომ „თეირანი მტრის თვალსაზრისს იზიარებს“.

ევროპული სადაზვერვო სამსახურების მონაცემებით, რუსეთის ეკონომიკა კოლაფსის ზღვარზეა, – ამის შესახებ ინფორმაციას გერმანული მედია ევროპის სადაზვერვო წრეებზე დაყრდნობით ავრცელებს.ექსპერტების შეფასებით, „ეკონომიკური შოკი, მაგალითად, სანქციების მასშტაბური პაკეტი ბანკების წინააღმდეგ ან ნავთობის ფასების მდგრადი დაცემა“, შეიძლება, უკანასკნელ წვეთად იქცეს და შეასრულოს სასხლეტის როლი.სადაზვერვო სამსახურების მონაცემებით, ყველაზე მოწყვლადი რუსეთის საბანკო სექტორია. ბანკების ბალანსი „ხელოვნურადაა გაბერილი“. მაღალი საპროცენტო განაკვეთების პირობებში ინვესტორების მოსაზიდად ბანკებმა შეამცირეს დაშვებული რისკების ზღვარი.ამასთან, ანგარიშში აღნიშნულია, რომ რუსეთში სახელმწიფოს მიერ გაცემულმა სუბსიდირებულმა იპოთეკურმა სესხებმა გამოიწვია უძრავი ქონების გაძვირება, რაც დეფოლტის ტალღის საფრთხეს აჩენს. ამას ემატება ე.წ. ფარული ვალები – შეღავათიანი კრედიტები, რომლებსაც ბანკების გასცემდნენ კრემლის ზეწოლით და ამ სესხებს იღებდნენ სამხედრო საწარმოები, რომელთაც უზარმაზარი ფინანსური მოთხოვნილებები აქვთ.ანგარიშში აღნიშნულია, რომ რუსეთი ამ დრომდე ინარჩუნებს „მოჩვენებით დინამიკურ ეკონომიკას“, თუმცა ეს უკვე აღარ შეესაბამება რეალობას. მთავრობამ კი თავადაც აღიარა, რომ ეკონომიკა, უკვე ორი წელია, სტაგნაციაშია. წელს ეკონომიკის ზრდის პროგნოზი 0,4%-მდეა შემცირებული.გერმანული მედია აღნიშნავს, რომ „ევროპული სადაზვერვო სამსახურების ანგარიში არ გამოდის რუსეთის წინააღმდეგ სანქციების დაწესების მოწოდებით, მაგრამ ის პოლიტიკოსებს აძლევს არგუმენტებს, რატომ არის ახლა სახარბიელო დრო მოქმედებისთვის“.