ჩვენ ვერავინ აგვიკრძალავს იმას, თუნდაც, არალეგიტიმურ პარლამენტში შევიდეთ და ვიბრძოლოთ ამ მოძალადე ავტოკრატიული რეჟიმის წინააღმდეგ, – ამის შესახებ პარტია „გახარია საქართველოსთვის“ პოლიტსაბჭოს წევრმა, გიორგი შარაშიძემ საქართველოს პირველი არხის გადაცემაში „დღის თემა“ განაცხადა.
ამ განცხადებით პარტია „გახარია საქართველოსთვის“ პოლიტსაბჭოს წევრმა, გიორგი შარაშიძემ საქართველოს პირველი არხის გადაცემის „დღის თემა“ წამყვანის შეკითხვას უპასუხა, აღიარებს თუ არა გახარიას პარტია პარლამენტის ლეგიტიმურობას, რადგან საკანონმდებლო ორგანოში შესვლის გადაწყვეტილება მიიღო.
თამთა სანიკიძის შეკითხვაზე, როგორი სტატუსით უნდა წარადგინოს პარლამენტში შესვლის შემდეგ, როგორც არალეგიტიმური წევრები, თუ როგორ, გიორგი შარაშიძემ უპასუხა, რომ ეს თავად წამყვანის გადასაწყვეტია.
„პარლამენტი ლეგიტიმურია, თუ არალეგიტიმური, დღეს ეს აქტუალური აღარ არის. დღეს თქვენ ინტერვიუ დაიწყეთ იმ კითხვებით, რაც ეხებოდა სუს-ში და პროკურატურაში ჩატარებული ბრიფინგებს“, – განაცხადა შარაშიძემ.
შარაშიძემ ასევე ისაუბრა ბოიკოტის რეჟიმში მყოფი ოპოზიციის განცხადებებზე, რომ პარტია „გახარია საქართველოსთვის“ პარლამენტში შესვლის გადაწყვეტილებით ხელისუფლების პოზიციას ამყარებს.
„ამ ოპოზიციას ჩვენ ვპასუხობთ, თუ ვინმემ დღეს ლეგიტიმაცია მისცა „ოცნებას“, პირველ რიგში, არიან ისინი, საკუთარი უპასუხისმგებლო მოქმედებებით, რაც ჩაიდინეს 4 ოქტომბერს“, – აღნიშნა შარაშიძემ.
შეკითხვაზე, ხომ არ იყენებს პარტია „გახარია საქართველოსთვის“ საბაბად 4 ოქტომბრის გეგმას, რადგან პარტიის ლიდერები მუდმივად ამბობენ, რომ ოთხმა ოქტომბერმა საბოლოოდ გაუმყარათ გადაწყვეტილება, რომ პარლამენტში უნდა შესულიყვნენ, თუმცა მანამდეც, ისინი გარკვეული ფრთხილი მიდგომებით მაინც მიდიოდნენ ამ გადაწყვეტილებამდე და საზოგადოებისთვის მათი გადაწყვეტილება მოულოდნელი არ იყო, რადგან ბოლომდე არ ჩახსნეს საპარლამენტო სია და დაიტოვეს თეორიული შესაძლებლობა საკანონმდებლო ორგანოში ნებისმიერ დროს შესვლის, ხოლო ორი თვის წინ თქვეს, რომ საპარლამენტო ბოიკოტი შეცდომა იყო, გიორგი შარაშიძემ უპასუხა: „რა თქმა უნდა, ველოდით“.
„4 ოქტომბრამდეც ვამბობდით. მეტსაც გეტყვით, ამოიღეთ გიორგი გახარიას ინტერვიუ 4 ოქტომბრამდე სხვადასხვა სატელევიზიო არხზე, რასაც ამბობდა, ყველაფერი მოხდა ზუსტად ისე“, – განაცხადა შარაშიძემ.
შეკითხვაზე, 4 ოქტომბერს პროცესები ისე რომ არ განვითარებულიყო, როგორც განვითარდა, მაინც შევიდოდნენ თუ არა პარლამენტში, მანამდეც თუ ჰქონდათ გადაწყვეტილი პარლამენტში შესვლა, გიორგი შარაშიძემ განაცხადა, რომ ეს რთული სათქმელია.
„ჩვენთვის მთავარი იყო, დავლოდებოდით 4 ოქტომბერს, იმდენად დიდი იყო 4 ოქტომბრის მოლოდინი, ჩვენ ვამბობდით, რომ გადაწყვეტილებას პარლამენტში შესვლასთან დაკავშირებით მივიღებთ იმ პოლიტიკური სიტუაციის გათვალისწინებით, რაც იქნება პოსტ 4 ოქტომბრის საქართველოში, ანუ, პოსტმუნიციპალური არჩევნების პერიოდში, მაგრამ მოხდა ის, რასაც, როგორ გითხრათ, ველოდით, მაგრამ ასეთ წარმოუდგენელ უპასუხისმგებლობასაც არ ველოდით“, – განაცხადა შარაშიძემ.
ამასთან, თამთა სანიკიძის შეკითხვაზე, რა შეფასებას გააკეთებს მას შემდეგ, რაც ბრიფინგზე მოისმინა, რომ რამდენიმე სისხლის სამართლის საქმეა აღძრული და არ ვიცით, კონკრეტულად რას ედავებიან ყოფილ პრემიერ-მინისტრს, ირაკლი ღარიბაშვილს და ორ ყოფილ მაღალჩინოსანს, გრიგოლ ლილუაშვილს და ოთარ ფარცხალაძეს, გიორგი შარაშიძემ განაცხადა, რომ „ოცნებამ“ Შექმნა ამ ქვეყანაში სისტემური პოლიტიკური კორუფცია და ის, რასაც დღეს ვიგებთ, სხვა არაფერია, თუ არა იმის დასტური, რასაც ოპოზიცია ამბობდა, რომ განსაკუთრებით ბოლო წლებში, „ოცნება“ ჩაფლული იყო კორუფციაში.
„სისტემური პოლიტიკური კორუფცია ეს არის ჩვენი გუნდის მიერ შემოტანილი ტერმინი, ზოგადად. ეს არის პირდაპირი დადასტურება იმისა, რომ “ოცნებამ” შექმნა სისტემური პოლიტიკური კორუფცია“, – განაცხადა შარაშიძემ.
შეკითხვაზე, ელოდება თუ არა ბრალდებულთა წრის გაფართოებას, შარაშიძემ აღნიშნა, რომ მნიშვნელოვანი არის არა ის, გაფართოვდება თუ არა ეს წრე, არამედ ყველაზე მნიშვნელოვანია ის, რამდენად რეალურად ებრძვის „ოცნება“ კორუფციას, ხოლო „ოცნება“ არ ებრძვის რეალურად კორუფციას.
მისივე თქმით, მართლაც პარადოქსია, რომ ერთი მხრივ, იყოს საკმაოდ მისაღები და ნორმალური ეკონომიკური ზრდა, ქვეყანაში ეკონომიკური სიტუაცია მეტ-ნაკლებად გაუმჯობესებული და ამ დროს, ჩვენი ქვეყნის რიგითი მოქალაქეები ისევ ისეთ გაჭირვებასა და სიღარიბეში ცხოვრობდნენ.
გადაცემის წამყვანის შეკითხვაზე, რა მისიით იმყოფება მათი ლიდერი გიორგი გახარია გერმანიაში და უკავშირდება თუ არა მისი იქ ყოფნა სისხლის სამართლის საქმეს, რომელიც მის წინააღმდეგ აღიძრა, რადგან მმართველი გუნდი მის ქმედებას გაქცევად აფასებს, გიორგი შარაშიძემ განაცხადა, რომ „რა თქმა უნდა, უკავშირდება.
„დღეს „ოცნება“ არის იმდენად არაადეკვატური ავტოკრატიული რეჟიმი, რომ ახლა ნამდვილად სჯობს, პოლიტიკოსმა ყველაფერი გააკეთოს, რათა შეინარჩუნოს ხალხთან კომუნიკაცია, შეინარჩუნოს პარტიის მართვა“, – განაცხადა შარაშიძემ.