გიორგი ტუღუში:ევროპული საქართველო პატიმრების შეწყალებაზე პრეზიდენტის ინიციატივას იზიარებს

აშშ-ის პრეზიდენტი დონალდ ტრამპი ირანს ურჩევს, შეთანხმება გააფორმოს.მისი თქმით, საპროტესტო არეულობების დროს 32 000-მდე ადამიანი დაიღუპა და ირანის ხელისუფლება გეგმავდა, სიკვდილით დაესაჯა 800-ზე მეტი მოქალაქე. როგორც ტრამპმა აღნიშნა, მან გააფრთხილა თეირანი, რომ ერთი ადამიანი თუ მაინც დაისჯება სიკვდილით, ვაშინგტონი ირანს მყისიერად დაარტყამს.ტრამპის თქმით, ამ გაფრთხილების შემდეგ ქვეყანაში სასიკვდილო განაჩენი არავის მიმართ აღუსრულებიათ.დონალდ ტრამპმა ასევე განაცხადა, რომ თანაუგრძნობს ირანის მოსახლეობას, რომელიც, მისი თქმით, „ჯოჯოხეთში ცხოვრობს“.

ფინანსთა სამინისტროს შემოსავლების სამსახურის ხელმძღვანელმა, ირაკლი (დაჩი) ბერაიამ და საქართველოს განათლების, მეცნიერებისა და ახალგაზრდობის მინისტრის მოადგილემ, თამარ მახარაშვილმა თანამშრომლობის მემორანდუმს მოაწერეს ხელი.აღნიშნული მემორანდუმის მიზანია, ერთობლივად შემუშავებული მრავალმხრივი სასწავლო პროგრამების დახმარებით, მხარეებმა კოორდინირებულად განახორციელონ საგანმანათლებლო დაწესებულებების მოსწავლეების/სტუდენტების საგადასახადო-საბაჟო საკითხების მიმართულებით, ცნობიერების ამაღლება. ამასთან, მემორანდუმის ფარგლებში, საგანმანათლებლო პროექტებში მონაწილეთათვის (ასაკობრივი ჯგუფების გათვალისწინებით) შემოსავლების სამსახურის წარმომადგენლები, საქართველოს მასშტაბით არსებულ მოქალაქეთა მომსახურების სერვისცენტრებში, ასევე გაფორმების ეკონომიკურ ზონებსა და საბაჟო გამშვებ პუნქტებზე გამართავენ საინფორმაციო-შემეცნებითი ხასიათის შეხვედრებს, რაც გაზრდის მათ ინფორმირებულობას, როგორც საგადასახადო-საბაჟო პროცედურების, პრინციპების შესახებ, ასევე უზრუნველყოფს საზოგადოებაში ნებაყოფლობითი კანონშესაბამისობის დონის ამაღლებას.შეხვედრას ესწრებოდნენ ფინანსთა სამინისტროს შემოსავლების სამსახურის უფროსის  მოადგილე ლევან წითელაშვილი და უწყების სხვადასხვა დეპარტამენტის ხელმძღვანელი პირები.მემორანდუმი ძალაში შედის მხარეების მიერ, მისი ხელმოწერის თარიღიდან.

საქართველოში ჩემს წინააღმდეგ საქმე უცხოელი პატრონების დავალებით შეთხზეს - ყველაფერს გავაკეთებ ქართველ და რუს ერებს შორის ძმური ურთიერთობების გასაძლიერებლად, - ამის შესახებ საქართველოს ყოფილმა გენერალურმა პროკურორმა, ოთარ რომანოვ - ფარცხალაძემ რუსულ სახელმწიფო გამოცემა „მოსკოვსკი კომსომოლეცთან“ ინტერვიუში განაცხადა.„შეთხზული დანაშაულებისთვის მდევნიან, იმისთვის, რაც არ ჩამიდენია, ცდილობენ ისტორიული სამშობლო წამართვან. საერთაშორისო კრიმინალურმა დაჯგუფებებმა ჩემზე ნადირობა გამოაცხადეს. არ მეშინია. ეს ყველაფერი ყველაზე უკეთ ადასტურებს ჩემი არჩეული გზის სიმართლეს. მზად ვარ ჩემი სიცოცხლე გავიღო ჩვენი შვილების ბედნიერი მომავლისთვის.დროა, წარსულში დავტოვოთ წარსულის წყენები, რომლებიც ჩვენი ერის მტრების მიერაა შექმნილი და წინ ვიაროთ. ქართველმა ხალხმა თვალები უნდა გაახილოს და გაიგოს, ვინ მოქმედებს მის ინტერესებში, ხოლო ვინ ინტრიგებს ხლართავს, რითაც უცხოელ პატრონებს ემსახურება, ანგრევს ჩვენს იდენტობას, წეს-ჩვეულებებსა და ერთიანობას. ასე შევძლებთ ჩვენი სუვერენიტეტის, ჩვენი ტრადიციებისა და რწმენის შენარჩუნებას“, - განაცხადა ფარცხალაძემ.მან ასევე ქართველ და რუს ერებს შორის „ძმური ურთიერთობების“ გაძლიერებაზეც ისაუბრა.„გრძელი და სახიფათო გზა გავიარე ჩემი სამშობლოს - საქართველოს - სამსახურში. და დღეს ზუსტად იმ წერტილში აღმოვჩნდი, საიდანაც ვიცი, რომ ახალი ფურცელი დაიწყება ძმურ ერებს შორის ურთიერთობაში…მართლმადიდებლური რწმენა გვაერთიანებს…ყველაფერს გავაკეთებ ქართველ და რუს ერებს შორის ძმური ურთიერთობების გასაძლიერებლად, რომელიც პატივისცემაზე, ერთიანობასა და გარე საფრთხეებისთვის ერთობლივ წინააღმდეგობაზეა დაფუძნებული“, - განაცხადა ფარცხალაძემ.ცნობისთვის, ყოფილ გენერალურ პროკურორს, ოთარ რომანოვ-ფარცხალაძეს ბიზნესმენ ლევან ჯანგველაძის შეკვეთით და ანგარებით განზრახ მკვლელობის ორგანიზებას ედავებიან. მას ბრალი საქართველოს სისხლის სამართლის კოდექსის 25/109-ე მუხლის ,,ნ“ ქვეპუნქტით წარუდგინეს, რაც შეკვეთით და ანგარებით განზრახ მკვლელობის ორგანიზებას გულისხმობს. ამასთან, ფარცხალაძეს ე.წ. ქოლცენტრების საქმეზე წარედგინა ბრალი.ფარცხალაძეს პატიმრობა დაუსწრებლად აქვს შეფარდებული.

საქართველოს ტექნიკური უნივერსიტეტის რექტორი, აკადემიკოსი დავით გურგენიძე ინფორმატიკისა და მართვის სისტემების ფაკულტეტის ჟიული შარტავას სახელობის ინფორმაციული ტექნოლოგიების სასწავლო-კვლევით ლაბორატორიულ კომპლექსში გახსნილ სტროუ ლაბორატორიაში მიმდინარე სამუშაო პროცესს გაეცნო.ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, სტროუ ლაბორატორიაში უკვე დამზადებულია 20 მმ დიამეტრის სტროუ მილების ექსპერიმენტული ეგზემპლარები, რომელთაც წარმატებით გაიარეს ტესტირება. უახლოეს დროში კი სტროუ მილების პირველი პარტია, SHiP ექსპერიმენტისთვის, ბირთვული კვლევების ევროპულ ორგანიზაციაში (CERN) გაიგზავნება. SHiP ექსპერიმენტის მთავარი მიზანია სტანდარტული მოდელის მიღმა არსებული უხილავი ნაწილაკების აღმოჩენაა.რექტორის განცხადებით, საქართველოს ტექნიკური უნივერსიტეტი, მსოფლიოს 20 ქვეყნის 48 უნივერსიტეტს შორის, 2025 წლიდან SHiP ექსპერიმენტის სრულფასოვანი წევრია. სტუ-ის მეცნიერთა ჯგუფის ლიდერია (Team Leader) ირაკლი ლომიძე. გუნდი დაკომპლექტებულია მაღალი კლასის ფიზიკოსებით, ინჟინრებითა და პროგრამისტებით. აკადემიკოს დავით გურგენიძის თქმით, უნივერსიტეტი აქტიურად ჩაერთვება ექსპერიმენტის ძირითადი ამოცანების შესრულებაში, რომელთაგანაც განსაკურებით ხაზგასასმელია 20 მმ-იანი დიამეტრის სტროუ მილების წარმოება ექსპერიმენტისათვის. „საქართველოს ტექნიკურ უნივერსიტეტში სტროუ ლაბორატორია გასული წლის აპრილში გაიხსნა. ხაზგასმითაა აღსანიშნავი, რომ ინოვაცია, რომელიც დაინერგა ჩვენი უნივერსიტეტის კედლებში, პირველად განხორციელდა როგორც საქართველოში, ასევე მსოფლიო მასშტაბით. ლაბორატორიამ წარმატებით აწარმოა 5 და 10 მმ-იანი სტროუ მილები COMET ექსპერიმენტისათვის (KEK, იაპონია), რომლებიც უკვე გაგზავნილია იაპონიაში და მათი მეშვეობით წარმატებით ხდება მონაცემთა აღება ექსპერიმენტის პირველი ფაზის ფარგლებში დაგეგმილი გაზომვებიდან. ტრეკული დეტექტორის შექმნით, საქართველოს ტექნიკური უნივერსიტეტისა და მისი სამეცნიერო წრეების ცნობადობა და რეიტინგი საგრძნობლად გაიზარდა საერთაშორისო სივრცეში. აღსანიშნავია, რომ ამ პროცესში მეცნიერებთან ერთად ჩვენი სტუდენტებიც მონაწილეობენ, ხოლო საქართველოს ტექნიკური უნივერსიტეტის სტროუ ლაბორატორიაში წარმოებული მილები უკვე გაგზავნილია იაპონიაში - KEK-სა და J-PARC-ში. ჩატარებული მუშაობის წარმატებაში განსაკუთრებული წვლილი მიუძღვით: ნიკა წვერავას, დავით ჩოხელს და სტუ-ს სამაგისტრო საფეხურის სტუდენტს, ილია ჩოხელს. საქართველოს ტექნიკური უნივერსიტეტი აქტიურადა იქნება ჩართული SHiP ექსპერიმენტის როგორც საინჟინრო საქმეებში, ისე მონაცემთა დამუშავებასა და ანალიზში, 2026-2032 წლების განმავლობაში დაგეგმილია ექსპერიმენტისათვის საჭირო მოსამზადებელი სამუშაოების წარმოება, ე.წ R&D, ხოლო 2030 წლიდან იგეგმება უშალოდ ექსპერიმეტის ჩართვა CERN ის SPS ამაჩქარებელზე - 450 GeV ენერგია - და მონაცემთა აღება და ანალიზი, რასაც, ვიმედოვნებთ, მალევე მოჰყვება ფუნდამენტური მნიშვნელობის აღმოჩენა ნაწილაკების ფიზიკაში. წარმატებებს ვუსურვებ საქართველოს ტექნიკურ უნივერსიტეტს და ქართველ მეცნიერთა ჯგუფს“, - აცხადებს დავით გურგენიძე.სტუ-ის ინფორმაციით, ახალი თაობის სტროუ ტრეკული მილების საპილოტე წარმოება საქართველოს ტექნიკური უნივერსიტეტის რექტორმა, CERN/CMS ექსპერიმენტის ასოცირებულმა წევრმა, აკადემიკოსმა დავით გურგენიძემ და სტუ-ის კვანტური ფიზიკისა და საინჟინრო ტექნოლოგიების ინსტიტუტის დირექტორმა, სტუ-ის CERN-CMS ჯგუფის ხელმძღვანელმა, CERN-ში საქართველოს მთავრობის წარმომადგენელმა, პროფესორმა ზვიად წამალაიძემ გასულ წელს გახსნეს. პირველად მსოფლიოში, საქართველოს ტექნიკური უნივერსიტეტის მეცნიერთა მიერ შემუშავებული, უზუსტესი და დახვეწილი ულტრაბგერითი შედუღების ტექნოლოგიის მეშვეობით, ალუმინიზირებული მაილარის 12 და 15-მიკრონიანი (µm) ლენტისგან ახალი თაობის სტროუ ტრეკული მილები დამზადდა.სტროუ დეტექტორები, საუკეთესო ტექნიკური მახასიათებლებისა და ხელმისაწვდომობის გამო, ფართოდ გამოიყენება ისეთ უმსხვილეს სამეცნიერო ცენტრებში, როგორიცაა: ბირთვული კვლევების ევროპული ორგანიზაცია (CERN, შვეიცარია), ექსპერიმენტები: NA-62, SHIP; იაპონიის მაღალი ენერგიების ამაჩქარებლების კვლევითი ორგანიზაცია (KEK, იაპონია), J-PARC-ში მიმდინარე COMET ექსპერიმენტი; ფერმის ლაბორატორია (FERMILAB, აშშ), ექსპერიმენტები: DUNE, Mu2e.

ჯანდაცვის სამინისტრო სოციალურად დაუცველი ოჯახების ბაზის გადამოწმებას იწყებს, – ამის შესახებ საქართველოს ჯანდაცვის მინისტრმა, მიხეილ სარჯველაძემ ბრიფინგზე განაცხადა.სარჯველაძის თქმით, ბაზაში დღემდე ფიქსირდებიან ადამიანები და ოჯახები, რომლებსაც აღარ აქვთ სოციალური დახმარების აუცილებლობა.„დღეისთვის სოციალურად დაუცველი ოჯახების მონაცემთა ერთიან ბაზაში რეგისტრირებული და ფინანსური შემწეობის მიმღები ოჯახების რაოდენობა აღემატება 185 ათასს, ხოლო ასეთი ოჯახების წევრთა რაოდენობა შეადგენს, ჯამში, 710 000-ს. ბაზაში სულ რეგისტრირებულია 400 ათასამდე ოჯახი (ჯამში, დაახლოებით 1 300 000 პირი). მათგან ნახევარზე მეტი არ იღებს შემწეობას, მაგრამ მნიშვნელოვანი ნაწილი სარგებლობს კანონმდებლობით გათვალისწინებული სხვადასხვა ტიპის შეღავათით“,- აღნიშნა მინისტრმა.ამასთან, მისივე თქმით, სოციალურად დაუცველი ოჯახების ერთიანი ბაზა არაერთხელ გამხდარა არაკეთილსინდისიერი პოლიტიკური სპეკულაციების საგანი.„2012 წლის შემდე  მეტი ადამიანის მხარდაჭერის მიზნით ორჯერ გაიზარდა იმ ქულის მაჩვენებელი, რომელიც შემწეობის მიღებას განსაზღვრავს. ქულა რომ არ გაზრდილიყო, ანუ, შედარებით უფრო შეძლებულებისთვისაც რომ არ დაენიშნა სახელმწიფოს შემწეობა, დღეისთვის შემწეობის მიმღებ ოჯახთა რაოდენობა იქნებოდა, მაქსიმუმ, 120 ათასი, ნაცვლად 185 ათასი ოჯახისა. სამწუხაროდ, გადამოწმების შეფერხებები, სხვა ობიექტური თუ სუბიექტური გარემოებები, ოპოზიციურად განწყობილ პირებს საფუძველს უქმნიდა ასეთი სპეკულაციებისთვის. აღსანიშნავია, რომ კოვიდპანდემიის შემდეგ მოქმედებდა ე.წ. მორატორიუმი და გარდა უიშვიათესი გამონაკლისებისა, ოჯახების გადამოწმება პრაქტიკულად არ ხორციელდებოდა. ამის გამო ბაზაში დღემდე ფიქსირდებიან ადამიანები და ოჯახები, რომლებსაც, საბედნიეროდ, აღარ აქვთ სახელმწიფოს მხრიდან სოციალური დახმარების აუცილებლობა“, – განმარტა სარჯველაძემ.მინისტრის ინფორმაციით, არის სრულიად ანომალიური შემთხვევებიც. მაგალითად, ბაზაში რეგისტრირებულია და შემწეობას იღებს ოჯახი, რომელსაც ბოლო სამ თვეში შემოსავლის სახით მიღებული აქვს, ჯამში, რამდენიმე ათეული ათასი ლარი. ბაზაში არის ოჯახიც, რომელსაც ერთი წლის განმავლობაში შეძენილი აქვს რამდენიმე ათეულ ათას ლარად ღირებული რამდენიმე ავტომანქანა. ერთ-ერთ ოჯახს კი 2025 წელს შეძენილი აქვს 2025 წელს გამოშვებული ავტომანქანა. კიდევ ერთ ოჯახს აღებული აქვს რამდენიმე ასეული ათასი ლარის საბანკო სესხი.„ასეთი ოჯახების რაოდენობა არ არის ცოტა, თუმცა ძირითად შემთხვევაში სახეზეა ოჯახები, რომელთაც ამ დროის განმავლობაში გაუჩნდათ გარკვეული მატერიალური შესაძლებლობები, გაუუმჯობესდათ მდგომარეობა და მათი ეს მდგომარეობა აღარ არის ისეთი, რომ სახელმწიფომ დაუნიშნოს ფინანსური შემწეობა“, – განაცხადა მიხეილ სარჯველაძემ.​სარჯველაძის თქმით, სოციალურად დაუცველი ოჯახების ბაზის გადამოწმების მიზანია, რომ ბაზაში რჩებოდნენ მხოლოდ ის ოჯახები და ადამიანები, რომლებსაც, დღეისთვის მოქმედი კანონმდებლობის თანახმად, რეალურად ეკუთვნით სახელმწიფოს ფინანსური მხარდაჭერა.„ფაქტია, რომ სოციალურად დაუცველი ოჯახების მონაცემთა ერთიანი ბაზა შესაბამისობაში ვერ მოდიოდა იმ აღიარებულ ეკონომიკურ წარმატებასთან, რომელიც ქვეყანას ჰქონდა ბოლო წლების განმავლობაში. სწორედ ამ მიზეზთა გამო იქმნებოდა ნიადაგი აღნიშნული რიცხვებით მანიპულირებისა და ყალბი შთაბეჭდილებების შესაქმნელად. დროა, წერტილი დაესვას ასეთ პოლიტიკურ სპეკულაციებს და ამ მიზნით სამინისტროს საჯარო სამართლის იურიდიული პირი – სოციალური მომსახურების სააგენტო იწყებს ბაზაში რეგისტრირებული ოჯახების გადამოწმების აქტიურ პროცესს. ჩვენი მიზანია, ბაზაში რჩებოდნენ მხოლოდ ის ოჯახები და ადამიანები, რომლებსაც რეალურად ეკუთვნით სახელმწიფოს ფინანსური მხარდაჭერა, რაც, თავის მხრივ, გულისხმობს სოციალური შემწეობის გაცემას, ასევე იმ მრავალი შეღავათით სარგებლობას, რასაც ითვალისწინებს კანონმდებლობა. ბაზაში არ უნდა რჩებოდნენ ოჯახები და პირები, რომლებიც ვერ შეძლებდნენ აღნიშნული სტატუსის მოპოვებას ვერც ახლა და ვერც წარსულში. ამგვარად იქნება შესაძლებელი, ბაზა გახდეს რეალური, რაც, თავის მხრივ, აუცილებელია მეტი სოციალური სამართლიანობის უზრუნველსაყოფად, რათა სოციალური დაცვისთვის გათვალისწინებული სახელმწიფოს რესურსები რეალურად და უფრო ეფექტიანად ხმარდებოდეს მხოლოდ იმ ადამიანებს, ვისაც ეს ნამდვილად სჭირდებათ და ნამდვილად ეკუთვნით“,- განაცხადა სარჯველაძემ.მინისტრის განცხადებით, გადამოწმების წარმართვისთვის მომზადებულია ყველა საჭირო წინაპირობა და მომდევნო თვეების განმავლობაში ოჯახები გადამოწმდებიან სამინისტროს მიერ განსაზღვრული პროგრამის მიხედვით. პრიორიტეტულად შემოწმდებიან ოჯახები, რომელთა შემთხვევაშიც მაღალია ალბათობა, რომ არ აკმაყოფილებენ შემოწეობის მიღების პირობებს.„მაგალითად, ერთ-ერთ ასეთ საფუძვლად განისაზღვრება უკანასკნელი სამი თვის განმავლობაში ყოველთვიურად 2 000-ლარიანი შემოსავლის მიღება. მივამართავ ყველას, ვისაც შეხება ექნება ამ პროცესთან, შესამოწმებელი ოჯახის წევრებიდან დაწყებული, შემმოწმებლებით დამთავრებული, თავი შეიკავონ ყოველგვარი სიყალბისგან. პროცესი წარიმართება მკაცრი კონტროლით, იქნება საკმაოდ ხანგრძლივი, რადგან მოითხოვს სკურპულოზურ მუშაობას, ე.წ. ჯავშნების გათვალისწინებას, პროცედურების დაცვას. პარალელურად, ჩვენ მიერ გაანალიზდება პროცედურები და მისი ეფექტიანობის გაზრდის მიზნით დაიხვეწება სისტემა (შეფასების მეთოდოლოგიიდან დაწყებული, დამთავრებული ბაზაში რეგისტრირებული რეალურად შეძლებული ოჯახების ამორიცხვის მექანიზმების შექმნით). საზოგადოებას პერმანენტულად მივაწვდით ინფორმაციას მიმდინარე პროცესების შესახებ“, – აღნიშნა სარჯველაძემ.