კრიმინალური პოლიციის ყოფილი უფროსი ზაზა ბაქრაძე ბუტა რობაქიძის მკვლელობის საქმესთან დაკავშირებით მტკიცებულებების ფალსიფიცირებაზე და იმ პირთა შესახებ ლაპარაკობს, ვინც 2004 წლის 24 ნოემბერს ბუტა რობაქიძის მანქანაში ცეცხლსასროლი იარაღის ჩადების ბრძანება გასცეს.
ამ საქმეში თავად ზაზა ბაქრაძეც არის ბრალდებული. ის ადასტურებს, რომ რობაქიძის ერთ-ერთ მეგობარს ხელყუმბარა პირადად მან ჩაუდო.
“თავიდან ბოლომდე მიღებული მაქვს მონაწილეობა როგორც შემთხვევის ადგილის გაყალბებაში, ასევე იარაღის ჩადებაში”, – ამბობს “იმედის კვირასთან” ზაზა ბაქრაძე.
“როდესაც შემთხვევის ადგილზე მივედით, მე ზურაბ მიქაძეს ვესაუბრე და აგვიხსნა სიტუაცია – რომ აქ არავითარ ცეცხლსასროლი იარაღით წინააღმდეგობის გაწევას ადგილი არ ჰქონია, უბრალოდ საპატრულო პოლიციის თანამშრომელს გაუვარდა და ახალგაზრდა გარდაიცვალა. მიქაძეს ვუთხარი, რომ დანაშაული ფაქტიურად გახსნილია, დააკავეთ ვაშალეიშვილი, მიეცით გამოძიებას-მეთქი. “ასე არ გამოვა”-ო, იმიტომ რომ ხელმძღვანელობისგან მიღებული მაქვს განკარგულება – დაზიანდება საპატრულო პოლიციის იმიჯი”, – იხსენებს ბაქრაძე საპატრულო პოლიციის ყოფილი უფროსის ზურაბ მიქაძის ნათქვამს.
ბაქრაძის თქმით, მიქაძემ უთხრა, რომ მომხდარი ისე უნდა ყოფილიყო წარმოჩენილი, თითქოს საპატრულო პოლიცია მართალი იყო: “მაშინ უკვე გავიგე რასაც მეუბნებოდა – უნდა მოგვეტანა და ჩაგვედო იარაღები. მიქაძემ თავისი სამსახურებრივი მანქანით მოიტანა (იარაღი) ვაკე-საბურთალოს პოლიციიდან, არაყიშვილის ქუჩიდან. (გურამ) დონაძე ხელმძღვანელობდა გადაღებას”, – ამბობს ზაზა ბაქრაძე
ზაზა ბაქრაძემ საქართველო 2012 წელს დატოვა, მან საზღვარგარეთ გაიგო, რომ მასზე საქართველოში ძებნა გამოცხადდა.
ბუტა რობაქიძის საქმე მთავარმა პროკურატურამ 2012 წელს გახსნილად გამოაცხადა. ხელახალი გამოძიების შედეგად დადგინდა, რომ 19 წლის ბუტა რობაქიძის სიცოცხლე სამართალდამცველის, გიორგი ბაშალეიშვილის მიერ შემთხვევით გასროლილმა ტყვიამ იმსხვერპლა.
პროკურატურამ ბრალი 5 პირს: გურამ დონაძეს, ირაკლი ფირცხალავას, ზაზა ბაქრაძეს, დავით იაშვილსა და ზურაბ მიქაძეს წაუყენა.