ანაკლიის ღრმაწყლოვანი ნავსადგური საქართველოსთვის სტრატეგიული პროექტია, ის ხელს შეუწყობს ქვეყნის ეკონომიკურ განვითარებას, გაზრდის საქართველოს რეგიონულ და საერთაშორისო მნიშვნელობას – ირაკლი კობახიძე

წევრობა ეფუძნება მკაცრ წესებსა და კრიტერიუმებს, რომლებსაც ყველა კანდიდატი ქვეყნის მიმართ ერთნაირად ვიყენებთ, მოკლე გზა არ არსებობს, – ამის შესახებ საქართველოში ევროკავშირის ელჩმა, პაველ ჰერჩინსკიმ ევროპის დღესთან დაკავშირებულ ღონისძიებაზე ჟურნალისტებთან საუბრისას განაცხადა.მისივე თქმით, ევროკავშირში გაწევრიანებისთვის საქართველომ ზუსტად ისეთივე ნაბიჯები უნდა გადადგას, როგორც სხვა კანდიდატმა ქვეყნებმა.„ეს არის ღია ღონისძიება. ჩვენ ყველა მოვიწვიეთ და დარწმუნებული ვარ, ნახეთ პოსტერები მთელ ქალაქში. ჩვენ ასევე გამოვიყენეთ სოციალური მედიის პლატფორმა, სატელევიზიო რეკლამები და ყველას, ვისაც სურვილი აქვს, შეუძლია, შემოგვიერთდეს და ჩვენთან ერთად აღნიშნოს ევროპის დღე.ყოველ ჯერზე ვიმეორებ, რომ ევროკავშირმა 2023 წლის დეკემბერში ერთხმად და უმაღლეს დონეზე, პრეზიდენტებისა და პრემიერ-მინისტრების დონეზე გადაწყვიტა, გაეხსნა საქართველოსთვის ევროკავშირში გაწევრიანების შესაძლებლობა. ეს ეფუძნება საქართველოს ხელისუფლების ნებას. ეს იყო საქართველოს ხელისუფლების სუვერენული გადაწყვეტილება წევრობაზე. წევრობა ეფუძნება მკაცრ წესებსა და კრიტერიუმებს, რომლებსაც ყველა კანდიდატი ქვეყნის მიმართ ერთნაირად ვიყენებთ. მოკლე გზა არ არსებობს. თუ საქართველოს ხელისუფლება სერიოზულად განიხილავს ევროკავშირში გაწევრიანებას, მათ ზუსტად იგივე ნაბიჯები და ზუსტად იგივე პროცედურები უნდა გაიარონ, რაც ყველა სხვამ“, – განაცხადა ჰერჩინსკიმ.ჟურნალისტის კითხვაზე პარლამენტის თავმჯდომარის, შალვა პაპუაშვილის ღია წერილთან დაკავშირებით, პაველ ჰერჩინსკიმ აღნიშნა, რომ წერილი მიიღეს, სათავო ოფისში გადაგზავნეს და პასუხი გარკვეულ დროში დაბრუნდება.

ვუყურებ რა მათ განწყობებს, სავარაუდოდ, დღესაც იქნება ევროკავშირის საელჩოს მიერ ორგანიზებული კიდევ ერთი ანტისამთავრობო მიტინგი, – ამის შესახებ საქართველოს პარლამენტის თავმჯდომარემ, შალვა პაპუაშვილმა განაცხადა, რითაც უპასუხა ჟურნალისტის კითხვას, მიიღებს თუ არა მონაწილეობას ევროპის დღისადმი მიძღვნილ ღონისძიებაში?როგორც პაპუაშვილმა კითხვის საპასუხოდ აღნიშნა, ღონისძიებაში მონაწილეობის „არანაირი სურვილი არ აქვს“.„ჩვენ შარშან ვიხილეთ, რომ ევროკავშირის საელჩომ ჩაატარა ანტისამთავრობო მიტინგი 9 მაისს, როდესაც ევროკავშირის ელჩს ერთი სიტყვა არ დასცდენია მეორე მსოფლიო ომში დაღუპული 300 ათასი ქართველის შესახებ. ეს მსხვერპლი რომ არა, რომელიც მეორე მსოფლიო ომში საქართველომ და ქართველმა ხალხმა გაიღო, არანაირი ევროკავშირი, არანაირი ევროპის დღე არ იქნებოდა და არც არაფერი ექნებოდათ საზეიმო. ასე რომ, ვუყურებ რა მათ განწყობებს, სავარაუდოდ, დღესაც იქნება ევროკავშირის საელჩოს მიერ ორგანიზებული კიდევ ერთი ანტისამთავრობო მიტინგი. რა თქმა უნდა, ამ მიტინგში მონაწილეობის არანაირი სურვილი არ გვაქვს.მე ერთი რამ მაინტერესებს, ვიხილავთ თუ არა ამ თავყრილობაზე 4 ოქტომბრის მონაწილეებს, ხელისუფლების დამხობის თანაორგანიზატორებს პოლიტიკური მნიშვნელობით, მათ, ვინც ნეპალით გვემუქრებოდნენ. ეს ხალხი გამოჩნდება თუ არა მათ ღონისძიებაზე და ხელს ჩამოართმევენ თუ არა ამ ხალხს. მაინტერესებს, 26 მაისს რომ დაანონსებული აქვთ კიდევ ერთი 4 ოქტომბერი, ის ხალხი თუ იქნება ამ შეკრებაზე, ხელს თუ ჩამოართმევენ. ეს ბევრ რამეს აჩვენებს ქართველ ხალხს, სინამდვილეში ვინ დგას საქართველოში სიძულვილის, ძალადობის და რადიკალიზმის უკან“, – აღნიშნა პაპუაშილმა.

არის გარკვეული პოზიტიური ნაბიჯები, როგორც იქნა, დემონსტრაციებზე ჩადენილი ძალადობისთვის დააკავეს პოლიციის რამდენიმე ოფიცერი, – ამის შესახებ საქართველოში ევროკავშირის ელჩმა, პაველ ჰერჩინსკიმ ევროპის დღესთან დაკავშირებულ ღონისძიებაზე ჟურნალისტებთან საუბრისას განაცხადა.როგორც ჰერჩინსკიმ აღნიშნა, იმედი აქვს, რომ საქართველოს მთავრობა ევროინტეგრაციის გზას დაუბრუნდება.„არსებობს ევროპული საბჭოს დასკვნები. ეს არის დოკუმენტები, რომლებიც ევროკავშირის 27-ვე წევრმა სახელმწიფომ შეათანხმა, რომელშიც ძალიან მკაფიოდ არის ნათქვამი, თუ რას ველოდებით კანდიდატი ქვეყნებისგან და, მათ შორის, საქართველოსგან. ასე რომ, ჩახედეთ დოკუმენტებს, არსებობს გაფართოების შესახებ ძალიან ფართო დასკვნა, რომელიც შარშან მოვამზადეთ. ის ნოემბერში გამოქვეყნდა. ვწუხვარ, რომ ამის თქმა ღიად მიწევს, ეს ანგარიში იყო კატასტროფული საქართველოსთვის. ახლა ვმუშაობთ გაფართოების ახალ ანგარიშზე, რომელიც წელს ნოემბერში გამოქვეყნდება. ბოლო დასკვნები, რომლებიც შეთანხმებულია ევროკავშირის წევრი სახელმწიფოების მეთაურების დონეზე, არის მიღებული შარშან, დეკემბერში. ასე რომ, თქვენ შეგიძლიათ გადახედოთ ამ დოკუმენტებს, სადაც წერია, რა ნაბიჯებს ველოდებით საქართველოსგან, რათა ის დაბრუნდეს ევროინტეგრაციის გზაზე. ყველაფერი საქართველოს ხელშია. ჩვენს მხარეს უკვე გადავწყვიტეთ. ახლა ჩვენ საქართველოს ველოდებით. სამწუხაროდ, დრო იწურება. ძალიან ბევრ დროს ვფლანგავთ. ტანგოსთვის ორი ადამიანია საჭირო.უკვე არის გარკვეული პოზიტიური ნაბიჯები. ის ფაქტი რომ, როგორც იქნა, პოლიციის რამდენიმე ოფიცერი დააკავეს ძალადობისთვის, რომელიც მათ ჩაიდინეს დემონსტრაციების დროს. ჩემი აზრით, ეს სწორი მიმართულებით გადადგმული ნაბიჯია, დაუსჯელობა არის მიუღებელი. ჩვენ ვგმობთ ძალადობას ყველა მხრიდან. არის სხვა ნაბიჯებიც. მე გულწრფელად იმედი მაქვს, რომ საქართველოს მთავრობა დაუბრუნდება ევროინტეგრაციის გზას. ჩვენ კი ყოველთვის მზად ვართ დასახმარებლად, მხარდასაჭერად, რჩევის მისაცემად. თუმცა ჩვენ გვჭირდება გულწრფელი ვალდებულება და ევროკავშირი არის დაფუძნებული ძალიან მკაფიო წესებზე. ევროკავშირის წევრები ვართ ოჯახი, რომელიც ეფუძნება თავისუფლებას, დემოკრატიას, კანონის უზენაესობას და ადამიანის უფლებებს. ყველა ქვეყანა, რომელიც მიისწრაფვის ევროკავშირში გაწევრიანებისკენ, უნდა ეყრდნობოდეს ერთსა და იმავე ღირებულებებს და პრინციპებს“, – განაცხადა ჰერჩინსკიმ.

ევროკავშირის ისტორია არის საუკეთესო მტკიცებულება, რომ ის არის ყველაზე წარმატებული სამშვიდობო პროექტი ევროპის ისტორიაში, – ამის შესახებ საქართველოში ევროკავშირის ელჩმა, პაველ ჰერჩინსკიმ ევროპის დღესთან დაკავშირებულ ღონისძიებაზე ჟურნალისტებთან საუბრისას განაცხადა.მისივე თქმით, ფაშიზმზე გამარჯვების დღესა და ევროპის დღეს შორის წინააღმდეგობა არ არსებობს.„არანაირი წინააღმდეგობა არ არსებობს გამარჯვების დღესა და ევროპის დღეს შორის. როგორც ყველამ იცის, ევროკავშირი აშენდა მეორე მსოფლიო ომის ფერფლზე. ჩვენ დიდ პატივს ვცემთ ყველას, ვინც საკუთარი სიცოცხლე გაიღო მსხვერპლად ამ გამარჯვებისთვის, სწორედ ამიტომ შეიქმნა ევროკავშირი. ევროკავშირის ისტორია არის საუკეთესო მტკიცებულება, რომ ის არის ყველაზე წარმატებული სამშვიდობო პროექტი ევროპის ისტორიაში. მშვიდობის და განვითარების 80 წლის განმავლობაში ჩვენ გავაფართოვეთ ეს შესაძლებლობა საქართველოზე, რომ ის გაწევრიანდეს ევროკავშირში. მე გულწრფელად მაქვს იმედი, რომ ეს ისტორიული შესაძლებლობა  ხელიდან გაშვებული არ იქნება“, – განაცხადა ჰერჩინსკიმ.

ჯანდაცვის სექტორში დაშვებულ შეცდომებს შორის ერთ-ერთი პრივატიზაციის გაუაზრებელი ტემპია, რომელიც ჯერ კიდევ 1990-იანი წლებიდან დაიწყო. შედეგად, დღეს, სახელმწიფო და ჯანდაცვის პოლიტიკა არანორმალურად დიდი წილით არის დამოკიდებული კერძო სექტორის გავლენაზე, კომერციულ ინტერესზე, – ამის შესახებ  ჯანდაცვის მინისტრმა, მიხეილ სარჯველაძემ განაცხადა.როგორც მიხეილ სარჯველაძემ აღნიშნა, ამ პროცესებმა კომერციული ინტერესი დომინანტად აქცია პაციენტისა და ჯანდაცვის სფეროს საჯარო ინტერესებთან შედარებით.„სახელმწიფო იმისთვის არსებობს, რომ ამის შესაძლებლობა არცერთ შემთხვევაში არ გააჩინოს. ფასი თუ არადამაკმაყოფილებელი გახდა, კლინიკა თავს უფლებას აძლევს –  პაციენტს მომსახურებაზე უარი უთხრას. ე.ი. პაციენტი უფრო მნიშვნელოვანია თუ მოგება? მოგება აუცილებელი არის, მაგრამ – არამთავარი“, – აღნიშნა ჯანდაცვის მინისტრმა.მიხეილ სარჯველაძემ ჯანდაცვის სექტორის პრივატიზაციის მიმართულებით დასავლეთის გამოცდილებაზეც ისაუბრა. მისი განცხადებით, ევროპაში  სახელმწიფოს წილი ჰოსპიტალურ სექტორში, როგორც წესი, 50%-ზე ნაკლები არ არის.„უბრალოდ, ვერსად შეხვდებით ასეთ ფაქტს. მაშინ, როდესაც წლების წინ დაწყებული პრივატიზაციის პროცესი წინა ხელისუფლების დროს გაგრძელდა და სახელმწიფოს წილი ჰოსპიტალურ სექტორში დაიყვანეს 14-15%-ზე. დღეს ჩვენ ორიენტირებული ვართ – მაქსიმალურად ევროპული სტანდარტების ქვეყნად ჩამოყალიბდეს საქართველო. ამაზეა ორიენტირებული ჯანდაცვის პოლიტიკის განხორციელებაც. ევროპა ლოზუნგი კი არა, რეალურად ნაკეთები საქმეებია. იმიტომ კი არ არის იქ სახელმწიფოს წილი ჰოსპიტალურ სექტორში 50%, რომ მას დომინანტობა და აქედან შემოსავლის მიღება სურს, უბრალოდ, ჯანდაცვა სპეციფიკური სივრცეა, სავსე – მორალური თუ სამართლებრივი პასუხისმგებლობებითა და ვალდებულებებით, რომელიც, ხშირ შემთხვევაში, არც შეიძლება, თავსებადი იყოს კომერციულ ინტერესებთან. ამიტომ, როცა ბრუტალურად, ბლანკეტურად, ყველაფერი პირდაპირ გადაეცათ კერძო კლინიკებს, რომ, მათ შორის, ეკეთებინათ ისეთი რამ, რაც სულაც არ იყო კომერციულად საინტერესო, შეიქმნა უზარმაზარი პრობლემები ჯანდაცვის სტრუქტურების გასამართად. შვედეთში, შესაძლოა, საერთოდ,  80%-ს სცდებოდეს სახელმწიფოს წილი ჰოსპიტალურ სექტორში. რატომ?! – რიტორიკული კითხვაა და პასუხი ყველასთვის ნათელია.არ შეიძლება, კერძო სექტორისთვის იყოს ყველაფერი, არ შეიძლება, ფულის შოვნა იყოს მთავარი ამოცანა ჯანდაცვის სექტორში პაციენტის ინტერესის საპირწონედ – სრულიად საპირისპირო უნდა იყოს. ჩვენი მთავარი ამოცანაა, პირველ რიგში, დავიცვათ პაციენტის ინტერესი და, სხვათა შორის, ეს კონსტიტუციაშიც ასეა ჩაწერილი. ამისთვის, რაღაც მომენტში, სიმკაცრეც იქნება აუცილებელი და თუკი მკაცრად ვაკონტროლებ პროცესს – დაცულია თუ არა პაციენტის უფლება ყველა კონკრეტულ შემთხვევაში, არ შეიძლება, ეს ჩაითვალოს სახელმწიფოს მხრიდან ანტიევროპულ გადაწყვეტილებად“, – განაცხადა მიხეილ სარჯველაძემ.