ვვარაუდობთ, მოლოდინი გვაქვს, რომ ოპოზიციაში მეტი განხეთქილების შესატანად აკრძალავენ ორ კოალიციას თუ პარტიას და არ აკრძალავენ ჩვენს კოალიციას, – ამის შესახებ „ლელო – ძლიერი საქართველოს“ წევრმა, ალეკო ელისაშვილმა „ქართული ოცნების“ საკონსტიტუციო სარჩელის კომენტირებისას განაცხადა.
მისივე თქმით, აუცილებლად გამოიყენებენ ყველა მექანიზმს და მაქსიმალურად იბრძოლებენ.
„ჩვენ მაქსიმალურად ვიბრძოლებთ იურიდიულად. რა მექანიზმიც არსებობს, ვიცით, სადაც ვცხოვრობთ, რა უსამართლო გარემოში. სასამართლო კი ჰქვია, მაგრამ სინამდვილეში დავალებათა აღსრულების ბიუროა. ვიბრძოლებთ მაქსიმალურად. თვითონ ვიბრძოლებთ, ჩვენი კოალიცია. ამისთვის საკმარისი ცოდნა, განათლებაც გვაქვს. უბრალოდ ვვარაუდობთ, მოლოდინი გვაქვს, რომ ოპოზიციაში მეტი განხეთქილების შესატანად აკრძალავენ ორ კოალიციას თუ პარტიას და არ აკრძალავენ ჩვენს კოალიციას. ერთ-ერთი ვერსია, რაც ჩვენამდე მოდის, არის ეს, რომ გააღრმაონ დაპირისპირება. დანარჩენი ოპოზიცია, იცოცხლე, ჩვენი ლანძღვით იწყებენ და ამთავრებენ და კიდევ ერთი საბაბი მიეცემათ. რა თქმა უნდა, ჩვენ აუცილებლად გამოვიყენებთ შიდა იურიდიულ მექანიზმებსაც და გარე მექანიზმებსაც. ყველაფერს გამოვიყენებთ, რაც კი არსებობს“, – განაცხადა ალეკო ელისაშვილმა.
ფრაქცია „ქართულმა ოცნებამ“, პოლიტიკურმა ჯგუფებმა – „ხალხის ძალამ“ და „ევროპელმა სოციალისტებმა“ მოამზადეს ერთობლივი კონსტიტუციური სარჩელი, რომლითაც მოთხოვნილია სამი პოლიტიკური პარტიის საქმიანობის არაკონსტიტუციურად ცნობა და მათი აკრძალვა. ეს პარტიებია: მოქალაქეთა პოლიტიკური გაერთიანება „ერთიანობა − ნაციონალური მოძრაობა“; მოქალაქეთა პოლიტიკური გაერთიანება „კოალიცია ცვლილებისთვის, გვარამია, მელია, გირჩი, დროა“; მოქალაქეთა პოლიტიკური გაერთიანება „ძლიერი საქართველო − ლელო, ხალხისთვის, თავისუფლებისთვის“.