სამოქალაქო საზოგადოების განვითარების ცენტრი (CSDC) ,,ქალებისთვის გლობალური ფონდის’’ (Global Fund for women) მხარდაჭერით იწყებს პროექტს მიუსაფარი და მარტოხელა ქალების ხელშესაწყობად. აღნიშნულის შესახებ ცნობა ცენტრის ოფიციალურ გვერდზე გამოქვეყნდა.
პროექტის შესახებ უფრო ვრცელი ინფორმაციის მისაღებად ჩვენ ორგანიზაციის ხელმძღვანელს, ნინო თოდუას დავუკავშირდით. თუ ვის შეუძლია ჩაერთოს პროექტში, რა აქტივობებია დაგეგმილი ორგანიზაციის მიერ და რა შედეგებს მოიტანს პროექტი – ამ და სხვა საკითხებზე ინტერვიუს ფორმატში ვისაუბრეთ:
- ნინო, უპირველეს ყოვლისა, გვიამბეთ თქვენი ორგანიზაციის შესახებ. რამდენი ხანია რაც სამოქალაქო საზოგადოების განვითარების ცენტრი ფუნქციონირებს და რა მიზნებს ემსახურება ის?
სამოქალაქო საზოგადოების განვითარების ცენტრი 2010 წლიდან ფუნქციონირებს. ჩვენი ორგანიზაციის მისიაა მოწყვლადი ქალებისა და ბავშვების პრობლემების ადვოკატირება, მათი ინტეგრირება საზოგადოებაში სამოქალაქო უფლებების დაცვის, ინოვაციური ტექნოლოგიებისა და არაფორმალური საგანმანათლებო პროგრამების უზრუნველყოფით, რათა მათ შეძლონ ღირსეული და დამოუკიდებელი ცხოვრება.
გვიამბეთ თქვენი ახალი პროექტის შესახებ, რომელსაც ქალებისთვის გლობალური ფონდის მხარდაჭერით ახორციელებთ, საიდან გაჩნდა იდეა და რა არის პროექტის მიზანი?
პროექტი „COVID-19 პანდემიის დროს მიუსაფარ და მარტოხელა ქალთა დაცვის ხელშეწყობა“ – ახლა იწყება და 6 თვეს გასტანს. პროექტი თბილისის ფარგლებში განხორციელდება.
ამ პროექტის იდეა გაჩნდა დღეს არსებული ვითარებიდან გამომდინარე. ვირუსის გავრცელების შემდეგ ჩვენ ვიცით, რომ ყველაზე მეტად სწორედ სოციალურად მოწყვლადი ჯგუფები დაზარალდნენ. მათ შორის არიან მიუსაფარი ქალები და მათი ოჯახები, რომელთაც სხვადასხვა მიმართულებით ესაჭიროებათ დახმარება. ჩვენ ძალიან გვინდოდა ამ ქალების ერთ ნაწილს მაინც დავხმარებოდით. ,,გლობალურმა ფონდმა ქალებისთვის’’ პროექტის ფინანსური მხარდაჭერა უზრუნველყო, რაც ერთი მხრივ საშუალებას გვაძლევს, რომ შერჩეულ ქალებს მცირე დახმარება გავუწიოთ, მეორე მხრივ კი – წამოვიწყოთ აქტიური ფანდრაიზინგის კამპანია და მიღებული რესურსებიც მათ სასარგებლოდ გამოვიყენოთ.
პროექტის საბოლოო მიზანია ბენეფიციართა სოციალური ინკლუზია და მხარდაჭერა COVID-19 პანდემიით გამოწვეული სირთულეების დასაძლევად.
როგორია პროექტის გეგმა და რა კონკრეტულ აქტივობებს განახორციელებთ?
როგორც ზემოთ აღვნიშნე, პროექტი 6 თვეს გასტანს და რამდენი ეტაპად განხორციელდება: საწყის ეტაპზე სამოქალაქო განვითარების ცენტრი 100 ქალს შეარჩევს, ჩატარდება მათი საჭიროებების კვლევა, შემუშავდება რეკომენდაციები, ასევე მოხდება თითოეული მონაწილის უზრუნველყოფა პირველადი ჰიგიენური ნივთებითა და არამალფუჭებადი საკვები პროდუქტებით.
პროექტის შემდგომ ეტაპზე, სამოქალაქო საზოგადოების განვითარების ცენტრი დაიწყებს აქტიური ფანდრაიზინგისა და ადვოკატირების კამპანიას. მომზადდება ბენეფიციართა ფოტო და ვიდეო ისტორიები, ბენეფიციართა თანხმობით, საზოგადოებას მიეწოდება ინფორმაცია მათი პრობლემებისა და საჭიროებების შესახებ. კამპანიაში ჩართვა კი ნებისმიერ მსურველს შეეძლება. ცხადია, ფანდრაიზინგის შედეგად მიღებული თანხა სრულად მოხმარდება მიუსაფარ და მარტოხელა ქალთა საჭიროებებს.
პროექტის განხორციელებაში CSDC-ის საორგანიზაციო ჯგუფთან ერთად 20 მოხალისეც ჩაერთვება, რომლებიც სპეციალურად გადამზადდებიან და მიიღებენ შესაბამის თეორიულ ცოდნას ბენეფიციართა აღნიშნულ ჯგუფთან სამუშაოდ. თუმცა, პროექტის ეფექტურად განხორციელებისთვის, აუცილებელი იქნება საზოგადოებისა და სხვადასხვა ჯგუფების ჩართულობა, რათა ერთად შევძლოთ პანდემიით დაზარალებული და მარტოხელა ქალების წინაშე არსებული პრობლემების, თუნდაც მცირე ნაწილის აღმოფხვრა.
ვინ და როგორ შეიძლება გახდეს პროექტის მონაწილე? სად შეიძლება დაინტერესებულმა პირებმა პროექტის მიმდინარეობის შესახებ მიიღონ ინფორმაცია?
პროექტის მონაწილე ქალები სხვადასხვა კრიტერიუმის საფუძველზე შეირჩევიან მკვლევართა ჯგუფის მიერ. ისინი იქნებიან ძირითადად სოციალურად დაუცველი, მრავალშვილიანი და მარტოხელა ქალები, რომელთაც ყველაზე მეტად ესაჭიროებათ დახმარება. პროექტში მონაწილეობის მსურველმა ქალებმა უნდა შეავსონ ელექტრონული განაცხადი ბმულზე:
ჩვენი პროექტის რესურსები საშუალებას გვაძლევს, რომ საერთო ჯამში 100 ასეთი ქალი და მათი ოჯახი ჩავრთოთ კამპანიაში. რაც შეეხება ინფორმაციულ უზრუნველყოფას, თითოეული აქტივობის შესახებ ინფორმაცია ეტაპობრივად გამოქვეყნდება სამოქალაქო საზოგადოების განვითარების ცენტრის გვერდზე სოციალურ ქსელში და ოფიციალურ ვებგვერდზე: csdc.ge.