ტოჩინოშინმა მაკე კოში გაიფორმა

საქართველოს ხელისუფლებამ გარკვეული ნაბიჯები გადადგა, რაც მიანიშნებს, რომ მათ სურთ შეერთებულ შტატებთან ურთიერთობების გაუმჯობესება, – ამის შესახებ აშშ-ის სახელმწიფო მდივანმა, მარკო რუბიომ წარმომადგენელთა პალატის საგარეო ურთიერთობათა კომიტეტის წინაშე გამოსვლის დროს კონგრესმენის, ჯო უილსონის კითხვის საპასუხოდ განაცხადა.როგორც მარკო რუბიომ აღნიშნა, საქართველოს ხელისუფლებას განუმარტეს, რისი გაკეთება იქნება საჭირო ურთიერთობების გასაუმჯობესებლად და საქართველოს ხელისუფლებისგან მიიღეს გარკვეული პოზიტიური პასუხებიც.მისივე თქმით, აშშ იმედოვნებს, რომ ურთიერთობებში წინსვლა შესაძლებელი იქნება. როგორც რუბიომ აღნიშნა, „შესაძლოა, შევცვალოთ არა მხოლოდ ჩვენი ურთიერთობის მიმართულება საქართველოსთან, არამედ მათი ქცევისაც“.რაც შეეხება ჯო უილსონის კითხვას, მან მარკო რუბიოს ჰკითხა: „თქვენ მიაღწიეთ ისტორიულ ერთიანობას ახლო აღმოსავლეთში, სადაც ყველა ქვეყანა, საქართველოს გარდა, მხარს უჭერს ამერიკის ძალისხმევას ირანისა და მისი ბირთვული შესაძლებლობების წინააღმდეგ. ევროპაშიც, ნატო და ევროკავშირი ისე არიან გაერთიანებული, როგორც არასდროს, თავდაცვის ხარჯების გაზრდის ხელშეწყობის მიზნით, პრინციპით – „მშვიდობა ძალის მეშვეობით“, რაც საბოლოოდ უკრაინის გამარჯვებასა და ომის დამნაშავე პუტინის დამარცხებას ემსახურება. ამ კონტექსტში კიდევ ერთი მნიშვნელოვანი რეგიონია სამხრეთ კავკასია, სადაც დიდი შესაძლებლობა გაჩნდა ე.წ. ტრამპის მარშრუტის ფარგლებში, რომელსაც სომხეთის პრემიერ-მინისტრთან, ფაშინიანთან და აზერბაიჯანის პრეზიდენტთან, ალიევთან ერთად მიაღწიეთ. ეს მართლაც დიდი მიღწევაა, თუმცა პროირანული რეჟიმი და ჩინეთის კომუნისტური პარტიის მიერ მხარდაჭერილი „ქართული ოცნების“ მთავრობა, რომელსაც არალეგიტიმურია, საფრთხეს უქმნის ამერიკის წვდომას რეგიონში. საქართველოში არჩევნები გაყალბდა. ამასთანავე, ისინი ხელს უწყობენ „ისლამურ რევოლუციურ გვარდიას“ და გვერდს უვლიან თეირანის წინააღმდეგ დაწესებულ სანქციებს. ამ ვითარების გათვალისწინებით, თქვენი აზრით, რა უნდა გაკეთდეს, რომ შეჩერდეს სწრაფად მზარდი რადიკალიზაცია, რომელსაც საქართველოში „ქართული ოცნების“ მთავრობა უწყობს ხელს?“აშშ-ის სახელმწიფო მდივნის, მარკო რუბიოს პასუხი კითხვაზე ასეთია: „საქართველოსთან დაკავშირებით თქვენ მართალი ხართ. ყველაფერი, რაც ახლა ჩამოთვალეთ, ჩვენთვის უკვე არსებული შეშფოთების საგანია. მას შემდეგ მათ გარკვეული ნაბიჯები გადადგეს, რომლებიც მიანიშნებს, რომ სურთ შეერთებულ შტატებთან ურთიერთობების გაუმჯობესება. ჩვენ მკაფიოდ განვუმარტეთ, რას მოითხოვს ეს და რისი შესრულება იქნება საჭირო. მათგან გარკვეული პოზიტიური პასუხებიც მივიღეთ. ამიტომ, იმედია, საქართველოს შემთხვევაში ჩვენ შევძლებთ, დავინახოთ ტრაექტორიის ცვლილება იმ მიმართულებასთან შედარებით, სადაც ქვეყანა დღეს იმყოფება. რა თქმა უნდა, გვესმის, რომ ყველა ის საკითხი, რომელიც თქვენ ახლა ჩამოთვალეთ, ჩვენთვის უკვე არსებული პრობლემებია. მათ გვკითხეს: „რა არის საჭირო იმისთვის, რომ შეერთებულ შტატებთან უკეთესი ურთიერთობა გვქონდეს?“ ჩვენ მათ ამაზე პასუხი გავეცით და ვიმედოვნებთ, ამ საფუძველზე შევძლებთ წინსვლას და, შესაძლოა, შევცვალოთ არა მხოლოდ ჩვენი ურთიერთობის მიმართულება საქართველოსთან, არამედ მათი ქცევისაც“, – განაცხადა მარკო რუბიომ.

ქვემო სამგორის მაჟორიტარი დეპუტატი ზაქარია წიკლაური, მუნიცაპალური განვითარების ფონდის ხელმძღვანელთან ერთად თბილისის №83 საჯარო სკოლის მშენებლობის მიმდინარეობას ადგილზე გაეცნო.მისი თქმით, მუნიციპალური განვითარების ფონდის ხელმძღვანელისგან მიიღო დაპირება, რომ წლის ბოლომდე სკოლის მშენებლობა დასრულდება და მოსწავლეები სწავლას გააგრძელებენ უკეთეს გარემოში.„№83 საჯარო სკოლის მოსწავლეები უკვე ექვსი წელია შეხიზნულები არიან №82 საჯარო სკოლაში. ასეთი პირობებით სასწავლო პროცესის სრულყოფილად მართვა კი შეუძლებელია. მუნიციპალური განვითარების ფონდის ხელმძღვანელი და ინფრასტრუქტურის მინისტრი შეგვპირდნენ, რომ წლის ბოლომდე მოსწავლეები აუცილებლად გააგრძელებენ სწავლას უკეთეს გარემოში,“ - განაცხადა ზაქარია წიკლაურმა.

შეხვედრაზე ხაზი გაესვა, რომ ერთმნიშვნელოვნად ვართ განწყობილი საიმისოდ, რაც შეიძლება სწრაფად, ეფექტიანად მოინახოს გადაწყვეტილებები, რომელიც რეალურად იქნება სასარგებლო თითოეული პაციენტისთვის, – ამის შესახებ საქართველოს ჯანდაცვის მინისტრმა, მიხეილ სარჯველაძემ მთავრობის ადმინისტრაციაში დიუშენის დაავადების მქონე მშობლებთან შეხვედრის შემდეგ ჟურნალისტებს განუცხადა.მისივე თქმით, უახლოეს მომავალში მშობლებთან საკითხების ირგვლივ მსჯელობა კვლავ გაგრძელდება.„ერთმნიშვნელოვნად სასარგებლო იყო ეს შეხვედრა. პირველივე დღეებიდანვე, რაც პროტესტი დაიწყო და უფრო ადრიდანაც, ეს დამოკიდებულება გვაქვს, რომ ძალიან მნიშვნელოვანია მუშაობა მშობელთა ორგანიზაციებთან, მშობლებთან. ყოველთვის მნიშვნელოვანია იმ ხალხთან საუბარი, ვისაც უნდა ემსახურებოდეს ნებისმიერი ახალი გადაწყვეტილება, რომელიც შეიძლება მზადდებოდეს. რაც შეეხება საკუთრივ გადაწყვეტილებას, ბუნებრივია, მუშაობა დასჭირდება, ამას ალტერნატივა არ აქვს. სწორედ ამას ვსაუბრობთ პირველივე დღიდან. კრიტიკულად მნიშვნელოვანია საკითხები, რომელთა დაკავშირებითაც მოვისმინეთ ხედვა მშობლებისგან, ესეც არის განსაკუთრებული ინტერესის საგანი და გარემოება, რომელსაც აუცილებლად უნდა მიექცეს ყურადღება. ამ საკითხებზე გადაწყვეტილებების მიღება არ არის მარტივი, ვინაიდან საუბარია ოთხი ტიპის მედიკამენტზე, რომელთა ირგვლივ სტატუსიც, მდგომარეობაც, განწყობაც, პოტენციალიც, გადაწყვეტილების მიღებისთვის მზადყოფნაც კი თვისობრივად განსხვავებულ ეტაპზეა. ადრეც აღვნიშნე, რომ დასახელებული მედიკამენტებიდან ორთან დაკავშირებით ნაკლები კითხვები არსებობს და, ვთქვათ, სხვასთან მიმართებით – მეტი. რა თქმა უნდა, ამ ყველაფერს აუცილებლად სჭირდება დეტალური ანალიზი, სწორად განსჯა, რას უნდა მიექცეს ყურადღება და ამის მიხედვით იყოს მიღებული გადაწყვეტილებები. ამ თვალსაზრისით, საკმაოდ ნაყოფიერი, დატვირთული და მნიშვნელოვანი შეხვედრა იყო. საუბარი იყო ისეთ საკითხებზეც, რომლებიც, მაგალითად, პოლიტიკოსების მხრიდან ამის არასწორად გამოყენებას ეხებოდა. ხაზი გაესვა გარემოებას, რომ ერთმნიშვნელოვნად ვართ განწყობილი საიმისოდ, რაც შეიძლება სწრაფად, ეფექტიანად მოინახოს გადაწყვეტილებები, რომლებიც რეალურად იქნება სასარგებლო თითოეული პაციენტისთვის. სავარაუდოდ, უახლოეს მომავალში კიდევ გვექნება შეხვედრა, გაგრძელდება მსჯელობა. რა წამს იქნება მზად გადაწყვეტილება მისაღებად, ყოველგვარი დაყოვნების გარეშე იქნება მიღებული. ამისთვის აუცილებელია, გადაწყვეტილება იყოს მზად მიღებისთვის. მომდევნო შეხვედრების დროს საუბარი იქნება ამაზეც, როგორ უნდა განვაგრძოთ მუშაობა, სად რა ეტაპზე ვართ, როგორ გავაგრძელოთ ერთმანეთთან კომუნიკაცია და სხვადასხვა ფორმატები. ყველაფერი, ყველა გადაწყვეტილება მიღებული იქნება იმის მიხედვით, რა არის ყველაზე სასარგებლო იმ პაციენტებისთვის, ვისაც ეს რეალურად უნდა ემსახურებოდეს“, – განაცხადა სარჯველაძემ.

პარლამენტის თვითმმართველობის კომიტეტის თავმჯდომარის, ირაკლი ქადაგიშვილის განცხადებით, ოპოზიციაში შიდა დესტრუქცია კიდევ უფრო გამძაფრდება.ქადაგიშვილის თქმით, ამის გამოხატულებაა პიროვნული დაპირისპირებაც.„ის ანტიპოლიტიკა და დესტრუქცია, რომელიც ქართულმა ოპოზიციამ საქართველოს წინააღმდეგ აწარმოა, შიდა დესტრუქციაში გადაიზარდა. ამიტომ მოლოდინია, რომ შიდა დესტრუქცია კიდევ უფრო გამწვავდება და გამძაფრდება. პიროვნული დაპირისპირებაც სწორედ ამის გამოხატულებაა. სააკაშვილსა და მელიას თავიანთი ეგო აქვთ და ახლა სწორედ ამ ეგოების ბრძოლას ვხედავთ“, – აღნიშნა ირაკლი ქადაგიშვილმა.

„საქართველოს ტექნიკური უნივერსიტეტი მხოლოდ ტექნოლოგიური და საინჟინრო ცოდნის ცენტრი არ არის. ჩვენი უნივერსიტეტის მისია მოიცავს ეროვნული კულტურის, ისტორიული მეხსიერებისა და ჰუმანიტარული ღირებულებების დაცვასა და განვითარებას. სწორედ ამიტომ განსაკუთრებულ მნიშვნელობას ვანიჭებთ ისეთ ღონისძიებებს, რომლებიც ქართული კულტურისა და ლიტერატურის უმნიშვნელოვანეს ფიგურებს ეძღვნება. კონსტანტინე გამსახურდისა საჯარო ლექციის თემა უკავშირდება ერთ-ერთ ყველაზე გამორჩეულ ქართველ მწერალს - დიდ კონსტანტინე გამსახურდიას, რომლის შემოქმედებამ წარუშლელი კვალი დატოვა ქართული ლიტერატურის განვითარებაზე, ეროვნულ თვითშეგნებასა და თვითმყოფადობაზე. მისი ნაწარმოებები არა მხოლოდ მხატვრული ღირებულებებით გამოირჩევა, არამედ ასახავს ქართველი ერის ისტორიულ გამოცდილებას, სულიერ ძიებებს, თავისუფლების იდეალსა და კულტურულ იდენტობას”, - ამის შესახებ საქართველოს ტექნიკური უნივერსიტეტის რექტორმა, აკადემიკოსმა დავით გურგენიძემ საქართველოს ეროვნული ბიბლიოთეკის გენერალური დირექტორის, ისტორიის მეცნიერებათა დოქტორის, ასოცირებულ პროფესორ კონსტანტინე (კოკო) გამსახურდიას საჯარო ლექციის გახსნის ღონისძიებაზე განაცხადა.ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, საჯარო ლექციას - „კონსტანტინე გამსახურდიას შემოქმედება“ - რომელიც საქართველოში ქრისტიანობის სახელმწიფო რელიგიად გამოცხადების 1700 წლისთავისადმი მიძღვნილი ღონისძიებების ფარგლებში, კულტურულ-საგანმანათლებლო პროგრამა „ქართული თვითმყოფადობის“ ეგიდით გაიმართა, მკვლევრები, სტუდენტები და მოწვეული სტუმრები ესწრებოდნენ.როგორც სტუ-ის რექტორმა აღნიშნა, უნივერსიტეტი განსაკუთრებულ მნიშვნელობას ანიჭებს ისეთ აკადემიურ და კულტურულ ღონისძიებებს, რომლებიც ხელს უწყობს ეროვნული მემკვიდრეობის, ისტორიისა და კულტურის პოპულარიზაციას, ახალგაზრდებში ჰუმანიტარული ცოდნის გაღრმავებასა და სამეცნიერო დისკუსიების განვითარებას. აკადემიკოს დავით გურგენიძის თქმით, საჯარო ლექცია კიდევ ერთი მნიშვნელოვანი ნაბიჯია უნივერსიტეტში აკადემიური დიალოგის, კულტურული მემკვიდრეობის კვლევისა და ახალგაზრდების ინტელექტუალური განვითარების ხელშეწყობის მიმართულებით.„კონსტანტინე გამსახურდიას შემოქმედება დღემდე რჩება კვლევის, განხილვისა და ახალი ინტერპრეტაციების საგნად. მისი ლიტერატურული მემკვიდრეობა გვაძლევს შესაძლებლობას, უფრო ღრმად გავიაზროთ ჩვენი ისტორია, კულტურა და ის ღირებულებები, რომლებზეც საუკუნეების განმავლობაში შენდებოდა ქართული სახელმწიფოებრიობა. მსურს განსაკუთრებული მადლობა გადავუხადო ბატონ კოკო გამსახურდიას საქართველოს ტექნიკურ უნივერსიტეტთან თანამშრომლობისა და ჩვენი სტუდენტებისა და საზოგადოებისათვის თავისი ცოდნისა და გამოცდილების გაზიარებისთვის“, - აღნიშნა დავით გურგენიძემ.სტუ-ის ინფორმაციით, საჯარო ლექციის ფარგლებში მომხსენებელმა ისაუბრა გამოჩენილი კლასიკოსი მწერლის, კონსტანტინე გამსახურდიას ლიტერატურულ მემკვიდრეობაზე, მისი შემოქმედების ძირითად თემატიკაზე, ისტორიულ-კულტურულ კონტექსტსა და იმ ღირებულებებზე, რომლებმაც განსაკუთრებული ადგილი დაიკავა ქართულ ლიტერატურასა და ეროვნულ ცნობიერებაში. შეხვედრა ინტერაქტიულ ფორმატში წარიმართა. სტუდენტებსა და დამსწრე საზოგადოებას შესაძლებლობა ჰქონდათ, დაესვათ კითხვები მომხსენებლისთვის და მიეღოთ ამომწურავი პასუხები მათთვის საინტერესო საკითხებზე.ცნობისათვის, მიმდინარე წელს საქართველო ქრისტიანობის სახელმწიფო რელიგიად გამოცხადების 1700 წლისთავს აღნიშნავს. თარიღთან დაკავშირებით, მეცნიერთა და კულტურის მოღვაწეთა თაოსნობით, საქართველოს საპატრიარქოსა და საქართველოს მეცნიერებათა ეროვნული აკადემიის მხარდაჭერით, შემუშავდა სამწლიანი კულტურულ-საგანმანათლებლო პროგრამა - „ქართული თვითმყოფადობა“, რომელიც 2024 წლის მაისიდან ამოქმედდა. პროგრამის მიზანია, საზოგადოების ჩართულობით, გაანალიზოს ისტორიის ის უმნიშვნელოვანესი ეტაპები, რომელთაც განსაზღვრეს საქართველოს უნიკალური კულტურა და ფასეულობები. ჩატარებული საჯარო ლექციების ვიდეოჩანაწერების ნახვა შესაძლებელია Youtube არხზე, მისამართით: logos ქრისტიანული კვლევის საერთაშორისო ცენტრი.