ირაკლი კობახიძე: გამოსაძიებელია, რატომ ამბობდა მაშინდელი საგარეო საქმეთა მინისტრის მოადგილე, რომ სამონასტრო კომპლექსის დიდი ნაწილი ჩვენს ტერიტორიაზე არ ექცეოდა

ნათელი უნდა მოეფინოს იმას, რატომ კეთდებოდა ძალიან საეჭვო განცხადებები მაშინდელი საგარეო საქმეთა მინისტრის მოადგილის მხრიდან, რომელიც პირდაპირ ამბობდა, რომ სამონასტრო კომპლექსის მნიშვნელოვანი ნაწილი საქართველოს ტერიტორიაზე არ ექცეოდა, – ამის შესახებ „ქართული ოცნების“ აღმასრულებელმა მდივანმა, ირაკლი კობახიძემ განაცხადა.

„ნათელი უნდა მოეფინოს დავით გარეჯის საქმის ყველა გარემოებას, მათ შორის იმასაც, რატომ კეთდებოდა, მაგალითად, ძალიან საეჭვო განცხადებები მაშინდელი საგარეო საქმეთა მინისტრის მოადგილის მხრიდან, რომელიც პირდაპირ ამბობდა, რომ სამონასტრო კომპლექსის მნიშვნელოვანი ნაწილი საქართველოს ტერიტორიაზე არ ექცეოდა. რატომ კეთდებოდა ეს განცხადებები იმ ფონზე, როდესაც საეჭვო ქმედებები ხორციელდებოდა. შესაბამისად, ეს არის გამოძიების საქმე, ისევე, როგორც ის, თუ ვინ უნდა დაიკითხოს. საზღვრის დელიმიტაცია-დემარკაცია მიმდინარეობს 1990-იანი წლებიდან და ამ პერიოდში საგარეო საქმეთა მინისტრის პოსტს უამრავი ადამიანი იკავებდა, ხოლო რაც შეეხება ამ ფაქტთან ​სალომე ზურაბიშვილის კავშირს, ეს ინფორმაცია უნდა გადაამოწმოთ. ლუსტრაცია უკვე სახეზეა – რატომ უნდა აინტერესებდეს პოლიტიკურ ძალას ასეთი ორკესტრირებული შტურმი, რომელიც განხორციელდა გუშინ ხელისუფლების წინააღმდეგ, თუ რამე არ აქვს დასამალი. თუ მათი მხრიდან ეს ლუსტრაცია გაგრძელდება, რა თქმა უნდა, ეს დაეხმარება გამოძიებას“, – განაცხადა კობახიძემ.

7 ოქტომბერს პროკურატურამ საქართველოს ტერიტორიის ნაწილის გადაცემისკენ მიმართული ქმედების ბრალდებით დააკავა საგარეო საქმეთა სამინისტროს მეზობელი ქვეყნების დეპარტამენტის, სასაზღვრო ურთიერთობათა სამსახურის უფროსი ივერი მელაშვილი და შსს სასაზღვრო პოლიციის სახმელეთო საზღვრის დაცვის დეპარტამენტის მთავარი ინსპექტორი ნატალია ილიჩოვა. 8 ოქტომბერს მათ ბრალი ოფიციალურად წარედგინათ.

17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.

Comments

კომენტარები