ირაკლი კობახიძე: გამოსაძიებელია, რატომ ამბობდა მაშინდელი საგარეო საქმეთა მინისტრის მოადგილე, რომ სამონასტრო კომპლექსის დიდი ნაწილი ჩვენს ტერიტორიაზე არ ექცეოდა

ირანის საგარეო საქმეთა მინისტრი ​სეიედ აბას არაღჩი შიო მესამეს სრულიად საქართველოს კათოლიკოს-პატრიარქად აღსაყდრებას ულოცავს.„სახელითა უზენაესისა სრულიად საქართველოს კათოლიკოს-პატრიარქს, მის უწმინდესობა შიო III-ს, მე როგორც ირანის ისლამური რესპუბლიკის საგარეო საქმეთა მინისტრმა, ქართველი ერის უძველესი ისტორიის, სულიერი იდენტობისა და ფასდაუდებელი მემკვიდრეობისადმი ღრმა პატივისცემის გათვალისწინებით, მსურს გამოვხატო ჩემი პოზიტიური დამოკიდებულება და ყურადღება საქართველოს მართლმადიდებლურ ეკლესიაში მიმდინარე მნიშვნელოვან და საპასუხისმგებლო მოვლენებზე.ქართველმა ხალხმა საუკუნეების განმავლობაში ერთმანეთთან მტკიცედ დააკავშირა თავისი რწმენა, რელიგია, ეროვნული კულტურა და ისტორიული იდენტობა, ხოლო მართლმადიდებლურმა ეკლესიამ უმნიშვნელოვანესი როლი შეასრულა საზოგადოების ერთიანობის, ზნეობრივი ურთიერთობების, ტრადიციებისა და ქრისტეანობაზე დაფუძნებული ეროვნული ერთსულოვნების განმტკიცებაში.ასეთი მდგომარეობა ცხადყოფს იმ ერის ღრმა ისტორიულ გამოცდილებას, რომელიც აღმავლობისა თუ ძნელბედობის მიუხედავად, ყოველთვის მყარად იდგა თავის სულიერ და ზნეობრივ პრინციპებზე.იმ ვითარებაში, როდესაც თანამედროვე სამყარო რთული კულტურული და სოციალური გამოწვევების წინაშე დგას, რელიგიური ინსტიტუტების როლი მშვიდობის, სოციალური ერთიანობისა და თანასწორობის შენარჩუნებაში კიდევ უფრო მნიშვნელოვანი ხდება. ამ მხრივ, საქართველოს მართლმადიდებლური ეკლესიის სინოდში კოლექტიურ სიბრძნეზე, წინდახედულობასა და პასუხისმგებლობაზე დაფუძნებული პროცესები უაღრესად საყურადღებოა, რაც წარმოადგენს ქართულ საზოგადოებაში რელიგიური სიბრძნის უძველესი ტრადიციის უწყვეტობას.ირანის ისლამური რესპუბლიკა, მორალური პრინციპებისა და საერთაშორისო სამართლის უგულებელყოფის ფონზე, რაც გამოხატულია დიდი სახელმწიფოების აგრესიულ და ოკუპაციურ მოქმედებებში, ყოველთვის პატივს სცემს სულიერ და ზნეობრივ ღირებულებებს, რელიგიურ რწმენას და რელიგიური ინსტიტუტების ადგილს ერების იდენტობაში.ირანი მიიჩნევს, რომ რელიგიებსა და კულტურებს შორის დიალოგით მომზადდება სათანადო ნიადაგი ურთიერთგაგების, მდგრადი მშვიდობისა და ერებს შორის მშვიდობიანი თანაარსებობისთვის.ვიმედოვნებთ, რომ თქვენი უწმინდესობის სულიერი და რელიგიური პასუხისმგებლობა საქართველოს მართლმადიდებლური ეკლესიის მიმართ მსახურებაში, სიბრძნესთან, ზომიერებასთან და მშვიდობასთან ერთად, კიდევ უფრო მეტ ერთიანობას, იმედს და სულიერ სრულყოფილებას მოუტანს ქართულ საზოგადოებას.ყოვლისშემძლე უფალს შევთხოვთ თქვენი უწმინდესობის წარმატებას, მისი უწმინდესობა ილია II-ის სულის მარადიული დიდებას და საქართველოს ხალხის დღეგრძელობას, ღირსებას, მშვიდობასა და წინსვლას“, – აღნიშნულია მილოცვაში.

საქართველოს ტექნიკური უნივერსიტეტის სამთო-გეოლოგიური და მთის მდგრადი განვითარების ფაკულტეტის წარმომადგენლებმა, კომპანია RMG-ის მხარდაჭერით, ავსტრიის ლეობენის სამთო უნივერსიტეტში (Montanuniversität Leoben), სტრატეგიული ვიზიტის ფარგლებში, მინერალური რესურსების განვითარების საერთაშორისო სამაგისტრო პროგრამის (AMRD - Advanced Mineral Resources Development) შერჩევის კომიტეტის სხდომაში მონაწილეობა მიიღეს.ინფორმაციას საქართველოს ტექნიკური უნივერსიტეტი ავრცელებს.სტუ-ის ცნობით, AMRD საერთაშორისო კომიტეტის სხდომაზე, რომელსაც ავსტრიის ლეობენის უნივერსიტეტის რექტორი, პროფესორი პეტერ მოზერი ხელმძღვანელობდა, საქართველოს ტექნიკური უნივერსიტეტი საერთაშორისო აკადემიური და სამეცნიერო კონსორციუმის წევრის რანგში, მსოფლიოს წამყვან ტექნიკურ უნივერსიტეტებსა და კვლევით ცენტრებთან ერთად იყო წარმოდგენილი.საქართველოს ტექნიკური უნივერსიტეტის მხრიდან კომიტეტის მუშაობაში მონაწილეობდნენ სამთო-გეოლოგიური და მთის მდგრადი განვითარების ფაკულტეტის პროფესორი გიორგი ხეცურიანი და A კატეგორიის პროფესორი თორნიკე ლიპარტია, ხოლო AMRD პროგრამის პრაქტიკული კომპონენტის განხორციელებაში სტუ-თან პარტნიორობით ჩართული იყო კომპანია RMG-ის გენერალური დირექტორის მოადგილე გიორგი ჩხეიძე.საქართველოს ტექნიკურ უნივერსიტეტთან ერთად, AMRD საერთაშორისო კომიტეტის სხდომის მონაწილე საერთაშორისო აკადემიური და სამეცნიერო კონსორციუმის წევრმა ორგანიზაციებმა - Montanuniversität Leoben (ავსტრია), TU Bergakademie Freiberg (გერმანია), Instituto Superior Técnico (პორტუგალია), Universidad Politécnica de Madrid (ესპანეთი), Dnipro University of Technology (უკრაინა), McGill University (კანადა), UFRGS (ბრაზილია), CUMTB (ჩინეთი), IIT (ISM) Dhanbad (ინდოეთი), ASKTU (ყაზახეთი), NSUMT და UGS (უზბეკეთი), University of Mines and Technology (განა) - არაერთ მნიშვნელოვან მიმართულებაზე გაამახვილეს ყურადღება.განხილვის მთავარი თემები იყო თანამედროვე სამთო და გეოლოგიური საინჟინრო განათლების განვითარება, საერთაშორისო აკადემიური თანამშრომლობის გაღრმავება, სტუდენტური და სამეცნიერო მობილობის გაფართოება, ასევე ინდუსტრიასთან ინტეგრირებული პრაქტიკული სწავლების გაძლიერება. შეხვედრებზე განსაკუთრებული აქცენტი გაკეთდა მდგრადი განვითარების პრინციპებზე დაფუძნებული სამთო ტექნოლოგიების დანერგვასა და სამეცნიერო-კვლევითი პროექტების ერთობლივ განხორციელებაზე, რაც პარტნიორ უნივერსიტეტებს შორის გამოცდილების გაზიარებისა და ინოვაციური მიდგომების განვითარების ახალ შესაძლებლობებს ქმნის.პროფესორ გიორგი ხეცურიანის განცხადებით, ლეობენის სამთო უნივერსიტეტში ვიზიტისას, რომელიც ქართულ და ავსტრიულ უნივერსიტეტებს შორის ხელმოწერილი ურთიერთგაგების მემორანდუმის ფარგლებში დაიგეგმა, რამდენიმე სტრატეგიული შეთანხმება იქნა მიღწეული, რაც პრაქტიკულად ადასტურებს საქართველოს ტექნიკურ უნივერსიტეტსა და ლეობენის სამთო უნივერსიტეტს შორის პარტნიორობის რეალურ შედეგებს.„პირველი - AMRD პროგრამაში მოხდება საქართველოს ტექნიკური უნივერსიტეტის სრული ინტეგრაცია და ლეობენის სამთო უნივერსიტეტის ვიცე-რექტორის, პროფესორ თომას პროჰასკას ოფიციალური მიწვევით, საქართველოს ტექნიკური უნივერსიტეტი ამ პროგრამის სრულუფლებიანი პარტნიორი გახდება. მეორე, ასევე მნიშვნელოვანი შეთანხმება ეხება ავსტრიულ უნივერსიტეტთან პარტნიორობით ერთობლივი საბაკალავრო და სამაგისტრო პროგრამების გაფართოება-განვითარებას სამთო-გეოინჟინერიისა და მექანიკის ინჟინერიის მიმართულებით. რაც შეეხება მესამე შეთანხმებას, ის აქტიურ დიპლომატიურ მხარდაჭერას ითვალისწინებს. ამ მიზნით, ვიზიტის ფარგლებში შედგა შეხვედრა საქართველოს ელჩთან ავსტრიაში - ბატონ ალექსანდრე მაისურაძესთან. ვისაუბრეთ პროექტის მნიშვნელობასა და საერთაშორისო სივრცეში ქვეყნის სამეცნიერო პოტენციალის გაძლიერების აუცილებლობაზე. ამასთან დაკავშირებით, ელჩმა საქართველოს ტექნიკურ უნივერსიტეტს დიპლომატიური მხარდაჭერა აღუთქვა.მნიშვნელოვანია, რომ საქართველოს ტექნიკური უნივერსიტეტი საერთაშორისო საგანმანათლებლო სივრცეში, სამთო და გეოინჟინერიის მიმართულებით, უკვე ძლიერ პოზიციებს იკავებს და ევროპულ უნივერსიტეტებთან თუ კვლევით ცენტრებთან პარტნიორობის ფორმატში ერთვება. ახალი სტრატეგიული შეთანხმებები მეტად შეუწყობს ხელს სტუდენტებისა და ახალგაზრდა მკვლევრების საერთაშორისო მობილობას, ერთობლივი სამეცნიერო პროექტების შემუშავებას და თანამედროვე ტექნოლოგიებზე დაფუძნებული საინჟინრო განათლების გაძლიერებას“, - აღნიშნავს გიორგი ხეცურიანი.როგორც სტუ-ის სამთო-გეოლოგიური და მთის მდგრადი განვითარების ფაკულტეტის A კატეგორიის პროფესორი თორნიკე ლიპარტია ამბობს, ავსტრიაში სტრატეგიული ვიზიტის ფარგლებში განსაკუთრებული დატვირთვა ჰქონდა შეხვედრას საქართველოს ტექნიკური უნივერსიტეტის სტუდენტებთან, რომლებიც აკადემიურ მომზადებას ამჟამად ლეობენის სამთო უნივერსიტეტში გადიან. მისი თქმით, სტუდენტებთან შეხვედრაში მონაწილეობა მიიღეს RMG-ის გენერალური დირექტორის მოადგილე გიორგი ჩხეიძემ და სტუ-ის დელეგაციის კიდევ ერთმა წევრმა - გეოლოგიის სამაგისტრო პროგრამის სტუდენტმა ვახტანგ ბლუაშვილმა.„უნდა აღინიშნოს, რომ საქართველოს ტექნიკური უნივერსიტეტის ოთხი ნიჭიერი სტუდენტი ევროპაში მოწინავე ლეობენის სამთო უნივერსიტეტში სწორედ ამ ავსტრიული სპეციალიზირებული უმაღლესი სკოლის სრული დაფინანსებით ეუფლება ცოდნას. ახალგაზრდებისგან მივიღეთ დეტალური ინფორმაცია სასწავლო პროცესების შესახებ და, რაც მთავარია, განვიხილეთ მათი სამომავლო დასაქმების პერსპექტივა სამთო-მომპოვებითი დარგის ლიდერი კომპანიის - RMG-ის მაღალტექნოლოგიურ პროექტებში”, - ამბობს თორნიკე ლიპარტია.საქართველოს ტექნიკური უნივერსიტეტის წარმომადგენლების ინფორმაციით, სტრატეგიული ვიზიტის ფარგლებში გამართულ სამუშაო შეხვედრებზე, რომლებშიც საერთაშორისო აკადემიური და სამეცნიერო კონსორციუმის წევრი უნივერსიტეტებისა და კვლევითი ცენტრების წარმომადგენლები მონაწილეობდნენ, განსაკუთრებული ყურადღება დაეთმო ქართული სამთო სკოლის მჭიდრო კავშირს ევროპულ საგანმანათლებლო ტრადიციებთან, ხაზგასმით აღინიშნა პარტნიორობა გერმანიის ფრაიბერგის ტექნიკურ უნივერსიტეტსა და ავსტრიის ლეობენის სამთო უნივერსიტეტთან. ისტორიულ ჭრილში საუბარი შეეხო ისეთ ცნობილ ქართველ მეცნიერებს, როგორიცაა: ქართული სამთო სკოლის ფუძემდებელი გრიგოლ წულუკიძე, რომელიც ლეობენის სამთო უნივერსიტეტის კურსდამთავრებული იყო; ალექსანდრე თვალჭრელიძე, რომელიც პროფესიულ პრაქტიკას გეტინგენის უნივერსიტეტში გადიოდა; შეაფასეს კონსტანტინე აბაშიძის, გიორგი ნიკოლაძისა და ირაკლი წერეთლის მოღვაწეობა, რომელთა ევროპულმა გამოცდილებამ გარდამტეხი როლი ითამაშა ქართული საინჟინრო დარგების განვითარებაში.სტუ-ის ინფორმაციით, ვიზიტის დასასრულს, საქართველოს ტექნიკური უნივერსიტეტის დელეგაციის წევრებმა, უნივერსიტეტისა და მისი რექტორის, აკადემიკოს დავით გურგენიძის სახელით, საერთაშორისო კონსორციუმის წევრი ორგანიზაციების წარმომადგენლები საქართველოში, კერძოდ კი თბილისში, 2026 წლის შემოდგომაზე დაგეგმილ სამთო-გეოლოგიის დარგის საერთაშორისო საგანმანათლებლო-სამეცნიერო და ინდუსტრიულ ფორუმზე მიიწვიეს. აღნიშნული ფორუმი საქართველოს ტექნიკური უნივერსიტეტის ინიციატივით საუნივერსიტეტო სივრცეში გაიმართება.

კრემლის პრესსპიკერმა, დიმიტრი პესკოვმა განაცხადა, რომ ცეცხლის შეწყვეტა და სამშვიდობო მოლაპარაკებები შესაძლებელი იქნება მხოლოდ მას შემდეგ, რაც უკრაინის შეიარაღებული ძალები დონბასს დატოვებენ.„იმისთვის, რომ ცეცხლის შეწყვეტა დაიწყოს და სრულმასშტაბიანი სამშვიდობო მოლაპარაკებებისკენ გზა გაიხსნას, როგორც ამის შესახებ პრეზიდენტმა ჯერ კიდევ შარშანწინ, ივნისში რუსეთის საგარეო საქმეთა სამინისტროს ხელმძღვანელობასთან შეხვედრაზე განაცხადა, ზელენსკიმ უნდა მისცეს ბრძანება უკრაინის შეიარაღებულ ძალებს, შეწყვიტონ ცეცხლი და დატოვონ დონბასის ტერიტორია, ასევე რუსეთის რეგიონების ტერიტორია“, – განუცხადა ჟურნალისტებს კრემლის ოფიციალურმა წარმომადგენელმა, დიმიტრი პესკოვმა.მისი თქმით, უკრაინული ჯარების გასვლის შემდეგ „დაიწყება ცეცხლის შეწყვეტა და მხარეებს შეეძლებათ, მშვიდად გადავიდნენ მოლაპარაკებებზე“.პესკოვის განცხადებით, მოლაპარაკებები „ძალიან რთული იქნება და ბევრ მნიშვნელოვან დეტალს მოიცავს“.კითხვაზე, უნდა დატოვონ თუ არა უკრაინის შეიარაღებულმა ძალებმა ზაპოროჟიესა და ხერსონის ოლქებიც, პესკოვმა ჟურნალისტებს ურჩია, „კიდევ ერთხელ გადაიკითხონ პრეზიდენტ პუტინის განცხადება საგარეო საქმეთა სამინისტროში“.2024 წლის ივნისში ვლადიმერ პუტინმა ცეცხლის შეწყვეტის პირობებად დაასახელა უკრაინული ჯარების გაყვანა დონეცკის, ლუგანსკის, ზაპოროჟიესა და ხერსონის ოლქებიდან, ასევე უკრაინის მიერ ნატო-ში გაწევრიანებაზე უარის თქმა.უკრაინის პრეზიდენტმა, ვოლოდიმირ ზელენსკიმ ეს წინადადება ულტიმატუმად შეაფასა, რომლის „ნდობაც არ შეიძლება“.

რუსეთის სახელმწიფო დუმამ ოკუპირებულ სამხრეთ ოსეთთან თანამშრომლობის გაღრმავების შესახებ შეთანხმების რატიფიცირება მოახდინა.მანამდე დოკუმენტი რუსეთის პრეზიდენტმა, ვლადიმერ პუტინმა დასამტკიცებლად პარლამენტის ქვედა პალატას წარუდგინა.შეთანხმების თანახმად, რუსეთი და ოკუპირებული სამხრეთ ოსეთი გააგრძელებენ ერთიანი ეკონომიკური სივრცის შექმნას და თანდათანობით გადავლენ საგარეო სესხებისა და უცხოური ინვესტიციების ერთიან მიდგომაზე. ასევე, იგეგმება ენერგეტიკისა და სატრანსპორტო სისტემების ინტეგრაცია, საერთო კომუნიკაციებისა და ტელეკომუნიკაციების განვითარება და თანამშრომლობის გაფართოება სოციალურ, შრომისა და კულტურის სფეროებში.დოკუმენტი ასევე მიზნად ისახავს კოორდინირებული საგარეო პოლიტიკის განხორციელებას და თავდაცვისა და უსაფრთხოების საკითხებზე მუშაობას, სოციალურ-ეკონომიკური პირობების გაუმჯობესებას, ინფრასტრუქტურის განვითარებას და კაპიტალის, საქონლის, მომსახურებისა და შრომის თავისუფალი გადაადგილების პირობების შექმნას.

გაერთიანებულ სამეფოს სულ უფრო სახიფათო და არასტაბილური სამყარო საფრთხეს უქმნის, რომლის უახლესი მაგალითიც ახლო აღმოსავლეთში არსებული კონფლიქტია, – ამის შესახებ გაერთიანებული სამეფოს მეფე ჩარლზმა ლორდთა პალატაში სიტყვით გამოსვლისას განაცხადა.ბრიტანეთის მონარქის თქმით, გამოიცდება ქვეყნის ენერგეტიკული, თავდაცვისა და ეკონომიკური უსაფრთხოების ყველა ელემენტი.„ჩემი მთავრობა ამ სამყაროს ძლიერად უპასუხებს და მიზნად ისახავს ისეთი ქვეყნის შექმნას, რომელიც ყველასთვის სამართლიანი იქნება. ჩემი მინისტრები მიიღებენ გადაწყვეტილებებს, რომლებიც დიდი ხნის განმავლობაში დაიცავს გაერთიანებული სამეფოს ენერგეტიკულ, თავდაცვით და ეკონომიკურ უსაფრთხოებას. ისინი დაიცავენ ბრიტანულ ღირებულებებს, როგორებიცაა წესიერება, ტოლერანტობა და განსხვავებულობის პატივისცემა ჩვენი საერთო დროშის ქვეშ და გამოიყენებენ იმ სიამაყის პოტენციალს, რომელსაც მთელი ქვეყანა განიცდის თავისი თემების მიმართ“, – აღნიშნა მეფე ჩარლზმა.გაერთიანებული სამეფოს მონარქმა წარადგინა მთავრობის დღის წესრიგის ფართო ელემენტები, დაწყებული ანტისემიტიზმის წინააღმდეგ საბრძოლველად სასწრაფო ზომების მიღებით და ყველა თემის უსაფრთხოების უზრუნველყოფით.ჩარლზის თქმით, მთავრობა მიიჩნევს, რომ დიდი ბრიტანეთის ეკონომიკური უსაფრთხოება დამოკიდებულია ცხოვრების დონის ამაღლებაზე მთელი ქვეყნის მასშტაბით.„ჩემი მინისტრები მხარს დაუჭერენ სტაბილურობის შენარჩუნებისა და ცხოვრების ხარჯების კონტროლის ღონისძიებებს. ისინი გამოიყენებენ სახელმწიფო ინვესტიციებს ბაზრების ფორმირებისა და შემდგომი კერძო ინვესტიციების მოსაზიდად. ისინი გამოიყენებენ სახელმწიფოს ძალას ბიზნესთან პარტნიორობით და უზრუნველყოფენ რეფორმებს, რომლებიც ხელს შეუწყობს უფრო მაღალ ზრდას და სამართლიან შეთანხმებას მშრომელი ადამიანებისთვის“, – აღნიშნა ბრიტანეთის მეფემ.ჩარლზის განცხადებით, ქვეყნის ეკონომიკური უსაფრთხოებისთვის მნიშვნელოვანია სავაჭრო ურთიერთობების გაუმჯობესება და მთავრობა წარადგენს კანონპროექტებს „ევროკავშირთან კავშირების გასაძლიერებლად“, „მცირე ბიზნესისთვის დაგვიანებული გადახდების პრობლემის მოსაგვარებლად“ და „არასაჭირო რეგულაციების ტვირთის შესამცირებლად“.ბრიტანეთის მონარქმა საჯარო სერვისების განახლებაზეც ისაუბრა და თქვა, რომ წარდგენილი იქნება კანონმდებლობა პოლიციის, ჯანდაცვის ეროვნული სამსახურის, სისხლის სამართლის სისტემის და იმიგრაციისა და თავშესაფრის სისტემის რეფორმირების შესახებ.მთავრობის დღის წესრიგში ასევე შედის კანონპროექტები „წყლის ინდუსტრიის მოწესრიგების და „დიდი ბრიტანეთის რკინიგზის შექმნის“ შესახებ.„ჩემი მინისტრები თვლიან, რომ ყველა ბავშვი იმსახურებს შანსს, მიაღწიოს წარმატებას თავისი შესაძლებლობების ფარგლებში და არ იყოს ჩამორჩენილი სიღარიბის, სპეციალური საგანმანათლებლო საჭიროებების ან პროფესიული განათლებისადმი პატივისცემის ნაკლებობის გამო“, – აღნიშნა ჩარლზმა.საგარეო პოლიტიკასთან დაკავშირებით, ბრიტანეთის მეფემ განაცხადა, რომ მთავრობა „გააგრძელებს ურყევი მხარდაჭერის გაწევას უკრაინის მამაცი ხალხის მიმართ, რომლებიც თავისუფლებისთვის ფრონტზე იბრძვიან“. ქვეყნის მთავრობა ასევე „ეცდება, გააუმჯობესოს ურთიერთობები ევროპელ პარტნიორებთან, როგორც სასიცოცხლოდ მნიშვნელოვანი ნაბიჯი ევროპული უსაფრთხოების განმტკიცების საქმეში“ და „გააგრძელებს ახლო აღმოსავლეთში გრძელვადიანი მშვიდობისთვის და ისრაელსა და პალესტინაში ორი სახელმწიფოს გადაწყვეტისთვის ხელშეწყობას“.ბრიტანეთის მონარქი კიდევ ერთხელ ადასტურებს მთავრობის „ურყევ ერთგულებას ნატო-ს და ნატო-ს მოკავშირეების მიმართ“ და აცხადებს, რომ „თავდაცვის ხარჯების მდგრადი ზრდა“ იქნება. ბრიტანეთის მეფე ადასტურებს, რომ წარდგენილი იქნება კანონპროექტი, რომელიც „უცხო სახელმწიფო სუბიექტებისა და მათი მოკავშირეების მხრიდან მზარდი საფრთხის დაძლევას“ უზრუნველყოფს.ბრიტანული მედიის თანახმად, სავარაუდოდ, ეს, ძირითადად, „ირანის ისლამური რევოლუციის გუშაგთა კორპუსს“ ეხება. შემდეგი საკითხი ენერგეტიკული უსაფრთხოებაა.ბრიტანეთის მეფის თქმით, მინისტრები თვლიან, რომ ეს ეროვნულ უსაფრთხოებასთან არის დაკავშირებული და „გრძელვადიან ინვესტიციებსა და რეფორმებს“ მოითხოვს. მისი განცხადებით, მწვანე ენერგიის წარმოების გაზრდა ხელს შეუწყობს იმის უზრუნველყოფას, რომ „მტრებმა“ ვერ „შეუტიონ“ დიდი ბრიტანეთის ეკონომიკურ უსაფრთხოებას.