ეკატერინე ტიკარაძის თქმით, მოსალოდნელი მეორე ტალღისთვის 4 000-მდე საწოლია მობილიზებული
Read Time:1 Minute, 0 Second
ამ ეტაპზე ისევ მნიშვნელოვანი რჩება, რომ ინფექცია მაქსიმალურად შევაკავოთ, მაგრამ მიუხედავად ამისა მობილიზებულია 4 000-მდე საწოლი. ეს ნიშნავს იმას, რომ ერთდროულად შეგვიძლია ვმართოთ 4 000-მდე მოქალაქის საჭიროება, – ამის შესახებ ჟურნალისტებთან საუბრისას ჯანდაცვის მინისტრმა, ეკატერინე ტიკარაძემ განაცხადა.
„ამ ეტაპზე ისევ მნიშვნელოვანი რჩება, რომ ინფექცია მაქსიმალურად შევაკავოთ, მაგრამ მიუხედავად ამისა, მობილიზებულია 4 000-მდე საწოლი. ეს ნიშნავს იმას, რომ ერთდროულად შეგვიძლია ვმართოთ 4 000-მდე მოქალაქის საჭიროება. მნიშვნელოვანი იყო სისტემის სრული აუდიტის ჩატარება. ეს პროცესი შემოდგომაზე დავიწყეთ და ეპიდემიის დაწყების პერიოდისთვის არ დაგვისრულებია. დეტალურად უნდა შეგვესწავლა რეგიონებში ყველა საავადმყოფოს ინფრასტრუქტურული მოწყობა, ადგილზე სამედიცინო პერსონალის არსებობა და აპარატული მხარდაჭერა. დღეისათვის ჩვენ ამის სრული სურათი გვაქვს. საჭიროების შემთხვევაში, შეგვიძლია რეგიონის ნებისმიერი საავადმყოფო კოვიდ-ცენტრად ვაქციოთ“, – განაცხადა მინისტრმა.
საერთო ჯამში ქვეყანაში კორონავირუსი 893 ადამიანს დაუდასტურდა, აქედან 739 უკვე გამოჯანმრთელდა, 14 ადამიანი კი გარდაიცვალა. ვირუსით ინფიცირების პირველი შემთხვევა ქვეყანაში 2020 წლის 26 თებერვალს დადასტურდა. 21 მარტს საქართველოში საგანგებო მდგომარეობა ამოქმედდა, 31 მარტიდან კი – საყოველთაო კარანტინის რეჟიმი.
ჯანდაცვის მსოფლიო ორგანიზაციამ კორონავირუსთან დაკავშირებით პანდემია 2020 წლის 11 მარტს გამოაცხადა. მანამდე კი, 30 იანვარს ჯანმომ კორონავირუსი გლობალურ საფრთხედ გამოაცხადა. ჩინეთში პნევმონიის აფეთქება 2019 წლის დეკემბერში დაიწყო. ის გამოწვეულია კორონავირუსის აქამდე უცნობი შტამით.
21 იანვარს ჩინეთმა დაადასტურა, რომ კორონავირუსი გადამდებია. მომხდარის გამო ქვეყნის ორ ქალაქში კარანტინი გამოცხადდა.
Happy
0 %
Sad
0 %
Excited
0 %
Sleepy
0 %
Angry
0 %
Surprise
0 %
Comments
0
0
