„ალბათ, ყურადღებას მიაქცევდით პრეზიდენტ ზელენსკის განცხადებას, რომ მისთვისაც მოულოდნელი იყო – მგონი, მანაც მედიით შეიტყო მიხეილ სააკაშვილის მიერ უკრაინის დატოვების შესახებ. არ არის გამორიცხული, რომ მას უკრაინის კანონმდებლობაც ჰქონდეს დარღვეული და უკრაინის საზღვარი უკანონოდ ჰქონდეს გადაკვეთილი. ეს ჩემი პირადი ვარაუდია“, – ამის შესახებ საგარეო საქმეთა მინისტრმა მთავრობის ადმინისტრაციაში გამართულ ბრიფინგზე განაცხადა.
დავით ზალკალიანის თქმით, უკრაინის ხელისუფლების უფლება და მოვალეობაა, იზრუნოს საკუთარი ქვეყნის მოქალაქეზე, მაგრამ ეს განსხვავებულ შემთხვევაა, რადგან უკრაინის მოქალაქეობამდე, მიხეილ სააკაშვილი საქართველოს მოქალაქე და პრეზიდენტი იყო. მისივე თქმით, ექსპრეზიდენტს მსჯავრი და ბრალი საქართველოს კანონმდებლობის შესაბამისად აქვს წარდგენილი.
„დარწმუნებული ვარ, რომ ეს ყველაფერი სამართლებრივ ჭრილში გადაიჭრება, როგორც ჩვენს კანონმდებლობას შეესაბამება. მისი, როგორც მსჯავრდებულის, უფლებები დაცული იქნება“, – აღნიშნა საგარეო უწყების ხელმძღვანელმა.